1, 2. (a) Ibhidi iahi ia kexile mu dibhana na-iu Zuze ni muiji uê? (b) Njimbu iahi ia iibha ia tangele Zuze kua muhatu’ê?

 ZUZE u ta dingi imbamba ku thandu dia bulu. U suku hanji mu Beleme, muéne u tala mu jimbandu kioso kia mu longela o imbamba ku bulu. Zuze ua mu banza mu njila ia-nda bhanga. Ku Ijitu! Kididi kia ubhe, kua zuela dimi diéngi ni ifua iéngi​—o kuila o muiji uê ueji tena ku jidila o ukexilu ua ubhe?

² Kia bhonzele kiavulu Zuze kuzuela kua muhatu uê, Madiia, ia lungu ni njila ieji bhanga. Maji Zuze ua sungu nguzu iu ua zuela kua Madiia o nzoji ia kuila saí anju ia mu tangela o njimbu ia Nzambi: O sobha Helode ua mesenene ku jibha mon’â! Ene a tokalele ku tunda-ko ni lusolo (Tanga Matesu 2:13, 14.) Madiia ua kexile ni uôma uavulu. Mukonda diahi kuexile muthu ua mesenene ku jibha mon’ê ka bhangele kima? Né Madiia né Zuze kejidile se mukonda diahi. Maji a dielela kua Jihova, ia a mateka o ku longela o imbamba.

3. Jimbulula se kiebhi Zuze ni muiji uê kia tundu mu Beleme. (Tala ué o foto.)

³ Kioso athu oso mu Beleme kia kexile hanji mu zeka, se kuijiia ihi ia kexile mu bhita, Zuze ni Madiia ni mona, a xisa o mbanza. A kulumuka ku mbandu ia luiji, o dikumbi dia kexile mu tunda kiá, Zuze nange ua kexile mu banza se ihi ieji bhita na-iu ku pholo. Kiebhi o muthu ua lenduka, kalupindelu, kieji tena ku langa o muiji uê bhu maku a athu a iibha? O kuila muéne ueji tena ku dikila o muiji uê? O kuila ueji tena ku kolokota mu ku kumbidila o kikalakalu kia mu bhanene Jihova Nzambi kia ku sasa ni ku langa o mona? Zuze ua kexile ni kikalakalu kiavulu ku pholo. Mu ku di longa kiebhi muene kia kumbidila ni ufiiele uoso o kikalakalu kiê, tua-nda mona se mukonda diahi o maiala, jitata​—ni etu oso​—tua bhingi ku kaiela o kixikanu kia Zuze.

4, 5. (a) Kiebhi kia lunguluka o muenhu ua Zuze? (b) Kiebhi o anju kia suínisa Zuze ku xikina o kikalakalu kia dikota?

⁴ Mbeji ku dima, kioso Zuze kia kexile mu mbanza ia Nazalé,  o muenhu uê ua lunguluka kioso kia kituka dibhanga dia mon’a Heli. Zuze uejidile kuila Madiia uexile munzangala uambote, ua kexile ni kixikanu kia kolo. Maji ua mono kuila muéne uemitine! Muéne ua mesenene ku mu xisa sé athu ku kijiia phala ka mu sebhulule ku athu. a Maji kua mu monekena anju mu kilu ia mu tangela kuila Madiia uemitine bhu kaxi ka nzumbi ikôla ia Jihova. o anju ia mu tangela ué kuila o mon’ê ueji “bhulula athu’ê ku ituxi iâ.” Muéne ua tululukisa Zuze mu kuzuela: ‘Ku kale ni uôma ua ku tambula muhatu’ê Madiia.’​—Mat. 1:18-21.

