DISÁ 24
A Nanyi o Jianju ni Ihi Yene mu Bhanga?
Jihova wamesena kwila, tudilonga ya lungu ni mwiji wê wala kudyulu. O mwiji yú o jianju, a exana “an’â Nzambi.” (Jobe 38:7) Ihi ilonga o Bibidya ya lungu ni jianju? Ihi yene mu bhanga o jianju? O kwila o jianju joso jibhanga mbandu kumwiji wa Nzambi?
1. A nanyi o jianju?
Jihova wabhange o jianju ande dya kubhanga o ixi. Kala mwene, o jianju kitutena kujimona, jala kudyulu. (Jihebelewu 1:14) Kwene mazunda a jianju, jene joso jala ni idifwa ki idifu. (Dijingunwinu 5:11) Ene ‘a xikamena Jihova kwa tuma, mwene a mu tumaka izuwa yoso o dizwí dyê.’ (Jisálamu 103:20) Mu ukulu, Jihova wexile mu tumikisa jinjimbu, kukwatekesa ni kubhulula o mundu wê mu ilwezu, bhukaxi ka jianju. Lelu, o jianju jamukwatekesa o Jikidistá kusanga o athu amesena kudilonga ya lungu ni Nzambi.
2. Satanaji nanyi? Ananyi o madimonyo mê?
Sayi jianju kalondekesa ufiyele wâ kwa Jihova. O anju ya dyanga ya bhukumuka amwixana “Dyabhu, a mu ila Satana, mukwa kunganala o mundu woso.” (Dijingunwinu 12:9) Satanaji wamesenene kutumina o athu. Mwene wabhangesa Adá ni Eva, ni jianju jamukwa, kubhukumuka Jihova, ni kudibunda mu kubhukumuka kwê. O jianju ja yibha jiji ajixana madimonyo. Jihova wa akaye kudyulu, lelu ene ala mu ixi mumu, andakwabwika.—Tanga Dijingunwinu 12:9, 12.
3. Kyebhi Satanaji ni madimonyo mê kya sota kutunganala?
Satanaji ni madimonyo mê ene mu nganala o athu bhukaxi kawanga. Ene mubhanga kiki bhukaxi kamadimonyo. Maji athu avulu kejiya kwila ene mubhanga ima ya lungu ni wanga. Mu kifika, athu avulu asota kikwatekesu kwa aloji ni imbanda kala asaki. Akamukwa asota kwasaka ku imbanda ene muzambula. Satanaji ubhangesa o athu kuxikina kwila, atena kuzwela ni madifundu. Maji Jihova utudimuna: “Kana kukayela imbanda akwa-kusuma; kana kulandula akwa-thutha ya kuzambula ni kubhanga iphata.” (Ijila 19:31) Mwene utudimuna kiki ni tudilange ni Satanaji ni madimonyo mê. Ene jinguma ja Nzambi, kamesena o mbote yetu.
DILONGE DINGI
Dilonge dingi ya lungu ni ima yambote yene mu bhanga o jianju, o ilwezu ya kusota o wanga, ni kyebhi kitutena kudilanga kumibhetu ya Satanaji ni madimonyo mê.
4. O jianju akwatekesa o athu kudilonga ya lungu ni Jihova
O jianju kabokela o athu pholo ni pholo. Mu veji dya kiki, ene atena kukwatekesa o jiselevende ja Nzambi amesena kudilonga ya lungu ni Jihova. Tanga Dijingunwinu 14:6, 7, mukusuluka bhanga o ibhwidisu ya kayela:
-
Mukonda dyahi twabhingi o kikwatekesu kya jianju phala kuboka?
-
Kikima kyambote kwijiya kwila, o jianju jitena kukukwatekesa kusanga o athu amesena kudilonga o Bibidya? Mukonda dyahi?
5. Lenga ima yoso ya lungu ni wanga
Satanaji ni madimonyo mê jinguma ja Jihova. Jinguma jetu we. Tanga Luka 9:38-42, mukusuluka bhanga o kibhwidisu kya kayela:
-
O madimonyo ene mu bhanga ihi ku athu?
