1, 2. (a) Kikoué kiebhi kia mu kinga o jiselevende ja Nzambi? (b) Ihi i tu kuatekesa kuia ni kuxinganeka o kikoué ki tua-nda tambula? (Tala o foto ia dianga.)

O JIKIDISTÁ a a undu ala ni kidielelu kia dikota. Ene a kinga kutunga ku diulu. O kidielelu kiki poxolo Phaulu ua ki xana ‘o dilau dia ixanena ku diulu kuala Nzambi.’ (Filipe 3:14) Ku diulu, ene a-nda tumina kumoxi ni Jezú mu Utuminu uê. Jezú ni Jikidistá jiji, a-nda tu kuatekesa kukala tu athu a iuka. (Dijingunuinu 20:6) Kidielelu kia dikota muene! O jimbudi ja mukuá jala ni kidielelu kiengi. Ene a kinga kutunga mu Palaízu mu ixi katé ku hádia ni hádia. O kidielelu kiki, kia a bhangesa kukala ni kusanguluka kua kidi!—2 Phetele 3:13.

² Phaulu ua mesenene kukuatekesa o jiphange jê a a undu, n’a kolokote mu ufiiele uâ, n’a tambule o kikoué. Muene ua a tangela, uixi: ‘Muxima u mi lunge ku ima ia diulu.’ (Kolose 3:2) Ene a bhingile kukolokota mu kuxinganeka mu kidielelu kia kuia ku diulu. (Kolose 1:4, 5) Kuxinganeka mu mabesá a  Jihova kukuatekesa o jiselevende jê joso, kukolokota mu kuxinganeka mu kikoué. Kiki kidi, né muene se ala ni kidielelu kia kuia ku diulu, mba kutunga mu ixi.—1 Kolindo 9:24.

3. Poxolo Phaulu ua dimuna o Jikidistá mu ihi?

³ Phaulu ua dimuna ue o Jikidistá ia lungu ni iluezu ieji kua fidisa kutambula o kikoué. Mu kifika, muene ua sonekene o jiphange akua Kolose ia lungu ni Jikidistá ja makutu, a mesenene kubheza Nzambi mu kukumbidila o Kitumu kia Mozé, mu veji dia kuxikana Kristu. (Kolose 2:16-18) Phaulu ua zuela ue ia lungu ni iluezu iala hanji mu izuua ietu i tena ku tu fidisa ue kutambula o kikoué. Muene ua jimbulula kiebhi ki tu tena kutolola o jihânji jaiibha, ni ihi i tua tokala kubhanga phala kubatula o maka a moneka ku muiji uetu ni mu kilunga. O itendelesu ia bhana Phaulu i tena ku tu kuatekesa kiavulu. Mu kiki, tu mone itendelesu iambote i tu sanga mu mukanda ku akua Kolose.

4. Mukonda diahi o jihânji jaiibha ji tena ku tu bhangesa kukamba kutambula o kikoué?

⁴ Kioso Phaulu kia zubha kuzuela ku jiphange jê ia lungu ni kidielelu kia katunda kiexile na-kiu, muene ua a tangela uixi: “O jihânji jenu ja mu ngongo jala kukalakala moxi dienu, jibhenu-ju: ni undumbu, ni ufusa, ni hânji jaiibha, ni vondadi jabolo, ni luimbi, ku ma o luimbi lua soko ni kukaiela iteka.” (Kolose 3:5) O jihânji jaiibha ji tena kuvula, mukonda dia kiki, ji tena ku tu bhangesa kuzanga o ukamba uetu ni Jihova, ni ku texa o kidielelu kietu ku hádia. Sai phange ua tele kituxi, maji mu kubhita kithangana muene ua vutuka mu kilunga. Muene uambe: “O jihânji jami jaiibha ja suinine, mu kiki, kioso ki nga jikula o mesu, nga mono kuila nga bhangele kiá ima iavulu ia zembe Nzambi.”

