“KAMONA kandenge, ua kà di-bhanga midi; o ua beta kutola u biluka kifuxi kionéne.” (Izaia 60:22) O izuelu íii, ia mu dikumbidila lelu. Ku muvu ua 2015, kua kexile 8.220.105 a jiselevende ja Jihova, akexile mu boka o njimbu iambote ia Utuminu ua Nzambi ku mundu uoso! Ia lungu ni kibandekesu kiki, Nzambi uambe: “Eme, ngi Jihova, bhu kumbi diê nga ka ki bhanga sé kufula.” Mu kubhita mivu, o kikalakalu kietu ki dibandekesa dingi. O kuila tua mu bhanga ioso phala kuboka ni kulonga o njimbu iambote ku athu? Jiphange javulu ene mu kalakala kiá kála aboki a thembu ioso, ni aboki a ithangana ni ithangana. Amukuá ai mu tunga mu ididi iéngi, phala kukuatekesa o kikalakalu kia kuboka. O athu amukuá, a mu kuatekesa kutunga o Ididi ia Ubhezelu.

1, 2. (a) Kiebhi kia mu dikumbidila o divulu dia Izaia 60:22? (b) Ibhindamu iebhi i tuala na-iu mu kilunga kia Jihova?

² Mivu ioso ene mu bhanga 2.000 ja ilunga ia ubhe ndenge. O ilunga íii, ia bhindamena dingi tufunga ni akuatekexi a tufunga. Mivu ioso, midi ni jimidi ja akuatekexi a tufunga a bhingi  kukala tufunga, midi ni jimidi ja jiphange jamukuá a bhingi ué kukala akuatekexi a tufunga. Mu kidi, tuala ni ima iavulu phala kubhanga mu “kikalakalu kia Ngana.” Maji ko jiphange ja maiala ngó a tena kukuatekesa, o jiphange ja ahatu a tena uâ kukuatekesa.—1 Kolindo 15:58.

3, 4. Mudié, ihi ilombolola kubhanga dingi mu sidivisu ia Nzambi?

³ Tanga 1 Timote 3:1. Poxolo Phaulu ua ximana o jiphange a mesenene kukala tufunga. Se muthu ua mesena kukuata kima kiala dikanga, muéne ua tokala ku di sunga mba kusununa o lukuaku luê, phala kukuata o kima kia mesena. Mu kiki, xinganeka phange ua mesena kukala mukuatekexi ua tufunga. Muéne uejiia kuila, phala kukala mukuatekexi, ua tokala kubhanga nguzu phala kukala ni ídifua iambote. Kioso kia-nda kala mukuatekexi ua tufunga, muéne ua tokala kubhanga dingi nguzu mu kulungulula o ídifua iê, phala kukala kafunga mu kilunga.

⁴ Jiphange javulu a mu lungulula o ukexilu ua muenhu uâ, mukonda a mesena kubhanga dingi mu sidivisu ia Jihova. Mu kifika, saí jiphange nange a mesena kukala aboki a thembu ioso, kukalakala ku Betele, mba kukuatekesa kutunga Ididi ia Ubhezelu. Tua-nda mona kiebhi o Bibidia i tena ku tu kuatekesa kubhanga dingi mu sidivisu ia Nzambi.

5. Kiebhi o minzangala kia tena kusidivila Jihova ni nguzu iâ?

⁵ O minzangala a tena kukalakala dingi mu sidivisu ia Jihova, mukonda ala ni nguzu, ni sauidi iambote. (Tanga Jisabhu 20:29.) Saí minzangala, a kalakala ku Betele mu kukuatekesa kubhanga madivulu, ni ji Bibidia. Saí jiphange javulu, a tunga Ididi ia Ubhezelu, mba a kuatekesa ku i iudika kiambote. Minzangala iamukuá, a dibhakula phala kukuatekesa kioso kubhita mavuua. Minzangala iavulu aboki a thembu ioso, a sota kudilonga dimi diéngi, mba aia mu tunga mu ididi iéngi, phala kuboka o njimbu iambote.

6-8. (a) Ihi ia bhange Aaron phala kusanguluka mu sidivisu ia Nzambi? Mbote iebhi ia katula? (b) Kiebhi ki tu tena ‘kulola ni kumona kuma Jihova uene ni mbote’?

⁶ Etu tua zolo Jihova. Mukonda dia kiki, tua mesena ku mu sidivila ni muxima uoso. Maji né kiki, nange tu divua kála Aaron. Muéne ua mesenene kusidivila Nzambi, maji ka sangulukile mu sidivisu iê. Aaron ua mateka kuia mu iônge ni kuboka tundé mu undenge uê, maji né kiki muéne uambe: “Ki ngi kexile dingi ni vondadi ia kuia mu iônge, ni kuia mu sidivisu ia kuboka.” Mu kiki-phe, ihi ia bhange muéne?

