Ikalakalu ya Jipoxolo 10:1-48
10 Mu Sezaleya mwexile diyala amwixana Kolonelyu, wexile kabhitangu* ka kibuka kya masoladi akwa Itálya.*
2 Mwene ni mwiji wê woso exile mu bheza Nzambi. Mwene wexile we mu kwatekesa kyavulu o jingadyama mwaxaxi ka mundu ni kudyondela Nzambi mu misambu ithangana yoso.
3 Mu ola ya kavwa,* mu kisumwa mwene wamono anju ya Nzambi ya mu zukama, i ya mwixana: “Kolonelyu!”
4 Ni wôma, Kolonelyu wa mutale swí yu wa mwibhwidisa: “Kiki kima kyahi, Ngana?” Mwene wa mwambela: “O misambu yé ni kikwatekesu ki wene mubhana ku jingadyama, kyabhixila kwa Nzambi kala dilembalelu.
5 Mu kyenyiki, tumikisa mayala ku Jope phala kutakana-ku diyala dijina dyê Ximá, amwixana we Phetele.
6 O diyala didi a muzalela* mu inzo ya Ximá, o mukwa kukalakala ni ibha, watungu bhu mbandu ya musanza wa kalunga.”
7 Kyoso kyatundu o anju ya zwela-nê, Kolonelyu wexana jiselevende jê jiyadi ni disoladi wexile mubhezi wa Nzambi
8 wa atangela yoso, yu wa atumikisa ku Jope.
9 Mu kizuwa kya kayela, kyoso kyexile mu kwenda o njila, ene azukama mu mbanza. Mu ola ya kasamanu,* Phetele wabande mu inzo ya thandu phala kusamba.
10 Kyenyiki, mwene ukala ni nzala yavulu anga umesena kudya. Kyoso o athu kyexile mulamba o kudya, mwene wamono kisumwa.
11 Mu kisumwa mwene wamono o dyulu dya jikuka, anga umona kima kya mu tuluka ku dyulu kyadifu ni dilasola dya dikota dya linyu dyokute mu jimbandu jiwana,
12 mwenyomo mwa kexile yama yoso ya ixi yenda ni inama iwana, ni yoyó i dihuha ni mala bhoxi ni jinjila jibhita bhulu.
13 Phetele anga wívwa dízwi dyambe: “Balumuka Phetele, ujibhe ni udye!”
14 Maji Phetele wa mu tambwijila: “Kana Ngana, mukonda kiluwa ngi dya kima kyayibha mba kyaxidi.”
15 Mwene anga wívwa dingi o dízwi lwa kayadi, dyexi: “Yazelesa Nzambi, kana ku izwela kwila yaxidi.”
16 Kima kiki kyabhiti we mu lutatu, mu kithangana kyenyókyo o dilasola adisungu ku dyulu.
17 Phetele wa diwanene, wa dibhwidisa se ihi ya lombolola o kisumwa kyamonene. Mu kithangana kyenyókyo, o mayala atumikisa Kolonelyu ebhwidisa kwebhi kwa tungile Ximá. Ene emanene bhu mwelu wa inzo.
18 Ene exana muthu mukwa inzo, a mu ibhwidisa se Ximá dya Phetele a mu zalela kwenyóko.
19 Kyoso Phetele kyexile hanji mu xinganeka yalungu ni kisumwa, o nzumbi ikôla ya mu tangela: “Talesa! Kweza kitatu kya mala a mu kusota.
20 Balumuka, tuluka, uye nawu kumoxi. Kana kukala ni hele mukonda éme nga atumu.”
21 Kyenyiki Phetele wakulumuka phala kudisanga ni mayala, yu wa atangela: “Éme mwene mwa mu ngisota. Mukonda dyahi mweza bhabha?”
22 A mu tambwijila, exi: “Kolonelyu o kabhitangu ka masoladi, diyala dya yuka mubhezi wa Nzambi, yó ene mu mu tumbula kyambote ku kifuxi kyoso kya Jijudé, a mubhana itendelesu ya Nzambi ku anju, phala ku kwixana mu inzo yê, phala kwívwa o ima i wanda zwela.”
23 Phetele wa abokwesa m’onzo, yu wa azalela.
Mu kizuwa kya kayela, mwene wa balumuka wayi nawu kumoxi, wambata we jiphange akwa Jope.
24 Mu kizuwa kya kayadi, mwene wabhixila mu mbanza ya Sezaleya. Kolonelyu wexile kyá mwa kingila, mwene wa bhongolwele we o jindandu ni makamba mê akazola.
