MOZÉ uakexile múia izuua ioso ku mulundu ua Holebe mu sota iangu phala o jimbudi jê. Kuenhoko muéne ua mono kisasa kia uama, maji ki kia kexile mu jokota!

Mozé ua xinganeka, ‘Kiki madiuanu.’ ‘Nga-nda zukama phala ngi tale kiambote.’ Kioso kia zukama, ku kisasa kua tundu dízui, dixi: ‘Kana ku zukama dingi. Katula o jisabhatu, mukonda uemana mu mavu akôla.’ Nzambi uakexile mu zuela mu’axaxi ka anju, kienhiki Mozé ua di futu o pholo iê.

Nzambi-phe uixi: ‘Nga mu mona o hadi ia mundu uami mu Ijitu. Nga-nda ku a bhulula, nga-nda ku tumikisa eie phala ku katula o mundu uami ku Ijitu.’ Jihova ua mesene ku ambata o mundu uê mu ixi ia uabha ia Kanana.

Maji Mozé uixi: ‘Eme ki ngi tena. Kiebhi nga-nda tena ku bhanga kiki? Maji se ngia. Akua Izalaiele a-nda ngi ibhula, “Nanhi ua ku tumu?” Ihi nga-nda zuela?’

Nzambi ua tambuijila, ‘Ua-nda zuela kiki.’ ‘“JIHOVA o Nzambi ia Mbalahamu, o Nzambi ia Izake ni Nzambi ia Jakobo ua ngi tumikisa kó kuenu.”’ Jihova uambe dingi: ‘Didi diene o dijina diami katé ku hádia.’

Mozé ua vutuila, ‘Maji se ene ka ngi xikina kuma eie ua ngi tumu.’

Nzambi uebhula. ‘Ihi ua kuata bhu maku?’

Mozé ua tambuijila: ‘Mbangala.’

Nzambi uixi, ‘Takula-iu bhoxi.’ Mozé kia i takula, o mbangala ia bhiluka nhoka. Jihova uedikisa Mozé o madiuanu a mukuá. Muéne uambe: ‘Ta o lukuaku luê moxi dia izuatu.’ Mozé ua bhange kienhiki, kioso kia lukatula bhu kanga, lua zelele kala mbundu! Lukuaku lua kexile kala ió uala ni uhaxi ua dibhute. Jihova ua bhana kua Mozé o nguzu ia ku bhanga o kidiuanu kia katatu. Mu kusukáko muéne uixi: ‘Kioso ki ua-nda bhanga madiuanu oso iá, Izalaiele a-nda xikana kuma eme nga ku tumikisa.’

Kienhiki, Mozé uai kubhata iu ua ambela Jetulu: ‘Nga ku dióndo nge-hele ngi vutuke ku jindandu jami mu Ijitu, ngi tale kiebhi kiala.’ Kienhiki, Jetulu ua dilekela ni Mozé, anga Mozé ua vutuka mu Ijitu.