DISÁ 34
Kyebhi Kitutena Kulondekesa o Henda Yetu Kwa Jihova?
Eye udivwa kwila wazukama dingi kwa Nzambi kindala, kyoso kiwamateka kudilonga o Bibidya ndenge? Wamesena kusuluka ni kukolesa o ukamba wé ni mwene? Se kyene, lembalala kwila kyoso Jihova kyamona kuma o henda yé ya mudibandekesa dingi kwamwene, mwene wandakuzola dingi wandakulanga. Kyebhi ki utena kulondekesa kwila wazolo Jihova?
1. Kyebhi kitutena kulondekesa kwila twazolo Jihova?
Tulondekesa o henda yetu kwa Jihova kyoso kitumubelesela. (Tanga 1 Nzwá 5:3.) Mwene kajijidika muthu phala kumubelesela. Mwene watubhana o ufolo wakusola kumubelesela mba kana. Mukonda dyahi? Mukonda Jihova wamesena kwila tu mu “tumaka ni muxima woso.” (Loma 6:17) Mu izwelu yamukwa, mwene wamesena kwila umubelesela se kijijidiku, maji ni muxima woso. O jimbandu ja 3 ni 4 ya divulu didi, janda kukwatekesa kulondekesa o henda yé kwa Jihova mu kubhanga o ima imusangulukisa ni kuzemba o ima ya zembe mwene.
2. Mukonda dyahi nange kutubhonza kulondekesa o henda yetu kwa Jihova?
“Wayuka umona jiphaxi javulu.” (Jisálamu 34:19) Etwenyoso twene mudibhana ni maka mukonda dya kukala tu akwa ituxi. Nange tudibhana ni maka alungu ni kukamba kitadi, kukamba kuyuka ni ibhidi ya mukwa dingi kumwenyu. Kyoso kitudibhana ni maka ya, nange kutubhonza kubhanga o kima kya tubhingi Jihova. Kiki kibhita mukonda kikubhonzo kubhanga o ima yayibha. Maji kyoso ki ukala fiyele anga ubelesela Jihova, eye wa mulondekesa kwila wamuzolo dingi kima kyosokyoso ndenge. Kyenyiki eye ulondekesa o ufiyele wé kwa mwene. Mukonda dya kiki, Jihova wandalondekesa we o ufiyele wê kokwé. Mwene nuka wandakuxisa.—Tanga Jisálamu 4:3.
DILONGE DINGI
Dilonge dingi phala kwijiya se mukonda dyahi Jihova ubhana valolo mu kubelesela kwé, ni ihi itena kukukwatekesa kukala fiyele kwa mwene.
3. Satanaji wakutatela
O Bibidya mu divulu dya Jobe ilondekesa kwila, Satanaji watatela Jobe ni athu oso amesena kusidivila Jihova. Tanga Jobe 1:1, 6–2:10, mukusuluka bhanga o ibhwidisu ya kayela:
-
Kala kyambe Satanaji, mukonda dyahi Jobe wexile mubelesela Jihova?—Tala Jobe 1:9-11.
-
Ihi yazwela Satanaji ya lungu ni athu oso, kate mwene neye?—Tala Jobe 2:4.
Tanga Jobe 27:5b, mukusuluka bhanga o kibhwidisu kya kayela:
-
Kyebhi Jobe kyalondekesa ni kidi kyoso kwila, wazolele Jihova?
Jobe walondekesa ni kidi kyoso kwila wazolele Jihova, wexile fiyele kwa mwene
Etu tulondekesa kwila twazolo Jihova kyoso kitukala fiyele kwa mwene
4. Sangulukisa o muxima wa Jihova
Tanga Jisabhu 27:11, mukusuluka bhanga o ibhwidisu ya kayela:
-
Kyebhi Jihova kya divwa kyoso ki ubhanga o ima ni unjimu anga umubelesela? Mukonda dyahi?
5. Eye utena kukala fiyele kwa Jihova
O henda yetu kwa Jihova ituswinisa kuzwela ni akwetu ya lungu ni mwene. Mukukala fiyele kwa Jihova, twamesena kumubelesela né mwene se kubhonza kubhanga kiki. Tala OVIDYU, mukusuluka bhanga o ibhwidisu ya kayela.
-
Mudyé, o kwila kubhonza kuzwela ni akwenu ya lungu ni Jihova?
-
Mu vidyu itwamono, ihi ya kwatekesa Jorge kutolola o wôma?
Kikubhonzo kukala fiyele kwa Jihova, kyoso kituzola o ima yazolo mwene ni kuzemba o ima yazembe mwene. Tanga Jisálamu 97:10, mukusuluka bhanga o ibhwidisu ya kayela:
-
Mu kuxinganeka mu ima iwadilongo, ima yebhi yazolo Jihova? Ima yebhi yazembe mwene?
-
Ihi itena kukukwatekesa kuzola o ima yambote ni kuzemba o ima yayibha?
6. Kubelesela Jihova kyene o kima kyabeta kota
Kubelesela Jihova phala o mbote yetu. Tanga Izaya 48:17, 18, mukusuluka bhanga o ibhwidisu ya kayela:
-
O kwila eye uxikina kuma ima yoso itutuma kubhanga Jihova phala o mbote yetu? Mukonda dyahi?
-
Kyebhi o ima iwadilongo mu Bibidya ni ya lungu ni Jihova, yene mukukwatekesa katé mu kithangana kiki?
NANGE SAYI MUTHU WIBHULA: “O kwila o ibhangelu yami itena kusangulukisa Nzambi?”
-
Kibatulu kyebhi kya Bibidya kiweji tanga phala kulondekesa kwila, o ibhangelu yetu itena kusangulukisa mba kuluwalesa Jihova?
IHI IWADILONGO
Eye utena kulondekesa kwila wazolo Jihova kyoso ki umubelesela, ni kumukala fiyele sumbala ni ibhidi.
Kubhitulula
-
Ihi iwadilongo mu phangu ya Jobe?
-
Kyebhi ki utena kulondekesa kwila wazolo Jihova?
-
Ihi yanda kukwatekesa kukala fiyele kwa Jihova?
TOKWESA DINGI
Tala kyebhi ki utena kukala fiyele kwa Jihova ni kilunga kyê.
Dilonge dingi ya lungu ni ima yatatela Satanaji ku athu.
“Jobe Wakolokota mu Ufiyele wê” (O Bibidya—Yebhi o Njimbu yé? Mbandu ya 6 mu Phutu
Tala kyebhi kate mwene o ana jindenge kyatena kulondekesa o ufiyele wâ kwa Jihova.
Kyebhi munzangala wene mudibhana ni ijijidiku ya minzangala ni akwa kyalondekesa o ufiyele wê kwa Nzambi?
Eye Nange Wandawabhela we o Maka Yá
IBHUIDISU IENE MU BHANGA DINGI O ATHU
Kyebhi o Jimbangi ja Jihova Kyene Mulonga o Bibidya?
Ni ukexilu ubhe yú wakulonga o Bibidya wa Jimbangi ja Jihova, eye utena we kutanga o jivelesu mu Bibidya yoso yoso iwamesena. Divwa kyambote phala kwixana muthu kumwiji wé mba kamba dyé kudibunda neye mukudilonga o Bibidya.
