1. Mukonda diahi o athu mu mbanza ia Silo a luualele kiavulu ni ku dila?

 SAMUUELE ua kexile mu tala o ku luuala kua athu mu mbanza ia Silo. Athu oso akexile mu dila. Mabhata akuxi akexile mu dila mu kuijiia kuila o jitata jâ, o anumi’â, o an’â, ni phange ja maiala keji tena ku vutuka dingi kubhata mukonda dia ita? Tuejiia ngó kuila 30.000 a masoladi akua Izalaiele a a jibhile ku akua Fidíxia mu ita, mu ita ia kamúkua, a jibhile-ku 4.000.—1 Sam. 4:1, 2, 10.

2, 3. Ibhidi iahi ia bheka jisonhi ni ku katula o kijingu kia mbanza ia Silo?

² O kibhidi kiki, ki kiene ngó kia bhiti ni akua Izalaiele. O Mukunji ua Dikota, Eli ua kexile ni ana a iiadi a iibha, Hofini ni Finehase, a tundile ku Silo ni álaka ia kikutu. O kaxa íii ia kexile mu kala mu kididi ki kola mu kalatódio—o tembulu io tungile kala balaka​—kiexile mu londekesa kuila Nzambi kuene kua kexile. Maji o mundu uambatele o álaka mu ita, mu ku banza kuila o álaka ieji ku a bhulula bhu maku a jinguma jâ. Maji o akua Fidíxia a tambula o álaka, ia a jibha Hofini ni Finehase.—1 Sam. 4:3-11.

³ O tembulu mu Silo ia kexile ni fuma, mukonda muene mua kexile o Álaka mu mivu iavulu. Maji kindala, o Álaka ki i kexile dingi mu Silo. Kioso Eli kia kexile mu kitala kia 98 a mivu, kiévu kiki, u dibhala ni dima ku kialu kua xikama anga u toloka o xingu, ufuá. O mbalakaji iê, uexile mutudi, uafú ué mu kizuua kieniókio kioso kiexile mu vuala. Ande dia kufuá, muéne uambe: ‘Kijingu kia tundu kiá mu Izalaiele, mukonda ué dia álaka ia Nzambi a i tambula.’ Kienhiki, o mbanza ia Silo kieji kala dingi ni fuma.​—1 Sam. 4:12-22.

4. Ihi i tua-nda ku di longa mu kibatulu kiki?

⁴ Kiebhi Samuuele kieji dibhana ni ibhidi ioso íii? O kuila muéne ueji tena ku kolokota mu kixikanu kiê mu ku kuatekesa o mundu a ditunine kua Jihova? Lelu, nange etu oso tuene mu dibhana ni ibhidi ni ku luuala i bhangesa o kixikanu kietu ku zoza. Kienhiki, tu tale ihi i tu tena ku di longa ku phangu ia Samuuele.

5, 6. Mu 20 a mivu, o musoso ua Bibidia ua suluka ni kuzuela ia lungu ni ihi, ni ihi ia kexile mu bhanga Samuuele mu mivu ioso íii?

⁵ Mu kithangana kiki, o musoso ua Bibidia ki u zuela dingi ia lungu ni Samuuele, u suluka ni kuzuela ia lungu ni Álaka ia kikutu, ni kiebhi akua Fidíxia kia di tele mu ibhidi mukonda dia kuambata o álaka, ni nguzu ia bhange phala ku i vutula. Kua bhitile kiá 20 a mivu kioso o musoso ua Bibidia ua vutuka o kuzuela ia lungu ni Samuuele. (1 Sam. 7:2) Ihi ia kexile mu bhanga Samuuele mu mivu ioso íii? O Bibidia i tu zuela ihi ia kexile mu bhanga.

⁶ O Bibidia i zuela kuila, ande dia ku mateka o makuinhi a iiadi a mivu, “Samuuele anga u kala mufundixi ua kufundisa Izalaiele izuua ioso ia muenhu uê.” (1 Sam. 7:15) O musoso ulondekesa kuila kioso kia bhiti o kithangana kiki, Samuuele ua kuata ku kunda mbanza jitatu, mu Jeluzaleme, ni ku kondoloka mivu ioso o mbanza jiji ni ku fundisa ni ku batula o maka. Anga u vutuka ku mbanza iê bhu Lama, kuma bhuene bhua kexile o inzo iê. (1 Sam. 7:15-17) Kiki kilondekesa kuila, Samuuele ua kexile mu kalakala kiavulu, ni kuila mu mivu ioso íii ia 20 a mivu, muéne ua kexile mu bhanga ima iavulu.

