Kala Kyasoneka Luka 1:1-80
1 Ngana Tiyófilu, athu avulu akwata kwongeka ni kusoneka mu mukanda o ima yoso i tu xikina we,
2 kala kya tu tangelele nayu oso akexile jimbangi ni aboki a njimbu, tundé kudimatekenu.
3 Eme wami, kyoso ki nga zubha kutokwesa o ima yoso ni kidi kyoso, ngasolo ku kusonekena o ima kala ki yabhiti tundé kudimatekenu,
4 phala wijiye kyambote o ima ya kulongo.
5 Mu izuwa ya Helode* sobha ya Judeya, kwakexile mukunji amwixana Zakadiya, watokalele ku kibuka kya Abiya. O muhatu wê watokalele ku mwiji wa Alá, dijina dyê Nzebele.*
6 Kiyadi kyâ exile athu ayuka bhu pholo ya Nzambi, akexile mu kumbidila o itumu yoso ni ijila ya Jihova ni ufiyele woso.
7 Ene kexile ni ana, mukonda Nzebele kexile mu vwala.* Kiyadi kyâ akukile kyá.
8 Zakadiya ukala mu sidivila bhu pholo ya Nzambi kala mukunji, mu kibuka kyê.
9 Kala kyexile o kifwa kya akunji, o kithangana kyê kya kwoha o wasu wa dizumba kyabhixila. Mwene wabokona mu tembulu ya Jihova.
10 Mu kithangana kya kwoha o wasu wa dizumba, o kifuxi kyoso kyakexile mu samba bhu kanga.
11 O anju ya Jihova ya mu tukulukila, anga imana bhu mbandu ya kadilu ka kalatódyu ka wasu wa dizumba.
12 Kyoso Zakadiya kyamono o anju, wa sasumuka, anga wôma u mu kwata.
13 Maji o anju ya mu tangela: “Kana kukala ni wôma Zakadiya, mukonda o misambu yé a ivu, o muhatu wé wanda kuvwalela mon’a diyala, eye u mu luka o dijina dya Nzwá.
14 Eye wanda sanguluka kyavulu ni kutana, athu avulu anda sanguluka ni uvwalelu wê,
15 mukonda mwene wanda kala muthu wadikota bhu pholo ya Jihova. Maji katokala kunwa vinyu, mba kima kyoso-kyoso ki kodiwisa. Mwene wanda kwizala ni nzumbi ikôla, tundé kyá mu divumu dya many’â.
16 Wanda bhangesa kwila, athu avulu ku twana twa Izalayele avutuke kwa Jihova, o Nzambi yâ.
17 Nzambi wanda mu tumikisa ku pholo yê. Mwene wanda sokela ni Elija mu kutena, phala kubhangesa o ana ni jitata kudibhana kyambote, o a bhukumuka abhange o ima ni unjimu kala o athu ayuka, phala kusokejeka o mundu watokala kwa Jihova.”
18 Zakadiya wambela o anju, wixi: “Kyebhi ki ngitena kwijiya kwila, kiki kidi? Mukonda eme nga kuka kyá, o muhatu wami we wala kyá ni mivu yavulu.”
19 O anju ya mu tambwijila: “Éme Ngabidiyele, ng’emana bhu pholo ya Nzambi. Mwéne wa ngi tumikisa phala kuzwela n’eye, ni ku kutudila o njimbu yiyi yambote.
20 Mu kiki-phe, wanda kala udibubu, ki wanda tena kuzwela katé kyanda dikumbidila o ima yiyi, mukonda ki waxikina o izwelu yami, yanda dikumbidila mu kithangana kyoxinde.”
21 Kyoso kyakexile mu bhita o ima yiyi, o kifuxi kyakexile mu kinga Zakadiya. Ene adiwanene mukonda mwene wakexile mu laleka mu kalatódyu.
22 Kyoso mwene kyatundu, katenene kuzwela nawu. Ene anga amona kwila, Zakadiya wa mwene kisunji mu kalatódyu. Mwene wakexile ngó mwa bhangela ijimbwete, kuma wa kitukile dibubu.
