KUA kambele ngó phala kumateka o kiônge kia dikota. O muendexi ua kiônge ua habe ku ditala, anga u sangesa o athu oso. Kua kambele ngó phala kumateka o mukumbi. O athu ejidile kuila, a tokalele kuxikama kiá mu ididi iâ. Ene a mesenene kuívua o mimbu iaiuka. A kexile ni hanji ia kuívua o madiskursu eji bhanga. Maji nange, saí iá ka mono o muendexi ua kiônge, mba ka mono kuila, o mimbu ua matekene kiá. Mu kiki, ene ka mono kuila, o kiônge kieji mateka, mukonda a landukile mu kuzuela ni makamba mâ. O musoso iú, ulondekesa o ima i tena kubhita, se tu landuka, mba tu kamba ku ta o muxima ku ima ia mu bhita bhu kaxi k’etu. Ìii phangu iambote phala etu, mukonda kua kambe ngó, kua-nda bhita kizulukutu kia dikota. Mu kiki, tua tokala kukala polondo phala ku dibhana ni maka enhá. Kizulukutu kiebhi kia-nda bhita?

2. Mukonda diahi Jezú ua tendelesa o maxibulu mê ‘kudilanga’?

² Jezú Kristu ua tendelesa o maxibulu mê  kudilanga ni kukala polondo phala o “dizubhilu dia mundu.” Muéne ua a tangela: “Alukenu-phe, mu langidile, mu sambe; kuma o thembu ki mua ijiia.” Anga ua tangela dingi mu veji javulu: “Langidilenu-phe!” (Matesu 24:3; tanga Marku 13:32-37.) O divulu dia Matesu di londekesa ué kuila, Jezú ua dimuna o maxibulu mê ku maka enhá. Muéne ua a tangela: “Langidilenu-phe! Mbata kizuua kià keza Ngana ienu ki mua k’ijiia.” Muéne ua a tangela dingi, uixi: “Kalenu polondo. Mbata kithangana ki mua ki fikile, kiene kia kà tukuluka o Mon’a Muthu.” Muéne ua zuela dingi, uixi: “Enu uenu langidilenu-phe, kuma kizuua ki mua k’ijiia, kithangana ki mua k’ijiia.”—Matesu 24:42-44; 25:13.

3. Mukonda diahi tu bhana valolo ku kitendelesu kia bhanene Jezú?

³ O Jimbangi ja Jihova, a bhana valolo ku kitendelesu kia bhana Jezú. Tuejiia kuma tua tungu mu izuua isukidila-ku, ni kuila, kua kambe ngó, o hadi ia dikota ia-nda mateka! (Daniiele 12:4; Matesu 24:21) Kala kia kanene Jezú, o mundu ua Jihova ua mu boka o njimbu iambote ia Utuminu ku mundu uoso. Tuene mu mona ué ita, mauhaxi, itungutu ia ixi, ni nzala mu jixi javulu. Lelu, o jingeleja ja makutu, ni ujibhangânga, ni usuéia, uavulu m’ukulu ndenge. (Matesu 24:7, 11, 12, 14; Luka 21:11) Lelu, tua mu kingila ni hanji ioso o kithangana, kioso Jezú kia-nda kumbidila o vondadi ia Tat’ê.—Marku 13:26, 27.

4. (a) Mukonda diahi tu xikina kuila, nange Jezú uejiia kiá o kizuua kia-nda mateka o ita ia Alumajedone? (b) Sumbala ki tuejiia o kithangana kia-nda mateka o hadi ia dikota, maji kidielelu kiahi ki tuala na-kiu?

⁴ Kioso ki tuia mu kiônge kia dikota, tuejiia o kithangana kia-nda mateka o kiônge. Maji ki tuijiia o kithangana kia-nda mateka o hadi ia dikota. Kioso kiexile mu ixi, Jezú uambe: “Kizuu’okio-phe ni kithangana kiê, kana [muthu] ua k’ijiia, né ji-anju mu diulu, né o Mona, kikale Tata muène ngó.” (Matesu 24:36) Kuma Jezú muéne ua-nda kuendesa o ita ia Alumajedone, nange muéne uejiia kiá o kizuua kia-nda mateka o ita íii. (Dijingunuinu 19:11-16) Maji etu ki tuijiia luua o kizuua ni kithangana kia-nda kuíza o dizubhilu. Mukonda dia kiki, tua tokala kudilanga. Jihova ua xindi kiá o kizuua kia-nda mateka o hadi ia dikota. O kizuua kiki, kia zukama. “Ki kia-nda ku kokoloka, kana.” (Tanga Habakuke 2:1-3.) Mukonda diahi tu tena kudielela mu kikanenu kiki ni muxima uoso?