7, 8. (a) Ngolokela iebhi ia tula Samuuele ku mundu kioso kia bhiti makuinhi a iiadi a mivu mu ku kalakala kiavulu? (b) Kiebhi kia tambuijila o mundu o ngolokela ia bhange Samuuele?

⁷ O undumbu ni kuiibha kua an’a Eli, kia kexile mu ta o kixikanu kia mundu mu iluezu. Mukonda dia kiki, athu avulu akexile mu bheza iteka. Maji mu ku bhita makuinhi a iiadi a mivu mu ku kalakala kiavulu, Samuuele ua tula o ngolokela iambote ku mundu, uixi: “Se muedi mu vutuka kua Jihova ni muxima uenu uoso, hé mu tubhula jinzambi ja [makutu] ni Axitalote mu’axaxi kenu, ni mi lunge mixima ienu kua Jihova, ni mu bhikile muene ngó ubheka uê; muéne-phe u mi kudila bhu maku ma akua Fidíxia.”—1 Sam. 7:3.

⁸ O “maku ma akua Fidíxia” a nemene kiavulu phala akua Izalaiele. O kifuxi kia Izalaiele a a toluele ku akua Fidíxia, kiki kiene kia bhangesa akua Fidíxia ku banza kuila, eji tena ku bhikisa akua Izalaiele. Maji Samuuele ua kanene o mundu kuila, o ima ieji lunguluka se ene a vutukile kua Jihova. Maji o kuila ene a mesenene muene ku bhanga kala kia a zuelele Samuuele? Samuuele ua sanguluka  kiavulu mu ku mona o mundu ku xisa ku dima o ubhezelu ua iteka, anga “a kala mu bhikila ngó Jihova ubheka uê.” Samuuele anga u bhongolola o mundu bhu kiônge kia dikota, ku mbanza ia Mixipa ku mbandu ia thunda ia Jeluzaleme. O mundu ua di bhongolola kuenhoko a fula kudia, ni ku diela o ituxi iâ mukonda dia ku bheza o iteka.​—Tanga 1 Samuuele 7:4-6.

9. Kithangana kiebhi kia mono akua Fidíxia, ni ihi ia bhange o mundu kia mono o kiluezu?

⁹ Kienhiki, kioso akua Fidíxia kiévu kuila, akua Izalaiele a bhongolokela bhu Mixipa, a mono kuila kiki kiexile o kithangana kia ku buikisa o abhezi oso a Jihova. Mu kiki, ene a tumikisa o kifuxi kiâ kia masoladi phala ku luua ni akua Izalaiele. Akua Izalaiele kia kívu, a kala ni uôma ua akua Fidíxia. Ni uôma uavulu, a bhinga Samuuele phala ku a kolela kua Jihova bhu maku a akua Fidíxia. Muéne anga u bhanga kiki, anga u kuata kambudi u ka bhana mu sata. Mu kithangana kieniókio, o kifuxi kia masoladi kia akua Fidíxia kia bhixila ku Mixipa. Kienhiki, Jihova u tambuijila o musambu ua Samuuele. Jihova anga u kala ni njinda. Mu kithangana kieniókio, Jihova-phe “u numina kizuua kieniókio ni kinuminu kia dízui diê dia dikota ku thandu dia akua Fidíxia.”​—1 Sam. 7:y​7-10.

10, 11. (a) Mukonda diahi o kifuxi kia masoladi kia akua Fidíxia akexile ni uôma ua kinuminu kia Jihova? (b) Ihi ia bhiti kioso kia bhu o ita mu Mixipa?

