1, 2. (a) Mukonda diahi Hana ua luualele kiavulu kioso kia kexile mu longela o ima phala kuia mu Silo? (b) Ihi i tu tena o ku di longa ku musoso ua Hana?

 HANA ua kexile mu longela o ima phala kuenda njila, ni ku bhanga ioso phala ka banze mu malamba mê. Kieji kala kithangana kia ku sanguluka; ku mivu ioso, o muadi uê, Elikana, ua kexile múia ni muiji uoso mu tembulu mu Silo, phala ku bheza Nzambi. Jihova ua mesenene kuila o ithangana íii, i kale ithangana ia ku sanguluka. (Tanga Matendelelu 16:15.) Tundé kia mu vuala, Hana, ua sangulukile kiavulu kuia ku jifesa jiji. Maji o ima ia lungulukile, ki iexile dingi kala m’ukulu.

² Hana a mu zolele kiavulu kua muadi uê. Maji Elikana ua kexile ni muhatu uéngi. Dijina diê, Penina, ua mesenene ngó ku talesa hadi kua Hana ithangana ioso. Penina ua soto ukexilu ua ku bhangesa Hana ku tala hadi katé muene mu ithangana ia kuia mu fesa. Ukexilu uebhi? Kiebhi o kixikanu kia kexile na-kiu Hana kua Jihova, kia mu kuatekesa ku dibhana ni maka a bhonzele kiavulu? Ni kiebhi o kixikanu, kia kuatekesa Hana ku dibhana ni ibhidi? Se ua mu bhita mu ibhidi i ku tolokela o muxima, o musoso ua Hana ua-nda ku kuatekesa kiavulu.

3, 4. Ibhidi iebhi iiadi ia kexile mu dibhana na-iu Hana ni mukonda diahi o ibhidi iiadi íii, iexile ibhidi ia makota?

³ O Bibidia i zuela kuila Hana ua kexile mu dibhana ni ibhidi iiadi ku muenhu uê. Mu kibhidi kia dianga, muéne kexile ni kutena kua soko phala ku batula o maka, mu kibhidi kia kaiiadi, ka kexile ni kutena né ngó kibanzelu. O kibhidi kia dianga, muadi uê ua kexile ni muhatu ua mukuá, ua zembele kiavulu Hana. O kibhidi kia kaiiadi, Hana ka kexile mu vuala. O ku kamba o ku vuala, ku luualesa kiavulu o muhatu ua mesena ku kala ni mona, maji kiexile kibhidi kia dikota mu izuua ia Hana. Mukonda athu oso a mesenene ku vuala ana phala ku suluka ni dijina dia muiji. O ku kamba o ku vuala kiexile jisonhi javulu phala o muhatu.

⁴  Hana nange ueji tena ku kolokota mu maka enhá se Penina ka mu talesele hadi. Tundé m’ukulu o ku sokana hongo, ki kima kiambote. Kuexile mu bheka unguma, jinvunda ni ndolo ku muxima. Ki uene o ukexilu ua zuelele Nzambi mu jaludim ia Edene kuila, o diiala u kala ngó ni muhatu umoxi. (Dim. 2:24) O musoso iú ua lungu ni muiji ua Elikana, ulondekesa kuila, o Bibidia ki i xikina o hongo, kana.

5. Mukonda diahi Penina ua mesenene kuila Hana u tala hadi ni kiebhi muéne kia kexile mu bheka lamba ku muxima ua Hana?

⁵ Elikana ua zolele dingi Hana. Saí madivulu a Jijudé, alondekesa kuila Elikana ua dianga ku kazala ni Hana, mu ku bhita mivu, kiene kia kazala ni Penina. Maji, Penina ua kexile ni difuba diavulu iu ua kexile mu sota masunga phala ku talesa hadi kua Hana. O Penina ua tundile ngó Hana mu ku vuala. Muéne ua kexile ni ana avulu iu ua kexile mu di zangeleka kiavulu. Mu veji dia ku kala ni henda ia Hana ni ku mu konda o malamba, Penina ua kexile mu luualesa dingi o mukajin’ê mukonda dia ku kamba o ku vuala. O Bibidia i zuela kuila, Penina ua kexile mu bhanga phoko ia Hana, “phala n’a kale ni malamba.” (1 Sam. 1:6) Muéne ua kexile mu bhanga kiki mu vondadi iê muene. Ua mesenene ku bheka malamba ku muxima ua Hana.

