DISÁ 43
Ihi Yamba o Bibidya ya Lungu ni Kunwa Uhôlwa?
Kumundu woso, o athu kala ni ixinganeku yadifu ya lungu ni kunwa uhôlwa. Sayi athu asola ithangana phala kunwa kumoxi ni makamba. Amukwa kaxikina mwene kunwa uhôlwa. Maji amukwa anwa katé kya kodiwa. Ihi ilonga o Bibidya ya lungu ni uhôlwa?
1. O kwila o kunuwa kituxi?
O Bibidya ki ilongo kwila, kituxi o kunwa uhôlwa. Kumbandu yamukwa, o Bibidya ilonga kwila, ‘o vinyu isangulukisa o muxima wa muthu’, yala bhukaxi ka ima yambote yatubhana Nzambi. (Jisálamu 104:14, 15) Sayi mayala ni ahatu afiyele a atumbula mu Bibidya, exile munwa uhôlwa.—1 Timote 5:23.
2. Kitendelesu kyebhi kibhana o Bibidya kwa yó asola o kunwa?
Jihova wazembe o kunwa kyavulu. Né mwene se o muthu wamunwa umoneka kala kakodiwe. (Ngalásya 5:21) O Bibidya yamba: “Ku kale mu kisangela kya jihólwa ja vinyu.” (Jisabhu 23:20) Mukiki, se tusola kunuwa, kitutokala kunwa kyavulu, né mwene se twala ubheka wetu. Kunwa kyavulu, kutena kubhangesa o muthu kuzwela se kuxinganeka, kuzwela mba kubhanga ima ki itokala. Kutena we kubhangesa o muthu kukata. Kitumesena kwila, o ima yiyi ibhita netu, se kitwamutena kunwa bhofele, twatokala kweha o kunwa o uhôlwa.
3. Kyebhi kitutena kuxila o kima kyasolo akwetu kya lungu ni uhôlwa?
Kala muthu mwene watokala kusola se wandanwa uhôlwa mba kana. Kitutokala kufundisa muthu usola kunwa ni kilunji, kitujijidika we muthu kunwa uhôlwa. (Loma 14:10) Etu tudituna kunwa uhôlwa se kubhanga kiki kubhangesa akwetu kudivwa kyayibha. (Tanga Loma 14:21.) Etu tubelesela o kitendelesu kiki: “Muthu ka sote kubhanduluka ngó mwene, maji a sote we o kubhanduluka kwa akwâ.”—Tanga 1 Kolindu 10:23, 24.
DILONGE DINGI
Tokwesa jivelesu ja Bibidya janda kukwatekesa kusola se watokala kunwa mba kana, ni uhôlwa kuxi uwandanwa. Tala we se ihi i utena kubhanga se wamudibhana ni maka mukonda dya uhôlwa.
4. Sola se wandanwa uhôlwa mba kana
Kyebhi kyexile o kibanzelu kya Jezú kya lungu ni kunwa uhôlwa? O madiwanu adyanga a Jezú atukwatekesa kwijiya o kitambwijilu. Tanga Nzwá 2:1-11, mukusuluka bhanga o ibhwidisu ya kayela:
-
Kyebhi o madiwanu ya atukwatekesa kumona kyebhi kyexile o kixinganeku kya Jezú kya lungu ni uhôlwa ni muthu unwa uhôlwa?
-
Kuma Jezú kambe kwila kituxi kunwa uhôlwa, ihi yatokala kuxinganeka o Jikidistá ya lungu ni yó asola o kunwa?
Sumbala o kidistá wala ni ufôlo wakunwa, kiki kikilombolola kwila, kyene o kima kyabeta o kota kya kubhanga ithangana yoso. Tanga Jisabhu 22:3, mukusuluka dizwelesyenu kyebhi o jipondo jakayela jitena kufunyisa o kima ki wandasola:
-
Se wanda kwendesa dikalu mba wanda kalakala ni jimakina.
-
Se wemita.
-
Se o musaki ukufidisa kunwa.
-
Se kukubhonza kunwa ni kilunji.
-
Se o ijila ya ixi ikufidisa o kunwa.
-
Se wala ni muthu usola kudituna kunwa, mukonda mukulu wadibhanene kya ni maka alungu ni uhôlwa.
O kwila eye watokala kuta uhôlwa mufesa ya ukaza mba mu itonokenu yengi? Phala kumona ihi itena kukukwatekesa kusola kyambote, tala OVIDYU.
Tanga Loma 13:13 ni 1 Kolindu 10:31, 32. Kyoso kimwandazubha kutanga o ibatulu yoso, bhanga o kibhwidisu kya kayela:
-
Kyebhi o kukumbidila o ima yiyi kutena kukukwatekesa kusola o ima mu ukexilu usangulukisa Jihova?