⁷ Aaron ua bhange nguzu phala kutanga o Bibidia izuua ioso, ku di sokejeka phala o iônge, ni kutambuijila mu iônge. Muéne ua mateka ué kusamba izuua ioso. O ima ioso íii, ia mu kuatekesa kukala ni ukamba uambote ni Nzambi. Aaron uéza mu kuijiia kiambote Jihova. Mu kiki, o henda iê kua muéne ia dibandekesa dingi. Mukonda dia kiki, muéne ua sangulukile dingi. Aaron ua mateka kukalakala kála muboki ua thembu ioso, ua kuatekesa o athu akexile mu bhita ni mavuua, anga uai mu tunga mu ixi iéngi phala kukuatekesa mu sidivisu ia kuboka. Lelu, muéne kafunga, ua mu sidivila  ku Betele. Ihi i banza muéne mu kima kia solo? Aaron uambe : “Eme nga ‘lola, nga mono kuma Jihova uene ni mbote.’ Mukonda dia mabesá u nga tambula kua Jihova, nga mono kuila nga tokalele kubhanga dingi mu sidivisu iê. Mu kubhanga kiki, muéne uene mu ngi besoala kiavulu.”

⁸ O mukuá jisalamu uambe: “Lolenu, mu mone kuma Jihova uene ni mbote.” Muéne uambe dingi: “Iá-phe a sota Jihova, kana kima kiambote kia a kamba.” (Tanga Jisálamu 34:8-10.) Kioso ki tu sidivila Jihova ni nguzu ietu ioso, tu sanguluka kiavulu mukonda tuejiia kuila, tua mu bhanga o kima ki mu sangulukisa. Tuejiia ué kuila, muéne ua-nda kumbidila o kikanenu kiê kia ku tu langa.

9, 10. Mukonda diahi kima kiambote kukala ni ukexilu ua ku “kinga”?

⁹ Nange tua mesena kubhanga dingi mu sidivisu ia Jihova. Maji ihi i tuamba se tua mu kingila kiá thembu iavulu phala kutambula ujitu mu kilunga, mba tua mesena kuila o ima i lunguluka phala tu bhange dingi mu sidivisu ia Jihova? Mu ithangana íii, tua tokala kukala ni muanhu. (Mikeia 7:7) Sumbala Jihova ua mu kuehela o ima íii kubhita n’etu, maji tuejiia ni kidi kioso kuila, muéne ua-nda tu kuatekesa kukala ni muanhu. Tu tena kukatula mbote mu phangu ia Mbalahamu. Jihova ua mu kanene kuila, muéne ueji vuala mona, maji muéne ua kingila mivu iavulu phala kuvuala Izake. Mu ithangana ioso, Mbalahamu ua londekesa muanhu, iú ua kolokota ni kulondekesa kixikanu kua Jihova.—Dimatekenu 15:3, 4; 21:5; Jihebeleu 6:12-15.

¹⁰ Mu kidi, ki bhonza kukingila. (Jisabhu 13:12) Maji se tu suluka ni kuxinganeka mu maka u tua mu bhita nau, ni kiebhi ki tua mu divua, tua-nda bhuila. Mu veji dia kiki, tua tokala kubhanga ioso phala kukala ni ídifua iambote, i tua-nda bhindamena kioso kia-nda tu bhana ikalakalu mu kilunga.

11. Ídifua iebhi i tua tokala kukala na-iu? Mukonda diahi o ídifua íii iala ni valolo?

¹¹ Sota kukala ni ídifua iambote. Se u tanga o Bibidia izuua ioso ni kuxinganeka mu ima i u tanga, ua-nda kala ni unjimu, ua-nda kala ni ixinganeku iambote ia-nda kukuatekesa kusola kiambote o ima. Mu kidi, o jiphange ja maiala a bhingi kukala ni ídifua íii, phala kulanga kiambote o kilunga. (Jisabhu 1:1-4; Tito 1:7-9) Kioso ki tu di longa o Bibidia, tuijiia kiambote o ibanzelu ia Jihova. Mu kiki, ande dia kusola kubhanga kima, tua-nda xinganeka mu ima i tua di longo, ni kusola o kima ki sangulukisa Jihova. Mu kifika, tua-nda kuijiia se kiebhi ki tua tokala kudibhana ni akuetu, kiebhi ki tua tokala kungastala o kitadi kietu, ni kusola kiambote o izuatu, ni itonokenu.

