1, 2. (a) Kiebhi o musonhi kia menekena Madiia? (b) Kima kiahi kia tokalele ku sola Madiia ni mukonda diahi kiki kieji lungulula o muenhu uê?

 MADIIA ua diuanene kiavulu mu ku mona o musonhi ua mu bokona ku dibhata diê. Muéne kejile phala kuzuela ni tat’ê mba manh’â. Ua mesenene kuzuela ni muéne. Madiia uejidile kuila muéne ka kexile mukua Nazalé. Kuma o mbanza iofele kála o mbanza ia Nazalé, o asonhi akexile mu a mona ni ku a tungula ni lusolo. O musonhi iú eji ku mu mona kabasa kididi kua ile. Maji muéne uejile mu zuela ni Madiia, uixi: “Nga ku menekena Madiia! Eie a ku zediuisa kiavulu kuala Nzambi!”​—Tanga Luka 1:26-28.

² Kiki kiene ki mateka o Bibidia ku tumbula Madiia, mon’a Heli, ua tungile mu mbanza ia Nazalé, mu ixi ia Ngalileia. Madiia ua kexile mu sola kima ku muenhu uê. Muéne uexile dibhanga dia kalupindelu, Zuze​—diiala diexile ngadiama, maji fiiele kua Nzambi. Kienhiki, Madiia ua banzele kuila ima ioso ia kexile múia kiambote​—muéne ueji kala ni muadi uê, Zuze, mu ku mu kuatekesa ku sasa o tuana. Maji o musonhi ua tula kua Madiia njimbu ia Nzambi iê, ia zolele kiavulu, kima kieji lungulula o muenhu uê.

3, 4. Phala kuijiia kiambote Madiia, ihi i tua tokala o ku dituna, ni ihi i tua tokala ku di longa?

³ Nange eie u diuana mu kuijiia kuila o Bibidia, ki i zuela kiavulu ia lungu ni Madiia. I zuela ngó bhofele ia lungu ni unzangala uê, ni ukexilu uê, ki i zuela ué ia lungu ni pholo iê. Maji o i tu tangela o Mak’â Nzambi ia lungu ni muéne, i tu londekesa kiavulu se muéne uexile muthu ua kídifua kiahi.

⁴ Phala kuijiia kiambote Madiia, ki tu tokala ku xikina ku ima iene mu longa o jingeleja ia lungu ni muéne. Kienhiki, ki tua-nda zuela se kiebhi o athu kiene mu londekesa Madiia mu jifoto ni mu iteka. Ki tua-nda zuela ué o ilongesu ia jingeleja i zangeleka o muhatu iú ua lenduka ni majina mê a ujitu kala, “Manh’a Nzambi” ni “Mvuale ia Diulu.” Mu veji dia kiki, tua-nda di longa ihi i longa o Bibidia ia lungu ni Madiia. O Mikanda Ikola i tu kuatekesa kuijiia kiambote o kixikanu kia kexile na-kiu o muhatu iú ni kiebhi ki tu tena ku kaiela o kixikanu kiê.

5. (a) Ihi i tu tena o ku di longa kua Madiia mu ukexilu uê ua ku tambuijila o anju Ngabidiiele? (b) Ihi i tu tena o ku di longa ku phangu ia Madiia?

⁵ O musonhi ua Madiia, kala ki uejiia kiá, kexile muthu uoso-uoso. Muéne uexile o anju Ngabidiiele. Kioso muéne kiexana Madiia, “a ku zediuisa kiavulu,” muéne ua “sasumuka kiavulu” ni izuelu ia anju, iu ua dibhudisa se ihi ilombolola o izuelu íii. (Luk. 1:29) Nanhi ua mu zediuisa kiavulu? Madiia ka kexile mu kingila ku mu ximana kiki ku maiala. Maji o anju ia kexile mu zuela ia lungu ni henda ia Jihova Nzambi. Kima kia betele kota phala muéne. Maji muéne ka di zangelekele mu ku zuela kuila a mu xikinine kiá kua Nzambi. O phangu ia Madiia i tu longa kuila, se tu bhanga nguzu phala ku tu xikina kua Nzambi, ki tu tokala ku di zangeleka kuila a tu xikina kiá kua muéne. Nzambi u zoka ni ió a di zangeleka, maji u xikina ió a lenduka.​—Tiia. 4:6.