⁵ Zuze muthu uambote, ua belesela, ua bhange kala kia mu tangela o anju. Muéne ua xikina o kikalakalu kia dikota: ku sasa ni ku langa o mona, sumbala ka mu tokalele, mona ua betele o kota phala Nzambi. Mu ku bhita thembu, phala ku belesela o kitumu kia bhele o nguvulu ia Loma, Zuze uambata o muhatu’ê uemita mu Beleme phala ku disonekesa. Kuenhoko, kuene kua vualela o mona.

6-8. (a) Ihi dingi ia bhitile ia lungulula o muenhu ua Zuze ni muiji uê? (b) Ihi ilondekesa kuila Satanaji muene ua tumikisa o “théthembua” íii? (Tala ué ku luiji.)

⁶ Zuze ka vutuka ni muiji ué ku Nazilé. Mu veji dia kiki, ene a xalela mu Beleme, phala ku bhixila mu Jeluzaleme enda 10 dia kilómetulu. Sumbala exile jingadiama, Zuze ua bhange ioso phala ku langa Madiia ni Jezú phala ka tale hadi. Mu ku bhita thembu akexile kia ni dibhata diâ. Kioso Jezú kia kulu kiá​—nange ua kexile ni muvu umoxi​—o ukexilu ua muenhu uâ ua lunguluka dingi.

⁷ Kibuka kia maiala a tula kubhata diâ, exile jimesene a di longa o jithéthembua akua Tundila-kumbi, nange a tundile ku Babilonha. Ene a kaiele o “théthembua” katé kubhata dia Zuze ni Madiia, ia akexile mu sota o mona ueji kala o sobha ia Jijudé. O maiala enhá exile athu ambote, a xila akuâ.

⁸ Né muene se ene ejidile mba kana, o jimesene jiji, a tele o muenhu ua mona iú mu iluezu. O “théthembua” ia diangele ku a endesa mu Jeluzaleme, kana mu Beleme. b Ene a zuela kua sobha ua iibha, Helode kuila akexile mu sota o mona ueji kala o sobha ia Jijudé. Kiki, kia bhangesa o sobha ku kala ni difuba ni njinda iavulu.

9-11. (a) Kiebhi o ji-anju ja betele o kutena, Helode ni Satanaji ndenge? (b) Kiebhi o njila ia bhangele phala kuia mu Ijitu ki i difu ni misoso ia makutu ni jisabhu?

⁹ Maji kua kexile ji-anju ja betele o kutena, Helode ni Satanaji  ndenge. Maji kiebhi? Kioso asonhi kia bhixila kubhata dia Jezú, ia a mu mono ni manh’â, a mu bhana maujitu avulu. Nange Zuze ni Madiia a sasumukine kiavulu mu ku tambula “ujitu, ni ulu, ni uasu ua dizumba ua libana”​—ima iala ni valolo iavulu! O jimesene jiji ja mesenene ku tangela o Sobha o kididi kua kexile o mona. Maji Jihova ua a fidisa. Mu nzoji, Jihova ua a longesa ku vutukila njila iéngi​—Tanga Matesu 2:1-12.

¹⁰ Kioso o jimesene kia tundu, ku moneka anju ia Jihova ia dimuna Zuze: “Balumuka, u katule kamona ni mam’â, u lengele ku Ejitu; ua kale koko katé bhuoso bhu ngi ku ixanena. Mukonda Helode ua-ndu sota o Kamona, phala ku ka jibha.” (Mat. 2:13) Kala ki tua di longo kiá ku dimatekenu dia kibatulu kiki, Zuze ua belesela ni lusolo. Muéne ua bhange ioso phala ku langa mon’ê, iu uambata o muiji uê ku Ijitu. Ni maujitu oso a tambuile, Zuze ua kexile ni ima iavulu ieji ku a kuatekesa ku kala kiambote ku Ijitu.

¹¹ Mu ku bhita thembu, kua tukuluka misoso ia makutu ni jisabhu ja zuelele kuila, Jezú mu madiuanu ua butisa o njila ia tokalele kuenda, ua fidisa o jibandi ku a bhanga kia iibha, iu ua bhangesa muxi ku bhetama phala Madiia ku kanza-ko kibundu. c Mu kidi, o njila ia lebhele kiavulu, ia bhonzele ué kiavulu, akexile mu kuenda sé kuijiia kuebhi kua kexile múia.

