1-3. (a) Jimbulula kiebhi kia divu Estere mu ku zukama ku kiandu kia muadi uê? (b) Ihi ia bhangele o sobha kia mono Estere ku bhixila ku kiandu?

 ESTERE u zukama ku kiandu kia sobha ni hele. Xinganeka o ku tululuka kua kexile ku mbonge ia Pélesa ku mbanza ia Suzana, mukonda dia ku tululuka kuku, Estere ua tenene kuívua o makanda mê ku diata bhoxi ni jibuia ja kexile mu bhanga o izuatu iê. Muéne ka tokalele ku landuka mu ku mona o ku iuka kua mbonge ni ima ia katunda ia kexile-mu io bhangele ni ima ia tundile ku Libanu. Muéne ua kexile ngó mu tala o sobha, o muthu ua tokalele ku mu bhulula.

² Kioso Estere kia kexile mu bhixila ku mbonge, o sobha ua leka bhulu o mbangala iê ia ulu phala Estere ku kuata-ku. Kiki kiexile kima kiofele, maji kiene kia bhulula o muenhu ua Estere, mukonda kiki kia lombolola kuila o sobha ua mu lolokele o kituxi kia tele mu ku bhixila bhu pholo ia sobha sé ku mu ixana. Mu ku zukama ku kiandu kia sobha, Estere ua sununa o lukuaku luê iu ua kuata ku mbangala ia sobha, ni ku sakidila.​—Este. 5:1, 2.

³ Ima ioso ia kexile mu mbonge ia Sobha Asuuelu, ia kexile mu londekesa o umvuama uê ni kutena kuê ku usobha. O izuatu ia ji sobha ja akua Pélesa ia bhingile kitadi kiavulu phala ku ji sumba mu thembu iná, lelu iala mu valolo ia hama ia midi ja ji dolale. Sumbala ni ima ioso íii, Estere ua mono kuila o muadi uê muthu ua henda, ua mu zolele kiavulu. Muéne uambe: ‘Kiebhi-ze na mvuale, Estere? Ihi i u ngi bhinga? Zuela, ngi ku bhane-iu, né kia ngi bhingi kuila o utuminu uami tu u uane’tu ngó.’​—Este. 5:3.

4. Ibhidi iahi ia kexile mu kingila Estere?

⁴ Mukonda dia Estere ku moneka bhu pholo ia Sobha phala ku langa o mundu uê, a mesenene ku u jibha, kilondekesa kixikanu ni ku suína. Katé mu kithangana kiki, muéne ua kexile kiambote, maji kueji kuíza ibhidi ia makota ku pholo. Muéne ua tokalele ku xikinisa o sobha íii ia dikota, kuila o diiala dia dielele kiavulu, uexile muthu ua iibha, ua mu nganalele ku tuma ku jibha o mundu ua Estere sé ku kijiia. Kiebhi muéne kieji xikinisa o sobha ni kiebhi ki tu tena o ku kaiela o kixikanu kia Estere?

5, 6. (a) Kiebhi Estere kia kumbidila kiambote o kitendelesu kiala mu divulu dia Ndongixi 3:1, 7? (b) Kiebhi o ukexilu ua Estere ku zukama kua muadi uê ulondekesa unjimu?

⁵ O kuila Estere ua tokalele kuzuela kua sobha bhu pholo ia selevende jê, o maka oso akexile mu bhita? Ku bhanga kiki kieji katula o kijingu ni unéne ua sobha ni ku bhangesa o nguma iê, Hamane, ku sota ndunge phala ku di zokela. Kienhiki, ihi ia bhange Estere? Hama ja mivu ku dima, o njimu Sobha Solomá ua soneka: “Ima ioso iala ni kithangana kiê . . . kithangana kia kuzuela ni kithangana kia ku di xibha.” (Ndo. 3:1, 7) Tu tena ku xinganeka o tata ua sase Estere, Moledekai ku longa o ima íii kioso muéne kia kexile mu kula. Mu kidi, Estere uejidile kiambote ku sola o “kithangana kia kuzuela.”