6. Ujitu uahi ua bhana o anju kua Madiia?

⁶ Madiia ua bhingile ku kala ni kídifua kiki, o ku lenduka, mukonda o anju ua mu bhanene ujitu ua dikota. Muéne a mu tangela kuila Madiia ueji vuala mon’a diiala ueji kala o muthu ua beta kota mu ngongo ioso. Ngabidiiele uambe: “[Jihova] Nzambi ua kà mu bhanga Sobha, kala kia kexile tat’â Davidi mu xahulu. Muène ua ka tumina o dibhata dia Jakobo katé ni ku hádia. O Ungana uê ki ua kà-bhua dingi.” (Luk. 1:32, 33) Madiia sé phata uejidile o kikanenu kia bhangele Nzambi kua Davidi midi ia mivu ku dima​—kuila ku muiji uê kueji tunda muthu ueji tumina ku hádia ni hádia. (2 Sam. 7:12, 13) Kienhiki, Mon’ê ueji kala o Mexiia, ia kexile mu kingila o mundu ua Nzambi mu hama ja mivu.

7. (a) Ihi ilondekesa o ibhuidisu ia bhange Madiia ia lungu ni muéne? (b) Ihi i tena ku di longa o minzangala kua Madiia?

⁷ O anju ia mu tangela ué kuila o mon’ê, eji ku mu ixana “Mon’a Nzambi ia Diulu.” Kiebhi muhatu mu xitu kieji vuala o Mon’a Nzambi? Mu kidi, kiebhi Madiia kieji tena ku vuala mona? Muéne ka kazalele luua ni Zuze. Madiia uebhula: “Kiki ki bhita kiebhi, eme ki ng’ejiia luua diiala?” (Luk. 1:34) Talesa kuma, Madiia ua zuela sé jisonhi kuila nuka ua zekele ni diiala. Mu veji dia kiki, muéne ua sangulukile mu ku kala hanji muzeletete. Lelu, minzangala iavulu ka bhana valolo mu ku kala muzeletete, anga a xonguena oso ala hanji mizeletete. Mu kidi, o athu a lunguluka. Maji Jihova ka lunguluka. (Mal. 3:6) Kala mu izuua ia Madiia, lelu Jihova  u bhana valolo ku athu a belesela o itumu iê.​—Tanga Jihebeleu 13:4.

8. Kiebhi Madiia kieji tena ku vuala mona sé kituxi se muéne uexile mukua ituxi?

⁸ Sumbala Madiia uexile selevende ia fiiele ia Nzambi, muéne uexile mukua ituxi. Kiebhi-phe muéne kieji tena ku vuala mona ua iuka, sé kituxi, o Mon’â Nzambi? Ngabidiiele ua tambuijila: ‘O nzumbi ikôla ia Nzambi ia Diulu, ia-nda ku ku vungina kizuzumbia kiê. Ki bhangesa kuila o mona ukôla, ua-nda ku mu vuala a mu ixana Mon’a Nzambi.’ (Luka 1:35) O kizuelu ukôla, kilombolola kima “kia zele,” “kikola.” O tuana a lundula o kituxi ku jitata jâ. Maji mu ukexilu iú, Jihova ueji bhanga madiuanu. Muéne ueji ta o muenhu ua Mon’ê mu mala dia Madiia ni ku mu vungina ni nzumbi iê ikôla phala ka lundule o kituxi kia Madiia. O kuila Madiia ua xikina mu kikanenu kia anju? Kiebhi kia divu muéne?

9. (a) Mukonda diahi akua ji phata a di nganala ia lungu ni musoso ua Madiia? (b) Kiebhi Ngabidiiele kia kolesa o kixikanu kia Madiia?

