KIOSO kiafú Jelobouamu, o jisobha joso ja kexile mu tumina o 10-dia diembu dia Izalaiele exile jisobha jaiibha. O Sobha Akabe ua betele kota mu kala muthu uaiibha. Eie uejiia mukonda diahi? Mukonda dia muhatu uê, o Sobha iaiibha, Jezabele.

Jezabele kexile mukuá Izalaiele. Muéne uexile mon’a sobha ia Sídone. Muéne mubhezi a nzambi ia makutu Bahale, ua bhangesa ué Akabe, ni mundu uavulu ua akua Izalaiele kubheza Bahale. Jezabele ua zembele Jihova, iu ua jibhile o jipolofeta jê. A kamúkua a disuekele mu makungu phala ka a jibhe. Se Jezabele ua mesenene kima, muéne kala u jibha na kale na-kiu.

Saí kizuua, o Sobha Akabe ua luualele kiavulu. Kienhiki, Jezabele ua mu ibhula: ‘Mukonda diahi lelu, eie ua luuala?’

Akabe ua tambuijila, ‘Mukonda ia ngi tangela Nabote.’ Nga mesenene ku sumba o mividi uê. Maji muéne uambe, ki ngandala-mi.’

Jezabele uixi, ‘Ki bhuale kima.’ ‘Nga-nda i tambula phala eie.’

Kienhiki, Jezabele ua soneka mikanda ku atuameni mu mbanza mua tungile Nabote. Muéne ua ambela, ‘Tumina maiala aiibha phala azuele, kuma Nabote ua xingi Nzambi ni sobha.’ ‘Kienhiki, katulenu Nabote bhu kanga dia mbanza, mu takulenu matadi katé kiafua.’

Kioso Jezabele kiévu kuma Nabote uáfu, muéne uambela Akabe: ‘Nde kiá, ni u tambule o mividi. Eie ki u xikina kuma Jezabele ua tokalele ku mu kaxtikala, mu ku bhanga o kima kiki kiaiibha?

Mu kienhiki, Jihova ua tumu Jehú phala ku mu kaxtikala. Kioso Jezabele kiévu kuma Jehú iu uiza, muéne ua di phindala o mikasu, iu ua di iudikisa kiambote. Maji, kioso Jehú kia bhixila iu ua mono Jezabele mu njanela, muéne ua dikola ku maiala akexile mu sabhalalu: ‘Mu takulenu bhoxi!’ O maiala a belesela, kála ki ua mu mona mu fikula. Ene a mu takula bhoxi, inga muéne u fuá. Didi o disukilu dia Sobha iaiibha Jezabele.