1, 2. (a) Mukonda diahi tuene mu kala ni hele? (Tala o foto ia dianga.) (b) Ihi i tua-nda di longa mu milongi íii?

LELU, Satanaji, “ua di bhange, mukuâ ni hoji iala mu zuma, u nhunga jinga mu [jimbandu] . . . mu kusota uoso a mu dia.” (1 Phetele 5:8; Dijingunuinu 12:17) Mukonda dia kiki, o athu a kala ni hele iavulu. Katé muene ni jiselevende ja Nzambi, ene mu kala ue ni hele. O jiselevende ja Nzambi m’ukulu, akexile ue ni hele. Mu kifika, o Bibidia i zuela kuila, Sobha Davidi ua kexile ue ni hele. (Jisálamu 13:2) Poxolo Phaulu ua kexile ni ‘hele ia ilunga ioso.’ (2 Kolindo 11:28) Maji ihi i tua tokala kubhanga, kioso ki tu kala ni hele iavulu?

² Tata ietu ia henda, ua kuatekesa o jiselevende jê jo’ukulu, kusosolola o hele. Mu kiki, muene ua mesena ue ku tu kuatekesa. O Bibidia i tu tendelesa: ‘Hele ienu ioso xilenu-iu Nzambi, kuma muene ua mi kuatela muanhu.’ (1 Phetele 5:7) Maji kiebhi ki u tena kubhanga kiki? Tua-nda di longa maukexilu auana. Eie u tena (1) kusamba, (2) kutanga ni kuxinganeka mu Mak’â Nzambi, (3) kuehela o nzumbi ikola ia Jihova ku ku kuatekesa, ni (4) kuzuela o maka u ua mu bhita nau, ku  muthu ua mu dielela. Kioso ki tua-ndaia ni kudilonga o maka iá, sota kumona o ima i ua bhingi kulungulula ku muenhu ué.

3. Kiebhi ki u tena kutakula kua Jihova, o “kimbamba kia ku xina?”

³ O ukexilu ua dianga ua kuxia o hele ietu bhu maku a Jihova, o kusamba. Tata ietu ia diulu ua mesena kuila, kioso ki u kala ni hele, u mu tangela o maka oso u ua mu bhita nau. Davidi ua diondo Jihova: “[Ivua] o musambu uami, Ngana Nzambi.” Davidi ua zuela dingi: “Se uevu kimbamba kia ku xina, iza na-kiu kua Jihova, muene u ku sokesa na-kiu.” (Jisálamu 55:1, 22) Se ua bhange ioso phala kubatula o maka, kana kuthandanganha dingi, mu veji dia kiki, samba kua Jihova, phala ku ku kuatekesa. Maji o kuila o musambu u tena ku tu kuatekesa? Kiebhi o musambu u tena kusosolola o hele ietu?​—Jisálamu 94:18, 19.

4. Kioso ki tu kala ni hele, mukonda diahi kima kiambote kusamba?

⁴ Tanga Filipe 4:6, 7. Kiebhi Jihova kia tu tambuijila, kioso ki tu kolokota mu kusamba ni muxima uoso? Muene u tena ku tu kuatekesa kukala ni muxima ua tululuka, mu veji dia ku divua kiaiibha, mba kubanza ima iaiibha. Muene u tu bhangesa ue kutululuka, mu veji dia kukala ni hele mba uôma. Jiphange javulu, a mono o kutululuka kuku. Nange eie ue ua mono kiá o kutululuka kuku. “O kutululuka kua Nzambi,” ku tena ku ku kuatekesa ku dibhana ni ibhidi ioso! Eie u tena kudielela mu kikanenu kia Jihova ni muxima uoso. Muene ua kanena: “Kana kukala ni uoma, kuma eme ngala bhuamoxi n’eie; kana kubhuuama, mbata eme ngala ngi Nzambi ié; eme ngi ku suinisa, hé ngi ku kuatekesa.”​—Izaia 41:10.

5. Kiebhi o Mak’â Nzambi a tena ku ku tululukisa o muxima?

⁵ O ukexilu ua kaiiadi ua kusanga o kutululuka, o kutanga ni kuxinganeka mu jivelusu ja Bibidia. Mukonda diahi kima kiambote kubhanga kiki? O Bibidia, Mak’â Nzambi. Mu Bibidia tu sanga-mu milongi ia unjimu, i tu bhana o Mubhangi uetu. Né muene se u kala ni hele iavulu, eie u tena kuxinganeka mu milongi ia Nzambi, ni kumona kiebhi muene kia tena ku ku kuatekesa kusuina. O kubhanga kiki, ku tena ku ku kuatekesa ku dibhana ni hele, kusosolola o hele, mba ku di langa ku hele. Jihova ua londekesa kuila, o muthu u tanga o Mak’ê, u kala ‘kindanda, u kola o muxima.’ Muene ka kala ‘ni uoma, mba kekènha.’​—Josuué 1:7-9.