⁹ Akua jiphata ni ji mesene ja ngeleja ja Kidistándade, a zuela kuila o muzeletete ka tena ku vuala mona. Sumbala a di longa kiavulu, ka tena ku tendela kima kimoxi kia kidi. Kala kiambe Ngabidiiele kuila, “kua Nzambi, kana-ku kima ki kamba kuxikina.” (Luka 1:37) Madiia ua xikina mu izuelu ia Ngabidiiele, mukonda muéne uexile muhatu ua kixikanu kia kolo. O kixikanu kiê kia kexile ni ngunji. Kala muthu uoso uala ni kilunji, Madiia ua bhingile polova phala ku kolesa o kixikanu kiê. Ngabidiiele ua kexile polondo phala ku mu bhana dingi polova ia lungile ni ima iejidile kiá. Muéne ua mu tangela maka alungu ni ndandu iê ia muhatu, Nzebele, ua kukile kiá, a muijidile kiá ku athu mu mivu iavulu kuila ka tenene ku vuala ana. Nzambi ua mu bhangesa o kuimita.

10. Mukonda diahi ki tu tokala ku banza kuila o ujitu ua tambula Madiia uexile kikalakalu kia bhonzo?

¹⁰ Ihi-phe ieji bhanga Madiia? Muéne ua kexile ni kikalakalu phala ku ki bhanga, iu ua dielele kuila Nzambi ueji kumbidila ioso ia mu tangele Ngabidiiele. Sé phata, o ujitu iú ueji bheka ué ibhidi iavulu kua Madiia. Mu kifika, muéne ua tokalele ku banza kiebhi kieji divua o diiala ua-nda kazala-nê, Zuze, mu maka enhá. O kuila Zuze ueji xikina ku kazala nê mu kuijiia kuila muéne uemitine? Nange Madiia ua kexile ni uôma mukonda dia ujitu iú. Muéne ueji kuambata mu mala mê o muenhu ua beta o kota, mienhu ioso ndenge​—o Mon’a kazola ua Nzambi! Madiia ua tokalele ku mu tambula konda ni ku mu langa ku mundu iú ua iibha. Kikalakalu kia dikota!

11, 12. (a) Kiebhi kia kexile mu divua o maiala a nguzu, a fiiele kioso kia a bhanene kikalakalu kua Nzambi? (b) Ihi ia londekesa o kitambuijilu kia Madiia kua Ngabidiiele?

¹¹ O  Bibidia ilondekesa kuila katé muene o maiala a nguzu, a fiiele, akexile uá ni uôma ua ku tambula kikalakalu kua Nzambi. Mozé ua vutuila kua Nzambi kuila ka kexile ni uhete ua kuzuela. (Mak. 4:10) Jelemiia uambe kuila, uexile “mona-ndenge” phala ku xikina ku bhanga o kikalakalu kia mu bhanene Nzambi. (Jel. 1:6) Jona ua lengele o kikalakalu kia mu bhanene! (Jona 1:3) Abha Madiia?

¹² Athu avulu lelu a mona o ku lenduka kua Madiia ni ku belesela kuê mu izuelu iê. Muéne uambe kua Ngabidiiele: ‘Eme’ami’ú, ngi mubhika ua Jihova, kala ki ua ki zuela.’ (Luka 1:38) O mubhika uexile selevende ia betele o ku lenduka; o muenhu uê ua kexile bhu maku a ngana iê. Kienhiki Madiia ua kexile mu mona Jihova kala Ngana iê. Muéne uejidile kuila o muenhu uê uexile bhu maku ambote, mukonda Jihova muthu ua fiiele ni ió a mu kala fiiele ni kuila ueji mu bhana dibesá mu ku kumbidila o kikalakalu kia tambuile kua muéne.​—Jisá. 18:25.

13. Se tu mona kuila o ima i tu bhinga Nzambi ki tene’tu ku i bhanga, mukonda ia bhonzo, kuila ki tu tene’tu ku kibhanga, kiebhi ki tu tena ku kaiela o phangu ia Madiia?

¹³ Saí ithangana, Nzambi u tu bhinga ku bhanga kikalakalu kia bhonzo kuila ki tu tene’tu ku ki bhanga. Maji o Bibidia i tu bhana polova javulu phala tu xikine kua muéne kala kia bhangele Madiia. (Jisa. 3:5, 6) O kuila kiene ki tua-nda bhanga? Se tu bhanga kiki, muéne ua-nda tu bhana mabesá avulu ni ku tu bhangesa ku kala dingi ni kixikanu kia kolo kua muéne.