12. Kiebhi o muthu mu kilunga kia tena kulondekesa kuila, a tena ku mu dielela?

 ¹² Bhanga kiambote o kikalakalu kioso-kioso kia kubhana. Kioso o mundu ua Nzambi kia kexile mu tunga o tembulu, Nehemiia ua bhindamene maiala phala kubhanga o ikalakalu. Muéne ua solo ió a tenene ku a dielela. Muéne uejiidile kuila, o maiala enhó a zolele Nzambi, ni kuila, ene eji bhanga kiambote o kikalakalu kioso-kioso kieji kua bhana. (Nehemiia 7:2; 13:12, 13) Se tu bhanga kiambote o ikalakalu ia tu bhana, o jiphange jetu a-nda tu dielela ni ku tu bhana dingi ikalakalu ia mukuá mu kilunga. (1 Kolindo 4:2) Mu kiki, kikale se tu mala mba tu ahatu, etu enioso tua tokala kubhanga kiambote o ikalakalu ia tu bhana mu kilunga.—Tanga 1 Timote 5:25.

13. Kiebhi ki u tena kukaiela o phangu ia Zuze, né muene se akuenu a kutalatala kiaiibha?

¹³ Dielela kua Jihova. Ihi i ua tokala o kubhanga se akuenu a ku talatala kiaiibha? Eie u tena kua jimbulula kiebhi ki u divua. Maji se u sota kulondekesa kuila, eie ua lungu, o maka a-nda vula dingi. Tu tena kudilonga ima iavulu mu phangu ia Zuze. O jiphange jê a mu zukutisile kiavulu. O athu a mu tatela makutu, anga a mu te mu kaleia né muene sé kikuma kia kima. Maji Zuze ua dielele kua Jihova. Muéne ua kexile mu banza mu ikanenu ia Jihova. Mukonda dia kiki, ua kolokota mu ufiiele uê. (Jisálamu 105:19) O  ithangana ioso ia ibhidi, ia kuatekesele Zuze kukala ni ídifua iambote. O ídifua íii, ia mu kuatekesa kioso kia mu bhana ikalakalu ia dikota. (Dimatekenu 41:37-44; 45:4-8) Se ene mu ku zukutisa mba ku kutalatala kiaiibha, samba kua Jihova mu ku mu bhinga unjimu. Muéne ua-nda kukuatekesa kutululuka, ni kuzuela ni athu enhá mu ukexilu uambote.—Tanga 1 Phetele 5:10.

14, 15. (a) Mukonda diahi tua tokala kubandekesa o uhete uetu ua kulonga? (b) Jindunge jebhi ji u tena kufikisa mu sidivisu ia kuboka? (Tala o foto ia dianga, ni kaxa “ O Kuila u Tena Kufikisa Ndunge Iéngi?”)

¹⁴ Phaulu ua tendelesa Timote kubandekesa o uhete ué ua kulonga o Mikanda Ikola. Phaulu uambe: “Dilange eie-muène, ni ulongelu ué.” (1 Timote 4:13, 16) Timote ua kexile kiá mu boka thembu iavulu. Mu kiki, mukonda diahi ua bhingile kubandekesa o uhete uê ua kulonga? Timote uejidile kuila, o ibhindamu ia athu ki i difu. Muéne ua mesenene kuila, o athu a suluka ni kuívua o njimbu ia kexile mu boka. Mukonda dia kiki, muéne ua tokalele kulungulula o ukexilu uê ua kulonga. Kiene ué ki tua tokala o kubhanga.

¹⁵ Mu ididi ia mukuá, ki tuene mu sanga o athu ku mabhata mâ, kioso ki tu boka nzo ni inzo. Mu ididi ia mukuá, nange o athu a kala muéne mu jinzo jâ. Maji o alangidi a tu fidisa kubokona mu jisabhalalu. Se uene mu dibhana ni maka enhá mu mbambe iê, o kuila u tena kusota ndunge iéngi phala kuboka?

16. Kiebhi ki tu tena kuditunda kiambote mu kuboka mu ididi mu bhongoloka o athu?

¹⁶ O jiphange a uabhela kuboka mu ididi mu bhongoloka o athu. Mu kifika, ene a boka mu ididi mu bhita o jikomboio, ni maximbombo, ni mu itanda. O muboki u tena kumateka kuzuela ni muthu, mu ku mu tangela maka mba minangu a mutelembe. Mba u tena kuzuela ia lungu ni kima kioso-kioso kiambote, kuximana o tuana tuê mba kubhanga ibhuidisu ia lungu ni salu iê. Se o muthu ulondekesa ngalasa, o muboki u tena kutanga kibatulu kia Bibidia, ni ku mu ibhuidisa se ihi ia banza. Athu avulu a uabhela kuijiia o milongi ia Bibidia.

