Kala Kyasoneka Matesu 3:1-17
3 Mu izuwa yenyóyo, Nzwá dya Batizu wamateka kuboka mu mukáwu wa Judeya,
2 mu kuzwela: “Dyelenu o ituxi yenu, kuma o Utuminu wa dyulu wazukama.”
3 Mu kidi, yú mwéne a mu tangele kwa polofeta Izaya, kyoso kyambe: “Evu dízwi dya muthu wa mu dikola ku mukáwu: ‘Yudikenu o njila phala Jihova! Yukisenu o ikoka yê.’”
4 Nzwá wakexile mu zwata ibha ya kamelu, ni ku di kuta phonda ya kibha mu mbunda. Mwene wakexile mu dya mahoho ni wiki* wa mukáwu.
5 O akwa Jeluzaleme ni akwa Judeya, ni oso a tungile mu jisanzala ja kondolokele o Ngiji ya Njolodá, akexile muya kwa mwene,
6 yu wakexile mu a batizala* mu Ngiji ya Njolodá, ya akexile mu fisala o ituxi yâ.
7 Kyoso kyamono o Jifalizewu ni Jisadusewu javulu kuzukama bhu kididi kya batizu, mwene wa atangela, wixi: “Enu mu an’â madyuta, nanyi wa mi tangela kwila, mu tena kulenga o njinda ya Nzambi yanda kwiza?
8 Mu kiki-phe, imenu ibundu ya fwama ya kudyela.
9 Kanenu kuzwela ku mixima yenu kwila, ‘Tat’etu Mbalahamu.’ Mukonda ngi mi tangela kwila, mu matadi yá, Nzambi utena kubhanga-mu ana phala Mbalahamu.
10 O dikuwa* adite kyá ku jindanji ja mixi. Mu kiki, muxi woso ukamba kwima ibundu yambote, anda ku ubatula ni ku utakula mu túbhya.
11 Eme ngi mi batizala ni menya mukonda dya kudyela kwenu, maji o yó wanda ngi kayela wala kota eme ndenge, ki ngi fwama né ngó ku mu katula o jihayi jê. Mwene wanda mi batizala ni nzumbi ikôla, ni túbhya.
12 Mwene wa kwata o kivotelu kyê bhu maku, phala kutungula o tiliku mu ibhyate, ni kuzelesa o kididi kyê; wa ká bhongolola o tiliku yê ni ku ibheka mu kididi kya kubhaka o idima, maji o ibhyate-phe wanda itakula mu túbhya ki tu xikina dingi kujima.”
13 Mu kiki-phe Jezú utunda mu Ngalileya, anga uya mu Njolodá kwa Nzwá, phala ku mu batizala kwa mwene.
14 Nzwá-phe usota ku mu fidisa, u mwambela, wixi: “Éye watokala ku ngi batizala, maji mukonda dyahi wa mu kwiza dingi kokwami?”
15 Jezú wa mu tambwijila, wixi: “Kindala kyene kya fwama o kubhanga, ni tu kumbidile yoso ya yuka.” Mu kiki Nzwá ka mu fidisa dingi.
16 Kyoso kyazubha ku mu batizala, Jezú watundu mu menya. Mu kithangana kyenyókyo o dyulu dya jikuka, mwene anga umona o nzumbi ya Nzambi ya mu tuluka kala dyembe,* i yatula kuthandu dyê.
17 Ku dyulu anga kutunda dízwi, dixi: “Yú mwéne o Mon’ami wakazola, eme nga mu xikina.”