⁶ Estere uambe: “Se kia ku uabhela ngana, u muenexi, lelu izé hanji ni Hamane ku fesa i nga ku bhangela.” (Este. 5:4) O sobha ua xikina iu ua tumina kuixana Hamane. U tena ku mona kiebhi Estere kia solo ni unjimu o ima ia tokelele o kuzuela? Muéne ua xila muadi uê iu ua soto kithangana kia tokala phala kuzuela o ima ia kexile ku mu thandanganhesa.​—Tanga Jisabhu 10:19.

7, 8. Jimbulula ihi ia bhangele Estere mu fesa ia dianga, ni mukonda diahi muéne ka zuelele kiá o maka mu kithangana kieniókio?

⁷  Sé phata, Estere ua bhangele o fesa íii ni ujitu uoso, ni ku lamba o kudia kua uabhela kiavulu muadi uê. Mu fesa íii mua kexile vinhu iambote phala ku sangulukisa oso eji kala-mu. (Jisá. 104:15) Asuuelu ua sangulukile kiavulu, iu uebhula dingi Estere se ihi ia mesenene. O kuila kiki kiexile kiá o kithangana kia tokala phala kuzuela?

⁸ Estere ua monene kuila ki kiexile luua o kithangana kia kuzuela. Kienhiki, ua bhingi dingi o sobha ni Hamane phala kuíza ku fesa mu kizuua kiéngi. (Este. 5:7, 8) Mukonda diahi muéne ka zuela kiá mu kithangana kieniókio? Lembalala kuila o mundu ua Estere eji ku a jibha mukonda dia kitumu kia sobha. Kienhiki, Estere ua tokalele ku sola kiambote o kithangana kia kuzuela o maka akexile mu bhita. Kienhiki, muéne ua kingila iu ua soto kithangana phala kulondekesa kua muadi uê kuila ua mu xile kiavulu.

9. Mbote iahi i bheka o muanhu, ni kiebhi ki tu tena ku kaiela o phangu ia Estere mu ukexilu iú?

⁹ O muanhu kídifua kia dikota, maji ki ki moneka ku athu oso. Sumbala Estere ua mesenene kiavulu o kuzuela, muéne ua londekesa  muanhu mu ku kingila o kithangana kia tokelele phala kuzuela. Tu tena ku di longa kiavulu ku phangu iê, mukonda etu oso tuene mu mona ima iavulu ia iibha ia bhingi ku i lungulula. Se tua mesena ku xikinisa muthu ua ku tende phala ku batula maka, tua tokala ku kaiela o phangu ia Estere ni ku kala ni muanhu. O divulu dia Jisabhu 25:15, dizuela: “Kilamba u fundisa o milonga, [u tetuluka] ngó kia ku mona o ku xididika kué; mukonda o dimi dia lenduka kiambote, di bula o ifuba.” Se tu kingila ni muanhu o kithangana kia kuzuela, ni kuzuela ni ku lenduka kala kia bhangele Estere, katé muene ni kizukutisu kia dikota, kia-nda bula kala kifuba. O kuila o Nzambi ia Estere, Jihova ua bhana dibesá kua Estere mukonda dia kulondekesa muanhu ni unjimu?

10, 11. Mukonda diahi Hamane ua kexile ni njinda iavulu kioso kia tundu ku fesa ia dianga, ni ihi ia mu suínisa o muhatu uê ni makamba mê o ku bhanga?

¹⁰ O muanhu ua Estere ua jikula o njila phala ku batula kiambote  o maka a moneka ku pholo. Hamane ua tundu ku fesa ni ku sanguluka kuavulu, “mukonda ku muxima kua mu zele” mukonda o sobha ni n’a mvuale a mu tambuluile kiambote. Maji kioso kia bhixila bhu muelu ua mbonge ia sobha, muéne ua mono Moledekai, o Judé ua kexile mu dituna o ku mu fukamena. Moledekai ka ditunine ku mu fukamena phala ku londekesa kuila, ka mu xila Hamane kana, maji ua ditunine mukonda dia kitongoluelu kiê ni ukamba uê ni Jihova Nzambi. Maji né kiki, Hamane “u kala ni njinda.”​—Este. 5:9.