5. Kiebhi ki tu tena ku di langa ku iluezu?

⁵ Tua bhingi kudilanga kiavulu, phala ki tu bhange ima ia zembe Jihova. Mu kifika, kioso kia mateka ku di tangesa, o diiala ni muhatu a tokala ku di zuelesa kiambote, phala kuijiia kiebhi kia-nda dilanga phala ka dibhale mu kiluezu kia ku di bhabha, ku di bhana ji nzobole, ni kukala ubheka. (Jisabhu 22:3) O iluezu ia mukuá, i moneka kioso ki tuia dikanga kubhanga uenji, mba kioso ki tu kalakala kumoxi ni muhatu ki kaza dietu. (Jisabhu 2:10-12, 16) Ihi i ua tokala kubhanga phala kudilanga? Zuela ku jikoleka jê kuila, u Mbangi ia Jihova. Kala ni uendelu uambote. Kana ku di jimba kuila, kiluezu kia dikota kulondekesa ku muhatu mba diiala diéngi kuila, ua mu uabhela. Tua bhingi ue kudilanga kioso ki tu divua ubheka. Nange tua-nda kala ni hânji ia kukala ni muthu, u tu bhangesa ku divua kiambote. Se ki tu dilange, o kuluuala kiavulu ku tena ku tu bhangesa kuxikina muthu uoso-uoso ku tu konda. Kiki kiluezu kia dikota! Se ua mu divua kiki, kana kubhanga kima kioso-kioso ki tena ku kufidisa kutambula o kikoué. Sota o kikuatekesu kia Jihova ni kia jiphange jé mu kilunga.—Tanga Jisálamu 34:18; Jisabhu 13:20.

6. Ihi i tua bhingi kulembalala kioso ki tu sola itonokenu?

⁶ Phala kutolola o jihânji jaiibha, tua bhingi kudituna o itonokenu ia ufusa. Mu izuua ietu, o itonokenu i tu lembalesa o ima ia kexile mu bhita mu jimbanza ja Sodoma  ni Ngomola. (Juda 7) O akuâ kubhanga o jifilme, o milongi ia mitelembe ia izuzumbia, a londekesa o undumbu mba ufusa, kala kima kiambote. Mukonda dia kiki, tua tokala kukala ni mesu a zele. Tua tokala kusola kiambote o ima i tua-nda mona, ni kuívua. Ki tu tokala kuehela kuila, o itonokenu i tu mona, i tu fidisa kutambula o kikoué kia muenhu.—Jisabhu 4:23.

7. Maka ebhi a tena kumoneka mu kilunga?

⁷ Tu sanguluka kiavulu mu kubhanga mbandu ia kilunga kia Jihova. Mu iônge ietu, tu dilonga o Mak’â Nzambi, tu di kuatekesa ue mudietu. Kiki, ki tu kuatekesa kukolokota mu kuxinganeka mu kikoué. Maji, sai bhabha kumoneka maka ni jiphange jetu. Kiki ki tena kubhekela maka mu kilunga. Se ki tu batule o maka iá, tu tena kubhaka phonzo ia jiphange jetu.—Tanga 1 Phetele 3:8, 9.

8, 9. (a) Idifua iebhi ia-nda tu kuatekesa kutambula o kikoué? (b) Ihi i tena ku tu kuatekesa kukala ni kutululuka se phang’ietu ua tu luualesa?

⁸ Ki tua tokala kuehela o phonzo ku tu fidisa kutambula o kikoué. Phaulu uambe ihi i tua tokala kubhanga: “Enu phe muala mu athu a Nzambi. Muene ua mi tungula phala mu kale mu athu ê, ua mi lumbu, ua mi zola. Kala kiki, enu zuatenu muxima uanengana, ni kunhephuka, ni kubatama, ni kubelesela, ni [kuxididika]. Mu di lendukile ni kudikuatekesa mudienu, mu di loloka, se bhuala muthu ua di kuata ni mukuá. Kala muthu a loloke mukuá kala kioso Nzambi kia mi loloka enu, kiene ue ki mu bhanga jinga. Ku ima ioso-phe, kota o henda, kuma o henda iene o dijikita di kuta o uthu uatenena.”—Kolose 3:12-14.

⁹ O henda ni kubatâma i tu kuatekesa kuloloka akuetu. Se tu luuala mukonda dia kima kia zuela phang’ietu, tua bhingi kulembalala kuila, tuene mu zuela ue ni kubhanga ima i luualesa akuetu. Tu divua kiambote kioso ene kia tu loloka! (Tanga Ndongixi 7:21, 22.) Tu sanguluka kiavulu mu kuijiia kuila, Kristu ua bhongolola o abhezi a kidi. (Kolose 3:15) Etu enioso tua zolo Nzambi imoxi, tu boka o njimbu imoxi, tu dibhana ue ni ibhidi imoxi. Se tu londekesa henda ni ku di loloka mudietu, etu enioso mu kilunga tua-nda zediua. Tua-nda kolokota mu kuxinganeka mu kikoué.

