1, 2. (a) Ihi ia bhangesa Jona ni athu a mukuá akexile mu naviiu ku kala mu iluezu? (b) Ihi i tu londekesa o musoso ua Jona?

 JONA ka mesenene dingi kuívua o jibuia jojo javulu. Ko jibuia ngó ja kitembu kionene ja kexile mu bhuka ku jingoji ja naviiu ni ku mabhuku a kalunga akexile mu beta bhu jimbandu ja naviiu. O kima kia zembele Jona o jibuia ja kexile mu bhanga o athu akexile mu kuendesa o naviiu, akexile mu bhanga ioso phala o naviiu ki i bobe. Jona uejidile kuila, o maiala enhó eji kufuá mukonda dia muéne!

² Ihi ia bhangesa Jona ku kala mu maka enhá? Muéne ua bhukumukine Nzambi iê, Jihova. Ihi-phe ia bhangele Jona? O kuila muéne keji tena dingi ku kala ni ukamba uambote ni Jihova? O itambuijilu ia ibhuidisu íii, i tu longa ima iavulu. Mu kifika, o musoso ua Jona u tu londekesa kuila, né muene o athu ala ni kixikanu kia kidi, a tena ku bhukumukina Nzambi​—ni kiebhi kia tena ku lungulula o ukexilu uâ.

3-5. (a) Kiebhi o athu kia mona Jona? (b) Ihi i tuejiia ia lungu ni Jona? (Tala ué ku luiji.) (c) Mukonda diahi o kikalakalu kia Jona kala polofeta, kia bhonzele?

³ Athu avulu a mona Jona kala muthu ua bhukumukina Nzambi. Maji saí ima iavulu i tu tena ku di longa ku diiala didi. Ijiia-kiu kuma, Jona a mu solele phala ku kala polofeta ia Jihova Nzambi. Jihova keji mu sola phala ku bhanga o kikalakalu kiki, se muéne kexile diiala dia kixikanu mba muthu ua iuka.

⁴ O Bibidia i tu tangela ima iofele ia lungu ni Jona, i tu kuatekesa ku muijiia kiambote. (Tanga 2 Jisobha 14:25.) Muéne uexile mukua Ngate-Hefele. Phala ku bhixila ku mbanza íii, kua bhingile kuenda ilómetulu iuana tundé ku mbanza ia Nazalé, o  mbanza mueji kudila Jezú 800 a mivu ku pholo. a Jona uexile polofeta mu kithangana kioso o Sobha Jelobouamu II, kia kexile mu tumina o kuinhi dia madiembu a Izalaiele. O polofeta Elija ua fuile kiá ukulu, o ua mu bhinganene, Ilizeu, ua fuile kioso o tat’â Jelobouamu kia kexile mu tumina. Sumbala Jihova ua tumine o maiala enhá ku zubha o ubhezelu ua Bahale, akua Izalaiele akexile mu bhukumukina dingi Jihova. Ene akexile mu kaiela o sobha ua kexile mu “bhanga ima ia ibhila Jihova ku mesu mê.” (2 Jis. 14:24) Kienhiki, o kikalakalu kia Jona kia bhonzele kiavulu. Maji muéne ua ki kumbidila ni ufiiele uoso.

⁵ Maji saí kizuua, o muenhu ua Jona ua lunguluka. A mu bhana kikalakalu kua Jihova kia mono kuila kia bhonzele ku ki kumbidila. Kikalakalu kiahi kia mu bhanene Jihova?