23 Kyoso kyabhu o izuwa yê ya kukalakala mu tembulu, mwene wavutuka kubhata dyê.
24 Mu kubhita tu izuwa, o muhatu wê Nzebele wemita, anga ukala kubhata mu mbeji jitanu. Mwene wakexile mu zwela, wixi:
25 “Yiyi yene o mbote ya ngi bhange Jihova mu izuwa yiyi. Mwene wa ngi banze phala ku ngi katula o jisonyi* mw’axaxi ka athu.”
26 Kyoso Nzebele kyatenesa mbeji jisamanu, Nzambi watumikisa anju Ngabidiyele mu mbanza ya Ngalileya, mu sanzala ya Nazalé,
27 ku muzeletete a mu lembe kyá ku diyala amwixana Zuze, watokala ku mwiji wa Davidi. O muzeletete dijina dyê Madiya.
28 Kyoso o anju ki yabokona, wa mwambela, wixi: “Nga kumenekena. Eye a kuzediwisa kyavulu, Jihova wala n’eye!”
29 Maji mwene wa sasumuka kyavulu ni izwelu yê, anga ukala mu xinganeka se ihi yakexile mu lombolola o umenekenu yú.
30 O anju ya mu tangela: “Madiya, kana kukala ni wôma, mukonda eye wasange ngalasa bhu pholo ya Nzambi.
31 Talesa! Eye wanda kwimita, wanda vwala mon’a diyala, u mu luka o dijina dya Jezú.
32 Mwene wanda kala muthu wonene, anda mwixana Mon’a Suke-ku. Jihova Nzambi, wanda mu bhana o kyandu kya tat’ê, Davidi.
33 Mwene wanda kala Sobha mu dibhata dya Jakobo katé ku hádya ni hádya. O Utuminu wê, ki wanda bhwa.”
34 Maji Madiya webhwidisa o anju, wixi: “Kiki kyanda bhita kyebhi? Eme kiluwa hanji ngi zeka ni diyala.”*
35 O anju ya mu tambwijila: “O nzumbi ikôla yanda tulukila kuthandu dyé, o kutena kwa Suke-ku kwanda kuvungina. Mukonda dya kiki, o mona u wanda mu vwala, anda mwixana muthu ukôla, Mon’a Nzambi.
36 Ejiya kwila o ndandu yé Nzebele, amwixana mbaku, sumbala wakuka kyá, maji wemita. Mwene wala kyá ni mbeji jisamanu.
37 Mukonda kwa Nzambi, kana-ku kima ki kamba ku dikumbidila.”
38 Madiya wambe, wixi: “Em’yú, ngi mubhika wa Jihova! Ki ngi bhite kala ki wa kizwela.” Kyenyiki, o anju ya muxisa.
39 Mu izuwa yenyóyo, Madiya wayi ni lusolo mu sanzala yala ku milundu, mu mbanza ya Judá.
40 Anga ubokona mu inzo ya Zakadiya, umenekena Nzebele.
41 Kyoso Nzebele kyevu o umenekenu wa Madiya, o mona mu mala watuka, anga Nzebele wizala ni nzumbi ikôla.
42 Mwene wadikola ni dízwi dya swina, wixi: “Ku ahatu oso, eye wabeta o kuzediwa, wazediwa we o mona wanda ku mu vwala!
43 Eme nanyi phala kukala ni ujitu yú, wa ku ngi kunda kwa many’â Ngana yami?
44 Kyoso ki wa ngi menekena, o mona mu mala dyami watuka ni kusanguluka.
45 Eye wazediwa mukonda waxikina kwila, o ima ya kutangela Jihova, yanda dikumbidila.”
46 Madiya wambe, wixi: “Mwenyu wami u ximana Jihova,
47 muxima wami wasanguluka mwa Nzambi, o Mubhuludi wami,
48 Mukonda mwene watale o kutola kwa mubhik’ê. Tundé lelu katé ku hádya, miji yoso yanda ngi tumbula kwila ngi muhatu wazediwa,
49 mukonda o Mukwa kutena wa ngi bhange madiwanu, o dijina dyê dikôla.
50 Ku miji ni miji, o henda yê yala kuthandu dya yó a muxila.
51 Mwene wabhange madiwanu ni lukwaku lwê, wa mwanganesa yó alondekesa kwila akwa izala bhukaxi ka ima yamesena ku mixima yâ.
