Kioso Jezú kia kexile mu inzo ia thandu kumoxi ni jipoxolo jê, muene ua a tangele, uixi: ‘Usuku uenhú, enu oso mua-nda ngi xisa.’ Phetele uambe: ‘Eme kana! Né muéne se ene oso a ku lenga ni ku-kuxa, eme ki nga-nda ku lenga ni ku kuxisa.’ Maji Jezú uambela Phetele, uixi: ‘Kioso o dikolombolo kiluua di kokola, eie ua-nda ngi dituna lutatu kuila, ku ng’ijiia.’

Kioso o masoladi kia ambatele Jezú mu inzo ia Kaiafa, ku jipoxolo, avulu mudiâ a lengele. Maji kiiadi ngó akexile mu kaiela mu kaxi ka mundu. Umoxi iú Phetele. Muene ua bokona bhu kaxi ka lumbu lua nzó ia Kaiafa, anga u kuôta túbhia. Kuma kua zelele, sai muhatu mubhika, ua mono Phetele, uambe: ‘Eme nga kuijiia! Eie ua kexile kumoxi ni Jezú!’

Phetele uambe: ‘Kana, ki nga kexile nê! Ki ngejiia se maka ahi u ua mu zuela!’ Muene uai katé ku dibhitu dionene. Maji ki kubhiti kithangana kiavulu, kilumba kiéngi ua mu mono, iu ua tangela o mundu, uixi: ‘O diiala didi ua kexile ni Jezú!’ Phetele uambe: ‘Jezú, eme ki ngi muijiia, lémbua!’ Saí diiala uambe: ‘Eie ue ua kexile mu kuenda nê! Ngi zuela kiki mukonda dia ukexilu ué ua kuzuela, uedi kála ua akuá Ngalileia, kála ua Jezú.’ Phetele ua zuela ni kulôka, uixi: ‘Eme ki ngi muijiia!’

Mu kithangana kienhokio, o dikolombolo dia kokola. Jezú ua tale kudima anga Phetele ua mu mono. Muene ua lembalala o izuelu ia Jezú, anga uia bhu kanga iu ua mateka kudila kiavulu.

Mu kithangana kienhokio, o Atuameni ku inzo ia kufundisa, ambata Jezú ku lumbu lua nzó ia Kaiafa phala ku mu fundisa. Ene a mesenene kujibha Jezú, mu kiki a kexile mu sota o kikuma phala kubhanga kiki. Maji ene ka tenene kusanga ndunge mba kikuma phala ku mu jibha. Mu kusuka-ku, Kaiafa uebhuidisa Jezú, uixi: ‘O kuila eie u Mon’â Nzambi?’ Jezú uambe: ‘Eme muéne.’ Kaiafa uambe: ‘Ki tu bhindamena dingi jimbangi. Didi dixonguenu!’ Ene oso a tambuijila, exi: ‘O diiala didi ua tokala kufua.’ Ene a mateka  kubeta Jezú ni ku mu ta mathé, anga a mu futa o pholo, a mu bhana jihome, exi: ‘Se eie u polofeta, zambula-phe uoso ua ku beta!’

Kuma kuaki kiá, ene a kuata Jezú, a mu ambata katé mu inzo ia kufundisa, a mu ibhuidisa dingi, exi: ‘O kuila eie u Mon’â Nzambi?’ Jezú ua tambuijila uixi: ‘Eie muene ua kiambe.’ Mu kiki ene a mu tatela ni ku mu zuela kuila, ua kexile mu xonguena, mu kiki a mu ambatele mu inzo ia Pônsio Pilatu, o muenexi ua Loma. Ihi dingi ia bhiti? Tu mone.