Kwa Titu 1:1-16
1 Eme Phawulu, mubhika wa Nzambi ni poxolo ya Jezú Kidistu. Ngala ni kuxikana kala kwala naku yó a asolo kwa Nzambi ni kwijiya kwa kidi kwalungu ni ubhezelu wetu kwa Nzambi.*
2 O ima yiyi, ya xamenena ku kidyelelu kya mwenyu wakalelaku, wakanena Nzambi tundé xahulu, yó kene mutanga makutu.
3 Maji muthembu yê yatokala wejidisa o maka mê bhukaxi ka ukunji wa ngibhana, kala kyatumu Nzambi o Mubhuludi wetu.
4 Nga kusonekena Titu, eye u mon’ami wa kidi, mu kuxikana kwetu kutwala naku:
O henda ni kutululuka kutunda kwa Nzambi, o Tata ni kwa Kidistu Jezú Mubhuludi wetu, kukale n’eye.
5 Nga kuxisa mu Keleta phala utene kuyukisa o ima yabhengalala, ni kusola o tufunga mu jimbanza joso, kala ki nga kutendelesa:
6 o kafunga ki katokala kukala ni kikuma, maji akale munumi wa muhatu umoxi, an’ê akala ni kixikanu, ka atatele ufusa, né kuxibhaka.
7 Kuma mwene kimbadi kya Nzambi, o kafunga ki katokala kukala ni kikuma, mukwa kujiza, muthu uthathamana, hôlwa, mukwa jimvunda,* kakale we muthu wazolo o nganyu yaxidi,*
8 maji akale mukwa kuzalela o asonyi, uzola o ima yambote, mukwa kilunji, muthu wayuka, fiyele, uditumina o jihânji jê,
9 ukwata kyambote o maka a fiyele alungu ni uhete wê wa kulonga, phala atene kuswinisa* akwâ ni milongi yambote* ni kubazela yó azwela kyayibha yalungu ni milongi yiyi.
10 Mukonda sayi mayala avulu abhukumuka, azwela ima sé valolo, akwa kunganala, bengebenge yó a jijila o kijila kya kusaya.
11 Athu yá abhingi kwajika o makanu, mukonda akolokota mu kutondalesa miji yoso mu kulonga ima ki yatokala, mukonda dya kumesena o nganyu yaxidi.*
12 Sayi-ku polofeta mukwa ixi yâ, wambe: “Akwa Keleta akwa makutu, yama ya muxitu, imonya awabhela kudya kyavulu.”
13 O izwelu yiyi ya kidi mwene. Mukonda dya kiki, kolokota mu kwabazela ni kuswina, phala akale ni kixikanu kya kolo,*
14 kabhane mátwi ku misoso ya makutu ya Jijudé, ni ku itumu ya mayala axisa o kidi.
15 Phala o athu azele, ima yoso yazele, maji phala yó axidi akambe kuxikana, sé-ku kima kyazele, mukonda o ilunji yâ ni itongolwelu, yaxidi.
16 Ene amba kuma ejiya Nzambi, maji o ibhangelu yâ ilondekesa kwila, adituna Nzambi, mukonda ene athu ayibha, akwa kuxibhaka, kafwama kubhanga kikalakalu kyoso-kyoso kyambote.
Footnotes
^ Mba, “kusidivila Nzambi ni kuswina kwoso.”
^ Mba, “mukwa kubeta.”
^ Mba, “kudyodya akwâ.”
^ Mba, “kutendelesa.”
^ Mba, “ya disanze.”
^ Mba, “kudyodya akwâ.”
^ Mu Ngel.: “kya disanze.”