¹¹ Kioso Hamane kia tangela muhatu’ê ni makamba mê kuila Hamane ua mu xonguena, ene a mu suínisa ku tumina ku bhanga taka ia lebha 20 a ji metulu ndenge, ni ku bhinga kua sobha phala ku nhenga-ku Moledekai. Hamane ua xikina o ndunge iu uai mu bhinga kua sobha.​—Este. 5:12-14.

12. Mukonda diahi o sobha ua bhingile o divulu dia Malunda phala o seketa iê ku tanga ni dízui dia suína ni ihi iévu?

¹² O Bibidia i zuela kuila mu usuku uenhó, sobha ‘u fula kilu,’ mukonda dia kiki ua bhingi ku seketa iê phala ku tanga o divulu dia Malunda ni dízui dia suína. Mu divulu didi, mua kexile maka alungu ni kikutu kia ku jibha o sobha Asuuelu. Muéne ua lembalala o maka; muéne ua tumina ku kasa ió a mesenene ku mu jibha, iu ua tumina ku a nhenga ku taka, ia afú. Maji ujitu uahi ua tambula o muthu ua mu dimuna​—Moledekai? O sobha uebhula se ujitu uahi ua tambuile Moledekai mu kima kia bhangele. Ihi ia tambuile? Ka tambuile kima kioso-kioso, kana.​—Tanga Estere 6:1-3.

13, 14. (a) Kiebhi o ima kia mateka ku lunguluka phala Hamane? (b) Ihi ia zuela o muhatu ua Hamane ni makamba mê?

¹³ Ni njinda, o sobha uebhula se nanhi ueji mu kuatekesa ku batula o maka enhá. Mu kithangana kieniókio, Hamane ua kexile mu mbonge ia sobha​—muéne ua bhixile selu mukonda ua mesenene ku bhinga kua sobha phala ku mu bhana o ufôlo ua ku jibha Moledekai. Maji ande dia ku bhinga o kima kia mesenene, o sobha ua mu ibhula se ujitu uahi ua tokala ku tambula o muthu a mu bhanene kijingu kua sobha. Hamane ua banze kuila o sobha ua kexile mu zuela muéne. Kienhiki, Hamane ua zuela kuila o muthu iú, a tokala ku mu bhana ima iavulu phala ku mu londekesa kijingu: ku mu zuika izuatu ia usobha, ni ku sola muthu uala ni kijingu ku utuminu ua sobha phala ku nhungisa Moledekai mu mbanza ioso ia Suzana, ku kabalu ka sobha, ni ku mu ximana bhu pholo ia mundu uoso. Xinganeka o pholo ia Hamane kioso kia mono kuila o muthu ueji tambula o kijingu kiki, Moledekai! Ni nanhi a mu solo phala ku nhungisa Moledekai? Muéne, muene-ko Hamane!​—Este. 6:4-10.

¹⁴ Sé ku ki mesena, Hamane ua kumbidila o kikalakalu kia monene kuila kia xidi, anga uia kubhata ni njinda. O muhatu uê ni  makamba mê a mu tangela kuila o ku lunguluka kuku kua ima, kiexile kisunji; eji mu tolola mu ku bhânga ni Moledekai, o mukua Judé.​—Este. 6:12, 13.

15. (a) Ihi ia bhitile mukonda dia Estere kulondekesa muanhu? (b) Mukonda diahi unjimu o kulondekesa o ‘ukexilu ua ku kinga?’

¹⁵ Mukonda dia Estere kulondekesa muanhu ni ku kingila dingi kizuua kimoxi phala kuzuela o ima ia mesenene o kuzuela kua sobha, kia bhana hanji kithangana kua Hamane ku kanda o dikungu diê muene. Nange ki Jihova Nzambi ua bhangesa o sobha ku fula kilu? (Jisa. 21:1) Mukonda dia kiki, o Bibidia i tu suínisa kulondekesa o ‘ukexilu ua ku kinga!’ (Tanga Mikeia 7:7.) Kioso ki tu kingila kua Nzambi, tu tena ku mona kuila muéne uala ni ndunge iambote phala ku batula o maka, o ndunge jetu ndenge.