¹⁰ O kuila akua Fidíxia exile kala tumbonga a lengela kua manh’â mu kuívua o kinuminu kia nzaji? Kana, ene exile masoladi a nguzu, ejidile kiá o ku luua ita. Maji ene nuka a kivuile kinuminu kala kiki. O kuila o ‘kinuminu kiki kia dikota’ kiene kia a kuatesa uôma? O kuila ku diulu kua zelele kioso kia bhange o kinuminu, anga o kinuminu kia tundile ku milundu ia a sasumukisa? Né muene se kiene, o kinuminu kia bhangesa akua Fidíxia ku kala ni uôma. Mukonda dia kiki ene akexile mu lenga o akua Izalaiele. O maiala a Izalaiele-phe anga a tunda bhu Mixipa, a kaia akua Fidíxia, a a beta, katé mu honga ku mbandu ia sulu ia Jeluzaleme.​—1 Sam. 7:11.

¹¹ O ita iná ia lungulula o ukexilu ua mundu ua Nzambi. Kienhiki, akua Fidíxia a toloka, ka somboka dingi o mbambe ia akua Izalaiele mu izuua ioso ia Samuuele kia kexile mufundixi. Kienhiki, akua Izalaiele anga a tumbula o sanzala joso ja tambuile akua Fidíxia.​—1 Sam. 7:13, 14.

12. Kiebhi Samuuele kia ‘bhange o kima kia tokala,’ ni ídifua iebhi ia mu kuatekesa o ku ditunda kiambote?

¹² Mu  ku bhita ji hama ja mivu, o poxolo Phaulu ua tumbula Samuuele kala mufundixi ua ‘bhange o kima kia tokala.’ (Jihe. 11:32, 33) Kienhiki, Samuuele ua kuatekesa o mundu ku bhanga o ima ia tokalele bhu pholo ia Nzambi. Muéne ua ditundu kiambote, mukonda ua kexile mu kingila ni muanhu uoso Jihova ni ku bhanga o kikalakalu kia mu bhanene kua Nzambi ni ufiiele uoso, sumbala ni ibhidi. Muéne ua londekesa ué ukexilu ua ku sakidila. Kioso kia tolola o jinguma ku mbanza ia Mixipa, Samuuele ua kuata ditadi iu ua d’imika phala ku a lembalesa o kikuatekesu kia Jihova.​—1 Sam. 7:12.

13. (a) Ídifua iebhi i tua tokala ku kala na-iu se tua mesena ku kaiela o phangu ia Samuuele? (b) Kitala kiebhi ki ua tokala ku kala na-kiu phala kulondekesa o ídifua kala ia Samuuele?

¹³ O kuila eie ua mesena ué ‘ku bhanga o ima ia tokala?’ Se kiene, ua tokala ku kaiela o phangu ia Samuuele ia ku kala ni muanhu, kulenduka ni ukexilu ua ku sakidila. (Tanga 1 Phetele 5:6.) Nanhi mudietu, ka mesena o ídifua íii? Samuuele ua bhange kiambote mu ku kala ni ídifua íii ni ku ilondekesa tunde mu undenge uê, mukonda iene ia mu kuatekesa ku di bhana ni ibhidi iavulu ia moneka ku pholo.

14, 15. (a) Ihi ia luualesa Samuuele mu ‘ukukilu uê?’ (b) O kuila Samuuele a mu bazela kála Eli? Jimbulula.

¹⁴ Samuuele ua ‘kukile kiá,’ kioso o musoso ki u mateka ni ku mu tumbula dingi. Samuuele ua kexile ni ana kiadi a kudile kiá, Jouele ni Abiia, a mu kuatekesa mu kikalakalu kia ku fundisa Izalaiele. Maji-phe, ene ka tokalele ku a bhana o kikalakalu kiki kia ujitu. Sumbala Samuuele uexile muthu ua kidi ni ua iuka, o an’ê, mukonda dia ujitu ua ku kala afundixi, akexile mu bhanga ima ia iibha kala o ku bhinga kitadi ku athu phala ku a lungisa.​—1 Sam. 8:1-3.