52 O mayala ala ni maungana, wa akatula ku yandu, yu wazangeleka athu alenduka,
53 wezalesa ni jimbote yó abhindama, o jimvwama wa jikaye ni maku ahatu.
54 Mwene wakudila Izalayele, o selevende yê, mu kulembalala o henda yakwatela
55 Mbalahamu ni mwiji* wê, katé ku hádya ni hádya, kala kya kanene ku jikuku jetu.”
56 Madiya ukala ni Nzebele mbeji jitatu, anga uvutuka kubhata dyê.
57 O izuwa ya Nzebele ya kubhanduluka* yabhixila, mwene anga uvwala mon’a diyala.
58 O jivizinyu ni jindandu jê evu kwila, Jihova wa mu londekesele henda, ene anga asanguluka kumoxi ni mwene.
59 Mu kizuwa kya kanake, ayi mu saya o kamona, ya amesenene ku mu luka o dijina dya tat’ê, Zakadiya.
60 Maji many’â wazwela, wixi: “Kana! Mwene anda mu luka Nzwá.”
61 Kyenyiki, a mwambela, exi: “Ku jindandu jé, sé-ku muthu wala ni dijina didi.”
62 O athu anga ebhwidisa o tata bhukaxi ka ijimbwete, se wa mesenene kwila, o mona a mu luka nanyi.
63 Mwene wabhingi kadibaya, yu wasoneka-ku: “Dijina dyê, Nzwá.” O athu adiwana kyavulu.
64 Mu kithangana kyenyókyo, o dikanu dyê dya jikuka, o dimi dyê dya jituka. Mwene anga umateka kuzwela ni kuximana Nzambi.
65 Athu oso atungile bhenyobho wôma wa akwata. O ima yoso yiyi, anga ifumana mu sanzala yala ku milundu ya Judeya.
66 Athu oso evu o maka enyá a abhake ku mixima, ya ambe, exi: “O mona yú wanda kala muthu wa kidifwa kyahi?” Mukonda o lukwaku lwa Jihova, lwa kexile ni mwene.
67 Zakadiya anga wizala ni nzumbi ikôla, yu wambe, wixi:
68 “Ximanenu Jihova, o Nzambi ya Izalayele, mukonda o mundu wê wa ukwatela henda, yu wa ubhulula.
69 Mwene wa tu tukulwila mubhuludi* wala ni kutena, watundu ku dibhata dya Davidi, o selevende yê,
70 kala kyazwelele bhukaxi ka jipolofeta jê tundé xahulu,
71 phala ku tubhulula bhu maku a jinguma jetu ni bhu maku a yó a tu zembe,
72 phala ku tu londekesa o henda yakanena ku jikuku jetu ni kulembalala o kikutu kyê kikôla.
73 Ni kima kya lokele kwa Mbalahamu, kukw’etu kwila,
74 kyoso kyeji zubha ku tubhulula bhu maku a jinguma jetu, weji tubhana o ujitu wa ku mu kalakalela sé wôma,
75 ni ufiyele ni kuyuka bhu pholo yê, izuwa yetu yoso.
76 Eye-phe kamona, anda kwixana polofeta ya Suke-ku, mukonda wanda twamenena bhu pholo ya Jihova, mu ku mu yudikila o jinjila jê,
77 ni kubhana o kwijiya kwa kubhuluka, bhukaxi ka muloloki wa ituxi yâ,
78 mukonda dya henda ya Nzambi yetu. O henda yiyi yatundu ku dyulu, yanda tu mwikina kala ki mwika o dikumbi,
79 phala kumwikina axikama mu kitombe ni mu kididi ki bhekela o kufwa, ni ku twendesa mu njila ya kutululuka.”
80 Anga o kamona kenda ni kukula kyambote.* Mwene ukala mu mukáwu, katé o kizuwa kya tukuluka mu Izalayele.
Footnotes
^ Tala o Dilombolwelu.
^ Mba, “Elizabete.”
^ Mba, “mbaku.”
^ Mba, “kixongwenu.”
^ Mba, “ngi muzeletete.”
^ Mu Ngel.: “mbutu yê.”
^ Mba, “kuvwala.”
^ Mu Ngel.: “lungela mba lumbinga lwa kubhulula.” Tala o Dilombolwelu, “Lungela.”
^ Mu Ngel.: “wa kolo mu nzumbi.”
