Ikalakalu ya Jipoxolo 15:1-41
15 Sayi mayala atundu ku Judeya, a kulumuka ku Andiyokiya amateka kulonga o jiphange, exi: “Se akamba ku mi saya kala kyósoneke mu Kijila kya Mozé, enu ki mwanda bhuluka.”
2 Kyoso Phawulu ni Balanabé kyazubha kukwata jiphata ni kuzoka ni ene, o jiphange atumikisa Phawulu ni Balanabé ni akwâ ku jipoxolo ni tufunga mu Jeluzaleme, phala kubatula o maka enyá.
3 Kyenyiki, o jiphange mu kilunga a axinjikila, ene asuluka ni njila yâ. Abhiti ku Fenixa ni mu Samadiya, mu kujimbulula kyambote ku jiphange, kyebhi o akwa jixi jengi kyaxikina o milongi ya Ngana. Kiki kya asangulukisa kyavulu.
4 Kyabhixila mu Jeluzaleme, o jiphange mu kilunga ni jipoxolo ni tufunga, a atambulula kyambote. Ene a atangela o ima yoso ya bhangele Nzambi bhukaxi ka ene.
5 Maji sayi athu atokalele ku kibuka kya Jifalizewu, axikinine Ngana, emana, ya ambe: “O athu ki Jijudé atokala kwa saya, ni kwa tendelesa kukumbidila o Kijila kya Mozé.”
6 Bhenyobho, o jipoxolo ni tufunga adyongeka phala kubatula o maka enyá.
7 Kyoso kyazubha kuzoka kyavulu, Phetele wemana yu wambe, wixi: “Enu akwetu jiphange, mwejiya kwila tundé kudimatekenu, Nzambi wa ngi solo mwaxaxi k’enu, phala o akwa jixi jengi evwe mu kanu dyami o njimbu yambote, n’a xikane.
8 O Nzambi wejiya o mixima ya athu walondekesa kwila, wa axikina mu kwabhana o nzumbi ikôla, kala kya tubhanene.
9 Mwene ka tutungula mwaxaxi kâ, maji mukonda dya kixikanu kyâ wa azelesa o mixima.
10 Kyenyiki-phe, mukonda dyahi mwa mu lola Nzambi, mu ku twika imbamba ya neme* ku maxibulu, o jikuku jetu n’etu, ki twatenene ku yambata?
11 Maji twaxikana kwila, etu ni ene twa bhuluka mu ngalasa ya tulondekesa Ngana Jezú.”
12 Kyenyiki, o mundu woso udixibha, anga wamateka kwívwa Balanabé ni Phawulu kutanga o isumwa yavulu ni madiwanu abhange Nzambi bhukaxi kâ, ku akwa jixi jengi.
13 Kyoso ene kyazubha kuzwela, Tiyaku wambe, wixi: “Enu akwetu, jiphange, ng’ivwidilyenu.
14 Ximinyá wa tutangela kyambote kyebhi Nzambi kya lembalala o athu akwa jixi jengi, yu wasolo mwaxaxi kâ athu phala kwambata o dijina dyê.
15 Kyene we kyazwela o Jipolofeta, kala kyosoneke:
16 ‘Kyoso kyanda bhita o ima yiyi, nganda vutuka ni kutunga dingi o balaka* ya Davidi ya budika, nganda tunga dingi o iphulungunzu ni ku isokejeka,
17 phala athu amukwá ni akwa jixi jengi asote Jihova ni mwanyu woso, athu a exana mu dijina dyami, kyene kyambe Jihova, yó wa mu kumbidila o ima yiyi,
18 yo kanene tundé xahulu.’
19 Mu kiki, ki nga mesena kwila o athu enyá akwa jixi jengi a mu xikana Nzambi, a atatesa,
20 maji twa sonekena mukanda phala alenge o ima yó satele o iteka. Alenge o undumbu,* ka dye xitu ya yama ka ikatula manyinga,* né mwene kúdya manyinga.
21 Mukonda tundé ukulu, kwene athu mu jimbanza joso ene mu longa o Kijila kya Mozé, kuma a kitanga ni dízwi dya swina mu malombe,* mu jisábhalu joso.”