¹⁵ Saí kizuua, o adiakimi oso a Izalaiele a di bhongolola kumoxi phala kuia mu zuela ni polofeta. Ene ambe kua Samuuele: “O an’ê-phe kala kuendela mu njila jê.” (1 Sam. 8:4, 5) O kuila Samuuele uejidile o ima ia kexile mu bhanga an’ê? O musoso ka tu tangela. Maji Samuuele kexile kála Eli, muéne ka bhingile ku mu bazela. Jihova ua bazele Eli ni ku mu kaxtikala mukonda ua luezele mu ku bazela an’ê akexile ni ukexilu ua iibha mu ku a bhana dingi kijingu, Nzambi ndenge. (1 Sam. 2:27-29) Maji ki kiene kiexile Samuuele.

16. Kiebhi kia divua o jitata ala ni ana a bhukumuka ni kiebhi o phangu ia Samuuele kia tena ku a suínisa ku dibhana ni maka enhá?

¹⁶ O musoso ka tu londekesa Samuuele ku kala ni ji sonhi, ku luuala mba ku divua kia iibha mukonda dia ukexilu ua iibha ua an’ê. Maji tata javulu lelu, a tena ku xinganeka kiebhi kia divu Samuuele. Mu jithembu ja bhonzo mu tuala, o ana ene mu bhukumukina o jitata jâ. (Tanga 2 Timote 3:1-5.) O phangu ia Samuuele, i tena ku suínisa o jitata a mu bhita mu ima íii. Samuuele kehela kuila, o ukexilu ua iibha ua an’ê, u mu bhangesa ku bhanga ima iibha. Ijiia-kiu kuma, né muene se o ana ka bhana mátui mu ima i zuela o jitata, ene a tena ku di longa mu ukexilu uambote ua jitata. O jitata ala ni kithangana kia ku sangulukisa o muxima ua Tat’â, Jihova Nzambi, kala kia bhange Samuuele.

17. Ihi ia bhingi o adiakimi a Izalaiele kua Samuuele ni kiebhi kia divu muéne?

¹⁷ O an’â Samuuele, ka xinganekene mu malamba eji bheka mukonda dia luímbi luâ. O adiakimi a Izalaiele a kolokota ni ku zuela kua Samuuele: ‘Tu solele sobha i kala mu tu fundisa kala mu jixi ja mukuá.’ O kuila mu ku bhinga sobha, o mundu ua kexile mu dituna Samuuele? Samuuele ua kexile mu fundisa o mundu ua Izalaiele mu dijina dia Jihova, mu mivu iavulu kiá. Maji mu kindal’iki, ene a mesenene sobha phala ku a fundisa, kana dingi polofeta, kala Samuuele. O jixi ja mukuá, akexile ni ji sobha, mukonda dia kiki, akua Izalaiele a mesenene uá ku kala ni sobha. Kiebhi kia divu ­Samuuele?  O musoso u zuela: “hundu ienhi’ii-phe i iibhila Samuuele.”​—1 Sam. 8:5, 6.

18. Kiebhi Jihova kia suínisa Samuuele ni kulondekesa kuila akua Izalaiele a tele kituxi kia dikota?

¹⁸ Tala kiebhi Jihova kia zuela kioso Samuuele kia sambe: “A évue dízui dia mundu ku di ténde mu ioso ia ku ambela; kuma ki eie a ku ditunu Eme, mbé ki ngi kale dingi ngi sobha iâ.” Samuuele ua divu kiambote mu izuelu íii, maji o Nzambi Muteni-ia-Ioso, ua dizangalele kiavulu! Jihova ua tumina polofeta iê ku tangela akua Izalaiele o malamba eji bhita nau mu ku kala ni sobha. Kioso Samuuele kia a tangela kiki, ene a jiji ni kuzuela: “Tu kala muene ni sobha i tu tumina.” Ni ku belesela kuoso, Samuuele uai ku unda o sobha ia solele Jihova.​—1 Sam. 8:7-19.

19, 20. (a) Kiebhi Samuuele kia belesela o kitumu kia Jihova kia ku unda Saúlu kala sobha ia Izalaiele? (b) Kiebhi Samuuele kia kolokota ni ku kuatekesa o mundu ua Jihova?