5. Bhana phangu ilondekesa kuila, tundé ukulu Jihova uene mu kumbidila o ikanenu iê mu kithangana kia tokala.

⁵ Tundé ukulu, o ikanenu ia Jihova iene mu dikumbidila mu ithangana ia tokala! Mu kifika, xinganeka o kizuua kia bhulula o mundu uê ku Ijitu. O kizulukutu kiki kia bhitile mu kizuua kia 14 kia mbeji ia Nizá,  kia muvu ua 1513 ande dia kithangana kia Kristu. Ia lungu ni maka enhá, Mozé ua soneka: “Kiabhu o hama jiuana ja muvu ni makuinhi atatu, mu kizuua kienhókio muene, kiene kia tundu o ilômbo ioso ia Jihova mu Ijitu.” (Makatukilu 12:40-42) Mu kizuua kia 14 kia mbeji ia Nizá, kia muvu ua 1943, ande dia kithangana kia Kristu, mba 430 ande dia kubhulula o akua Izalaiele, o kikanenu kia Jihova kia kubesoala o mbutu ia Mbalahamu, kia mateka ku dikumbidila. (Ngalásia 3:17, 18) Mu kubhita thembu, Jihova ua tangela Mbalahamu, uixi: “Ijiia na-kiu kiambote kuma, mbutu ié hádia a kà kala jinzuangiza m’oxi iengi, ki iâ ene, a kala mu bhikila akua’xi koko; a kà kala mu ku a tatesa mu hama jiuana ja muvu.” (Dimatekenu 15:13; Ikalakalu 7:6) O 400 ja mivu ja mateka ku muvu ua 1913 ande dia kithangana kia Kristu, kioso Ijimaiele kia mateka kuzukutisa Izake. O thembu íii, ia bhu kioso Jihova kia bhulula akua Izalaiele ku Ijitu. (Dimatekenu 21:8-10; Ngalásia 4:22-29) Mu kidi, ku hama ni jihama ja mivu ande dia kubhulula o mundu uê, Jihova ua xindile kiá o kizuua kieji kua bhulula!

6. Mukonda diahi tu tena kudielela ni muxima uoso kuila, Jihova ua-nda bhulula o mundu uê?

⁶ Josuué ua kexile bhu kaxi ka athu akua Izalaiele a bhuluile ku Ijitu. Mu kubhita mivu iavulu, muéne ua tangela o mundu, uixi: “Enu-phe mua k’ijiia ni muxima uenu uoso, ni muenhu uenu uoso, kuila ima ioso ia mi dielelesele Jihova Nzambi ienu, ki kua sonoka kima; iene ioso ia mi bhiti muene, ki bhuala kizuelu kia sukamena.” (Josuué 23:2, 14) Jihova ua kanena kubhulula o mundu uê ku hadi ia dikota, ni kua bhana o muenhu ua kalela-ku ku mundu uobhe. Tu tena kudielela ni muxima uoso kuila, o kikanenu kiki, kia-nda dikumbidila. Mu kiki, se tua mesena kukala ku mundu uobhe, tua tokala kudilanga.

7, 8. (a) Kikalakalu kiahi kia kexile mu bhanga o alangidi m’ukulu? Disá diahi di tu longa o phangu íii? (b) Bhana phangu ilondekesa o ima i tena kubhita, se o alangidi a zeka.

⁷ Tu tena kudilonga disá mu phangu ia alangidi a kexile mu langa o jimbanza m’ukulu. Jimbanza javulu, kala Jeluzaleme, ia kexile ni ilumbu ia dikota, phala ku ji langa ku jinguma. O alangidi akexile mu kala ku thandu ia ilumbu, phala kulanga o mbanza ioso. Amukuá akexile mu langa o mabhitu a jimbanza. Kikale mu muanha mba mu usuku, o alangidi ka tokalele kuzeka. Se a monene jinguma, ene a tokalele kudimuna o athu oso mu mbanza. (Izaia 62:6) Ene ejidile o valolo ia kukala ku mesu a zele, ni kutonginina kiambote o ididi ioso ia a kondolokele. Se a landukile, athu avulu eji fuá.—Izekiiele 33:6.

⁸ Josephus, ua sonekene o musoso ua lungu ni Jijudé, ua jimbulula kiebhi o akua Loma kia bokona mu mbanza ia Jeluzaleme ku muvu 70, kithangana kia Kristu. O alangidi akexile mu langa o mbanza, akexile mu zeka. Mukonda dia kiki, o masoladi a Loma a bokona mu mbanza. Ene ai mu tembulu, a te-mu o túbhia, anga a buika o mbanza ioso ia Jeluzaleme. O Jijudé nuka a bhitile ni kizulukutu kia dikota kála kiki.

