Kala Kyasoneka Luka 17:1-37
17 Jezú anga wambela o maxibulu mê, wixi: “O ima ibhangesa o athu kuta kituxi,* ki yanda kamba kumoneka. Maji lamba dya yó woso ubhangesa o ima yiyi kubhita!
2 Kyeji betakota ku mu kutila ditadi dya kuhuhila mu xingu, ni ku mu bobesa mu musanza wa kalunga, muveji dya kubhangesa muthu umoxi ku twana tutu kuta kituxi.*
3 Dilangyenu! Se phang’yé wate kituxi, mubazele, se mwene udyela, muloloke.
4 Né mwene se wa kute kituxi sambwadi dya jiveji ku kizuwa, anga wiza kokwé sambwadi dya jiveji, uzwela: ‘Ngi loloke!’ Eye watokala ku muloloka.”
5 O jipoxolo atangela Ngana: “Tu kwatekese kukala ni kixikanu kyakolo!”
6 Ngana wa atangela: “Se mwakexile ni kixikanu kyasoko ni lumbundu lwa mbutu ya mustarda, mweji tangela o muxi yú wa mukuzu:* ‘Tunda bhabha, di phaphe mu musanza wa kalunga!’ Wene weji mi belesela.
7 “Se muthu mudyenu ukala ni mubhika wa mudima mba wa mu kwinga ibhaku, kyoso mwene kyanda tunda ku dibhya, o kwila wanda mu tangela, wixi: ‘Za ku meza ni lusolo, phala kudya’?
8 Kana. Muveji dya kiki, wanda mwambela: ‘Ngi lambele o kúdya, ta o izwatu ni u ngisidivile, katé ki ngi zubha o kudya ni kunwa, phala eye we udyé ni unwe.’
9 O kwila muthu mwenyú wanda sakidila o mubhika, mukonda wabhange o ima ya mu tumina?
10 Kyene we kimoxi, kyoso ki mu zubha kubhanga o ima ya mitumina, muzwela, mwixi: ‘Tu abhika ahatu. O ima i twabhange, yene i twatokalele o kubhanga.’”
11 Kyoso mwene kyakexile muya mu Jeluzaleme, wabhiti bhu jimbambe ja Samadiya ni Ngalileya.
12 Kyabokona mu sanzala ya mukwá, dikwinyi dya mala akexile ni mabhute, eza phala kudisanga nê, maji emana dikanga.
13 Ene adikola, exi: “Jezú, Mesene! Tu kwatele henda!”
14 Kyoso Jezú kya amono, wa atangela, wixi: “Ndenu mu dilondekese ku akunji.” Kyoso ene kyakexile muya, adisanze.
15 Muthu umoxi mudyâ, kyoso kyamono kwila wadisanze, wavutuka, yu waximana Nzambi ni dízwi dya swina.
16 Mwene wafukamena Jezú ni pholo bhoxi, ni ku mu sakidila. Mwene wexile mukwá Samadiya.
17 Jezú wambe: “Ki dikwinyi dya mala adisanze? Kwebhi-phe kwala o divwa?
18 Sé-ku muthu mudyâ, wavutuka phala kuximana Nzambi, kikale ngó o diyala didi mukwá ixi yengi.”
19 Jezú anga u mwambela: “Balumuka, ndayé. O kixikanu kyé, kya kubhangesa kudisanza.”
20 O Jifalizewu a mwibhwidisa se thembu kuxi kyeji kwiza o Utuminu wa Nzambi. Mwene wa atambwijila: “O Utuminu wa Nzambi ki wanda kwiza mu ukexilu a umona ku athu oso.
21 Athu we kanda zwela: ‘Talesenu, yú bhabha!’ Mba ‘yú bhobho!’ Mukonda o Utuminu wa Nzambi wala mwaxaxi kenu.”
22 Jezú anga wambela o maxibulu mê: “Kwanda kwiza thembu, mwanda mesena kumona kizuwa kimoxi ku kithangana kya Mon’a muthu, maji ki mwanda kimona.
23 Athu anda mi tangela: ‘Talesenu, yú bhobho!’ mba, ‘Talesenu, mwene wala bhabha!’ Ki mu tokala kutunda mba kwa kayela.
24 Mukonda kála o nzaji imwikina ku mbandu imoxi ya dyulu katé ku mbandu ya mukwá, kyene we kyanda kala o Mon’a muthu mu kizuwa kyê.
25 Maji-phe, mwene watokala hanji kubhita mu jihadi ni ku mudituna ku mwiji yú.
26 Kála kyabhiti mu izuwa ya Nowé, kyene we kyanda bhita mu izuwa ya Mon’a muthu:
27 Athu akexile mudya, akexile mu nwa, o mala akexile mu kazala, o ahatu akexile mwabhana mu ukaza, katé o kizuwa kyabokona Nowé mu álaka, anga kwiza o Dilúvyu dya bwikisa enyoso.
28 Kyanda bhita we kála kyabhitile mu izuwa ya Lote: O athu akexile mudya, akexile mu nwa, akexile mu sumba ni kusumbisa, akexile mudima ni kutunga jinzo.
29 Maji kyoso Lote kyatundu mu mbanza ya Sodoma, ku dyulu kwa noko túya ni xôfidi, anga ibwikisa athu oso.
30 Kyene we kyanda bhita mu kizuwa kyanda tukuluka o Mon’a muthu.
31 “Mu kizuwa kyenyókyo, woso ukala ku ditala dya inzo, maji o jimbote jê jala m’onzo, katokala kutuluka phala ku j’ambata. Kyene we kimoxi, woso ukala ku mábhya, katokala kuvutuka ku ima ya xisa ku dima.
32 Lembalalenu o muhatu wa Lote.
33 Woso usota kubhulula o mwenyu wê, wanda ku utexi, maji woso utexi o mwenyu wê, wanda ubhulula.
34 Ngi myambela kwila, mu usuku wenyó, kiyadi kya athu anda zeka bhu hama imoxi. Muthu umoxi anda mwambata, maji o mukwá anda muxisa.
35 Kiyadi kya ahatu, anda kala mu huha mu ditadi dimoxi. Umoxi anda mwambata, o mukwá anda muxisa.”
36 ——
37 Mukonda dya kiki, a mwambela, exi: “Ngana, o ima yiyi yanda bhita kwebhi?” Mwene wa a tambwijila: “Bhwoso bhukala o kimbi, bhene bhwanda bhongolokela o jiholokoko.”