6. Kikalakalu kiahi kia bhana Jihova kua Jona, ni mukonda diahi kia bhonzele kiavulu?

⁶ Jihova uambela Jona: “Balumuka, u-ie mu mbanza ia dikota ia Ninive, u kole njimbu ia kibuika kiê, mukonda ituxi iê ia bande kunu, ia ngi bhixila.” (Jona 1:2) Saí ima iavulu i tu bhangesa kuijiia, se mukonda diahi o kikalakalu kia Jona kia bhonzele. O mbanza ia Ninive, ia kexile ku mbandu iu ku tundila-kumbi; kua bhingile kuenda 800 a ji kilómetulu phala ku bhixila-mu, mba kuenda mbeji ia muvimba. Maji o kuenda o dikanga, ki bhuene bhua kexile o maka kana. Ku Ninive, Jona ua tokalele ku kola o njimbu ia ku fundisa ia Jihova, ku akua Asídia, a betele ku a ejiia kala ijibhangânga. Se o mundu ua Nzambi ka bhanene mátui ku njimbu ia Jona, manhi o jiphagão eji xikina? Kiebhi kieji di tunda o selevende ia Jihova ubheka ué ku mbanza ioio ia dikota ia Ninive, a ixana “mbonge ia manhinga?”—Nah. 3:1, 7.

7, 8. (a) Ihi ilondekesa kuila, Jona ua mesenene muéne ku lenga o kikalakalu kia mu bhanene Jihova? (b) Mukonda diahi ki tu tokala kuzuela kuila Jona, mukua uôma?

⁷ Ki tuejiia se Jona ua xinganeka mu maka enhá. Tuejiia ngó kuila muéne ua lenge. Jihova ua mu tumine kuia ku mbandu ku tundila-kumbi, maji Jona uai dikanga ku mbandu ku fuila-kumbi. Muéne ua kulumuka ku mbanza ia Jope, ua kuata naviiu ia kexile múia ku Talxixi. Saí akua ku tokuesa amba kuila, Talxixi iexile mu  ixi ia Espanha. Se kiki kidi, Jona-phe ua kexile mu lengela dikanga, 3.500 a ji kilómetulu ku Ninive. O njila íii ia kexile múia mu sámbua dia Musanza Uonene ia bhingile kuenda muvu ua muvimba. Jona ua mesenene muéne ku lenga o kikalakalu kia mu bhanene, kuala Jihova!—Tanga Jona 1:3.

⁸ O kuila kiki kilombolola kuma, Jona uexile mukua uôma? Ki tu tokala ku mu fundisa ni lusolo. Kala ki tua-nda mona, muéne ua londekesa ku suína kua dikota. Maji kala etu lelu, Jona uexile mukua ituxi. (Jisá. 51:5) Nanhi mudietu, ua kambe o uôma?

9. Kiebhi ki tu tena ku divua mu ikalakalu i tu bhana Jihova, ni ihi i tua tokala ku lembalala mu ithangana íii?

⁹ Saí ithangana, Jihova u tu bhinga ku bhanga ima i tu mona kuila ia bhonzo o ku i bhanga. Nange tu mona kuila o kitumu kia kuboka o njimbu ia Utuminu ua Nzambi, kia bhonzo kiavulu. (Mat. 24:14) Tu tena ku jimba o izuelu ia Jezú: ‘Kua Nzambi ima ioso i xikina.’ (Mar. 10:27) Se kiki ki bhita n’etu, tu tena ku tendela o uôma ua Jona. Ihi ia bhitile ni Jona mukonda dia ku lenga o kikalakalu kia mu bhanene?

10, 11. (a) Ihi nange ia banze Jona, kioso o naviiu kia mateka o kuenda? (b) Ihi ia bhiti ni naviiu ni athu?

¹⁰ Tu tena ku xinganeka Jona ku longela o ima iê phala ku bokona mu naviiu, nange naviiu ia akua Fenicia (Kanana.) Muéne ua kexile mu tala kioso o mutuameni ua naviiu ni maiala mê, kia kexile mu longela o ima phala ku mateka kuenda. O kia mateka o kuenda, Jona nange ua banzele kuila, ua kexile mu lenga o iluezu ia kexile ku mu bhekela o uôma. Maji mu ku bhita ithangana, o ima ia lunguluka.