10, 11. (a) Mukonda diahi o kukala ni difuba kiluezu kia dikota? (b) Ihi i tua tokala kubhanga phala o difuba ki di tu fidisa kutambula o kikoué?

¹⁰ O difuba di tena ku tu fidisa kutambula o kikoué. Mu Bibidia muala phangu i tu londekesa se mukonda diahi o kukala ni difuba kiluezu kia dikota. Mu kifika, Kaini ua kexile ni difuba dia phang’iê Abele, mu kiki ua mu jibha. Kola, Datane, ni Abilamu akexile ni difuba dia Mozé, anga a mu bhukumukina. O Sobha Saúlu ua kexile ni difuba dia Davidi, mu kiki ua mesenene ku mu jibha. O Bibidia iamba: ‘Bhuoso bhuala o difuba ni kumesena kuila ima ioso eie ngó, bhu kala ue kavuanza ni isunji ioso ia ima iaiibha.’—Tiiaku 3:16.

¹¹ Se tu bhanga nguzu phala kulondekesa o henda ni kubatâma, ki tua-nda kala ni difuba dia akuetu. O Mak’â Nzambi amba, exi: “O henda i kolokota mu jihadi, i lenduka. O henda ki i moneka dixinga.” (1 Kolindo 13:4) Phala ki tu kale ni difuba, tua bhingi kumona o ima kala ki mona Jihova. Tua bhingi kumona o jiphange kala idiandu ia mukutu umoxi. O mukutu, ulombolola o  kilunga kietu. O Bibidia iamba: “Se kidiandu kimoxi a ki zangeleka, idiandu ioso i tana-nê kumoxi.” (1 Kolindo 12:16-18, 26) Se kubhita kima kiambote ni phang’ietu, tua-nda sanguluka-nê kumoxi, mu veji dia kukala ni difuba. Xinganeka mu phangu iambote ia Jonata, mon’a Sobha Saúlu. Mu veji dia ku mu sola kala Sobha, a solo Davidi. Maji né kiki, Jonata kexile ni difuba. Muene ua suinisa Davidi, iú ua mu kuatekesa ue. (1 Samuuele 23:16-18) O kuila tu tena kulondekesa henda ni kubatâma kala Jonata?

12. Itendelesu iebhi ia Bibidia ia-nda kuatekesa o muiji uetu kutambula o kikoué?

¹² Kioso o athu ku muiji a kaiela o itumu ia Bibidia, o muiji u kala ni kutululuka ni kusanguluka. Mua-nda tambula o kikoué. Phaulu ua tendelesa o miji uixi: “Enu ahatu, tumakenu anumi’enu, kuma kiene kia tokala kubhanga mua Ngana. Enu mu mala, zolenu ahatu enu, kana ku a thathamena jinga. Enu ana, tumakenu adi enu mu ima ioso, kuma kiene kia mi fuama mu ukidistá, o Ngana ue ki mu uabhela kiambote. Enu jitata, kana kuthathamesa an’enu, mbebhu ki mu a kuatese usudi.” (Kolose 3:18-21) U tena kumona kiebhi o izuelu iii i kuatekesa o muiji ué?

13. Kiebhi o muhatu Kidistá kia tena kukuatekesa muadi uê kubheza Jihova?

¹³ Nange eie u phange ia muhatu, uala ni diiala ki Mbangi ia Jihova. Ihi i ueji bhanga se u divua kala muene ka mu ku talatala ni henda? O kuila o ku zoka né, kua-nda mu bhangesa ku ku zola dingi? Né muene se u lunga kioso ki u di kuata né, o kuila kiki kia-nda mu kuatekesa kubheza Jihova? Nange kana. Maji se u mu xila, mukonda muéne  uala ku pholo dia muiji, ua-nda bhekela kutululuka ku muiji ué ni ku ximanesa Jihova. O phangu iambote i tena ku bhangesa muadi ué kumesena kusidivila Jihova, kiiadi kienu ni mu tambule o kikoué.—Tanga 1 Phetele 3:1, 2.