16, 17. (a) Kithangana kiebhi kia zuela Estere ioso ia mesenene? (b) Kiebhi Estere kexile kala Váxiti, o muhatu ua diangele ua sobha?

¹⁶ Estere ka tokalele ku xisa dingi o maka a mesenene kuzuela ku sobha phala o kizuua kiéngi; mu fesa ia kaiiadi muéne ua tokalele kuzuela kiá ioso. Maji kiebhi kieji mateka? O sobha ua mu bhana o kithangana kia kuzuela, mu ku mu ibhula dingi se ihi ia mesenene. (Este. 7:2) O ‘kithangana kia Estere kia kuzuela’ kia bhixile.

¹⁷ Tu tena ku xinganeka Estere ku samba kua Nzambi iê ande dia kuzuela o izuelu íii: “Se nga sange ngalasa ku mesu mé, ngana u muenexi, se kia ku uabhela ku ki bhanga, a ngi bhane o muenhu uami, uene u nga bhingi; ni muenhu ua muiji uami, uene u nga solo.” (Este. 7:3) Ijiia kuila, kia dianga, muéne ua mono kuila, o sobha muéne ua tokalele ku sola o kima kia tokala o ku bhanga. Estere kexile kala Váxiti, o muhatu ua diangele ua Sobha, ua mu  kuatekesele jisonhi bhu pholo ia makamba mê! (Este. 1:10-12) Estere ka zuela kia iibha kua sobha mukonda dia ku dielela Hamane. Mu veji dia kiki, Estere ua mu diondela phala ku langa o muenhu uê ua kexile mu iluezu.

18. Kiebhi Estere kia jimbulula o maka kua sobha?

¹⁸ O kima kia bhingile Estere kia sasumukisa o sobha. Nanhi ueji ta o muenhu ua mvuale mu kiluezu? Estere ua zuela: ‘A tu sumbisa, eme ni mundu uami, phala ku tu jibha, ku tu buikisa, maji se a tu sumbisile ngó mu ubhika, tu abhika, ngeji dixibh’ami; sumbala nguma ietu ua tu kanena keji tena ku ki futa kua sobha, kuma sobha ueji dibotesa kinéne.’ (Este. 7:4) Tala kuma Estere ua jimbulula o kiambote o maka akexile mu bhita, maji ua zuela kuila ueji dixibh’ê se a a kanene ku a ambata ku ubhika. Maji, o kibuikilu kiki, kieji bhekela uadiama uavulu kua sobha, mukonda dia kiki, muéne ka tokalele ku dixibha.

19. Ihi i tu tena ku di longa kua Estere ia lungu ni ukexilu ua ku xikinisa muthu?

¹⁹ O phangu ia Estere u tu longa o ukexilu ua ku xikinisa muthu. Se eie hádia u bhinga ku jimbulula maka a dikota ku muthu ua kazola mba ku muthu ua ku tende, o muanhu, o ku xila ni ku kala muthu ua kidi, kua-nda ku kuatekesa kiavulu.​—Jisa. 16:21, 23.

20, 21. (a) Kiebhi Estere kia londekesa o kuiibha kua Hamane, ni kiebhi kia divu o sobha? (b) Ihi ia bhangele Hamane kioso kia mu londekesa o kuiibha kuê?

²⁰ Ni njinda, Asuuelu uebhula: “Muenhó mu kuahi, o muene uala kuebhi, ua bhumina kuxinganeka kienhiki ku muxima uê?” Xinganeka Estere kulondekesa o diiala ni kuzuela: “Nguma ia tu kanena kiki! kingumba kienhiki muene-phe Hamana.” Ene oso anga a tema kiavulu. Hamane anga uôma u mu kuata. Xinganeka kiebhi kia  bhiluka o pholo ia sobha mu kithangana kieniókio mu kuívua kuila o muthu ua mu dielele kiavulu, ua mu nganale ku bhana kitumu kia ku jibha o muhatu uê! O sobha u tunda ni njinda, uia mu jaludim phala ku tululukisa o muxima uê.​—Este. 7:5-7.

