Kala Kyasoneka Matesu 26:1-75
-
Akunji a makota afunya ndunge ya kujibha Jezú (1-5)
-
Muhatu ulundulwila máji madizumba kwa Jezú (6-13)
-
O Phasu ya sukina, Jezú a musumbisa (14-25)
-
O Seyalu yadyanga ya Ngana (26-30)
-
Jezú wamba kwila Phetele wanda mudituna (31-35)
-
Jezú usamba mu Jetesemane (36-46)
-
Jezú amukuta (47-56)
-
A mu fundisa mu Kyônge (57-68)
-
Phetele udituna Jezú (69-75)
26 Kyoso Jezú kyazubha kutangela o ima yoso yiyi, mwene wambela o maxibulu mê, wixi:
2 “Enu mwa kijiya kwila, kwakambe ngó izuwa iyadi phala o fesa ya Phasu, o Mon’a muthu anda mu bhakula, phala ku mu jibha ku taka.*”
3 Mu kithangana kyenyókyo, o akunji a makota ni adyakimi a mundu, a dyongeka mu kithádi kya mukunji wadikota, a mwixana Kayafa.
4 Ene anga asota ndunge, phala kukwata* Jezú ni ku mu jibha.
5 Maji ene azwela, exi: “Ki twatokala kubhanga kiki mu kithangana kya fesa ya Phasu, phala ki tu bheke jimvunda ku mundu.”
6 Kyoso Jezú kyakexile mu Betanya mu inzo ya Ximá, o mukwa dibhute,
7 kwa mu zukama muhatu ni ngalafa ya alabasa, mwakexile máji ma dizumba, ate kitadi kyavulu. Jezú kyakexile mu dya,* o muhatu wamateka ku mu lundulwila o máji ku mútwe.
8 O maxibulu-phe kya kimono, kya a ibhila, anga azwela, exi: “Mukonda dyahi mwene wa mu zanga o máji?
9 Hinu twa a sumbisa mu kitadi kyavulu, o kitadi kyoso anga tu kibhana ku jingadyama.”
10 Mu kwijiya o maka enyá, Jezú wa a ambela, wixi: “Mukonda dyahi mwa mu thandanganyesa o muhatu? Mwene wa ngi bhange kima kyambote.
11 Enu-phe mwanda kala jinga ni jingadyama, maji kimwanda kala jinga n’eme.
12 Mu ku ngi lundulwila o máji ma dizumba, mwene wabhange kiki, phala ku fwamesa o mukutu wami, kyoso ki nganda fwa.
13 Ngi mi tangela o kidi kwila, kididi kyoso-kyoso kwanda bokela o njimbu yambote mu ngongo, o kima kyabhange o muhatu yú, anda kitumbula mu ku mu lembalala.”
14 Kyenyiki, muthu umoxi ku dikwinyi ni kiyadi kya jipoxolo, amwixana Juda dya Kadyota, wayi ku akunji a makota
15 yú wambe, wixi: “Ihi imwanda ngi bhana se ngi mu bhakula bhu maku menu?” Ene abakana ku mu bhana makwinyi atatu a mabele* a phalata.
16 Mu kiki, tundé mu kithangana kyenyókyo, mwene wakexile musota kithangana kyafwama phala ku mu sumbisa.
17 Mu kizuwa kya dyanga kya fesa ya Jimbolo ja kambe Felemendu,* o maxibulu azukama kwa Jezú, anga a mu ibhwidisa, exi: “Kwebhi ku wamesena kwila tu yudika o kididi, phala o fesa ya Phasu?”
18 Mwene wambe, wixi: “Ndenu mu mbanza, mwanda sanga diyala, mu mu ambela, mwixi: ‘O Mesene wambe kiki: “O kithangana kyami kyoxinde, kyazukama kyá. Nganda bhanga o fesa ya Phasu ni maxibulu mami mu inzo yé.”’”