17, 18. (a) Ihi i tena ku tu kuatekesa kusuína dingi mu kuboka mu ididi mu bhongoloka o athu? (b) Kiebhi o izuelu ia Davidi mu divulu dia Jisálamu 34:1, 2, i ku kuatekesa kusidivila Jihova?

¹⁷ Nange ki bhonza kiavulu phala eie kuzuela ni muthu ki ua muijiia. Kiene kia kexile mu divua Eddie, muboki ua thembu ioso mu mbanza ia Nova York. Maji saí kima kia mu kuatekesa kuboka sé uôma. Muéne uambe: “Mu ubhezelu uetu ku muiji, eme ni muhatu uami tua kexile mu tokuesa kiambote o milongi, phala kuijiia kiebhi ki tu tambuijila o muthu ka xikina o ilongesu ietu, mba kutambuijila ió a xikina mu milongi iéngi. Tua bhingi ué kikuatekesu ku jiphange jamukuá mu kilunga.” Lelu, Eddie ua zolo kuboka mu ididi mu bhongoloka o athu.

¹⁸ Se tu uabhela kuboka, anga tu bhanga ioso phala kubandekesa dingi o uhete uetu ua kulonga, o jiphange a-nda mona kuila, tuala ni ukamba uambote ni Nzambi. (Tanga 1 Timote 4:15.) Tu tena kukuatekesa muthu kukala selevende ia Jihova. Davidi uambe: “Ngi benzela Jihova mu thembu joso; diximanu diê di kala jinga mu kanu diami. Muxima uami u ta thâthe iê mu dielela ki bhanga Jihova; oso a belesela kia k’ivua, a kala ni ngalasa.”—Jisálamu 34:1, 2.

19. Mukonda diahi o selevende ia Jihova u tena kusanguluka, né muene se ua mu bhita ni ibhidi?

¹⁹ Davidi uambe dingi: “Ikalakalu ié ioso i ku sakidila muene, eie u Jihova; o athu é a kazola a ku tumbula. A kà tumbula o fuma ia ungana ué, a kà ta maka a nguzu ié. Phala kufumanesa mua’axaxi ka an’a athu o madiuanu mé ma uzonda, ni kuijidisa o fuma ni kuuabha kua utuminu ué.” (Jisálamu 145:10-12) O athu oso a zolo Jihova, a mu londekesa o ufiiele, a bhanga ioso phala kutangela akuâ ia lungu ni muéne. Abha se o uhaxi mba o kitala kié, ki ku fidisa kuboka nzo ni inzo mu ithangana iavulu? Lembalala kuila, kioso ki u bokela o athu a kukondoloka, kikale o ji dotolo mba o akuatekexi’â, eie ua mu ximana Jihova. Se uala mu kaleia mukonda dia kixikanu kié, eie u tena kuzuela ni akuenu ia lungu ni Jihova. Kioso ki u bhanga kiki, muéne u sanguluka kiavulu. (Jisabhu 27:11) Se ku muiji ué, eie ngó ua mu sidivila Jihova, ejiia kuila muéne u sanguluka kiavulu mu kumona o kukolokota kué. (1 Phetele 3:1-4) Né muene mu ithangana ia bhonzo, eie u tena kuximana Jihova, ku mu zukama, ni kubhanga dingi mu sidivisu iê.

20, 21. Se u sota kubhanga kiambote o ikalakalu mu kilunga, kiebhi kia-nda divua o jiphange?

²⁰ Se u kolokota mu kuzukama kua Jihova, ni kubhanga ioso phala ku mu sidivila, muéne ua-nda kubesoala kiavulu. Se u lungulula o ukexilu ua muenhu ué, nange ua-nda kala dingi ni kithangana kia kukuatekesa o athu kuijiia o ikanenu ia Nzambi. U tena kukuatekesa dingi o jiphange jé. Kioso o jiphange kia-nda mona o nguzu i u bhanga phala kukumbidila o ikalakalu mu kilunga, ene a-nda kuzola dingi!

²¹ Kikale se tua mu sidivila kiá Jihova tundé ukulu mba kana, etu enioso tu tena kukala ni ukamba uambote ni muéne, ni kubhanga dingi mu sidivisu iê. Mu milongi ia-nda kaiela, tua-nda di longa kiebhi ki tu tena kukuatekesa akuetu kubhanga dingi mu sidivisu ia Nzambi.