Kala muthu mwene watokala kusola se unwa mba kana. Sayi ithangana, o Kidistá utena kusola kunwa uhôlwa maji mu ithangana yamukwa kana
5. Sola se uhôlwa kuxi uwandanwa
Se usola kunwa uhôlwa lembalala kwila Jihova kafidisa kunwa uhôlwa maji mwene ufidisa kunwa kyavulu. Mukonda dyahi? Tanga Hozeya 4:11, 18, mukusuluka bhanga o kibhwidisu kya kayela:
-
Ihi itena kubhita ni muthu se unwa uhôlwa wavulu?
Ihi yanda tukwatekesa phala kitunwe kyavulu? Twabhingi kwijiya katé bhebhi bhututena o kunwa. Tanga Jisabhu 11:2, mukusuluka bhanga o kibhwidisu kya kayela:
-
Mukonda dyahi kima kyambote kuxinda jimbambe mu maka alungu ni kunwa uhôlwa?
6. Kikwatekesu phala yó anwa kyavulu
Tala ihi yakwatekesa diyala kutolola o ukexilu wakunwa kyavulu. Tala OVIDYU, mukusuluka bhanga o ibhwidisu ya kayela.
-
Mu vidyu, ihi yexile mubhanga Dmitry kyoso kyexile munwa?
-
O kwila muveji yadyanga kyoso kya fikisa kweha o kunwa mwene watena?
-
Kyebhi mwene kyatena kutolola o maka ya?
Tanga 1 Kolindu 6:10, 11, mukusuluka bhanga o ibhwidisu ya kayela:
-
Ihi yamba o Bibidya ya lungu ni kukodiwa?
-
Ihi ilondekesa kwila, o muthu unwa kyavulu utena kulunguluka?
Tanga Matesu 5:30, mukusuluka bhanga o kibhwidisu kya kayela:
-
Kyoso Jezú kyate o kifika kya lungu ni kubatula o lukwaku, mwene wamesenene kuzwela kwila, sayi ima itwawabhela twandabhinga kuyeha phala kusangulukisa Jihova. Se wa mubhânga ni maka alungu ni kukodiwa ihi itena kukukwatekesa kutolola o maka? a
Tanga 1 Kolindu 15:33, mukusuluka bhanga o kibhwidisu kya kayela:
-
Kyebhi o kukala ni makamba anwa kyavulu, kutena kukufunyisa?
NANGE SAYI MUTHU WIBHULA: “O kwila o Bibidya yamba kuma kunwa uhôlwa kituxi?”
-
Kyebhi kiweji tambwijila?
IHI IWADILONGO
O mauhôlwa ala bhukaxi ka maujitu atubhana Jihova. Maji mwene ufidisa o kunwa kyavulu ni kukodiwa
Kubhitulula
-
Ihi ilonga o Bibidya ya lungu ni kunwa uhôlwa?
-
Yebhi o ibhidi ijila mu kunwa lwavulu?
-
Kyebhi kitutena kuxila o kima kyasolo akwetu?
TOKWESA DINGI
Kyebhi o minzangala kyatena kusola kyambote mu maka alungu ni kunwa uhôlwa?
Tala ihi i utena o kubhanga phala kutolola maka alungu ni uhôlwa.
“Ta o Uhôlwa Bhu Kididi Kyê” (O Mulangidi, 1 wa Katatu wa 2010 mu Phutu)
O kwila o Jikidistá atokala kudipupa o jikopho ande dya kunwa?
“Atangi Amadivulu Metu Ebhula” (O Mulangidi, 15 wa Kawana wa 2007 mu Phutu)
Tanga o musoso, “Eme ngexile Munwa Kyavulu” phala kumona kyebhi o diyala amuthange mu musoso yu kyeha o kunwa kyavulu.
“O Bibidya Ilungulula o Myenyu ya Athu” (O Mulangidi, 1 wa Kasambwadi wa 2012 mu Phutu)
a O yó amudibhana ni maka alungu ni uhôlwa, nange abhinga kikwatekesu kya asaki. Asaki avulu amba kwila, o yó amudibhana ni maka alungu ni kunwa nange abhingi mwene kwenha o kunwa.
Eye Nange Wandawabhela we o Maka Yá
IBHUIDISU IENE MU BHANGA DINGI O ATHU
Kyebhi o Jimbangi ja Jihova Kyene Mulonga o Bibidya?
Ni ukexilu ubhe yú wakulonga o Bibidya wa Jimbangi ja Jihova, eye utena we kutanga o jivelesu mu Bibidya yoso yoso iwamesena. Divwa kyambote phala kwixana muthu kumwiji wé mba kamba dyé kudibunda neye mukudilonga o Bibidya.
