SAI IÂ AMBA KUILA KANA. Sai Dotolo ua sokesa o itendelesu ia Bibidia ni mesene ua kaiela o divulu dio soneke ku mivu ia 1920 phala kulonga mu xikola maka a lungu ni química. O mukua jiphata nange uibhula hanji se eie u tena kukaiela o itendelesu ia komputadolo iokulu phala ku ku kuatekesa kukalakala ni komputadolo ia izuua ietu. Mu izuelu ia mukua, sai iâ a mona kuila ka tokala kudielela mu Bibidia mukonda iokulu kiá.

Mukonda diahi o muthu ueji kaiela o itendelesu ia Bibidia iokulu mu izuua íii muezala ni mitelembe ia katunda? Mu kidi kuene zungule ia jisaite, jene mu tumikisa itendelesu ia ubhe mu ithangana ioso phala ku kuatekesa o athu. O mitelembe ia izunzumbia iene mu kuixana jingijiie ja katunda ni jidotolo phala kubhana kaiula mu kukuatekesa o athu kukala ni ukexilu uambote. O maloja a madivulu a sumbisa ndumba dia madivulu phala kukuatekesa o athu, mu kiki o matenda a nganhala kitadi kiavulu.

Ni milongi ioso íii mu izuua ietu mukonda diahi tua tokala kukaiela o itendelesu ia Bibidia, o divulu dio soneke 2.000 ja mivu kudima? O kuila o athu ka xikina mu Bibidia ka lungu mu kuzuela kuila, o kukaiela o itendelesu ia Bibidia kia difu ni kulonga ni divulu dio kulu dia química, mba kukaiela o itendelesu ia komputadolo iokulu? Mu kidi o kubanza kiki kiluezu. O ima i bhanga o jingijiie i lunguluka ni lusolo luoso, maji o kuila o vondadi ia athu ia kukala ni muenhu uambote ia lunguluka? O athu a mesena hanji kuijiia se kiebhi kia moneka o muenhu ni kukala ni kisangusangu ni ku kondama, kuzediua ku muiji, ni kukala ni makamba ambote.

Né muene o Bibidia iokulu, maji iene i zuela ia lungu ni ima íii i tua bhindamena ni ima ia mukua. I zuela ue kuila a i bhusu kuala o Mubhangi uetu. Iene i tuendesa mu maukexilu avulu a muenhu ni ku tu pelepalala phala ku dibhana kiambote kabasa kibhidi ki moneka. (2 Timote 3:16, 17) Ku mbandu ia mukua i tu bhana itendelesu mu ithangana ioso, o itendelesu íii i nangenena! O Bibidia iamba: “O kizuelu kia Nzambi kima kia muenhu.”—Jihebeleu 4:12.

O kuila o ima i tanga o Bibidia ia kidi muene? O kuila iene ió kulu kiá? Inga ku madivulu moso iene iala kota mu ku tu kuatekesa, ni kuila divulu dia muenhu? O Mulangidi iú uene ua dianga mu Milangidi ia katunda, ua-nda ku kuatekesa kusanga o itambuijilu ia ibhuidisu íii.