6, 7. (a) Sumbala Elikana ua mesenene ku kuatekesa Hana, mukonda diahi Hana ka mu tangela o ima ioso ia kexile mu bhanga Penina? (b) O kuila mukonda dia ku kamba o ku vuala, ulondekesa kuila Jihova ua zembele Hana? Jimbulula. (Tala ku luiji.)

⁶ Penina nange ua kexile mu zukutisa dingi Hana mu kithangana kia kuia mu Silo. Elikana ua kexile mu bhana ku ana a Penina​—“an’ê a mala ni a ahatu”​—sata phala ku i bhana kua Jihova. Maji mukonda dia ku kamba ku vuala, Hana akexile ku mu bhana ngó mbandu imoxi ia mu tokalele, kuabhu. Penina ua kexile mu sebhulula Hana mu ku mu tangela veji javulu kuila uexile mbaku, mukonda dia kiki-phe, Hana ua kexile mu dila kiavulu ni ku fula o kúdia. Elikana ua mono kuila o muhatu’ê ua kazola ua luualele kiavulu ni ku fula o kúdia, iu ua soto o ku mu kuatekesa. Muéne ua mu uebhula: “Eie Hana ua mu didila-hi? Ua mu fudila-hi kúdia? Ihi ia ku kate ku muxima? Manhi eme ki nga ku kala kota, o kuinhi dia mona ndenge?”​—1 Samuuele 1:4-8.

⁷ Elikana uejidile kuila, Hana ua luualele kiavulu mukonda dia ku kamba o ku vuala. Hana ua sanguluka mukonda dia Elikana ku  mu londekesa henda. a Maji Elikana ka zuela o ima ia iibha ia kexile mu bhanga Penina, o musoso ua Bibidia ki ulondekesa ué se Hana ua zuela ni muadi uê o ima ia kexile mu bhanga Penina mba kana. Nange muéne ua mono kuila, o ku tanga o ima ia kexile mu bhanga Penina, kueji vudisa ngó o maka. O kuila Elikana ueji tena ku batula o maka? O kuila Penina keji sebhulula dingi Hana? Ihi i tuamba ia lungu ni ana ni abhika a muhatu iú ua iibha, keji sebhulula uá Hana? Hana ueji divua kála musonhi ku dibhata diê muene.

8. Kioso kia tu bhanga ima ia iibha, mukonda diahi kima kiambote kuijiia kuila Jihova, o Nzambi ia iuka?

⁸ Né muene se Elikana uejidile o ima ia iibha ia kexile mu bhanga Penina mba kana, tua tokala kuijiia kuila Jihova ua kexile mu mona ioso ia kexile mu bhita. O Maka mê, o Bibidia, ilondekesa kuila muéne ua monene ioso ia kexile mu bhita ni ku dimuna oso a bhanga ima ia iibha mukonda dia luímbi ni difuba. Kienhiki, o athu sé kikuma kála Hana, a tena ku sanguluka mu kuijiia kuila, o Nzambi ia iuka, u tena ku batula o maka oso mu kithangana kia tokala ni mu ukexilu uê. (Tanga Matendelelu 32:4.) Hana sé phata uejidile o kidi kiki, iu ua lengela kua Jihova mu ku sota kikuatekesu.