12. Ihi ia tena ku di longa o jitata a sasa ana ku mundu iú ua iibha kua Zuze?

¹² O jitata a tena ku di longa kiavulu ku phangu ia Zuze. Muéne ua xisa ioso ia kexile mu bhanga, iu ua xisa ué o dibhata diâ phala ku langa o muiji uê mu iluezu. Kiki kilondekesa kuila muéne ua kexile mu mona o muiji uê kala ujitu u kola kia mu bhanene Jihova. O jitata lelu, ene mu sasa o tuana tuâ ku mundu iú ua iibha, kuene ima iavulu i tena kuta o muenhu ua tuana tuâ mu iluezu. Kienhiki, kala kia bhange Zuze, jitata javulu a bhanga ioso phala ku langa o tuana tuâ ku ima ia iibha ia mundu i ta o muenhu ua tuana tuâ mu iluezu, mu kiki, tua tokala ku a ximana kiavulu!

13, 14. Mukonda diahi Zuze ni Madiia a vutuka ku Nazilé phala ku sasa o muiji uâ?

¹³ Nange ene ka nangenene kiavulu ku Ijitu, mukonda o anju  ia tangela Zuze kuila Helode ua fuile. Kienhiki, Zuze ua vutuka ni muiji uê ku ixi iâ. Saí kikanenu kiambele kuila Jihova ueji kuixana Mon’ê “mu Ejitu.” (Mat. 2:15) Sumbala Zuze ua kuatekesa ku kumbidila o kikanenu kiki, maji kuebhi-phe kueji kuambata o muiji uê?

¹⁴ Zuze ua dilangele dingi. Muéne ua kexile ni uôma ua sobha ua bhinganene Helode, Alakelau uexile ué sobha ia iibha, kijibhangânga. Bhu kaxi ka Nzambi, Zuze uambata o muiji uê ku mbandu ia thunda, dikanga dia Jeluzaleme mu ku lenga o iluezu, ni ku vutuka ku Nazilé ku mbanza kua mu vualela mu Ngalileia. Kuenhoko, Zuze ni Madiia kuene kua sasela o muiji uâ.​—Tanga Matesu 2:19-23.

15, 16. Kiebhi kiexile o kikalakalu kia kexile mu bhanga Zuze ni jifalamenda jebhi ja kexile mu kalakala na-ju?

¹⁵ Kuenhoko, ene ka kexile ni ima iavulu​—a dibhanene ni ibhidi. Mu kuzuela kuila Zuze uexile kalupindelu, o Bibidia i zuela kuila muéne ua kexile mu kalakala ni mabaia, ku batula mixi, ku ji bheka kubhata, ni ku i songa kiambote phala ku bhanga jinzo ni jibaluku, milonde iofele, makalu, malola ni ima ia mukuá ia mábhia. (Mat. 13:55) Ua kexile ni kikalakalu kia dikota. Kala ki zuela o Bibidia, o kalupindelu ua kexile mu kalakala bhua zukama o inzo iê.

¹⁶ Zuze ua kexile mu kalakala ni falamenda javulu. Saí jifalamenda, tat’ê muéne ua mu bhanene na-ju, pulumu, maxado, lapi, dinha, selote, malutelu, jipheleku, njangu, ni jifalamenda ja mukuá, sumbala a ji tele kalu iavulu.

17, 18. (a) Ihi ia di longo Jezú kua tat’ê Zuze? (b) Mukonda diahi Zuze ua kexile mu kalakala kiavulu?