6. Kiebhi o izuelu ia Jezú, i tena ku ku kuatekesa?

⁶ O Mak’â Nzambi, a tu tangela kiebhi Jezú kia zuela ni athu. O athu a uabhele ku mu ivua, mukonda o izuelu iê ia kexile mu a bhangesa ku divua kiambote. O izuelu iê ia kexile mu kuatekesa benge benge o athu  a zozele, mba ió a tatele. (Tanga Matesu 11:28-30.) Jezú ua mesenene o mbote ia athu. (Marku 6:30-32) Jezú ua kanena kukuatekesa o jipoxolo akexile mu kalakala-nê kumoxi. Kiki kilondekesa kuila, muene ua-nda tu kuatekesa ue. Ki tu bhingi kukala ni Jezú, phala kumona o kikuatekesu kiê. Kuma Jezú Sobha ietu, muene uene mu tu londekesa o henda. Mu kiki, kioso ki u kala ni hele, u tena kudielela kuila, muene ua-nda ku kuatekesa mu kithangana kia tokala. Jezú u tu bhana kidielelu ni kusuina. Kiki, ki tu kuatekesa ku dibhana ni hele.​—Jihebeleu 2:17, 18; 4:16.

7. Kiebhi ki tu kuatekesa o nzumbi ikola ia Nzambi?

⁷ Jezú ua tu kanena kuila, se tu bhinga o nzumbi ikola kuaTata ietu, muene ua-nda tu bhana. (Luka 11:10-13) Iú uene o ukexilu ua katatu ua kusosolola o hele. Kiebhi o ukexilu iú u tena ku tu kuatekesa? O nzumbi ikola ia Nzambi, i tu kuatekesa kukala ni idifua iambote. (Kolose 3:10) Mu Bibidia, o idifua íii, a ixana ‘kibundu kia nzumbi.’ (Tanga Ngalásia 5:22, 23.) Kioso ki tu londekesa o idifua íii, tu kala ni ukamba uambote ni akuetu. Tu di langa ue ku ima i tena ku tu bhekela o hele. Tua-nda mona kiebhi o kibundu kia nzumbi, ki tena ku tu kuatekesa.

8-12. Kiebhi o kibundu kia nzumbi ikola ia Nzambi, ki tena ku ku kuatekesa?

⁸ “Henda, ngalasa, kutululuka.” Kioso ki u xila akuenu, o hele ié i sosoloka. Kiki ki bhita kiebhi? Kioso ki u londekesa o henda ku jiphange, mba u xila o jiphange, eie u tena ku di langa mu maka a tena ku ku bhangesa kudivua kiaiibha, kala o kukala ni njinda, mba kukala ni hele. O kubhanga kiki, kua-nda ku kuatekesa kukala ni ukamba uambote ni akuenu.​—Loma 12:10.

⁹ ‘Kuxididika, kubhanga mbote.’ O Bibidia i zuela: “Kota o ku di kuatekesa mudienu, ni ku di xinganeka. Muenda ni ku di loloka, kala Nzambi kia mi loloka enu mukonda dia Kristu.” (Efezo 4:32) Se tu kaiela o kitendelesu kiki, tua-nda kala ni ukamba uambote ni akuetu, ni ku di langa mu maka a tena ku tu bhekela o hele. O kubhanga kiki, kua-nda tu kuatekesa ue ku di bhana ni maka a moneka mukonda dia ukexilu uetu ua xitu.

¹⁰ ‘Kixikanu.’ Lelu, tuene mu kala ni hele iavulu, mukonda dia kitadi ni jimbongo. (Jisabhu 18:11) Kiebhi ki tu tena ku di langa ku hele íii? Tua tokala kukaiela o kitendelesu kia poxolo Phaulu. Muene uambe: “Ioso i mua mono i mi soke.” O kuxikina kua Jihova ni muxima uoso, kua-nda tu kuatekesa kudielela kuila, muene ua-nda tu bhana o ima ioso i tua bhindamena. Muene ua kanena: “Eme nuka nga kà mi xisa, ki nga kà mi ehelela ue, kana.” Kala kia bhangele Phaulu, tu tena ue kuzuela: “Ngana muène mukuatekexi uami, eme ki ngi kala ni uoma. Hé muthu u ngi bhanga-hi?”​—Jihebeleu 13:5, 6.