25 Kyoso Phetele kya bokona, Kolonelyu wayi ku mu sangesa, wa mu fukamena yu wa muximana.
26 Maji Phetele wa mu balumuna, yu wa mwambela, wixi: “Imana! Eme wami ngi muthu kala eye.”
27 Phetele kyakexile mu zwela-nê, wabokona m’onzo, wasange athu avulu a bhongoloka.
28 Mwene wa atangela: “Enu mwejiya kyambote kwila, kikôla o Judé kukala kumoxi mba kudibunda ni muthu mukwa ixi yengi. Maji Nzambi wa ngi londekesa kuma, ki nga tokala kwixana muthu woso-woso kwila, wayibha mba waxidi.
29 Mukonda dya kiki, kyoso ki mwa ng’ixana, ngeza sé hele. Kindala ngi m’ibhula, mukonda dyahi mwa ng’ixana?”
30 Kolonelyu watambwijila: “Izuwa iwana kudima, eme ngakexile mu samba m’onzo yami, mu ola yenyiyi, ya kavwa,* kwa ngi tukulukila diyala ni izwatu ya mu bhenya,
31 mwene wambe: ‘Kolonelyu, o musambu wé a wivu. Nzambi walembalala o kikwatekesu kiwene mubhana ku jingadyama.
32 Kyenyiki, tumikisa muthu ku Jope phala kutakana-ku Ximá, amwixana we Phetele. O diyala didi a mu zalela mu inzo ya Ximá, o mukwa kukalakala ni ibha, watungu bhu mbandu ya musanza wa kalunga.’
33 Nga lenguluka ku kwixana, éye wabhange kyambote weza. Kindala etu enyoso twala kyá bhabha bhu pholo ya Nzambi, phala kwívwa o maka oso a kutumina Jihova kututudila.”
34 Phetele anga umateka o kuzwela, wixi: “Kindala ngimona kwila Nzambi ki mukwa katombo,*
35 maji mu jixi joso mwene uxikina woso u mukala ni wôma, anga ubhanga o ima yayuka.
36 Mwene watumikisa o maka mê ku an’a Izalayele, mu kwa tudila o njimbu yambote ya paze bhukaxi ka Jezú Kidistu, o Ngana ya athu oso.
37 Enu mwejiya o maka exile muzwela o athu mu Judeya yoso, tundé ku Ngalileya, kyoso Nzwá kyazubhile kuboka yalungu ni batizu.
38 O athu akexile muzwela yalungu ni Jezú mukwa Nazalé, ni kyebhi Nzambi kya mu undu ni nzumbi ikôla ni kutena. Mwene wende mu jimbandu joso mu kubhanga o mbote ni kusaka yó akexile mwatalesa hadi kwa Dyabhu, mukonda Nzambi wakexile-nê.
39 Etu twala tu jimbangi ja ima yoso yabhange mwene mu ixi ya Jijudé ni mu Jeluzaleme. Maji ene a mu jibha mu ku mu phaphela ku muxi.*
40 Nzambi wa mu fukununa mu kizuwa kya katatu, mwene kamwehela kutukulukila
41 o athu oso, maji yó ngó a asolele kyá kwa Nzambi, ni etu twa dile, twa nwine-n’ê kumoxi kyoso kya mu fukununa mwaxaxi ka madifundu.
42 Mwene wa tu tumu we kubokela o athu ni kubhana umbangi kwila, mwéne a musolo kwa Nzambi, phala kufundisa o athu ala ku mwenyu ni yó afu.
43 O jipolofeta joso ja bhana umbangi walungu ni mwene kwila, woso u mu xikana, a mu loloka o ituxi bhukaxi ka dijina dyê.”
44 Kyoso Phetele kyakexile hanji muzwela o ima yiyi, o nzumbi ikôla yatulukila kuthandu dya athu oso akexile mu kwívwa o maka.
45 O maxibulu a asayele ejile kumoxi ni Phetele adiwana, mukonda o ujitu wa nzumbi ikôla akexile mu ubhana we ku athu akwa jixi jengi.
46 Mukonda ene a evu kuzwela mu madimi engi, ni kuximana Nzambi. Kyenyiki, Phetele wambe:
47 “O athu yá atambula we o nzumbi ikôla kala etu, nanyi-phe utena kwa fidisa kwa batizala mu menya?”
48 Kyenyiki, mwene watumu kwa batizala mu dijina dya Jezú Kidistu. Kyabhiti o ima yiyi, ene abhingi kwa Phetele phala kukala na-wu tu izuwa.
Footnotes
^ Kabhitangu kexile mu tumina hama ya masoladi.
^ Kibuka kya masoladi akwa Loma kyexile ni hama jisamanu ja masoladi.
^ Kiki kilombolola mu ola ya 15.
^ Mba, “a mu tambulula.”
^ Kiki kilombolola ku mediya.
^ Kiki kilombolola 15 kya ola.
^ Mba, “katungu.”
^ Mba, “ku taka.”