¹⁷ Xinganeka Jezú, mon’a-ndenge hanji ku mona tat’ê, Zuze ku kalakala. Ni mesu a jikuka, muéne ua kexile mu mona kiambote o kikalakalu kia kexile mu bhanga Zuze, nange Jezú ua diuanene kiavulu mu ku mona o uhete ni unjimu ua Zuze mu ufunu uê. Nange Zuze ua longo mon’ê Jezú o ima iofele mu kikalakalu kiê, kála o ku zelesa o mabaia a xidi. Nange ua mu longo ué ku mona o idifua ia mabaia ni kuijiia ué o mixi ioso​—kala o mixi ia mifiku ni mixi ia midiva.

¹⁸  Jezú ua di longo ué kuila o maku akexile mu batula o mixi ni ku songa o mabaia, ene ué akexile ku nzenza nau muéne, manh’â, ni phange jê. Mu ku bhita thembu, Madiia ni Zuze a vuala dingi ana a samanu. (Mat. 13:55, 56) Kienhiki, Zuze ua kexile mu kalakala kiavulu phala ku dikila oso kubhata.

19. Kiebhi Zuze kia kexile mu dikila o muiji uê mu nzumbi?

¹⁹ Maji Zuze uejidile kuila o ku dikila o muiji uê mu nzumbi, kuene kua betele dingi kota phala muéne. Kienhiki, ua kexile mu katula kithangana phala ku longa o muiji uê ia lungu ni Jihova Nzambi ni itumu Iê. Muéne ni Madiia akexile ni kifua kia kuambata o tuana tuâ mu tembulu, mua kexile mu tanga o kitumu ni ku ijimbulula kiambote. Nange Jezú ua kexile mu bhanga ibhuidisu iavulu, maji Zuze ua kexile mu bhanga ioso phala ku mu tambuijila. Zuze ua kexile mu kuambata ué o muiji uê mu jifesa mu tembulu mu Jeluzaleme. Mivu ioso, muéne nange ua tokalele kuenda semana jiiadi mba 110 ia kilómetulu phala kuia mu fesa ia Phasu ni ku vutuka kubhata.

20. Kiebhi o atuameni a muiji lelu kiene mu kaiela uâ o phangu ia Zuze?

²⁰ Lelu o atuameni a muiji ene mu kaiela uâ o phangu ia Zuze. Ene a bhanga ioso phala ku dikila o tuana tuâ, bhenge-bhenge mu ukexilu ua nzumbi, ima ia mukuá ndenge. O jitata enda kiavulu phala ku ambata o ana mu iônge ioso. Kala kia bhangele Zuze, ene ejiia kuila o kima kia beta o kota, o ku dikila o tuana tuâ mu nzumbi.

21. Kiebhi kiexile o fesa ia Phasu phala o muiji ua Zuze ni kiebhi Zuze ni Madiia kiéza mu mona kuila Jezú ua jimbidile?

²¹ Kioso Jezú kia kexile 12 dia mivu, kala kia kexile kiá mu bhanga, Zuze uambata o muiji uê mu Jeluzaleme. Kiexile mu kithangana kia fesa ia Phasu o miji akexile mu kuenda kumoxi phala kuia mu fesa íii. Mu ku zukama mu Jeluzaleme ia kexile ku tunda, athu avulu akexile mu kuimba jisálamu mba o mimbu ia ku banda milundu. (Jisá. 120–134) O mbanza iezalele ni athu avulu. Kioso kia zubha o fesa ia Phasu, athu oso akexile mu vutuka kala muthu kubhata diê. Kuma Zuze ni Madiia a lalamene ni ima iavulu, a banzele kuila Jezú ua kexile mu kuenda ni akuâ, nange ni jindandu jengi. Mu kuenda kizuua kia muvimba, a mono kuila​—Jezú ua jimbidile!​—Luka 2:41-44.

22, 23. Ihi ia bhangele Zuze ni Madiia kioso kia mono kuila o mona ua jimbidile?