²¹ Mu ku mu londekesa kuila uexile muthu ua iibha, kijibhangânga Hamane, ua fukama bhu inama ia mvuale Estere. Kioso o sobha kia vutuka iu ua sange Hamane ua mu diondela Estere bhu sofá iê, ua teme dingi, anga u zuela kuila Hamane ua mesenene ku zeka ni muhatu uê bhu dibhata dia sobha. Phala Hamane o kizuelu kia sobha kia lombolola kufuá. Muéne a mu katula bhu kanga, a mu vungu o pholo. Kienhiki, ku moneka selevende ia sobha u mu tangela kuila Hamane ua tumine ku bhanga taka phala ku nhenga-ku Moledekai. Mu kithangana kieniókio, Asuuelu ua tumina ku jibha Hamane ni ku mu nhenga ku taka ia bhangele muéne.​—Este. 7:8-10.

22. (a) Kiebhi o phangu ia Estere i tu longa kuila ki tu tokala ku thandanganha kiavulu, ni ku kala sé kidielelu?

²² Ku mundu ua lelu uezala ni kuiibha, tu tena ku banza kuila nuka ku moneka kufundisa ni ku iuka. O kuila ua banzele kiá kiki? Estere ua kexile ni kibanzelu kiambote ni kidielelu, ni kixikanu kuila o maka eji ku a batula kiambote. Mu kithangana kia tokala, muéne ua zuela ni ku suína kuoso, iu ua zuela o ima ia tokala, ni ku kingila kuila Jihova u bhanga o ima ia mukuá. Kiene ué ki tua tokala o ku bhanga! Jihova ka lunguluka tundé mu izuua ia Estere. Muéne u tena ku kuata muthu ua iibha mu kibhetu kiê muene, kala kia bhangele ni Hamane.​—Tanga Jisálamu 7:11-16.

23. (a) Kiebhi o sobha kia sakidila o Moledekai ni Estere? (b) Kiebhi kia di kumbidila o kikanenu kia tangele Jakobo ande dia kufuá, kia lungu ni Bejamí? (Tala o kaxa “ Kikanenu Kia di Kumbidila.”)

²³ Mu ku bhita ithangana, o sobha uéza mu kuijiia kuila Moledekai​—kexile ngó o muthu ua mu dimune phala ka mu jibhe ku jinguma jê, maji uexile ué o tata ia sasele Estere. Kienhiki, Asuuelu ua bhana o ujitu kua Moledekai ua ku kala o muthu ua kaiadi mu utuminu uê. O dibhata dia Hamane​—ni jimbote jê​—o sobha ua ji bhana  kua Estere, Estere anga u ji bhana Moledekai phala ku ji langa.​—Este. 8:1, 2.

24, 25. (a) Mukonda diahi Estere ua tokalele ku bhanga dingi kima se ua londekesele kiá o kuiibha kua Hamane? (b) Kiebhi Estere kia te dingi o muenhu mu iluezu?

²⁴ Mu kuijiia kuila Estere ni Moledekai akexile kiá kiambote, o kuila o mvuale Estere ka tokalele dingi ku bhanga kima? Keji bhanga kima se muéne uexile mukua luímbi. Mu kithangana kieniókio, o kitumu kia bhele Hamane kia lungile ni ku jibha o Jijudé, kia kexile mu tula ku jisanzala joso. Hamane ua tele jisorte, mba Pur​—nange kima kia uanga​—phala ku zambula o kithangana kia tokalele kia ku jibha o Jijudé. (Este. 9:24-26) Maji kua kambele hanji izuua iavulu, maji o thembu ia kexile mu bhita ni lusolo. O kuila kua kexile hanji ni kithangana kia ku fidisa o kibuikilu kiki?