19 Mu kiki, o maxibulu abhange kala kya atendelesa Jezú, anga a yudika o fesa ya Phasu.
20 Mu ngoloxi, mwene wa xikamene ku meza ni kwinyi ni kiyadi kya maxibulu mê.
21 Kyoso kyakexile mudya, mwene wa atangela, wixi: “Ngi mi ambela o kidi kwila, sayi muthu mudyenu, wanda ngi sumbisa.”
22 Mu kwivwa kiki, ene aluwala kyavulu, ene oso anga amateka ku mu ibhwidisa, exi: “Ngana, o kwila eme?”
23 Jezú wa avutwila, wixi: “O muthu wanda ngi sumbisa, yó wa muta o lukwaku lwê mu ditijela kumoxi n’eme.
24 Kala kyósoneke mu Mikanda ikôla, o Mon’a muthu wanda fwa mwene. Maji lamba dya yó woso usumbisa o Mon’a muthu! Kyeji kala kota se ka mu vwalele.”
25 Juda-phe, weji mu sumbisa wa mu ibhwidisa: “Mesene,* o kwila eme?” Jezú anga u mu tambwijila: “Eye mwene wa kitange.”
26 O kyakexile mudya, Jezú ukwata mbolo, usakidila Nzambi, u ibukujula anga u iwanena o maxibulu, uzwela, wixi: “Tambulenu, mudye. Yiyi, ilombolola o mukutu wami.”
27 Anga ukwata o dikáwu,* usakidila Nzambi, anga u dibhana ku maxibulu, uzwela, wixi: “Nwenu-ku enu oso.
28 Kuma didi dilombolola o ‘manyinga mami ma kikutu,’ anda kwa zunzumuna phala o mbote ya mundu woso, mu kwa loloka o ituxi.
29 Ngi mi tangela kwila: Ki nganda nwa dingi ku vinyu yiyi, katé o kizuwa ki twanda nwa kumoxi vinyu ya ubhe, mu Utuminu wa Tata yami.”
30 Kyoso kyazubha o kwimba mu kuximana* Nzambi, ayi ku Mulundu wa Midiva.
31 Jezú-phe wa atangela, wixi: “Mu usuku wenyú enu-oso mwanda ngixisa,* mukonda dya ima yanda bhita n’eme, kuma kyósoneke kwila: ‘Nganda jibha o mubhidi, anga o jimbudi ja kilunga ji mwangana.’
32 Maji kyoso kyanda ngi fukununa, nganda mi twamenena ku Ngalileya.”
33 Maji Phetele wa mu vutwila, wixi: “Né mwene ene oso yá akuxisa, mukonda dya ima yanda bhita n’eye, eme ki nganda kuxisa,* kana!”
34 Jezú wa mu ambela, wixi: “Ngi kutangela ni kidi kyoso kwila, usuku yú, ande dya dikolombolo kukokola, eye wanda ngi dituna lutatu.”
35 Phetele wa mu vutwila, wixi: “Né mwene se kubhinga kwila, ngi fwa kumoxi n’eye, eme ki nganda kudituna.” Kyene we kyazwela o maxibulu oso.
36 Mu kiki, Jezú wayi ni maxibulu mê bhu kididi akixana Jetesemane, anga wa a ambela, wixi: “Xikamenu bhabha, eme nganda ya bhaná phala kusamba.”
37 Mwene wambata Phetele, ni kiyadi kya an’a Nzebedewu. Jezú uluwala kyavulu, anga ukala ni kikote ku muxima.
38 Mwene anga u atangela, wixi: “Ngala ni kikote kya dikota ku muxima. Xalenu bhabha, kolokotenu mu ku dilanga kala ki nga mu dilanga eme.”
39 Anga usondoloka bhofele, ufukama ni pholo bhoxi, anga usamba, wixi: “Tata yami, se kibhana, o dikáwu* didi ngi katule-dyu. Maji-phe ki kibhite kala ki ngamesena eme, maji kibhite kala ki wamesena eye.”
