Kala Kyasoneka Luka 16:1-31
16 Jezú wambela o maxibulu mê, wixi: “Sayi diyala mvwama wakexile ni kimbadi. O kimbadi a mu tatela kwila, wazange o jimbongo ja ngana yê.
2 Mu kyenyiki, o ngana wa mwambela: ‘Nga mu kwívwa ima yayibha yalungu n’eye. Bhakula o jikonda ja kikalakalu kyé, mukonda kiwanda kala dingi u kimbadi kyami.’
3 Kyenyiki, o kimbadi waxinganeka mudyê, wixi: ‘Kuma o ngana yami wa mu ngi katula o umbadi, ngibhanga kyebhi? Kingala ni nguzu yasoko phala kudima, ngala we ni jisonyi ja kubhinga jimola.
4 Ewá! Ngejiya kyá inganda bhanga kyoso kyanda ngikatula o umbadi, phala athu a ngi tambulule ku mabhata mâ.’
5 Mwene wexana o athu atele makongo kwa ngana yê, anga wibhwidisa o muthu wa dyanga, wixi: ‘Dikongo dyahi diwala nadyu kwa ngana yami?’
6 O muthu wa mu tambwijila: ‘Midi jiyadi ni hama jiyadi ja jilitulu* ja máji. O kimbadi wa mutangela, wixi: ‘Kwata o mukanda wé wadikongo, xikama, ni lusolo usoneke-mu midi ni hama ya jilitulu.’*
7 Mwene anga webhwidisa mukwâ: ‘Eye we dikongo dyebhi diwala nadyu?’ Mwene watambwijila: ‘Hama ya izongelu ya makota ya tiliku.’* O kimbadi wa mutangela, wixi: ‘Kwata o mukanda wé wadikongo, soneka-mu makwinyi anake.’
8 Sumbala o kimbadi wexile muthu wayibha, maji ngana yê wa muximana, mukonda walondekesa unjimu. Kuma o an’a mundu* yú akala dingi jinjimu mu kudibhana ni akwâ, o an’a mukengeji ndenge.
9 “Eme wami ngi mitangela kwila: Bhangenu ukamba bhukaxi kakitadi kya mangonya, phala kyoso ki kimikamba, o makamba enyá a mitambulula ku mabhata ma nangenena.
10 Woso ukala fiyele mu ima yofele, ukala we fiyele mu ima ya makota. Woso ukamba kukala fiyele mu ima yofele, ukamba we kukala fiyele mu ima ya makota.
11 Kyenyiki, se mu kamba kulondekesa ufiyele mu ku kalakala ni umvwama wa mangonya, nanyi wanda midyelela mu kumibhana o umvwama wakidi?
12 Se mukamba kukalakala ni ufiyele ni ima yangene, nanyi wanda mibhana o ima ya mitokala?
13 Sé-ku selevende utena kusidivila ngana jiyadi, mukonda sayi yú u muzemba, o yó u muzola. Mba yú u mukala fiyele, o mukwá u mu bhukumukina. Enu wenu, kimutena kusidivila Nzambi ni Jimbongo.”
14 O Jifalizewu exile azodi akitadi, kyoso kyevu o ima yiyi, amateka ku mu xongwena.
15 Kyenyiki, mwene wa atangela: “Enu mu dilondekesa bhu pholo ya athu kwila mu athu ayuka, maji Nzambi wejiya o mixima yenu. Mukonda yoso yala ni valolo yavulu bhu pholo ya athu, bhu pholo ya Nzambi kiyalé ni valolo.
16 “O Kijila kya Mozé ni ulongelu wa Jipolofeta a ulongo katé mu izuwa ya Nzwá. Tundé mu kithangana kyenyókyo, o Utuminu wa Nzambi a mu uboka kala njimbu yambote. Athu oso a mubhanga nguzu phala kubokona-mu.
17 Mu kidi, dyulu ni ixi itena kujimuka, maji mu kijila né ngó kambandu kakizwelu, kakamba ku dikumbidila.
18 “Woso usenga muhatu wê anga ukazala ni muhatu wengi, uta phánda. Woso we ukazala ni muhatu a musenge, uta we phánda.
19 “Kwakexile diyala mvwama wakexile muzwata izwatu yakatunda, izuwa yoso ukala mu kudya kyambote ni kubhanga ngó o jivondadi jê.
20 Kwakexile ngadyama a mwixanene Lázalu akexile mu mutula bhu mwelu wa mvwama, mwene wezalele ni jifidila.
21 Mwene wa mesenene kudya o isesekenya yakexile mu lawuka ku meza ya mvwama. Katé mwene ni jimbwa jakexile mu mulesa o jifidila.
22 Mu kubhita thembu o ngadyama wafu, o jianju anga a mwambata bhu mbandu ya Mbalahamu.*
“O mvwama wafu we, anga a mu funda.
23 Mw’alunga* kyakala mu jiphaxi, mwene wabhetula o mesu, anga umona Mbalahamu wala dikanga ni Lázalu bhu mbandu yê.*
24 Mwene anga udikola kwa Mbalahamu: ‘Tata Mbalahamu, ngi kwatele henda, ngi tumikise Lázalu n’a bonde o mulembu mu menya n’a ngi talalese o dimi, mukonda nga mutala hadi mu túya tutu twadikota.’
25 Maji Mbalahamu wa mutangela, wixi: ‘Mon’ami, lembalala kwila eye wakexile ni jimbote javulu kyoso ki wakexile ku mwenyu, maji Lázalu wabhitile mu jiphaxi javulu. Kindala mwene wasange kutululuka kuku, maji eye wa mutala hadi.
26 Bhukaxi k’etu ni enu atutela-bhu kidikungu kyonéne, phala o athu ala kuku amesena kuya koko kumwala, katena. O ala koko amesena kwiza kuku, katena we.’
27 Mu kyenyiki, o mvwama wambe, wixi: ‘Se kyene, nga kudyóndo tata, tumikisa Lázalu kubhata dya tat’etu,
28 mukonda ngala-ku ni jiphange jitanu. Mwene anga wadimune, phala ene wa, keze bhu kididi kiki kyaphaxi.’
29 Maji Mbalahamu wa mutangela: ‘Ene ala kyá ni Mozé ni Jipolofeta. A évwe.’
30 Mwene wa mu tambwijila: ‘Kana, tata Mbalahamu! Maji se bhukaxi ka athu afu, kutunda muthu uya kwa ene, ene anda dyela.’
31 Mbalahamu wa mutangela: ‘Se ene kene mu kwívwa Mozé ni Jipolofeta, ene kanda xikina né mwene se kutunda muthu ku athu afu.’”
Footnotes
^ Mu Ngel.: “hama ya jibatu.” Batu imoxi ya sokele makwinyi a yadi ni kiyadi a jilitulu.
^ Mu Ngel.: “makwinyi atanu a jibatu.”
^ Mu Ngel.: “hama ya jikolu.” Kolu imoxi ya sokele hama ni makwinyi a sambwadi a jikilu.
^ Tala o Dilombolwelu.
^ Mu Ngel.: “bhu jihata ja Mbalahamu.”
^ Mba, “Hades.” Tala o Dilombolwelu.
^ Mu Ngel.: “bhu jihata jê.”
