EIE UALA ni henda ia haxi íii? Dijina diê Jobe, o muhatu iú kaza diê. Uejiia se ihi ia mu zuelela kua Jobe? ‘Xinga Nzambi ni u fué.’ Ndoko tu tale mukonda diahi muéne ua zuela kiki, ni mukonda diahi Jobe ua talele o hadi ioso íii.

Jobe uexile diiala dia kixikiknu, ni ua belesele Jihova. Muéne ua tungile ku ixi ia Uze, ia zukamene ku Kanana. Jihova ua zolele kiavulu Jobe, maji kua kexile muthu ka mu zolele. Eie uejiia se nanhi?

Uexile Satanaji o Diabhu. Lembalala kuma, Satanaji o anju ia iibha ia zembe Jihova. Muéne ua bhangesa Adá ni Eva ku xibhaka Jihova, muéne ua banzele kuila u tena ku bhangesa athu oso ku xibhakela Jihova. O kuila muéne ua tenene ku bhanga kiki? Kana. Xinganeka ngó o maiala oso a kixikinu, u tua dilongo kiá. Majina akuxi uejiia?

Kiafú Jakobo ni Zuze mu Ijitu, Jobe uexile o diiala dia betele kota mu kixikinu kua Jihova mu ixi ioso. Jihova ua mesenene kuila Satanaji uijiia kuma muéne keji tena ku bhangesa athu oso kuiibha, kienhiki muéne uambe: ‘Tala Jobe. Tala o kixikinu kiê kôkuami.’

Satanaji ua tambuijila, ‘Muéne mukuá kixikinu,’ ‘mukonda ua mu zediuisa, ni ima iavulu iambote. Maji se u mu katula ioso, muéne ua-nda ku xinga bhu pholo iê.’

Kienhiki Jihova uixi: ‘Ndé ku pholo. Mu katule ioso. Bhanga ioso iaiibha i ua mesena ku bhanga kua Jobe. Tua-nda mona se muéne ua-nda ngi xinga. Kana ku mu jibha.’

Satanaji ua dianga ku bhangesa athu ku nhana o jingombe ni jikamelu ja Jobe, ni ku jibhisa o jimbudi jê. Muéne ua jibha ué 10 dia an’ê a maiala ni ahatu ku kitembu. Anga Satanaji ua bhana Jobe uhaxi uaiibha. Jobe ua talele hadi iavulu. Mukonda dia kiki o muhatu’ê ua mu ambela: ‘Xinga Nzambi ni u fué.’ Maji Jobe ka ki bhange kana. Mbe, makamba mê kitatu eza ku mu ambela kuma muéne uexile muthu uaiibha. Maji Jobe ua kolokota ni kixikinu kiê.

Kiki kia bhangesa Jihova ku sanguluka kiavulu, mu kusukáko muéne ua zediuisa Jobe, kala ki ua mu mona mu fikula. Muéne ua mu sake o uhaxi uê. Jobe ua vuala dingi 10 dia ana a uabha iu ua mu bhana luiadi jingombe, jimbudi ni jikamelu.

Ua-nda kala ni kixikinu kua Jihova mu ithangana ioso kála kia bhange Jobe? Se u ki bhanga, Nzambi ué ua-nda ku zediuisa. Eie ua-nda kala ni muenhu mu ixi katé ku hádia, kioso o ixi ki ia-nda iuka kala o jaludim ia Edene.