²⁵ Estere ni ku lenduka kuoso, uai dingi mu sota o sobha sé ku mu ixana. Mu veji íii, muéne ua didila o mundu uê, ni ku diondela muadi uê phala ku jima o kitumu kia bhele. Maji o itumu ia bhanene o sobha ia Pélesa, ka tokalele ku i jima dingi. (Dan. 6:12, 15) Kienhiki, o sobha ua bhana kutena kua Estere ni kua Moledekai phala ku soneka itumu ia ubhe. A tumikisa mukanda ua kaiiadi ua londekesele kuila o Jijudé a tokalele ku bhânga. A tumikisa masoladi ku ixi ioso ia Pélesa phala ku bhanga o ngolokela íii iambote ku Jijudé. Kienhiki, o Jijudé a sangulukile dingi ni ngolokela íii. (Este. 8:3-16) Tu tena ku xinganeka o Jijudé ku ixi ioso ia Pélesa ku kala polondo  phala o ita, kima keji tena o ku ki bhanga sé o kitumu kia ubhe. Maji o kima kia beta o kota o kuijiia se “Jihova dia ifuxi” ueji kala muene ni mundu uê?​—1 Sam. 17:45.

26, 27. (a) Kikoué kiahi kia bhana Jihova ku mundu uê? (b) Kikanenu kiebhi kia dikumbidila mu ku jibha o an’a Hamane?

²⁶ Kioso kia bhixila o kizuua kia xindi, o mundu ua Nzambi ua kexile pholo phala ku bhânga. Katé muéne athu avulu akua Pélesa akexile ku mbandu ia akua Izalaiele kioso kia bhana o ngolokela ia lungu ni muthu ua kaiiadi mu utuminu ua Pélesa, o mukua Judé Moledekai. Jihova ua lange o mundu uê ni ku a bhana kikoué kia dikota. Phala o jinguma ka bhange dingi kia iibha ku mundu uê, Jihova ua tumina ku buikisa oso. a​—Este. 9:1-6.

²⁷ Moledekai keji tena ku langa kiambote o jimbote ja Hamane se o dikuinhi dia ana a diiala didi akexile hanji ku muenhu. Mukonda dia kiki, ene uá a a jibha. (Este. 9:7-10) Kienhiki, kia dikumbidila o kikanenu kia Bibidia kia lungile ni ku jima o mbutu ia akua Amaleke, exile jinguma ja mundu ua Nzambi. (Deut. 25:17-19) Nange o ana a Hamane ene a sukile mu ku a jima mu mbutu ia akua Amaleke.

28, 29. (a) Mukonda diahi Jihova uehela Estere ni mundu uê ku luua ita? (b) Mukonda diahi o phangu ia Estere dibesá phala etu lelu?

²⁸ Estere ua kexile ni kikalakalu kia dikota​—kála o ku soneka itumu ia ubhe, ia lungu ni ita ni ku jibha. Sé phata kiki kia mu bhonzele kiavulu. Maji, Jihova mu vondadi iê, ua mesene kuila o mundu uê a tokalele ku u langa ku kibuikilu; ku kifuxi kia Izalaiele kuene kueji vuala o Mexiia, a mu kanene, o kidielelu kia mundu uoso! (Dim. 22:18) Kisangusangu kia dikota phala o mundu ua Nzambi kuijiia kuila kioso o Mexiia, Jezú, kia bhixila mu ixi, muéne ua fidisa o akaiedi’ê ku luua ita.​—Mat. 26:52.

²⁹ Maji o Jikidistá a luua ita mu nzumbi; Satanaji ua mesena ku jima o kixikanu kietu kua Jihova Nzambi. (Tanga 2 Kolindo 10:3, 4.) Kima kiambote ku kaiela o phangu ia Estere! Kala kia bhangele muéne, tu tena kulondekesa o kixikanu kietu, mu ku xikinisa o athu ni unjimu ni muanhu mu kulondekesa ku suína ni ku zokela o mundu ua Nzambi.