O jinguma ja Jezú ja kexile mu longolola Jezú ni maxibulu mê, mukonda dia ima iavulu, kála o kukamba kusukula o maku ande dia kudia. O Kitumu kia Mozé Kia jimbulula o ima i bhangesa o muthu kukasana. Mu kifika, se o muthu u kala ni kibhubhe kia masu mba kia manhinga, u kala ni dibhute, u kuata o kimbi kia muthu mba kia kiama, muéne u kasana. O Kitumu kia jimbulula ué ima ia tokalele kubhanga o muthu phala kuzela dingi. Muéne ua tokalele kubhana sata, ku disukula mba ku di lunduluila menha.—Ijila, Ibatulu 11-15; Dialuilu, kibatulu 19.

O jimesene ja Jijudé a bandekesa ué o ijila iâ mu itumu íii. Saí divulu dia zuela kuila, o jimesene jiji ja bandekesa dingi ijila iéngi, mua tumbula o ima ioso i tena kuxidisa o muthu, ni kiebhi o muthu iú u tena ku sambukisa akuâ. Ene a tumbula ué o ima ia tokalele kuxila, ni ima ki i tokalele kuxila. A zuela ué o ima ia tokelele kubhanga o muthu, phala kuzela dingi.

O jinguma ja Jezú, a muibhula: “Phala-hi jixibulu jé ji kamba kukuata kijila kia akulu-a-ndamba, adia ni maku maxidi?” (Marku 7:5) O Jifalizeu jojo, ka kexile mu zuela ia lungu ni kusukula o maku ande dia kudia. Ene a bhangele kijila kia kuila, ande dia muthu kudia, a tokalele ku mu lunduluila menha bhu maku. O divulu di tua tange kiá kudima dia zuela ué kuila, o jimesene “a zuelele ué o itutu mua tokalele kuta o menha, o menha a tokalele ku a ta mu kitutu, o muthu ua tokalele ku lunduluila o menha, ni kiebhi kia tokalele kua lunduluila bhu maku.”

Kiebhi Jezú kia kexile mu mona o itumu ioso íii ia bhangele o jimesene jiji? Muéne ua tangela o atuameni a Jijudé, uixi: “Mu akua mangonha! Izaia kidi kiê kia mi soneka enu, uixi: Nzambi uambe kuma: Athu iá a ngi xila ngó ni mizumbu iâ, maji mixima iâ-phe ia ngi kala kua lebha. A ngi bheza-phe ngó makutu ni kulonga ijila ia tumu ngó athu, kala Nzambi muène ua i tumu. Enu mu-xa kitumu kia Nzambi.”—Marku 7:6-8.