40 Mwene wavutuka bhwa kexile o maxibulu, wa asange azeka, anga utangela Phetele, wixi: “Kimutena kudilanga, né ngó ola imoxi?
41 Kolokotenu-phe mu kudilanga, sambenu jinga, phala ki mu dibhale mu jitendasá. Mu kidi, o muthu wandala kubhanga o kima kyatokala, maji o mukutu-phe,* wa bhwila.”
42 Lwa kayadi, usondoloka, usamba, wixi: “Tata yami, se ki kibhana kukatula o dikáwu didi sé ku dinwa, yoso ibhite kala ki wamesena eye.”
43 Mwene wavutuka dingi, wa asange a mu zeka, mukonda akexile ni kilu kyavulu.
44 Mwene anga wa axisa dingi, wayi musamba lwa katatu, o maka azwela ene amoxi.
45 Mwene wavutuka bhwa kexile o maxibulu, wa atangela, wixi: “Mu kithangana kala kiki, mwa mu nyoha? Mwa mu zekenu? Talesenu! O ola ya kubhakula o Mon’a muthu bhu maku a akwá ituxi, ya zukama kyá.
46 Balumukenu, twende. Mukonda o muthu wanda ngi sumbisa, yú wiza kyá.”
47 Kyoso mwene kyakexile hanji mu zwela, Juda, wabhangele mbandu ku kwinyi ni kiyadi kya jipoxolo, weza kumoxi ni athu avulu, ambata jixibhata ni jimbangala. Enyá a atumikisa ku akunji a makota ni adyakimi a mundu.
48 O muthu weji mu sumbisa, wa abhele kijimbwete, wixi: “Yó nganda mu bhana nzobole, mwéne o muthu, mu kutyenu.”
49 Juda wabhixila kwa Jezú, yu wambe, wixi: “Mesene,* nga ku menekena!” Anga u mu bhana nzobole.
50 Maji Jezú wa mu tangela wixi: “Kamba dyami, ihi ya kubheka bhabha?” Ene akwata Jezú, anga a mu kuta.
51 Mu kithangana kyenyókyo, muthu umoxi kwa yó akexile ni Jezú, wazangula o lukwaku lwê, ukatula o xibhata anga ubatula o ditwi dya mubhika wa mukunji wadikota.
52 Jezú-phe wa mu ambela, wixi: “Vutula o xibhata, bhu kididi kyê. Mukonda oso a katula o xibhata, anda fwila ku xibhata.
53 Inga wa fika kwila, kindala kiki, ki ngi tena kubhinga kwa Tata yami, phala ku ngi tumikisa mazunda* a jianju?
54 Kyenyiki, kyebhi kyeji dikumbidila o maka oso ósoneke mu Mikanda Ikôla, ambe kwila o ima yatokala kubhita mu ukexilu yú?”
55 Mu kithangana kyenyókyo, Jezú watangela o mundu weza ku mu kuta, wixi: “Mweza bhabha phala ku ngi kuta ni jixibhata ni jimbangala kala ngi kifumbe? Izuwa yoso nga kexile muxikama mu tembulu ni kulonga, maji enu ki mwa ngi kutu.
56 Ima yoso yiyi yabhiti, phala ku di kumbidila o maka asonekene o jipolofeta.” Mu kiki, o maxibulu oso amuxisa, anga alenga.
57 O athu akutile Jezú, a mwambata ku inzo ya Kayafa, o mukunji wadikota, kwa bhongolokele o jimesene ja kulonga o Kitumu ni adyakimi a mundu.
58 Maji Phetele ukala dikanga mu ku mu kayela, katé mu kithadi kya inzo ya mukunji wadikota. Mwene wabokona, anga uxikama kumoxi ni akalakadi a inzo phala kumona ihi yanda bhita.
59 O akunji a makota ni athu oso mu kyônge, akexile mu sota kikuma kwa Jezú phala ku mu tatela, ni ku mu jibha.
60 Maji ene alémbwa, né mwene ni jimbangi javulu ja makutu jeza. Mu kubhita kithangana, kweza dingi jimbangi jiyadi,
61 ambe, exi: “O diyala didi dyambele kwila: ‘O tembulu ya Nzambi, ngi ibula, anga ngi itunga dingi mu izuwa itatu.’”
