Kala Kyasoneka Matesu 9:1-38
9 Mu kyenyiki, mwene wasambela mu ulungu, anga uya ku sambwa yu wabokona mu mbanza yê.
2 O athu a mu bhekela diyala katenene kwenda. O diyala didi dya zekele mu kipoya. Mu kumona o kixikanu kyakexile nakyu, Jezú wa mwambela, wixi: “Kolokota, mon’ami! Ituxi yé yololoke.”
3 Bhenyobho, sayi jimesene ja kulonga o Kijila akwata kuzwela mudyâ, exi: “Muthu yú wa mu lokalala Nzambi.”
4 Mu kwijiya o ima yakexile mu xinganeka ene, Jezú wa ebhwidisa: “Mukonda dyahi mwa mu xinganeka ima yayibha ku mixima yenu?
5 Mu kifika, ihi ya bhonzo dingi, o kuzwela kwila o ‘Ituxi yé yololoke,’ inga o kuzwela kwila ‘Balumuka wende’?
6 Maji, phala mu k’ijiye kwila o Mon’a muthu wala ni ungana wa kuloloka o ituxi mu ngongo . . . ” mwene anga wambela o diyala katenene kwenda, wixi: “Balumuka, zangula o kipoya kyé, ndé kubhata dyé.”
7 Mwene wa balumuka wayi kubhata dyê.
8 Kyoso o athu kya mono o ima yiyi, wôma wa akwata, anga a ximana Nzambi, wabhana o kutena kuku ku athu.
9 Mu kutunda bhobho, Jezú wamono diyala amwixana Matesu, waxikama bhu kididi kya kutambula o lubhaku, u mu tangela, wixi: “Kala u mukayedi wami.” Mwene wa balumuka anga u mu kayela.
10 Mu kubhita ithangana, kyoso kya kexile mudya* mu inzo ya Matesu, akwa kutambula o lubhaku ni akwa ituxi abhixila, ya amateka kudya* kumoxi ni Jezú ni maxibulu mê.
11 Mu kumona o ima yiyi, o Jifalizewu ebhula o maxibulu mê, exi: “Mukonda dyahi o mesene yenu udya kumoxi ni akwa kutambula o lubhaku ni akwa ituxi?”
12 Mu kwa evwa, Jezú wa ambela, wixi: “O athu adisanze ka bhindamena musaki, maji yó akate.
13 Mu kiki-phe ndenu mu dilonge ihi ilombolola o izwelu yiyi: ‘Nga mesena kwila akwenu mu akwatela henda, muveji dya ku ngi bhana jisata.’ Ki ngeza mu kwixana o athu a yuka, maji o akwa ituxi.”
14 Kyenyiki-phe o maxibulu a Nzwá a mu zukama, yá a mu ebhwidisa, exi: “Mukonda dyahi etu ni Jifalizewu twene mu jejuwala,* maji o maxibulu mé kene mu jejuwala?”
15 Jezú wa atangela, wixi: “O kwila o makamba a ngayala abhingi kudikwata mukôndo, kyoso o ngayala kyakala nawu kumoxi? Maji kwanda kwiza izuwa-phe o ngayala anda kwakatula nawu. Kyene kyanda jejuwala.
16 Kana muthu uta kibanji* kya mulele wa ubhe, ku kizwatu kyo ukulu. Mukonda o kibanji kya mulele wa ubhe kyanda sunga o kizwatu, o kutanduka kwê kwanda vula dingi.
17 Kyene we kimoxi, o athu kene muta vinyu ya ubhe mu jimbinda* jokulu, se abhanga kiki, o jimbinda janda baza, o vinyu yoso idibota, o jimbinda anga jibudika. Maji o athu ene muta vinyu ya ubhe mu jimbinda ja ubhe, yene yoso anga ikala kyambote.”