9. Ihi ia kambe o kuijiia o athu lelu?

⁹ Lelu, o jinguvulu jene mu langa o jimbambe  ja jixi jâ, mu kutula-mu o masoladi mba ji makina ja katunda, ji tonginina kiambote o ima. O jinguvulu jiji, a langa o jixi jâ ku muthu uoso uoso, mba kima kioso kioso ki tena kuta o jixi jâ mu iluezu. Maji ene kejiia kuila, kuene Utuminu ua dikota ku diulu, ni kuila, o muthu uala ku pholo dia utuminu iú, Jezú Kristu. Kua kambe ngó, o Utuminu iú ua-nda luua ni mautuminu oso mu ixi. (Izaia 9:6, 7; 56:10; Daniiele 2:44) Kuma tua mu kingila o kizuua kiki ni hanji ioso, tua mesena kukala polondo. Mu kiki, tu tonginina kiambote o izulukutu ia mu bhita, ia lungu ni ikanenu ia Bibidia, ni kukolokota mu kusidivila Jihova ni ufiiele uoso.—Jisálamu 130:6.

10, 11. (a) Tua tokala kudilanga ku ihi, ni mukonda diahi? (b) Mukonda diahi u xikina kuila, Diabhu u fidisa o athu kubhana mátui ku ikanenu ia Bibidia?

¹⁰ Xinganeka o mulangidi u bhita o usuku uoso sé kuzeka. Ku makolombolo, muéne u bhânga ni kilu, mukonda ua bhuila kiavulu. Kiene kimoxi ué n’etu, mukonda tuala mu izuua isukidila-ku ia mundu iú. Kuma o dizubhilu dia zukama, ki bhonza dingi kukala ku mesu a zele. Kima kia iibha se ki tu di lange! Tua-nda di longa ima itatu i tena ku tu landukisa.

¹¹ Diabhu u nganala o athu. “O sobha ia mundu iú,” Diabhu. Ande dia Jezú kufua, muéne ua tange o kidi kiki ku maxibulu mê mu veji jitatu. (Nzuá 12:31; 14:30; 16:11) Diabhu uene mu nganala o athu, bhu kaxi ka jingeleja ja makutu. Mukonda dia kiki, athu avulu ka bhana mátui ku ikanenu ia Bibidia ilondekesa ni kidi kioso kuila, o dizubhilu dia mundu iú dia zukama. (Sofoniia 1:14) Sé phata, Satanaji ‘ua bhake o ilunji ia athu mua vundu.’ (2 Kolindo 4:3-6) Mukonda dia kiki, kioso ki tu tangela o athu kuila, o dizubhilu dia mundu iú dia zukama, ni kuila, Kristu ua mu tumina kiá, avulu ka xikina ku tuívua. Ene a zuela: “Ngala kiá ni ngeleja iami.”

12. Mukonda diahi ki tu tokala kuehela Diabhu ku tu nganala?

¹² Sumbala athu avulu ka xikina mu ikanenu  ia Bibidia, etu ki tu tokala kuehela kuila, o ukexilu uâ u tu zozesa. Etu tuejiia o valolo ia kudilanga. Phaulu ua tangela o jiphange jê, uixi: “En’uenu mua kijiia kiambote, kuma o Kizuua kia Ngana, hinu k’iza kala kiza o muiii mu usuku.” (Tanga 1 Tesalonika 5:1-6.) Jezú ua tu dimuna mu kuzuela: “Di iudikienu; mukonda o kumbi ki mu di fika, Mon’a Muthu diene dià keza.” (Luka 12:39, 40) Kua kambe ngó, Satanaji ua-nda nganala o athu mu kua bhangesa kubanza kuila, o mundu ‘ua batama, ua tululuka.’ Mu kusuluka, o kizuua kia Jihova kia-nda kuíza ni lusolo, ene a-nda tukumuka, a-nda diuana. Abha etu? Se tua mesena kukala polondo phala o kizuu’okio, ni kudilanga phala ka tu nganale kála o athu amukuá, tua tokala ‘kutona, ni kukala ku mesu azele.’ Mukonda dia kiki, tua tokala ku tanga o Mak’â Nzambi izuua ioso, ni kuxinganeka mu ima i tu tangela Jihova.

13. Kiebhi o mundu iú uene mu nganala o athu, ni kiebhi ki tu tena kudilanga ku ukexilu iú uaiibha?

¹³ O ukexilu uaiibha ua mundu iú, u bhangesa o athu kubanza ima iaiibha. Lelu, athu avulu a banza kuila, ka bhingi kuijiia Nzambi. (Matesu 5:3) Mu kiki, ene a zanga o kithangana ni nguzu iâ, phala kukala ni jimbote javulu ku mundu iú. (1 Nzuá 2:16) Lelu, kuene itonokenu iavulu i suínisa o athu kuzola o ima íii, ni kusuua ngó o jivondadi jâ. (2 Timote 3:4) O ima íii, i landukisa o athu. Mu kiki, ene ka mono o valolo ia kukala ni ukamba uambote ni Nzambi. Kiki kiene kia bhangesa Phaulu kudimuna o Jikidistá, mu kua tangela kuila, ene a tokalele “kubalumuka ku kilu,” mu veji dia kusuua ngó o jihanji ja xitu.—Loma 13:11-14.