14, 15. (a) Kiebhi Jihova kia besoala dingi Madiia kioso muéne kiai mu kunda Nzebele ni Zakadiia? (b) Ihi i tu londekesa o izuelu ia Madiia i tu sanga mu divulu dia Luka 1:46-55?

¹⁴ O ima ia zuela Ngabidiiele ia lungu ni Nzebele, ia suínisa kiavulu Madiia. Ku ahatu oso, Madiia uejidile kuila Nzebele muéne ngó ueji tendela o ima ia kexile mu bhita na-iu muéne. Madiia ni lusolo ua bande o milundu ia Juda, nange ua bhange izuua itatu mba iuana mu njila. Kioso kia bokona mu dibhata dia Nzebele ni Zakadiia, o mukunji, Jihova ua bhana dingi polova phala ku  kolesa o kixikanu kia Madiia. Kioso Nzebele kiévu o umenekenu ua Madiia, o mona mu mala mê ua tuka ni ku sanguluka. Muéne uezalele ni nzumbi ikôla, iu uexana Madiia kuila “mam’a Ngana iami.” Nzambi ua londekesa kua Nzebele kuila o mona Madiia ueji kala Ngana iê, o Mexiia a mu kanene. Kienhiki, muéne ua ximana Madiia mu ku belesela kuê, kioso kiambe: “Eie ua zediua, mukonda ua xikana.” (Luka 1:39-45) Kienhiki, o ima ia kanene Jihova kua Madiia kuila ueji i bhanga, ieji di kumbidila!

¹⁵ Madiia ua zuela. O izuelu iê a i bhake kiambote mu Mak’â Nzambi. (Tanga Luka 1:46-55.) O Bibidia i tu londekesa kuila Madiia ua beta o kuzuela mu velusu jiji, mu velusu ja mukua, ndenge, o ima ia zuela muéne i tu longa ima iavulu ia lungu ni muéne.  O izuelu iê ilondekesa kuila muéne ua kexile ni ukexilu ua ku sakidila, ku ximana Jihova mu ku mu bhana o ujitu ua ku kala manh’a Mexiia. Kiki ki londekesa o kixikanu kiê kia kolo, mu kuzuela kuila Jihova ka bhana valolo ku athu ene mu di zangeleka kuila jingana, maji u kuatekesa o athu a lenduka a sota ku mu sidivila. Kiki ki tu londekesa ué kuila, muéne uejidile ima iavulu ia lungu ni Mikanda Ikola. Muéne nange ua tumbula 20 a ibatulu ia Bibidia i tu sanga mu Mikanda ia Hebalaiku! a

16, 17. (a) Kiebhi Madiia ni mon’ê kia londekesa o kídifua ki tua tokala ku kala na-kiu? (b) O ukamba ua Madiia ni Nzebele u tu longa ihi?

¹⁶ Madiia ua kexile mu xinganeka mu mak’â Nzambi. Maji né kiki ua lendukile, mu veji dia kuzuela mu kuijiia kuê, muéne ua tumbula o Mak’â Nzambi. O mona ua kexile mu mala diê, kioso kieji mu vuala, ueji londekesa ué o kídifua kiki, o kulenduka, muéne uambe: “Ima ioso i nga mu longa, ki iami eme; maji ia tundu kua Nzambi ió ua ngi tumu.” (Nzuá 7:16) Kima kiambote ku dibhudisa: ‘o kuila ngene mu xila ni ku bhana valolo mu Mak’â Nzambi?’ Inga ngi longa o ibanzelu iami, ia Nzambi kana? Tua tokala ku kaiela o phangu ia Madiia.

¹⁷ Madiia ua bhangele mbeji jitatu ni Nzebele, ia a di suínisa kiavulu mudiâ. (Luka 1:56) O musoso iú u tu lembalesa kuila dibesá dia dikota ku kala ni makamba. Se tu sota makamba a zola Jihova Nzambi, tua-nda kolesa kiavulu o kixikanu kietu ni ku zukama dingi kua muéne. (Jisa. 13:20) Maji kioso kia bhiti o mbeji jitatu, Madiia ua vutuka kubhata diê. Ihi ieji zuela Zuze mu kuijiia kuila Madiia uemita?