9. Ihi i tu tena ku di longa ku phangu ia Hana ia kuia mu Silo, sumbala uejidile kiá ihi ieji mu bhanga o mukajin’ê?

⁹ Mu kimenemene, athu oso a thandanganhele mu ku bhanga kima. Enioso katé ni ana-ndenge, akexile mu di pelepalala phala kuenda njila. Phala ku bhixila ku Silo, o muiji uoso ua tokalele kuenda 30 a ji kilómetulu mu ku bhitila ku milundu ia Ifalaíme. b Se kuendela bhoxi, a bhanga kizuua kimoxi mba izuua iiadi mu njila phala ku bhixila. Hana uejidile ihi ieji bhanga o mukajin’ê. Maji né kiki, muéne ka xala kubhata. Mu kiki, Hana ua bhana phangu iambote ku jiselevende ja Nzambi lelu. Ki tu tokala kuehela kuila o ukexilu ua iibha ua akuetu, u tu fidisa ku bheza Nzambi, mukonda kiki kieji tu fidisa ku tambula o mabesá a tena ku tu kuatekesa o ku kolokota.

10, 11. (a) Mukonda diahi Hana uai mu tembulu? (b) Kiebhi Hana kia jikula o muxima uê kua Tat’ê ia diulu?

¹⁰ Mu ku bhita kizuua mu njila mu ku bhitila ku milundu, o muiji u zukama mu Silo. Mu ku bhixila, Hana ua kexile mu xinganeka  mu ima ia tokalele kuzuela kua Nzambi bhu kaxi ka musambu. Kienhiki kioso kia bhixila, o muiji uoso adi kumoxi. Hana ua tundu bhu kaxi ka muiji anga uia mu tembulu ia Jihova. O Mukunji ua Dikota Eli, bhene bhua kexile, ua xikamene bhu mbandu ia dibhitu. Maji Hana ka mono Eli, mukonda muéne ua kexile mu xinganeka mu musambu ueji bhanga muéne kua Nzambi. Muéne ua dielele kuila eji ku muivua. Se ki kuexile muthu ueji kuívua o maka mê, o Tat’ê ia diulu ueji kuívua. Muxima uê uezalele ni malamba katé kia suku ni ku dila.

¹¹ Ni ku dila, Hana u jikula o muxima uê kua Jihova. O mizumbu iê ia kexile mu teketa mu ku banza mu izuelu ia tokalele o kuzuela phala kulondekesa o ndolo ia kexile mu divua. Muéne ua bhange ithangana iavulu mu kuzuela ni Tat’ê mu ku mu tangela ioso ia kexile ku muxima uê. Maji ka bhingi ngó phala Nzambi ku mu bhana mona kana, ua mesenene ué ku bhana ioso ia tenene. Kienhiki, ua kanena kuila se u vuala mona, ueji mu bhakula kua Jihova phala ku sidivila mu tembulu iê izuua ioso.​—1 Sam. 1:9-11.

12. Kála kilondekesa o musoso ua Hana, ihi i tua tokala ku lembalala kioso ki tu samba?

¹² Mu kiki, Hana ua bhana phangu iambote ku jiselevende ja Nzambi mu ku samba. Jihova uixana o athu phala ku jikula o mixima iâ kua muéne sé uôma ni ku mu tangela ioso ia mu bhita na-iu, kála ki bhanga o mona kua tat’ê ia henda. (Tanga Jisálamu 62:8; 1 Tesalonika 5:17.) Nzambi ua tumina poxolo Phetele ku soneka o izuelu íii ia lungu ni kusamba: ‘Hele ienu ioso xile-nu-iu Nzambi, kuma muéne ua mi kuatela muanu.’​—1 Phe. 5:7.

13, 14. (a) Ihi ia banzele Eli ia lungu ni Hana ni mukonda diahi? (b) Kiebhi Hana kia bhana phangu iambote ia kixikanu mu ku tambuijila Eli?

¹³ Maji o athu ka difu ni Jihova mu kuívua akuâ. Kioso Hana kia kexile mu samba ni ku dila, ua sasumuka mu kuívua dízui. Diexile dízui dia Eli, o mukunji ua dikota ua kexile ku mu mona. Muéne uambe: ‘Mbambe bhebhi, bhu ua-nda ku suka ni ku kodiua? Vinhu iê tula-iu.’ Eli ua monene o mizumbu ni mukutu ua Hana ua kexile mu teketa kala ua thandanganha. Mu veji dia kuibhuidisa ihi ia kexile mu bhita, muéne ua zuela kuila Hana ua kodiuile.​—1 Sam. 1:12-14.