62 Kyenyókyo, o mukunji wadikota wa balumuka, anga u mu ibhwidisa, wixi: “Eye ki wanda kwa tambwijila? Ki wanda zwela kima, ku ima ya mu kutatela o mayala yá?”
63 Maji Jezú wadixibha. Mu kiki, o mukunji wadikota, wa mu ambela, wixi: “Nga kulokesa mu dijina dya Nzambi ya mwenyu, phala u tu tangele se eye mwéne u Kidistu, o Mon’a Nzambi!”
64 Jezú wa mwambela, wixi: “Eye mwéne wa kitange. Ngi mi ambela kwila: Mwanda mona o Mon’a muthu kuxikama ku mbandu ya kadilu ya Muteni wa yoso,* ni kwiza ku matuta.”
65 O mukunji wadikota-phe, watandula o izwatu yê, yu wambe, wixi: “Mwene waxingi Nzambi! O kwila twa bhingi dingi jimbangi? Kindala enu mwevu kwila, mwene waxingi Nzambi.
66 Enu-phe mwa fika kyebhi?” Ene a tambwijila, exi: “Mwene watokala kufwa.”
67 Ene anga a mu phamena mathe bhu pholo, a mu bhana jihome. A ka mukwá a mu bhana jihuxi,
68 ya ambe, exi: “Eye u Kidistu, se u polofeta, tu tangele: Nanyi wa kubeta?”
69 Kyoso Phetele kyaxikama bhu kanga, mu kithadi, sayi kilumba* kya mu zukama, anga u mwambela, wixi: “Eye we wakexile mu kwenda kumoxi ni Jezú, mukwa Ngalileya!”
70 Mwene waditunu bhu pholo dya athu oso, wixi: “Eme ki ngejiya o kima ki wa mu zwela.”
71 Kyoso mwene kyabhixila bhu mbandu ya mwelu, kilumba kya mukwá wa mu tonginina, yu wambela o athu akexile-bhu, wixi: “Diyala didi dyakexile mu kwenda kumoxi ni Jezú, mukwa Nazalé’.”
72 Mwene anga udituna dingi ni kulôka, wixi: “Kingejiya o diyala didi!”
73 Mu kubhita ka kithangana, o athu akexile bhu kididi kyenyókyo, azukama kwa Phetele, ya a mu tangela, exi: “Ni kidi kyoso, eye we wakexile mu kwenda kumoxi ni mwene, mukonda o ukexilu wé* wa kuzwela wengi.”
74 Mwene anga umateka kudilokela, wixi: “Eme ki ngejiya o diyala didi!” Mu kithangana kyenyókyo, dikolombolo dyakokola.
75 Phetele anga ulembalala o izwelu ya Jezú, kyoso kyambe: “Ande dya dikolombolo kukokola, eye wanda ngi dituna lutatu.” Mwene utunda bhenyobho, anga udila kyavulu.
Footnotes
^ Tala o Dilombolwelu.
^ Mba, “kukuta.”
^ Mba, “kya xikamene ku meza.”
^ Mba, “iphaka.”
^ Mba, “kithuthume.”
^ Mba, “Labi.”
^ Mba, “o kopho.”
^ Mba, “jisálamu.”
^ Mu Ngel.: “kudibhukana.”
^ Mu Ngel.: “kudibhukana.”
^ Mba, “kopho.”
^ Kiki kilombolola, o ukexilu wa ituxi wa muthu.
^ Mu Ngel.: “Labi.”
^ Mu Ngel.: “12 kya ibuka.”
^ Mu Ngel.: “mbandu ya kadilu ya kutena.”
^ O kilumba kiki, wexile selevende ya mukunji wa dikota.
^ Mba, “mbimbi; dimi.”
