Phang’etu ia Kazola, Muboki ua Utuminu:

XINGANEKA kuila ua tokala ku Muiji ua Betele ua Brooklyn, kamene ka selu, kia Sesa, kizuua kia 2 kia mbeji ia Kamusasadi ua muvu 1914. Eie ua xikama bhu kididi bhu uene mu xikama kiá iu ua mu kingila Phange C. T. Russell. Mu ku bhita tu ithangana, u tala kuila o dibhitu di bokuesa o athu katé bhu kididi kia kudia bhu ua xikama ni akuenu dia jikuka, Phange Russell iú bokona. Muéne uimana bhofele, kala kiene mu bhanga kiá, anga u menekena o muiji ua Betele ni ku sanguluka kuoso, uixi: “Nga mi menekena enu oso.” Maji-phe, mu veji dia ku sunga kiá o kialu kiê ku meza n’a xikama, muéne u beta o maku mê ni ku zuela ni ku sanguluka kuoso: “O Jithembu ja Ifuxi, ja Bhu Kiá; o ku tumina kua jisobha jâ, kua bhu!” Eie u sanguluka kiavulu—mukonda ua mu kingila o kizuua kiki mu mivu iavulu! Kumoxi ni Muiji uoso ua Betele, eie u tambula o njimbu íii ni ukembu uoso.

 Kua bhiti kiá mivu iavulu tundé Phange Russell kia tange o izuelu íii. Ihi ia bhange o Utuminu tundé o kizuua kieniókio? Ima iavulu! Bhu kaxi ka Utuminu uê, Jihova uene mu zelesa ni ku longa o mundu uê. Ku muvu ua 1914 o mundu ua Nzambi ua tolele, ua tenesele ngó jimidi ja athu maji lelu mazunda a sambuadi ni kaxaxi ndenge. Kiebhi eie mudiê ki uene mu tambula o ulongelu iú?

Lelu tuene mu kuívua phange jetu kuzuela: “O dikalu dia Jihova mu diulu, ki diene mu kuimana!” Kiki kidi muene. Maji mu kidi, tundé ku muvu ua 1914, o dikalu dia Nzambi ku diulu, dilombolola o mbandu ia kilunga kia Jihova kiala ku diulu, diene mu kuenda ni lusolo kala kia-nda londekesa o divulu didi. Mukonda dia kuila o njimbu iambote a tokala ku i tula mu ngongo ioso, o aboki a Utuminu ene mu boka mu maukexilu avulu kala ni ji jurnale, ji fikula, ji filme ni jikalatá, mitelembe ni bhu kaxi ka Internete.

Ni dibesá dia Jihova, tua mu tena ku bhanga o madivulu metu mu 670 a madimi ndenge ni ku a bhana ku muthu uoso-uoso sé ku a bhinga kitadi. Athu a di bheka mu vondadi iâ phala ku kuatekesa mu ku tunga o Ididi ia ku Bheza, Ididi ia Iônge ia Makota, ni ji Filiiale ki kale mu jixi muala jimbongo javulu mba mu jixi mua kambe kitadi. Kioso ki bhita mavuua, phange jetu ja kazola aia ni lusolo luoso ku bhindumuna o jiphange jâ mu kulondekesa kuila makamba ‘mu ithangana ia jiphaxi.’—Jisa. 17:17.

Saí ithangana, o atuameni a jingeleja ni jinguma ja mukuá dingi, a tu zukutisa ‘mu dijina dia kitumu,’ maji ki tu kolesa kiavulu o kixikanu ku mona kiebhi nguzu iene mu bhanga ene phala ku tu bhuisa, iene mu “bhekela o Njimbu Iambote kusambuka dingi kiengi.”—Jisá. 94:20; Fil. 1:12.

Kijingu kia dikota ku di lunga n’eie mbata tua tokala ku “dibhata,” dimoxi. Ijiienu-kiu kuila tua mi zolo kiavulu. Tua mu samba phala o divulu didi di ku kuatekese ku ximana o undundu uê mu nzumbi, m’ukulu ndenge.—Mat. 24:45.

Tua mi menekena ni muxima uetu uoso,

Phange Jenu,

Kibuka Kia Utuminu Kia Jimbangi ja Jihova