¹⁴ Hana ua luualele kiavulu mu kuívua o izuelu ioio i bheka malamba ku muxima​—ku dikanu dia diiala uexile mukunji ua dikota! Maji muéne ua bhana ué phangu iambote ia lungu ni kixikanu. Muéne kehela kuila o ukexilu ua muthu ua ituxi, u mu fidisa ku bheza Jihova. Ni kulenduka kuoso, muéne ua jimbulula kua Eli ihi ia kexile mu bhita ni muéne. Nange mu ku mona kuila ua luezele, u mu zuela ni henda ioso: ‘Ndé ni kutululuka, Nzambi ia Izalaiele a ku bhane ujitu uoso u ua mu bhingi.’​—1 Sam. 1:15-17.

15, 16. (a) Kiebhi kia divu Hana mu ku jikula o muxima uê kua Jihova ni ku bheza mu tembulu? (b) Kiebhi ki tu tena ku kaiela o phangu ia Hana se tu toloka o muxima?

¹⁵ Kiebhi  Hana kia divu kioso kia jikula o muxima uê kua Jihova ni ku mu bheza mu tembulu? O musoso u zuela: ‘Muhatu anga u ila njila iê, u kala mu kudia kiá; muéne ka thandanganhele dingi.’ (1 Sam. 1:18) A Bíblia de Jerusalém i zuela: “Muéne ka luualele dingi.” Hana ua divu kiambote. Muéne ua tula o ibhidi iê kua Tat’ê, Jihova. (Tanga Jisálamu 55:22.) O kuila kuala maka a bhonzo phala Jihova kua batula? Kana.

¹⁶ Se tu toloka o muxima, tua tokala ku kaiela o phangu ia Hana ni kuzuela ni muxima uoso ni io a mu ixana mu Bibidia ‘mukua kuívua o misambu.’ (Jisá. 65:2) Se tu bhanga kiki ni kixikanu kioso, bhu kididi kia muxima ua toloka, tua-nda ta-ku, ‘o kutululuka kua Nzambi ku somboka o kitongoluelu kioso kia muthu.’​—Fil. 4:6, 7.

17, 18. (a) Kiebhi Elikana kia londekesa kuila ua xikinine o kikutu kia bhangele Hana? (b) Penina ka tenene dingi ku bhanga ihi?

¹⁷ Mu kizuua kia mukua mu kamene, Hana uai dingi mu tembulu kumoxi ni Elikana. Hana nange ua tangele kua muadi uê o kima kia bhingile kua Nzambi ni kikanenu kia bhange muéne, mukonda mu Kitumu kia bhanene Nzambi kua Mozé, o diiala u tena ku batula o kikutu ki bhanga o muhatu sé ku mu tangela. (Dia. 30:10-15) Maji o diiala didi dia fiiele ka batula o kikutu kia bhangele o muhatu’ê. Mu veji dia kiki, muéne ni Hana a bheza Nzambi mu tembulu ande dia ku vutuka ku bhata.

¹⁸ Kithangana kuxi Penina kia mono kuila ka mu tena dingi ku bhangesa Hana ku tala hadi? O musoso ki u tu tangela, maji o kizuelu, ‘muéne ka thandanganhele dingi,’ kilondekesa kuila tundé o kithangana kieniókio, Hana ua sangulukile. Penina ua mono kuila o ukexilu uê ua iibha ua ku talesa hadi kua Hana, ki u kexile dingi ni nguzu. O Bibidia ki i tumbula dingi o dijina dia Penina.

