Mutangi ua Zolo Jihova:

Jezú uambe, “o kidi mua-nda ku k’ijiia, o kidi anga ki mi bhana ufôlo.” (Nzuá 8:32) O izuelu íii, i tu suínisa kiavulu! Sumbala tuala mu “izuua íii isukidila-ku,” maji né kiki tu tena kuijiia o kidi, ku mundu iú uezala ni makutu. (2 Timote 3:1) O kuila eie u di lembalala hanji kioso ki ua mateka o ku di longa o kidi, kála ki jimbulula o Maka a Nzambi? Mu kidi, eie ua sangulukile kiavulu!

Maji o kima kia beta-kota, o ku kala ni kuijiia kuoso, ni kuboka o njimbu iambote izuua ioso ku akuenu, ni ku kala ni ukexilu uambote, kála ki tuene mu di longa mu Bibidia. Phala ku bhanga kiki, tua tokala ku kala mu henda ia Nzambi. Ihi ia bhingi? O izuelu ia Jezú ande dia kufuá, itambuijila o kibhuidisu kiki. Muéne uambe ku jipoxolo jê: “Se mu belesela o ijila iami, mua-nda kala mu henda iami, kála ki ngene mu belesela o ijila ia Tata iami, eme ngala mu henda iê.”​—Nzuá 15:10, NW.

Kála ki ua mono, Jezú ua kexile mu henda ia Nzambi, mu ku belesela o ijila ia Tat’ê. Kiene kimoxi ué ni etu lelu. Phala tu kale mu henda ia Nzambi, tua tokala ku belesela o milongi ia Bibidia izuua ioso ku muenhu uetu. Mu usuku uenió, Jezú uambe: ‘Se muejiia o ima íii, mu-nda zediua se mu i bhanga.’​—Nzuá 13:17.

Tua mesena kuila o divulu didi, di ku kuatekesa ku belesela o milongi ia Bibidia ku muenhu uê, ni ku kala ‘mu henda ia Nzambi, . . . ni ku kinga o muenhu ki uábhua.’​—Juda 21.