18. Ihi ia tangela Madiia kua Zuze ni kiebhi kia divu muéne?

¹⁸ Madiia ka kingila o divumu ku tunda phala ku tangela kua Zuze ioso ia kexile mu bhita. Muéne ua tokalele ku mu tangela. Ande dia kuzuela ni Zuze, muéne nange ua kexile mu banza kiebhi Zuze, diiala diambote, u xila Nzambi, kieji divua mu maka enhá. Maji, muéne uai, iu ua mu tangela ioso ia bhitile ni muéne. Kiki kia bhonzele kiavulu phala ku ki xikina. Muéne ua mesenene ku xikina, maji ua kexile mu banza kuila Madiia ua tele phánda. O Bibidia ki i tu tangela se ihi mba kiebhi kia kexile mu xinganeka muéne. Maji i tu tangela ngó kuila muéne ua bhingi kua Madiia phala ku di xisa mukonda mu ithangana ienioió, o mabhanga akexile mu a mona kiá kala makaza. Maji muéne ka mesenene kuila Madiia u bhita mu jisonhi ni ku mu kaxtikala, mukonda dia kiki ua banze o ku mu xisa mu kasuekele. (Mat. 1:18, 19) Kiki nange kia bhonzele kiavulu kua  Madiia ku mona o diiala didi diambote ku tala hadi mukonda dia maka enhá. Maji muéne ka luualele mu kuila Zuze ka xikina mu íii ia mu zuelela.

19. Kiebhi Jihova kia kuatekesa Zuze ku bhanga o kima kia tokala?

¹⁹ Jihova kehela Zuze ku bhanga o kima kia mesenene ku bhanga. Mu nzoji, o anju ia Nzambi, ia mu tangela kuila Madiia uemitine mu kaxi ka nzumbi ikôla. Kiki nange kia mu tululukisa o muxima! Kienhiki, Zuze ua bhange kala kia bhangele Madiia​—ua kaiela o kitendelesu kia Jihova. Ua kazala ni Madiia, iu ua kexile polondo phala ku langa kiambote o Mon’a Jihova.​—Mat. 1:20-24.

20, 21. Ihi i tena o ku di longa o makaza ni ió a banza o ku kazala ku phangu ia Zuze ni Madiia?

²⁰ O makaza​—ni ió a mu banza ku kazala​—a tokala ku di longa phangu ku dikaza didi dia kexile ku muenhu 2.000 ja mivu ku dima. Mu ku mona muhatu’ê ku kumbidila o ikalakalu ia mama, Zuze sé phata ua sangulukile kiavulu mu ku kaiela o kitendelesu kia mu bhanene o anju ia Jihova. Muéne nange ua mono kuila kima kiambote ku dielela kua Jihova mu ku batula o maka a moneka ku muenhu.​—Jisá. 37:5; Jisa. 18:13. Ua kolokota mu ku kala muthu uambote, ua henda ni ku kala ku pholo ia muiji mu ku batula o maka.

²¹ Ihi i tu tena o kuzuela ia lungu ni Madiia ni ku mesena ku kazala dingi ni Zuze sumbala ka mua ndalele dingi? Sumbala mu dimatekenu Zuze ka kexile mu tendela kiambote o maka, Madiia ua kingila iu ua muehela ku batula o maka, mukonda muéne ueji kala ku pholo dia muiji. Kienhiki, muéne ua di longo o valolo ia ku kingila, íii ué phangu iambote phala o ahatu a Jikidistá ku i kaiela lelu. O izulukutu íii ia longo ku dikaza didi o valolo ia ku di kunda o maka mu ukaza.​—Tanga Jisabhu 15:22.

22. Ihi ia bhangesa o ukaza ua Zuze ni Madiia ku mateka kiambote ni ihi ieji bhanga ku pholo?

²² Sé phata o ukaza ua Zuze ni Madiia, ua mateka kiambote. Kiiadi kiâ, a zolele kiavulu Jihova Nzambi, ia a mesenene ku bhanga o ima i mu sangulukisa mu ku kala tata jambote. Ene eji tambula mabesá avulu ku pholo​—ni ibhidi ia makota ué. Akexile ni kikalakalu kia ku sasa Jezú, o diiala dieji beta kota ku mundu.