 ¹¹ ‘Kulenduka, ni ku di tumina jihânji.’ Xinganeka o mbote i tu katula kioso ki tu londekesa o kulenduka, ni kioso ki tu di tumina o jihânji jetu. O idifua íii, ia-nda ku fidisa kuzuela mba kubhanga ima ia-nda ku bhangesa kukala ni hele, ni ku ku kuatekesa ku di langa mu ima kala ‘o kulula, ni kunônga, ni kutema, ni kuhoia-hoia, ni kulokalala.’​—Efezo 4:31.

¹² Eie ua bhingi kukala ni kidifua kia kulenduka, phala kudielela ku “lukuaku lua Nzambi lua suina,” ni ku mu ‘xila o hele ié ioso.’ (1 Phetele 5:6, 7) Se u lenduka, Jihova ua-nda ku kuatekesa. Muene ua-nda ku langa ué. Se u xikina kuila, sai ima, u tena ku i bhanga, maji sai ima, ku tena ku i bhanga, ki ua-nda dielela mu kutena kué. Mu kiki, ki ua-nda thandanganha dingi kiavulu, mukonda ua-nda dielela kua Nzambi.​—Mikeia 6:8.

13. Ihi ia mesenene kuzuela Jezú, kioso kiambe: ‘Kana kukala ni hele?’

¹³ Mu divulu dia Matesu 6:34 (tanga), tu sanga-mu o kitendelesu kia unjimu kia Jezú. Muene uambe: ‘Kana kukala ni hele.’ Nange tu mona kuila, ki bhonza kukaiela o kitendelesu kiki. Maji ihi ia mesenene kuzuela Jezú? Tua di longo kiá kuila, sai ithangana, Davidi ni Phaulu akexile ni hele. Jezú ka kexile mu zuela kuila, o muthu u sidivila Nzambi, ka-nda kala dingi ni hele. Mu veji dia kiki, Jezú ua kexile mu kuatekesa o maxibulu mê kumona kuila, o kukala ni hele iavulu, ki ku batula o maka. Izuua ioso, kua-nda moneka ibhidi. Mu kiki, o Jikidistá ka tokala kubandekesa dingi o hele iâ, mu kuxinganeka mu maka a bhiti kiá, mba mu maka a tena kumoneka ku hádia. Kiebhi o kitendelesu kia Jezú ki tena ku ku kuatekesa kusosolola o hele?

14. Kala kia bhangele Davidi, kiebhi ki u tena ue kusosolola o hele ié?

¹⁴ Sai ithangana, o athu a kala ni hele, mukonda dia ima iaiibha ia bhangele m’ukulu. Ene a tena ku di tatela kiavulu mukonda dia kituxi kia tele, né muéne se kua bhiti kiá mivu iavulu. Sobha Davidi ua kexile mu divua kiaiibha, mukonda dia ima ia bhangele m’ukulu. Muene uambe: “Ngi kuata ngó kukumba mukonda o muxima m’oxi ki ua ngi tula kididi!” (Jisálamu 38:3, 4, 8, 18) Mu ithangana ienióio, Davidi ua londekesa o unjimu, mu kubhanga kima. Muene ua  dielele kuila, Jihova ueji mu londekesa o henda, ni ku mu loloka. Mu kubhita thembu, Davidi ua sanguluka mu kuijiia kuila, Nzambi ua mu loloka.​—Tanga Jisálamu 32:1-3, 5.

15. (a) Ihi dingi i tu longa o phangu ia Davidi? (b) Ihi i u tena kubhanga, phala kusosolola o hele ié? (Tala o kaxa, “ Maukexilu a Kusosolola o Hele.”)

¹⁵ Sai ithangana, eie u tena kuthandanganha mukonda dia maka u ua mu bhita nau. Mu kifika, kioso kia soneka o Sálamu 55, Davidi ua kexile ni uoma, mukonda akexile ku mu sota, phala ku mu jibha. (Jisálamu 55, 2-5) Maji né kiki, muene ka texi o kidielelu kiê kua Jihova, mukonda dia hele. Davidi ua diondo kua Jihova, phala ku mu kuatekesa ku dibhana ni maka akexile mu bhita nau. Maji Davidi uejiidile kuila, muene ua tokalele ue kubhanga kima, phala kubatula o maka. (2 Samuuele 15:30-34) Eie u tena ku dilonga disá mu phangu ia Davidi. Mu veji dia kuthandanganha kiavulu, mba kukala ni hele iavulu, sota kubhanga ioso, phala kubatula o maka. Dielela kuila, Jihova ua-nda ku kuatekesa.