¹⁹ O kuila Samuuele ua belesela ni njinda? O kuila muéne uehela o ku luuala kuê ku mu tolola? Maiala avulu nange kiene kieji divua mu maka enhá, maji ki kiene kia bhiti ni Samuuele. Muéne ua undu Saúlu iu ua kijidile kuila, Jihova muéne ua mu solo. Muéne ua bhana ji nzobole kua Saúlu mu ku mu tanesa ni ku mu xila kala sobha. Muéne anga u zuela ku mundu: “Mu tadienu, muene’ó a mu solo kuala Jihova. Mu mundu uoso ki muala muthu uedi kala muene.”​—1 Sam. 10:1, 24.

²⁰ Samuuele ua tale o ídifua iambote ia kexile na-iu o diiala dia solele Jihova, kana o ituxi iê. Mu veji dia ku luuala mukonda o mundu ua mu bhingile sobha, Samuuele ua xinganeka mu ufiiele uê kua Jihova. (1 Sam. 12:1-4) Muéne ua kumbidila ué kiambote o kikalakalu kiê kia polofeta, mu ku dimuna o mundu ku iluezu ieji di bhana na-iu mu nzumbi ni ku a suínisa o ku kolokota mu ku bheza Jihova. O milongi ia kexile mu bhana muéne, ia kexile mu tula ku muxima ua mundu, ia a bhingi kua Samuuele phala ku a bhingila ku musambu. Muéne ua zuela: “Eme bhabha ué ki ngi te kituxi kua Jihova mu ku zumbuka ku mi sambela. Eme ngenda jinga muene ni ku mi longa mu njila ia uabha ia iuka.”​—1 Sam. 12:21-24.

21. Kiebhi o phangu ia Samuuele ieji ku kuatekesa se u luuala mukonda muthu uéngi ua tambula ujitu mba kikalakalu mu kilunga?

²¹ O kuila ua luualele kiá mu ku mona muthu uéngi a mu solo ni ku mu bhana ujitu mba kikalakalu mu kilunga? O phangu ia Samuuele, i tu londekesa kuila ki tu tokala kuehela kuila, o difuba mba  njinda i tu luualesa. (Tanga Jisabhu 14:30.) Nzambi uala ni ikalakalu iambote i sangulukisa, phala o jiselevende jê joso ja fiiele.

22. Mukonda diahi tu zuela kuila Samuuele ua lungu mu ku tala o ídifua iambote ia Saúlu mu dimatekenu?

²² Samuuele ua lungu mu ku tala o ídifua iambote ia Saúlu; muéne uexile diiala dia fuamene. Saúlu ua lebhele, ua iukile o pholo ni ku kala diiala dia suína. Mu dimatekenu, muéne uexile muthu ua kidi ni ua lenduka. (1 Sam. 10:22, 23, 27) Katu-ku o ídifua íii, muéne ua kexile ni ufolo ua ku sola o ima ia mesenene ku muenhu uê. (Mate. 30:19) O kuila muéne ua solo kiambote o ima ku muenhu uê?

23. Kídifua kiahi kia fuama kia dianga ku jimbidila kua Saúlu, ni kiebhi muéne kia dizangeleka?

²³ Kioso muthu kia kala ni fuma mba kia tambula ungana, u kala mu di zangeleka ku thandu dia akuâ. Ki ku bhitile ithangana iavulu, Saúlu ua mateka o ku dizangeleka. Muéne ua solo ku bhukumukina o itendelesu ia Jihova. Saí kizuua, Saúlu ua bhuila mu ku kingila Samuuele iu ua bhana o sata ia tokalele ku bhana ngó Samuuele. Samuuele ua mu bazela ni ku tangela kuila o usobha keji nangenena ku muiji uê. Saúlu ua kolokota mu ku bhukumukina Jihova mu veji dia ku diela.​—1 Sam. 13:8, 9, 13, 14.

24. (a) Kiebhi Saúlu kia bhukumukina Jihova kioso kia luu ni akua Amaleke? (b) Kiebhi Saúlu kia divu kioso kia mu bazela ni ihi ia zuela Jihova?