²²  Ene a vutuka mu Jeluzaleme ia a soto Jezú mu ididi ioso. Ene a sange o mbanza ki mua kexile–ku dingi athu avulu, kienhiki a mateka o kuenda mu ikoka-ikoka ni ku kola o dijina dia Jezú ni dízui dia suína. Kuebhi kua kexile o mona? Mu kizuua kia katatu, o kuila Zuze ua kexile mu xinganeka se ua kumbidile muene kiambote o kikalakalu kia mu bhanene Jihova kia ku sasa Jezú? Mu ku bhita ithangana, ai mu tembulu. Kuenhoko, ene a soto kiavulu katé kia bhixila mu dixilu mua kexile jimesene javulu, ejidile kiambote o Kitumu​—a sange Jezú ua xikama mu kaxi kâ! Xinganeka o ku sanguluka kua Zuze ni Madiia!​—Luka 2:45, 46.

²³ Jezú ua kexile mu kuivuidila o jimesene mu tembulu ni ku  a ebhuidisa. Ene a diuanene kiavulu mu ku mona mona-ndenge ku tendela kiambote o maka ni ku bhana itambuijilu iambote. Maji Madiia ni Zuze, a diuanene uá kiavulu. O Bibidia ilondekesa kuila Zuze ka zuela kima. Maji o izuelu ia Madiia, ilondekesa kiambote kiebhi kia kexile mu divua kiiadi kiâ: “Mona tata, ua tu bhangela-hi kiki? Talesa ni tat’enu ni eme, tua kexi ku ku sota ni mukôndo!”​—Luka 2:47, 48.

24. Kiebhi o Bibidia kilondekesa kiambote o kikalakalu kia tata?

²⁴ Kienhiki, ni izuelu íii, o Mak’â Nzambi alondekesa kiambote o kikalakalu kia tata. Ki tena ku bhonza kiavulu​—né muene se o mona ki mukua ituxi! O ku kala tata mba mama ku mundu iú ua iibha, ku bheka “mukôndo” ku jitata, maji o jitata a tena ku sanguluka mu kuijiia kuila o Bibidia i zuela ia lungu ni  hadi iene mu tala o jitata mu ku sasa o tuana.

25, 26. Kiebhi Jezú kia tambuijila o jitata jê ni kiebhi Zuze kia divu ni izuelu ia mon’ê?

²⁵ Jezú ua kexile bhu kididi bhua tenene ku divua kala ua zukama dingi kua Tat’ê ia diulu, Jihova, ni kuívua ioso ia kexile mu zuela o jimesene mu tembulu. Mukonda dia kiki, muéne ua zuela ku jitata ni kidi kioso: “Mua kexila-hi ku ngi sota? Ki mua kijiia kuma nga bhingi ngi kala m’onzo ia tat’etu?”​—Luka 2:49.

²⁶ Nange Zuze ua kexile mu xinganeka kiavulu mu izuelu íii. Nange ua kexile mu sanguluka kiavulu mu ku lembalala o izuelu íii. Mukonda muéne ua bhangele ioso phala ku longa mon’ê ku kala ni ibanzelu íii ia lungu ni Jihova Nzambi. Kioso Jezú kiexile hanji munzangala, o kizuelu “tata”​—kia kexile ni valolo ia dikota phala muéne, mukonda dia thembu ioso ia kexile ni Zuze.

27. Eie u tata, ujitu uebhi uala na-iu, ni mukonda diahi ua tokala ku lembalala o phangu ia Jezú?

²⁷ Se u tata, o kuila uejiia o ujitu ua ku kuatekesa an’ê kuijiia kiebhi ki kala o tata iambote, u langa o muiji uê? Se ua mu sasa an’a muhatu’ê, lembalala o phangu ia Zuze, ni u londekese kuila ene ala ni valolo ia dikota. U a kuatekesa ku zukama kua tata iâ ia diulu, Jihova Nzambi.​—Tanga  Efezo 6:4.