16. Kiebhi o dilomboluelu dia dijina dia Nzambi, di tena kusuinisa o kixikanu kié?

¹⁶ Sai ithangana, nange o Kidistá u thandanganha, mukonda dia ima i tena ku bhita ku hádia. Maji eie ku bhingi kuthandanganha ni ima ki i bhiti luua. Mukonda diahi? Mukonda sai ithangana, o ima ki i bhiti kala ki tu banza. Lembalala ue kuila, Nzambi uala ni kutena kua kubatula o maka oso-oso. O dijina diê dilombolola kuila, ‘Muene u Bheka Ioso ia Mesena o ku Bheka.’ (Makatukilu 3:14) Mu kiki, ki tu bhingi kuthandanganha ni ima ia-nda bhita ku hádia, mukonda o dijina dia Nzambi di londekesa kuila, muene ua-nda kumbidila o ima ioso ia kanena phala o athu. U tena kudielela ni muxima uoso kuila, Nzambi ua-nda besoala o jiselevende jê ja fiiele, ni kua kuatekesa kusosolola o hele iene mu kala na-iu, mukonda dia ima ia bhiti m’ukulu, ima ia mu bhita kindala, ni ima ia-nda bhita ku hádia.

17, 18. Kiebhi o kutanga o maka oso ua mu bhita nau, ku tena ku ku kuatekesa ku dibhana ni hele?

¹⁷ O ukexilu ua kauana ua ku dibhana ni hele, o kuzuela o maka oso u ua mu bhita nau, ku muthu ua mu dielela, phala ku kuatekesa. Nange, kaza dié, kamba dié dia kazola, mba kafunga mu kilunga, a tena o ku  kuatekesa kutendela kiambote o maka u ua mu bhita nau. O Bibidia i tu tangela: “O kubhindama kua muxima, kuene mu kubhelesa o muthu; maji mbimbi ia mbote, i mu [sangulukisa].” (Jisabhu 12:25) O Bibidia i zuela ue: “Bhua kambe o kaiula phala kumona o phangu ni ndongo, mabanzelu moso ma kituka kingoho; maji bhuala o nzungule ia jindongixi, ndunge joso ji tunda ni kubhanduluka.”​—Jisabhu 15:22.

¹⁸ O iônge ietu, i tu kuatekesa ue kusosolola o hele ietu. Kioso ki uia mu iônge, a ku suinisa ku jiphange jé. (Jihebeleu 10:24, 25) Kioso kia ku ‘konda o malamba’ mé, eie u suina. Mu kiki, u tena ku dibhana ni hele iê.​—Loma 1:12.

19. Mukonda diahi u tena kudielela kuila, o ukamba ué ni Nzambi ua-nda ku suinisa?

¹⁹ Sai kafunga mu ixi ia Canadá, ua mono o valolo ia kuxisa o hele iê bhu maku a Jihova. O kikalakalu kiê kia ku longa ni kukuatekesa o adilongi bhu xikola, ki mu bhekela hele iavulu. Muene uala ue ni uhaxi u mu bhekela hele. Ihi ia mu kuatekesa kusuina? Muene u bhanga ioso phala kusuinisa o ukamba ue ni Jihova. O makamba a kidi, ene ku mu kuatekesa ue mu ithangana íii ia bhonzo. Ni muxima uoso, muene u tangela ue o muhatu uê, o maka oso a mu bhita nau. O tufunga tua mukuá, ni kafunga ka ilunga, a mu kuatekesa ue kumona o maka mê, kala ki mona Jihova. O dotolo ia mu kuatekesa ue kuijiia kiambote o uhaxi uê. Kiki, kia mu kuatekesa kusota kithangana phala kunhoha, ni kutungutisa o mukutu. Bofele bofele, muene ua di longo ku di bhana ni uhaxi uê. Kioso ki ku moneka maka a tundu o nguzu iê, muene u dielela mu kikuatekesu kia Jihova.

20. (a) Kiebhi ki tu tena ku xisa o hele ietu bhu maku a Nzambi? (b) Ihi i tua-nda di longa mu milongi ia-nda kaiela?

²⁰ Mu milongi íii, tua mono o valolo ia kuxisa o hele ietu bhu maku a Nzambi, mu kusamba kua Jihova, kutanga o Maka mê, ni kuxinganeka mu milongi i tu tanga. Tua mono ue o valolo ia kuehela o nzumbi ikola ia Jihova ku tu kuatekesa, kuzuela ni muthu tua mu dielela, ni kuia mu iônge ietu. Mu milongi ia-nda kaiela, tua-nda mona kiebhi Jihova kia tu kuatekesa, mu ku tu bhana kidielelu kia kutambula mabesá.​—Jihebeleu 11:6.