19. Dibesá diahi dia tambula Hana, ni kiebhi muéne kia londekesa kuila uejidile nanhi ua mu besoala?

¹⁹ Kua bhitile mbeji javulu, o kutululuka kua Hana kua mu bhekela kisangusangu kia dikota. Muéne uemitine! Maji Hana ka di jimbile o muthu ua mu bhele o dibesá. Kioso kia vuala o mona, muéne ua mu luku o dijina dia Samuuele, dilombolola, “Dijina dia Nzambi,” nange phala ku kola o dijina dia Nzambi kála kia bhangele Hana. Ku muvu uenhó, muéne ka ile ni Elikana ni muiji uê mu Silo. Muéne ua xala kubhata katé kia zubha o ku mua muisa o  mona. Muéne ua suínisa o muxima uê mukonda ueji di lekela ni mon’ê ua kazola.

20. Kiebhi Hana ni Elikana kia kumbidila o kikutu kia bhangele kua Jihova?

²⁰ Muéne ua luualele kiavulu mu ku di lekela ni mon’ê mu tembulu. Hana uejidile kuila Samuuele eji mu langa kiambote mu Silo, nange kua ahatu akexile mu kalakala mu tembulu. Maji uexile hanji mona-ndenge! Mama uebhi keji mesena ku kala ni mon’ê? Maji né kiki, Hana ni Elikana ambata o mona, mu vondadi iâ phala kulondekesa o kisakidilu kiâ. Ene a bhana sata mu tembulu ia Nzambi anga a bhana Samuuele bhu maku a Eli, ni ku tumbula o kikutu kia bhangele Hana mivu ku dima.

21. Kiebhi o musambu ua bhange Hana kua Jihova, ulondekesa kuila muéne ua kexile ni kixikanu kia kolo? (Tala ué o kaxa, “ Misambu Iiadi ia Katunda.”)

²¹ Mu kiki-phe, Hana ua bhange musambu uambote ua bhangesa Nzambi ku u sonekesa mu Bibidia. Mu ku tanga o izuelu iê mu divulu dia 1 Samuuele 2:1-10, ua-nda mona o kixikanu kia kolo kia kexile na-kiu Hana kua Nzambi. Muéne ua ximana Jihova mu kutena kuê​—mu uhete uê ua ku tobhesa o akua ku dizangeleka, ku besoala oso a tate ni ku buikisa o athu a iibha mba ku fukununa oso afú. Muéne ua ximana Tat’ê mukonda dia ku zela kuê, ku iuka kuê ni ufiiele uê. Hana ua zuela: ‘Kana-ku ndanji iéngi i soka ni Nzambi ietu.’ Jihova, Nzambi a tokala ku mu dielela, ka lunguluka, dilengelu phala oso a toloka mixima, a mesena o kikuatekesu kiê.

22, 23. (a) Mukonda diahi tu tena kuzuela kuila Samuuele uejidile kuila a mu zolele kiavulu ku jitata jê? (b) Kiebhi Jihova kia besoala dingi Hana?

²² Sé phata, Samuuele ua zediuile kiavulu mu ku kala ni mama ia dielele kua Jihova ni muxima uê uoso. Sumbala muéne ua kexile ni jihenda ja manh’â kioso kia kexile mu kula, Samuuele nuka ua divuile  ubheka uê. Mivu ioso, Hana ua kexile múia mu Silo, ni divunga phala Samuuele ku zuata mu ku bhanga o sidivisu mu tembulu ia Jihova. Hana muéne ua kexile mu tunga o divunga mu ku londekesa o henda iê kua mon’ê. (Tanga 1 Samuuele 2:19.) Xinganeka Hana ku ta o divunga kua mon’ê, ku mu zuelesa ni henda ioso ni ku mu suínisa! Samuuele ua zediuile kiavulu mu ku kala ni mama ia henda, o kioso kia kulu, ua kituka ué dibesá phala o jitata jê ni Izalaiele ioso.

²³ Hana ué ka kexile mu divua ubheka uê kana. Jihova ua mu besoala dingi ni ana atanu. (1 Sam. 2:21) O dibesá dia beta o kota phala Hana, nange o ukamba uê ni Jihova, ua kexile mu dibandekesa mivu ni mivu. Tua mesena kuila kiki ki bhita n’eie mu ku kaiela o kixikanu kia Hana.