28, 29. (a) Ihi ilondekesa o izuelu mu divulu dia Luka 2:51, 52 ia lungu ni Zuze? (b) Kikalakalu kiahi kia kexile na-kiu Zuze mu ku kuatekesa mon’ê ku kula mu unjimu?

²⁸ O Bibidia ki i zuela iavulu ia lungu ni Zuze, maji kima kiambote ku di longa ihi i zuela o Bibidia ia lungu ni muéne. Mu kifika, o Bibidia i zuela kuila Jezú ‘u kala jinga mu tumaka.’​—o jitata jê. I zuela ué kuila, “Jezú anga u kala mù kula mu kitala ni mu kuvula o kuijiia, o ima ioso anga enda  ni ku mu uabhela kuala Nzambi ni athu.” (Tanga Luka 2:51, 52.) Ihi ilondekesa o izuelu íii ia lungu ni Zuze? Ima iavulu. Tua di longo kuma Zuze ua suluka ni ku kala ku pholo ia muiji uê, o mon’ê ua iuka ua kexile ku mu xila, iu ua kolokotele o ku mu belesela.

²⁹ Tua di longo ué kuma Jezú ua kexile mu kula ni unjimu. Zuze nange ua kuatekesa kiavulu mon’ê ku kula mu nzumbi. Mu thembu iná, o Jijudé akexile ni sabhu. A tena hanji ku i sanga ni ku i tanga mu izuua ietu. O sabhu íii i zuela kuila, o maiala ka kexile mu kalakala, ene ngó a tenene ku kala jinjimu, maji o ji kalupindelu, o adimakaji, ni akua ku kalakala ni ji felu “ka tenene ku zuela ima ia tokala ni ku fundisa muthu; ka tokalele ué ku kala mu kaxi ka athu a tanga jisabhu.” Maji Jezú ua londekesa kuila o sabhu íii ki iexile ia kidi. Kioso kiexile hanji munzangala, ua kexile mu kuivuidila tat’ê, o kalupindelu ku longa ni uhete ima ia lungu ni ‘ku iuka ni ku fundisa kua Jihova!’ Sé phata, kiki kia bhitile mu ithangana iavulu.

30. Phangu iahi ia xisa Zuze ku jitata lelu?

³⁰ Tu tena ku mona ué Zuze mu ku kuatekesa Jezú o ku kula mu xitu. Mukonda dia ku mu langa kiambote mu undenge, Jezú ua kituka diiala dia nguzu, ni sauidi iambote. Zuze ua longo ué mon’ê ku kala ni uhete mu kikalakalu kiê. Jezú ka mu ijidile ngó kuma, mona ua kalupindelu, maji a mu ijidile kala o “kalupindelu.” (Mar. 6:3) Kienhiki, Zuze ua longo kiambote mon’ê. O atuameni a muiji, a kaiela o phangu ia Zuze mu ku langa kiambote an’ê ni ku a longa uhete ua-nda tena ku a kuatekesa ku hádia kia-nda kula.

31. (a) Ihi ilondekesa o misoso ia lungu ni kufuá kua Zuze? (Tala ué o  kaxa.) (b) Phangu iahi ia tu xila Zuze phala tu i kaiele?

³¹ Tundé ku musoso u zuela ua lungu ni batizu ia Jezú kia kexile ni 30 a mivu, o Bibidia ki i tumbula dingi o musoso ua Zuze. O misoso ilondekesa kuila Madiia uexile mutudi kioso Jezú kia mateka o ukunji uê. (Tala o kaxa, “ Thembu Kuxi Kiafú Zuze?”) Maji Zuze ua xisa phangu iambote​—muéne uexile tata iambote ua lange, ua dikila o muiji uê, iu ua kolokota ni ufiiele katé mu kufuá kuê. Tata ioso-ioso mba Kidistá, ua-nda bhanga kiambote se u kaiela o kixikanu kia Zuze.