14. Kitendelesu kiahi ki tu sanga mu divulu dia Luka 21:34, 35?

¹⁴ Etu tua mesena kuila, Nzambi muene u tuendesa. Ki tu mesena kukaiela o ukexilu ua iibha ua mundu iú. Bhu kaxi ka nzumbi iê, Jihova uene mu tu kuatekesa kutendela kiambote o izulukutu ia-nda bhita. (1 Kolindo 2:12) ^[1] (Tala ku disukilu dia milongi.) Tua tokala kudilanga. Katé muéne ni ima i tua bhindamena, i tena ku tu bhangesa kulanduka mu kubhanga o sidivisu ia Jihova. (Tanga Luka 21:34, 35.) Nange o athu a tu tangela kuila tu iôua, mukonda tu xikina kuila, tuala mu izuua isukidila-ku ia mundu iú. (2 Phetele 3:3-7) Maji ki tu tokala kuzoza. Tuejiia ni kidi kioso kuila, o dizubhilu dia zukama. Se tua mesena kuila, o nzumbi ia Nzambi i tuendesa, tua tokala kudiongeka kumoxi ni jiphange jetu ithangana ioso.

15. Ihi ia bhitile ni Phetele, Tiiaku ni Nzuá? Kiebhi o kima kiki ki tena ué kubhita n’etu?

¹⁵ Mukonda dia ukexilu uetu ua xitu, ki bhonza kukala ku mesu a zele. Jezú uejidile kuila, o athu akuâ ituxi. Xinganeka mu ima ia bhitile mu usuku ua sukina, ande dia ufuilu uê. Sumbala Jezú uexile muthu  ua iuka, muéne uejidile kuila, phala kukolokota mu ufiiele uê, ua tokalele kusamba phala kubhinga kikuatekesu kua Tat’ê. Kioso Jezú kiai mu samba, muéne ua bhingi kua jipoxolo jê, Phetele, Tiiaku ni Nzuá, phala ka zeke. Maji o jipoxolo ka mono o valolo ia kukala ku mesu a zele. Ene a bhuidile, anga a zeka. Jezú ua bhuidile ué, maji ka zekele. Muéne ua kexile mu zuela ni Tat’ê bhu kaxi ka musambu. O jipoxolo a tokalele ué kusamba.—Marku 14:32-41.

16. Kiebhi Jezú kia tu tendelesa ‘kudilanga,’ mu divulu dia Luka 21:36?

¹⁶ Ihi ia-nda tu kuatekesa ‘kudilanga,’ ni kukala polondo phala o kizuua kia Jihova? Tua tokala kusuínisa o vondadi ietu ia kubhanga o ima iambote. Maji tua tokala kubhanga dingi ima ia mukuá. Kioso kia kambele ngó izuua phala Jezú kufua, muéne ua tendelesa o maxibulu mê kusamba kua Jihova, phala kubhinga kikuatekesu. (Tanga Luka 21:36.) Phala kukolokota mu ku dilanga mu izuua íii isukidila-ku, etu ué tua tokala kusamba kua Jihova ithangana ioso.—1 Phetele 4:7.

17. Ihi i tua tokala kubhanga, ni tu kale polondo phala o ima ia-nda bhita ku hádia?

¹⁷ Jezú ua zuela kuila, o dizubhilu dia-nda kuíza mu ‘kithangana ki tu ki fika.’ (Matesu 24:44) Mu kiki, tua tokala kukala polondo ithangana ioso. O izuua ia lelu, ki izuua ia kusota o ima ia mundu iú ua Satanaji, mu kubanza kuila, ia-nda bheka o kuzediua. Mu kidi, nzoji ngó. Bhu kaxi ka Bibidia, Jihova ni Jezú a tu tangela kiebhi ki tu tena kukolokota mu kudilanga. Mu kiki, tu tonginine kiambote o ikanenu ia Bibidia ni kumona kiebhi kia mu dikumbidila o ikanenu íii. Tu kolokote dingi mu kuzukama kua Jihova ni kuta o Utuminu uê ku pholo. Se tu bhanga kiki, kioso kia-nda kuíza o dizubhilu, tua-nda kala polondo. (Dijingunuinu 22:20) O kubhanga kiki, kulombolola muenhu!