²⁴ Bhu kaxi ka Samuuele, Jihova uambela Saúlu phala ku luua ni akua Amaleke. Jihova ua bhanene itendelesu ia ku jibha o sobha iâ ia iibha, Akake. Maji Saúlu uehela Akake ku muenhu ni ibhaku ia tokalele o ku i buika. Kioso Samuuele kia mu bazela, Saúlu ua londekesa ukexilu ua iibha. Mu veji dia ku lenduka ni kuxikina o kibazelu, muéne ua di zokela ni ku tatela o mundu. Kioso Saúlu kia ditunu o kibazelu mu kuamba kuila o ibhaku ia tokalele phala ku i bhana kala sata kua Jihova, Samuuele ua zuela: “O ku tumaka kota ku satela ndenge.” Ni ku suína kuoso, Samuuele ua mu bazela ni ku mu tangela o kizuelu kia Jihova: O usobha eji ku mu katula-u ni ku u bhana ku muthu uéngi​—ua mu tundu mu ku iuka. a​—1 Sam. 15:1-33.

25, 26. (a) Mukonda diahi Samuuele ua didila Saúlu ni kiebhi Jihova kia bazela ni henda ioso o polofeta iê? (b) Ihi ia di longo Samuuele kioso kiai kubhata dia Jese?

²⁵ Samuuele  ua luualele kiavulu mukonda dia ima ia iibha ia bhangele Saúlu. Muéne ua bhitile o usuku uoso ni ku bhinga o kikuatekesu kia Jihova. Samuuele ua didi mukonda dia Saúlu. Samuuele ua monene ídifua iambote kua muéne, ua suínine, maji o kidielelu kiê kia lungu ni Saúlu, kia di boto. Saúlu ua lungulukile​—ka kexile dingi ni ídifua iambote iu ua bhilukile Jihova. Samuuele ka mesenene dingi ku mona Saúlu. Maji ku bhita thembu, Jihova ua bazela Samuuele ni henda mu kuzuela: “Ua-nda ku suka bhebhi ni kudila Saúlu, se ki tual’iki eme nga mu ditunu ku ungana ua Izalaiele? Izalesa lumbinga lué ni maji, uize. Eme nga-nda ku ku tuma kua Jese, mukua Beleme mukonda nga solo sobha iami mu’axaxi ka an’ê.”​—1 Sam. 15:34, 35; 16:1.

²⁶ Jihova ka bhingi o athu, phala ku kumbidila o vondadi iê. Se muthu u bhukumukina, Jihova u sola muthu uéngi phala ku kumbidila o vondadi Iê. Kienhiki, o muadiakimi Samuuele, ka kexile mu dila dingi mukonda dia Saúlu. Ni kitendelesu kia Jihova, Samuuele uai ku dibhata dia Jese ku Beleme, bhua sange o ana a Jese a iukile o pholo. Mu ku mona o mona ua dianga ua Jese, Jihova ua lembalesa Samuuele phala ka tale ku pholo mba ku kitala kia muthu. (Tanga 1 Samuuele 16:7.) Mu ku suka-ku, Samuuele uéza mu kuijiia o kasule ka Jese Davidi​—a mu solele kuala Jihova.

27. (a) Ihi ia kuatekesa o kixikanu kia Samuuele ku kola dingi? (b) Kiebhi ki u divua mu phangu ia xisa Samuuele?

²⁷ Mu disukilu dia muenhu uê, Samuuele ua mono kuila o kibanzelu kia Jihova kia ku sola Davidi phala ku bhingana Saúlu, kia fuamene. Saúlu ua mesenene ku jibha Davidi mukonda dia difuba ni ku bhilukila o ubhezelu ua kidi. Maji Davidi ua londekesa ídifua iambote​—ku suína, ufiiele ni kixikanu. O kixikanu kia Samuuele kia kolele dingi mu disukilu dia muenhu uê. Muéne ua mono kuila ki kuala maka a bhonzo phala Jihova ku a batula mba ku a lungulula mu dibesá. Mu ku suka-ku Samuuele uafú, ni ku xisa o musoso ua muenhu uê ua bhange nange 100 a mivu. Ki tu diuana mu kuijiia kuila Izalaiele ioso ia didi mukonda dia ufuilu ua diiala dia kixikanu, Samuuele! Lelu, o jiselevende ja Jihova a tena ku di bhuidisa: ‘O kuila nga-nda kaiela o kixikanu kia Samuuele?’