18 Kyoso kyakexile hanji mwatangela o ima yiyi, sayi nguvulu uzukama, u mu fukamena* anga uzwela, wixi: “Mu kithangana kiki, nga fika kwila mon’ami wa muhatu wafu kyá. Zá ute o maku mé kuthandu dyê, mwene n’a vutuke ku mwenyu.”
19 Mu kiki, Jezú ni maxibulu mê a balumuka, anga a mu kayela.
20 Sayi muhatu wakatele uhaxi wa kubhubha manyinga mu kwinyi ni kiyadi kya mivu, wa mu zukama kudima, anga u mu kwata ku mbandu ya kizwatu kyê,
21 mukonda mwene waxinganeka: “Se ngi kwata ngó ku kizwatu kyê, nganda disanza mwene.”
22 Jezú-phe usakuka, u mu tangela, wixi: “Kolokota mon’ami! O kixikanu kyé kya kubhangesa kudisanza.” Mu kithangana kyenyókyo o muhatu wadisanze.
23 Kyoso mwene kyabhixila m’onzo ya nguvulu, wamono akwa kuxika mimbu ya malamba,* ni mundu wavulu wakexile mu dila ni dízwi dya swina.
24 Jezú wambe: “Tundenu bhabha, mukonda o kilumba kafu, wayi ngó ku kilu.” Mu kiki o athu a kwata ku mwelela ni ku mu sebhulula.
25 Kya zubha kutubhula o mundu bhu kanga, mwene wabokona, wakwata mu lukwaku lwa kilumba, anga o kilumba ubalumuka.
26 O njimbu yalungu ni madiwanu yá, ya di mwange mu mbanza yoso.
27 Kyoso Jezú kyakexile mu tunda mu mbanza, ifofo iyadi ya mu kayela ni kudikola exi: “Mon’a Davidi, tu kwatele henda.”
28 Kya bokona m’onzo, o ifofo i bhixila kwa mwene, Jezú-phe wa a ebhula, wixi: “Mu xikina kwila, eme ngitena ku mi saka?” Ene atambwijila, exi: “Kyene mwene Ngana.”
29 Mwene anga, wa akwata ku mesu, uzwela, wixi: “Kibhite kála o kixikanu ki mwala na-kyu.”
30 O mesu mâ anga ajikuka. Mu kiki-phe, Jezú wa a tendelesa: “Alukenu, ki mu ki tangele muthu.”
31 Maji kyoso ene kya tubhuka, amwange o njimbu ya lungu ni mwene mu mbanza yoso.
32 Kyakexile mutunda, o athu a mu bhekela diyala dyexile dibubu, wakexile ni dimonyo;
33 kyoso o dimonyo kya di kaye, o dibubu dya zwela. Mundu woso wadiwana, yu wambe, wixi: “Kiluwa twa mwene kima kála kiki mu Izalayele.”
34 Maji o Jifalizewu azwela, exi: “Mwene ukaya o madimonyo ni kutena kwa mutwameni wa madimonyo.”*
35 Jezú anga umateka kwenda mu jimbanza ni mu jisanzala joso, mu kulonga mu malombe* mâ, ni kuboka o njimbu yambote ya Utuminu, ni kusaka o mauhaxi moso.
36 Mu kumona o athu, henda ya mu kwata, mukonda akexile mwa tatesa ni kwa lundujula kála jimbudi ja kambe mubhidi.
37 Kyenyiki-phe, Jezú watangela o maxibulu mê, wixi: “O idima yavulu phala ku ibhongolola, maji o akalakadi atolo.
38 Kyenyiki, dyondelenu kwa Ngana mukwa díbhya, atumikise akalakadi ku díbhya dyê.”
Footnotes
^ Mba, “kya xikamene ku meza.”
^ Mba, “a xikama ku meza.”
^ Mba, “kujila.”
^ Mba, “kibandeku.”
^ O jimbinda jiji, akexile mu ji bhanga ni ibha ya yama.
^ Mba, “wa mu ximana.”
^ Mba, “akwa kuxika jimbendu.”
^ Mwéne Dyabhu.
^ Tala o nota ya Matesu 4:23.
