Makatukilu 15:1-27
15 Mu kithangana kyenyokyo, Mozé ni akwa Izalayele embi o mwimbu yú phala kuximana Jihova:
“Nganda kwimbila Jihova, mukonda mwene a muzangeleka kyavulu.
Watakula mu musanza wa kalunga o kabalu ni yó wendela-ku.
2 Jihova* mwéne o nguzu yami ni kutena kwami, mukonda wakituka ubhulukilu wami.
Yú mwene Nzambi yami, nganda muximana, o Nzambi ya tat’etu. Nganda muzangeleka.
3 Jihova dizonda dya ita. Jihova dyene o dijina dyê.
4 Mwene watakula mu musanza wa kalunga o makalu a ita a Falawó ni kifuxi kyê,O masoladi mê abetakota, aboba mu musanza wa Kalunga Kakusuka.
5 Ene a axiti ku mabhuku a menya, aboba mu majiya azongo kala ditadi.
6 O lukwaku lwé lwa kadilu, éye u Jihova, lwala ni kutena kwadikota,O Lukwaku lwé lwa kadilu, éye u Jihova, lutena kusasujula o jinguma.
7 Mu kutena kwé kwonene, utena kubwisa oso asota kubhânga n’eye,O njinda yé yawama kala túbhya, ya oha kala yangu.
8 Mu kubhusa kwa mazulu mê, o menya ma dilundu,O menya avulu adibhange ilumbu,O mabhuku a menya edi mwene ngé mwaxaxi ka musanza wa kalunga.
9 O nguma yambe: ‘Nganda kwa akayela kate ki nga asanga!
Nganda wana o jimbote jâ kate ki ngisanguluka!
Nganda katula* o xibhata yami! O lukwaku lwami, lwanda ku atolola!’
10 Wabhusu ni munza wé, o musanza anga wa avungina,Kala xumbu, ene aboba mu menya azongo.
11 Nanyi bhukaxi ka jinzambi, wadifu n’eye, u Jihova?
Nanyi udilondekesa sukeku* mu kuzela kala eye?
Yó atokala ku muximana bhukaxi ka mimbu, Yó ubhanga madiwanu.
12 Wasununa o lukwaku lwé lwa kadilu, o ixi anga ya aminya.
13 Mu henda yé yakidi, wendesa o mundu u wabhulula;Mu nguzu yé wanda kwa endesa kate mu kididi kyé kikôla, mu watungu.
14 O mundu wanda kwivwa, anda teketa,O akwa Fidíxa anda teketa ni wôma.
15 Mu kithangana kiki, o atwameni a miji ya Idomo, anda kala ni wôma wavulu,O jinguvulu ja Mowabe jala ni kutena, anda kala ni wôma wavulu,
Mundu woso wa akwa Kanana wanda luwala kyavulu.
16 Ene anda kala ni wôma wavulu.
Mukonda dya kutena kwa lukwaku lwé, kala o matadi,Ene kanda dizambesa, kate kibhita o mundu wé, éye u Jihova,Kate kibhita o mundu u wabhange.
17 Wanda kwa ambata ni kwa kuna ku mulundu wé wa undundu,O kididi ki wasokejeka phala kutunga, éye u Jihova,O kididi kikôla kyabhange o maku mé, éye u Jihova.
18 Jihova wa kà tumina kate ku hádya ni hádya.
19 Kyoso o jikabalu, o makalu a ita ni yó endela ku jikabalu a kifuxi kya Falawó kyabokona mu musanza wa kalunga,Jihova wa abobesa mu menya a musanza wa kalunga,Maji o mundu wa Izalayele wendela mu mavu akukuta mu kaxi ka musanza wa kalunga.”
20 Midiyana o polofeta ya muhatu, phang’ya Alá, wamateka kuxika o kangoma, ahatu oso anga a mukayela mukuxika o tungoma twâ ni kukina.
21
Midiyana wakexile mu kwimba mu kutambwijila o mayala:
“Imbilenu Jihova, mukonda mwene a muzangeleka kyavulu.
Watakula mu musanza wa kalunga o kabalu ni yó wendela-ku.”
22 Mukusuluka Mozé wabhangesa akwa Izalayele kutunda bhu Kalunga Kakusuka, ayi bhu kikangalakata kya Sule, anga enda mu izuwa itatu mu kikangalakata, maji kasange menya.
23 Ene anga abhixila ku Mahala,* maji katenene kunwa o menya a Mahala mukonda alulile. Kyenyiki, o kididi kyokyo mwene wa kiluku o dijina dya Mahala.
24 O mundu anga umateka kulongolola Mozé, exi: “Ihi i twanda nwa?”
25 Mwene wadikola kwa Jihova, anga Jihova u mulondekesa muxi. Kyoso Mozé kya utakula mu menya, ene akituka menya atowala.
Kwenyoko, Mwene wa abhana kitumu ni jingonge. Kwenyoko Mwene anga wa apolovala.
26 Mwene wambe: “Se wívwa mwene kyambote o dízwi dya Jihova Nzambi yé, anga ubhanga kyafwama ku mesu mê ni kubhana mátwi ku itumu yê, anga ubelesela o jingonge jê, kinganda bhekela kokwé o mauhaxi u ngabhekela kwa akwa Ijitu, mukonda eme ngi Jihova, éme ngikusaka.”
27 Mukusuluka abhixila ku Elimi, kwexile dikwinyi ni kiyadi kya jifixi ja menya ni makwinyi asambwadi a maye. Kyenyiki, ate o kibangu kyâ bhenyobho, bhu mbandu a menya.
Footnotes
^ Mu Heba.: “Jah.” Yú ukexilu wabutu wa kusoneka o dijina Jihova.
^ Mba, “nganda fomona.”
^ Mba, “mukwa kutena.”
^ Dilombolola, “kulula.”