Kitumesena kwehela o madimonyo kufunyisa o mwenyu wetu. Tanga Matendelelu 18:10-12, mukusuluka bhanga o ibhwidisu ya kayela:
-
Kyebhi o madimonyo kya tufunyisa ni kyebhi kya sota kudizwelesa n’etu? Ima yebhi ya lungu ni wanga iwene mu mona dingi mu dyembu dyé?
-
Mudyé o kwila kima kyambote Jihova kufidisa o ima yoso ya lungu ni wanga? Mukonda dyahi?
Tala OVIDYU, mukusuluka bhanga o ibhwidisu ya kayela.
-
Mu vidyu, Phalasa wakutile lungoji bhu lukwaku lwa mon’ê. Mudyé o kwila o lungoji lolo lwexile kilwezu phala mwene? Mukonda dyahi?
-
Ihi ya tokalele kubhanga Phalasa phala kudilanga mu mibhetu ya madimonyo?
O Jikidistá jakidi ene mu dituna kubhanga ima ya lungu ni madimonyo. Tanga Ikalakalu 19:19; ni 1 Kolindu 10:21, mukusuluka bhanga o kibhwidisu kya kayela:
-
Mukonda dyahi kima kyambote kubwika ima yoso ya lungu ni wanga?
6. Tolola Satanaji ni madimonyo mê
Satanaji mwéne wene mu tumina o madimonyo. Maji o jianju ja fiyele, ene mu atumina ku anju ya mukwa ya beta kota amwixana Mingedi, o dijina dyamukwa dya Jezú. Kutena kwahi kwala naku Mingedi? Tanga Dijingunwinu 12:7-9, mukusuluka bhanga o ibhwidisu ya kayela:
-
Nanyi wala dingi ni kutena, Mingedi ni jianju jê inga Satanaji ni madimonyo mê?
-
Ihi i ubanza, o kwila o akayedi a Jezú abhingi kukala ni wôma Satanaji ni madimonyo mê?
Eye utena kutolola Satanaji ni madimonyo mê. Tanga Tiyaku 4:7, mukusuluka bhanga o kibhwidisu kya kayela:
-
Kyebhi ki utena kudilanga mu mibhetu ya Satanaji ni madimonyo mê?
ATHU AVULU AMBA: “Kibhwale maka kujokala jijoko, mba kutala jifilme ja lungu ni wanga. Itonokenu ngó.”
-
Mukonda dyahi kilwezu kuxinganeka kiki?
IHI IWADILONGO
O jianju ja fiyele jitukwatekesa. Satanaji ni madimonyo, jinguma ja Jihova, ene asota kunganala o athu bhu kaxi kawanga.
Kubhitulula
-
Kyebhi o jianju kya kwatekesa o athu kudilonga ya lungu ni Jihova?
-
Nanyi Satanaji ni madimonyo mê?
-
Mukonda dyahi wamesena kulenga o wanga?
TOKWESA DINGI
Tokwesa dingi umone se mukonda dyahi Jezú mwéne Mingedi kota dya jianju.
Tanga o ima ilondekesa kwila, Dyabhu muthu wakidi, kikima kya yibha kyala ku muxima wamuthu.
Sayi muhatu watolola o madimonyo. Tala kyebhi kya bhange kiki.
“Mwene Wadilongo Kwila o Mwenyu Wala ni Valolo” (O Mulangidi, 1 wa Kavwa wa 1993 mu Phutu)
Tala kyebhi Satanaji kyene mu nganala o athu bhukaxi kawanga.
Eye Nange Wandawabhela we o Maka Yá
IBHUIDISU IENE MU BHANGA DINGI O ATHU
Kyebhi o Jimbangi ja Jihova Kyene Mulonga o Bibidya?
Ni ukexilu ubhe yú wakulonga o Bibidya wa Jimbangi ja Jihova, eye utena we kutanga o jivelesu mu Bibidya yoso yoso iwamesena. Divwa kyambote phala kwixana muthu kumwiji wé mba kamba dyé kudibunda neye mukudilonga o Bibidya.