14. Ihi ia tokala kubhanga o diiala Kidistá se o muhatu uê ka mu xila?

¹⁴ Nange eie u phange ia diiala, uala ni muhatu ki Mbangi ia Jihova. Ihi i ueji bhanga se u divua kuila, muene ka mu ku xila? Se u mesena kulondekesa kuila eie u tumina, mba eie u patalá, o kuila muene ua-nda ku xila dingi? Kana! Nzambi ua mesena kuila eie u kala u diiala dia henda, u kaiela o phangu ia Jezú. (Efezo 5:23) Jezú, uala ku pholo dia kilunga, ithangana ioso ua londekesa muanhu ni henda. (Luka 9:46-48) Se u kaiela o phangu ia Jezú, muhatu ué ua-nda mesena ue kubheza Jihova.

15. Kiebhi o diiala kia tena kulondekesa ku muhatu uê kuila, ua mu zolo?

¹⁵ Jihova ua tangela o anumi: “Zolenu ahatu enu, kana ku a thathamena jinga.” (Kolose 3:19) O munumi ua henda, u bhana kijingu kua muhatu uê. Kiebhi? Muene uivua kioso o muhatu uê ua mu mu bhana ka ndunge, u mu tangela ue kuila, ioso ia zuela u i bhana valolo. (1 Phetele 3:7) Né muene o diiala ka-nda kaiela o ji ndunge joso ja-nda mu bhana o muhatu, kuívua o muhatu kua-nda mu kuatekesa kubatula kiambote o maka. (Jisabhu 15:22) O diiala dia henda ka jijila muhatu uê ku mu xila. Mu veji dia kiki, muene u bhanga ioso phala muhatu-uê na mu xila ni muxima, sé muene ku mu bhinga. Kioso o diiala kia zola muhatu ni tuana tuê, o muiji u sanguluka dingi mu sidivisu iá kua Jihova. Ki kia-nda kua bhonza ku tambula o kikoué.

16, 17. Kuma u munzangala, kiebhi ki u tena kukamba kukala ni njinda ia jitata jé?

¹⁶ Minzangala iavulu a mona kuila, o jitata jâ kejiia o ima i bhita nau, mba a xinganeka kuila o jitata jâ ka a bhana o ufolo. O ima iii, i tena ku a luualesa, anga a tena kudibhuidisa se a bhingi muene kusidivila Jihova. Se kiene ki u banza, anga u bhana dikunda kua Jihova, ua-nda mona kuila, mu ngongo ioso, ki muala muthu ua ku zolo dingi kala o jitata jé ni makamba mé mu kilunga.

¹⁷ Xinganeka mu maka enhá: Se o jitata jé ka ku bazela, nange eie ueji banza kuila ene ka kubhana valolo. (Jihebeleu 12:8) Kuma ene akua ituxi, nange o ukexilu uâ ua ku bazela, u ku luualesa. Maji kana kutala o ukexilu ua ku bazela. Mu veji dia kiki, sota kutendela se mukonda diahi ene a mu ku tangela kima, mba a bhange kima. Se o jitata jé a zuela kima ki ku luualesa, tululuka, kana kudikola ni jitata jé. O Mak’â Nzambi a tu tangela: “Muthu uoso mu kuzuela kuê maka uia ni ku a fikisa, ió muene o njimu; o muthu u kala ni muxima ua tululuka, iò uala ni kilunji.” (Jisabhu 17:27) Sota kulondekesa kuila, u muthu ua kulu mu nzumbi, mu kuxikina jindunge mba itendelesu, ni kukatula disá ku kibazelu, né muene se a tu bhana mu ukexilu uaiibha. (Jisabhu 1:8) Lembalala kuila, o kukala ni jitata ja zolo Jihova, ujitu ua dikota. Ene a mesena ku ku kuatekesa kutambula o muenhu ua kalelaku.

18. Mukonda diahi ua mesena kukolokota mu kutonginina o kikoué?

¹⁸ Kikale se uala ni kidielelu kia kuia ku diulu, mba kutambula o muenhu ua kalelaku mu ixi, etu enioso tuala ni kidielelu kia katunda. O kidielelu kietu kia kidi. O Mubhangi ua ngongo ioso, muéne ua bhange o kikanenu kiki. Muene ua zuela uixi: “Oxi ioso ia kèzala ni kuijiia Nzambi.” (Izaia 11:9) Kua kambe ngó bhofele, mu ixi mua-nda kala ngó o athu a a longo kua Nzambi. Sé phata, kima kiambote kubhanga nguzu phala kutambula o kikoué kiki. Mu kiki, sota kulembalala jinga, o ima ia ku kanena Jihova. Kana kuehela kima kioso-kioso ku ku fidisa kutambula o kikoué!