22 Kyenyiki, o jipoxolo ni tufunga kumoxi ni kilunga kyoso, asolo mayala phala kwa tumikisa ku Andiyokiya kumoxi ni Phawulu ni Balanabé. A tumikisa-ku Juda amwixana we Balasaba ni Sila, o mayala akexile ku pholo mwaxaxi ka jiphange.
23 Asoneka o mukanda, ya a utumikisa bhu maku mâ, exi:
“O jiphange jenu, o jipoxolo ni tufunga, atumikisa umenekenu ku jiphange akwa jixi jengi, ala mu Andiyokiya, mu Sídya ni mu Silisya.
24 Twevu kwila, sayi athu atundu mwaxaxi k’etu a mi tatesa ni ima yazwela, amesenene kuzozesa o kixikanu kyenu, sumbala ki twa atendelesa kubhanga kima kyoso-kyoso.
25 Kyenyiki, etu enyoso ni muxima umoxi, twasolo mayala phala kwa tumikisa kokwenu, kumoxi ni jiphange jetu ja kazola Balanabé ni Phawulu,
26 athu abhakula o myenyu yâ mu dijina dya Ngana yetu Jezú Kidistu.
27 Twa mu tumikisa we Juda ni Sila, phala mwívwe o ima yoso yiyi mu makanu mâ.
28 Bhukaxi ka nzumbi ikôla, twamono kuma ki twatokala ku mi tatesa ni ima ya neme, kikale ngó o ima yiyi:
29 mwenda jinga ni kulenga o ima yó satele iteka, ni manyinga, ki mu dye xitu ya yama ka ikatula manyinga,* lengenu we o undumbu.* Se mu suluka ni kulenga o ima yeniyi, mwanda bhanga kyambote. Twa mi kundu,* mahezu!”
30 Kyoso kyazubha kwa sula, o mayala enyá akulumuka ku Andiyokiya. Kwenyóko ongeka o maxibulu moso, anga a abhana o mukanda.
31 Kyoso kyazubha o kutanga o mukanda, asanguluka ni kiswinisu kyatambula.
32 Kuma Juda ni Sila exile we jipolofeta, ene akwatekesa o jiphange ni kwa swinisa ni izwelu yavulu.
33 Kyazubha kubhita thembu mwenyomo, o jiphange a asula ni kutululuka, anga avutuka kwa yó a atumikisine.
34 ——
35 Maji Phawulu ni Balanabé axala mu Andiyokiya kumoxi ni akwâ, mu kulonga ni kuboka o njimbu yambote yalungu ni mak’â Jihova.
36 Mu kubhita izuwa, Phawulu wambela Balanabé: “Kindala, tuvutuke ni tukunde dingi o jiphange mu jimbanza joso mu twa bokela o mak’â Jihova ni tumone kyebhi kyala.”
37 Balanabé wamesenene kyavulu kuya kumoxi ni Nzwá, amwixana we Máluku.
38 Maji Phawulu kaxikina kuya-nê kumoxi, mukonda mwene wa axisa mu mbanza ya Panfídya, ka sulukile nawu mu ukunji.
39 Mu kyenyiki, ene azoko, ya a diwanuna. Balanabé wayi kumoxi ni Máluku, ene abande mu ulungu ayi ku Xipele.
40 Phawulu anga usola Sila. O jiphange asambe kwa Jihova phala kulondekesa o ngalasa yê kwa Phawulu, mwene anga uya.
41 Phawulu wabhiti mu jimbanza ja Sídya ni Silisya, ni kuswinisa o jiphange mu ilunga.
Footnotes
^ Mba, “mihamba.”
^ Mba, “inzo.”
^ Mu Ngeleku, por·nei′a. Tala o Dilombolwelu.
^ Mba, “yama yo kwenye.”
^ Mba, “ididi ya ubhezelu.”
^ Mba, “yama yo kwenye.”
^ Mu Ngeleku, por·nei′a. Tala o Dilombolwelu.
^ Mba, “twa mi menekena.”