¹¹ Kitembu kia dikota, kia mateka ku bhuka mu kalunga ni ku bhanga mabhuku onene. Ithangana ikuxi ia bhingile phala o mabaia a naviiu ku mateka o ku di budika? O kuila mu kithangana kieniókio, Jona uejidile kiá o ima ia soneka ku pholo kuila​—‘Jihova u tuma kitembu kia dikota ku bhuka mu kalunga?’ Ki tuejiia. Maji muéne ua mono o athu akexile mu naviiu ku samba kala muthu ku nzambi iê, maji Jona uejidile kuila o jinzambi jâ, keji tena ku a kuatekesa. (Iji. 19:4) O musoso u zuela: “Naviiu anga inda i budika.” (Jona 1:4) Kiebhi-phe Jona kieji tena ku samba kua Nzambi ia kexile mu lenga muéne?

12. (a) Mukonda diahi ki tu tokala ku fundisa Jona mukonda dia ku zeka kioso kia kexile mu bhita o kitembu kia dikota? (Tala ué ku luiji.) (b) Kiebhi Jihova kia londekesa o muthu ua kexile mu bhekela o maka?

¹² Mu ku mona kuila keji tena ku bhanga kima phala ku kuatekesa, Jona ua soto kididi kia ku zekela. Kuenhoko, muene ua kuata  kilu kia zongo. b O mutuameni ua naviiu, ua mu sange ni ku mu dionda ku samba kua Nzambi mu ku bhinga kikuatekesu kala kia kexile mu bhanga athu oso mu naviiu. Mu ku mona kuila, o kibhungu ni kitembu, ki ki kexile mu bhita, a te jisorte phala kuijiia nanhi ua kexile mu bhekela o uíndua uenhó. Sé phata, o muxima ua Jona uexile mu titila kiavulu ni uôma kioso ene kia kexile mu ta o jisorte. Mu ku bhita ithangana, o sorte ia buila kua Jona. Jihova ua kexile mu londekesa o muthu ua kexile mu bhekela o uíndua uenhó​—Jona!​—Tanga Jona 1:5-7.

13. (a) Ihi ia zuela Jona ku athu akexile mu naviiu? (b) Ihi ia bhingi Jona ku athu akexile mu naviiu phala ku bhanga ni mukonda diahi?

¹³ Jona ua lomboluela ku athu akexile nê mu naviiu, o ima ioso. Muéne uambe kuila, uexile selevende ia Nzambi, Muteni-ia-Ioso, Jihova​—o Nzambi ia kexile mu lenga ni ku mu luualesa, ni ku bhangesa kuila o mienhu ia athu oso mu naviiu, i kale mu iluezu. O maiala enhó akexile ni uôma uavulu. Kienhiki, ene ebhula Jona se ihi ia tokalele ku mu bhanga phala ku bhulula o naviiu ni mienhu iâ. Ihi ia zuela Jona? Muéne nange uexile ni uôma ua kufuá mu menha a talala a kalunga. Maji kiebhi kieji tena kuehela athu oso enhó o kufuá, se muéne uejidile ihi ia tokalele o ku bhanga phala ku a bhulula? Kienhiki, Jona uambe: “Ngi zangudienu; mu ngi takule mu kalunga, kalunga ka-nda ku tululuk’ê; mbata, eme ngijiia kuma, mukonda diami, kiene ki kua mi’ijila kibhungu kia dikota kiki.”—Jona 1:12.

14, 15. (a) Kiebhi ki tu tena ku kaiela o kixikanu kia Jona? (b) Kiebhi kia divu o athu akexile mu naviiu, kioso Jona kia a bhingi phala ku mu takula mu kalunga?

¹⁴ O kuila o muthu uala ni uôma, u tena kuzuela kiki? Jihova ua sangulukile kiavulu mu ku mona o henda ni ku suína kua Jona mu kithangana kieniókio kia bhonzo. Tu tena ku mona bhabha o kixikanu kia kolo kia Jona. Tu tena ku kaiela o kixikanu kia Jona mu ku ta ku pholo o ibhindamu ia akuetu. (Nzuá 13:34, 35) Kioso ki tu mona muthu ua bhindamena, mu xitu mba mu nzumbi, o kuila tu tena ku di bhakula phala ku mu kuatekesa? Tu sangulukisa kiavulu o muxima ua Jihova, kioso ki tu bhanga kiki!

¹⁵ O athu akexile mu naviiu, akexile ué ni henda ia Jona, mukonda mu dimatekenu, ene ka mesenene ku mu takula bhu menha! Mu veji dia kiki, a di suínisa mudiâ phala ku zaúka katé ku sámbua—maji a lembua. O kitembu kia kexile mu dimendala. Kienhiki, a mono kuila a tokalele muene ku takula Jona mu kalunga. A sambe kua Nzambi ia Jona, Jihova, phala ku a loloka ia a zangula Jona ni ku mu takula mu kalunga.—Jona 1:13-15.

16, 17. Zuela ihi ia bhitile ni Jona kioso kia mu takula mu kalunga. (Tala ué o jifoto.)

¹⁶ Jona ua bu mu menha a kalunga. Nange ua bhange ioso phala ka bobe mu menha, maji bhofele-bhofele, o naviiu ia kexile mu kuenda dikanga. Maji o mabhuku akexile ku mu sunga mua zongo. Kienhiki, Jona ua monene kuila, ki kuexile kidielelu kia ku bhuluka.

¹⁷ Mu ku bhita ithangana, Jona ua soneka kiebhi kia divu mu kithangana kiki. Moxi a menha, muéne ua mateka ku xinganeka mu ima ia lungu ni muenhu uê. Muéne ua luualele kiavulu, mukonda keji tena ku mona dingi o tembulu ia Jihova, ia kexile mu mbanza ia Jeluzaleme. Muéne ua mono kuila ua kexile mu kulumuka koxi a menha, kuene mu sabhuka o milundu ni iangu. Muéne ua banzele kuila ueji fuá muenhomo.—Tanga Jona 2:2-6.

18, 19. Ihi ia bhitile ni Jona koxi a kalunga, ni kima kiahi kia mu minha ni nanhi ua bhange kiki? (Tala ué ku luiji.)

 ¹⁸ Maji talesa! Moxi a menha mua kexile mu kuíza kima​—kima kia dikota, kia xikatela kia kexile ni muenhu. O kima kiki kia jikula o dikanu diê anga u minha Jona!

¹⁹ Jona ua banzele kuila uafú. Maji muéne ua diuana, mu ku mona kuila ua kexile hanji ni muenhu! Muéne ka mu xakuta kana. Muéne ua kexile hanji mu bhuima, sumbala ua banzele kuila ueji fuá kiá muenhomo. Kienhiki, Jona u kuata mu xila Nzambi. Sé phata, Jihova muéne ua ‘Bhangesa o mbiji ia dikota ku minha Jona.’ c​—Jona 1:17.

20. Ihi i tu tena ku di longa ku musambu ua bhangele Jona koxi a mala ia mbiji ionene?

²⁰ O thembu ia kexile mu bhita. Mu mala a mbiji mua kexile, Jona ua mateka o ku xinganeka ni ku samba kua Jihova Nzambi. Tu tena ku di longa ima iavulu ku musambu uê u tu sanga mu divulu dia Jona mu kibatulu kia kaiadi. Jona ua tumbula veji javulu, izuelu i tu sanga mu divulu dia Jisálamu, mu ku londekesa kuila muéne ua kexile ni kuijiia kuavulu kua lungu ni Mikanda Ikola. Ki tu londekesa ué kídifua kia mukuá kia Jona: o ku sakidila. Jona ua suku ni kuzuela: “Maji eme-phe ngi ku satela, ni kuimba ni mimbi ia kusakidila; ngi futa ioso i nga di habelela kua Jihova; o kubhuluka kuami ku tunda kua Jihova.”—Jona 2:9.

21. Ihi ia di longo Jona ia lungu ni ubhulukilu ni milongi iebhi i tua tokala ku di lembalala?

²¹ Jona ua di longo kuila, Jihova u tena ku bhulula muthu uoso-uoso uala mu kididi kioso-kioso ni mu kithangana kioso-kioso. Jihova ua sangele selevende iê ua kexile mu iluezu ni ku mu bhulula. (Jona 1:17) Jihova ngó ueji tena ku bhangesa kuila, muthu u kala ni muenhu mu mala ia mbiji ionene mu makumbi atatu ni mausuku atatu. Tua tokala kuijiia kuila Jihova, o Nzambi ‘ua kuata o muenhu uetu.’ (Dan. 5:23) Tua tua tokala ku mu sakidila mu ku tu bhana o muenhu. O kuila tuene ku mu  sakidila? Kuma Jihova, muéne ua tu bhange, tua tokala ku mu sakidila mu ku mu belesela.

22, 23. (a) Kiebhi o ukexilu ua ku sakidila ua Jona a u polovala? (b) Ihi i tu tena o ku di longa ku phangu ia Jona kioso ki tu lueza?

²² Ihi i tuamba ia lungu ni Jona? O kuila muéne ua di longo kuila ua tokala ku sakidila Jihova mu ku belesela? Kiene. Kioso kia bhiti izuua itatu, o mbiji ia bheka Jona ni ku mu “lusila ku ndundu ia kalunga ku kanga.” (Jona 2:10) Xinganeka ngó—Jihova ua kuatekesa Jona mu ku mu bheka ku kanga dia kalunga! Kididi kioso-kioso kua mu lusila, muéne ua tokalele ku sanga o njila ia ku vutuka. Maji mu ku bhita ithangana, a mu polovala phala ku mona se muéne uexile ni ukexilu ua ku sakidila. O divulu dia Jona 3:1, 2, dizuela: “Anga dízui dia [Jihova] diza lua kaiadi kua Jona, uixi: Balumuka, u-ie mu mbanza ia dikota ia Ninive, u boke njimbu ioso i ngi ku tuma. ” Ihi ieji bhanga Jona?

²³ Jona ka ditunu kana. O Bibidia i zuela: “Jona anga u balumuka hé uia mu Ninive, kala kia zuela Jihova.” (Jona 3:3) Mu kidi, muéne ua belesela. Tu tena ku mona kuila, muéne ua di longo bhu kaxi ka iluezu iê. Etu ué tua tokala ku kaiela o kixikanu kiê mu ukexilu iú. Etu oso tu akua ituxi mukonda dia kiki, tu lueza. (Lom. 3:23) Maji o kuila tu bhuila kioso ki tu lueza inga tu di longa ku iluezu ietu ni ku bhanga o ima ia mesena Jihova ko kuetu?

24, 25. (a) Mabesá ahi ia tambula Jona? (b) Mabesá ahi a-nda tambula Jona ku hádia?

²⁴ O kuila Jihova ua besoala Jona mu ku belesela kuê? Kiene, Jihova ua mu besoala. Kia dianga, Jona a mu tangela kuila o athu akexile mu naviiu, a bhulukile. O kitembu kia sosoloka kioso Jona, mukonda dia henda, ua bhingile phala ku mu takula mu kalunga. Mu suluka, o athu akexile mu naviiu, akexile “ni uôma ua Jihova” anga a bhana jisata kua Jihova, kana ku ji nzambi jâ ja makutu.​—Jona 1:15, 16.

²⁵ Jona ua tambula dingi dibesá dia mukuá dia dikota. Jezú ua zuela kuila o thembu ia bhitile Jona mu mala ia mbiji ionene, ia lomboluele o izuua ieji bhita muéne mu’alunga. (Tanga Matesu 12:38-40.) Jona ua-nda sanguluka kiavulu mu kuijiia o kidi kiki, kioso kia-nda mu fukununa mu’alunga phala ku kalela-ku mu ixi! (Nzuá 5:28, 29) Jihova ua mesena ué ku ku besoala. Kala kia bhange Jona, o kuila eie ué ua-nda di longa ku iluezu iê ni kulondekesa ukexilu ua ku belesela?