1. Kiebhi Mbalahamu kia londekesa kuila, ua dielele mu kuiuka kua Jihova? (Tala o foto ia dianga.)

“KIFUA Mufúndixi u fundisa ioso mu ngongo, u lémbua kubatula mu kidi?” (Dimatekenu 18:25) Mbalahamu o diiala dia fiiele, ka bhange o kibhuidisu kiki, mukonda ua kexile ni jiphata, kana. Mu veji dia kiki, o kibhuidisu kiê, kia londekesa kuila muene ua dielele kuma Jihova ueji fúndisa o jimbanza ja Sodoma ni Ngomola ni kuiuka kuoso. Muene uejiidile ni kidi kioso kuma, Jihova keji xikina kuila o athu “alungu ni iá abhukumuka u a jibhila kumoxi.” Mbalahamu uambe: “Ki ki xikina Ngana.” Mu kubhita thembu, Jihova ua zuela ia lungu ni muene: O “Tadi dia Muenhu! Kima kioso kia bhanga ki tenena! O uendelu uê uoso uatetuluka; Nzambi muene o Kidi, o mua muene ki muene mangonha; izuua ioso muene ngó uaiuka, o ku tetuluka ue muene ngó.”​—Matendelelu 31:19; 32:4.

2. Mukonda diahi Jihova ka tena kufúndisa kiaiibha?

² Mukonda diahi Mbalahamu ua dielele kuila, Jihova ueji  bhanga o kima kia tokala? Mukonda Jihova muéne o phangu ia beta-o-kota ia kufúndisa ni kuiuka. Kuma o itumu ia Jihova ia iuka, muéne ua-nda fúndisa jinga mu ukexilu ua iuka. O Bibidia izuela: “Muene u inda o kufúndisa kua kidi ni kutetuluka.”​—Jisálamu 33:5.

3. Bhana phangu ilondekesa o ukexilu uaiibha ua kufundisa ua mundu.

³ Kisangusangu kia dikota kuijiia kuila, Jihova ulondekesa o kuiuka mu ithangana ioso. Maji ku mundu ku tua tungu, o athu kene mu fundisa ni kuiuka. Mu kifika, o athu ene mu a tatela makutu, ni ku a ta mu kaleia, né muene se kala ni kikuma. Sai bhabha, ene a tokuesa kiambote o maka, anga a mona kuila, o athu kala ni kikuma. Sumbala a a jituna, maji a bhiti kiá mivu iavulu mu kaleia. Kioso kia tunda, o athu enhá a kala ni njinda iavulu, mukonda dia ima ien’ii. Maji sai kima kia mukuá ki tena ku tu bhonzesa kukolokota. Kima kiahi?

4. Kiebhi kia tena kulola o kixikanu kietu?

⁴ O Jikidistá ejiia kuila, ku mundu iú uaiibha, o athu a-nda kua talesa hadi sé kikuma. Maji o kixikanu kietu a tena ku ki lola, se a tu tatela kima ku jiphange jetu mu kilunga. Se kiki ki bhita, ihi i ua-nda bhanga? O kuila, ua-nda kuehela o maka enhá, ku ku bhangesa kubhuila?

5. Mukonda diahi ki tu tokala kudiuana se a tu talatala kiaiibha mu kilunga?

⁵ Etu enioso tu akua ituxi, mukonda dia kiki, tuene mu tondala. Nange sai muthu u tena ku tu talatala kiaiibha, mba nange tu tena kubhanga kima kia-nda luualesa phange mu kilunga. (1 Nzuá 1:8) Sumbala o ima íii ki i bhiti mu ithangana iavulu, maji o Jikidistá ja kidi kene mu diuana, né kubhuila kioso kia a talatala kiaiibha. Bhu kaxi ka Bibidia, Jihova uene mu tu bhana itendelesu iambote i tena ku tu kuatekesa kukolokota mu ufiiele uetu se phang’ietu u tu talatala kiaiibha.​—Jisálamu 55:12-14.

6, 7. Polova iebhi ia dibhanene na-iu phang’ietu, ni ihi ia mu kuatekesa?

⁶ Xinganeka mu musoso ua phange Willi Diehl. Phange Diehl ua mateka o sidivisu ia thembu ioso ku Betele, ku muvu ua 1931, mu mbanza ia Bern, mu ixi ia Suíça. Ku muvu ua 1946, ua bhange o Xikola ia Ngiliiade, mu mbanza ia Nova York, mu ixi ia Estados Unidos da América. Kia zubha o xikola, a mu tumikisa kala kafunga ka ilunga mu ixi ia Suíça. Mu musoso uê, phange Diehl ua zuela kuila, mu mbeji ia Kasambuadi ka muvu ua 1949, muene ua tangela o jiphange akexile kupholo ku filiiale kuila, ueji kazala. O jiphange akexile kupholo a muambela kuila, eji ku mu katula o maujitu oso akexile nau mu kilunga. Muene ueji kala ngó muboki ua thembu ioso. Phange Diehl uambe: “Eme ki ngi tokalele kubhanga madiskursu. Jiphange javulu mu kilunga kexile mu tu menekena dingi. Akexile mu tu mona kála a tu kaie mu kilunga.”

⁷ Ihi ia bhange phange Diehl? Muene uambe: “Etu tuejiidile kuila, o kukazala ki kituxi kana, mukonda dia kiki, tua kexile mu samba kua Jihova ni ku mu dielela.” Sumbala sai jiphange ka kexile mu tendela kiambote o kibanzelu kia Jihova kia lungu ni ukaza, mu kubhita kithangana, ene a mateka  kutendela kiambote o maka enhá. Mukonda dia kiki, phange Diehl ua tambula dingi o maujitu oso akexile nau mu kilunga. Jihova ua besoala o ufiiele uê. * (Tala ku luiji.) Tua tokala ku di ibhuidisa: ‘Se ngi dibhana ni maka kala a bhiti ni phange Diehl, o kuila nga-nda londekesa muanhu, ni kukingila Jihova kubatula o maka? Inga nga-nda dielela mu kilunji kiami, ni kubhanga ioso phala kubatula o maka?​—Jisabhu 11:2; tanga Mikeia 7:7.

8. Mukonda diahi nange tu tena kutondala mu kubanza kuila, sai maka a bhiti mu kilunga ka a batula kiambote?

⁸ Se u banza kuila, sai maka a bhiti mu kilunga ka a batula kiambote, kima kiambote kulembalala kuila, nange eie ua tondala. Mukonda diahi? Kuma tu akua ituxi, nange ki tu tendela kiambote o maka oso a bhiti. O kia mukuá, nange etu ki tuijiia ue o ima ioso ia lungu ni maka enhá. Maji kikale se tua tendela kiambote o maka, mba kana, tua tokala kusamba kua Jihova, ku mu dielela ni kukolokota mu ufiiele uetu kua muene. Kubhanga kiki, kua-nda tu fidisa ku “tatela Ngana.”​—Tanga Jisabhu 19:3.

9. Ihi i tua-nda di longa mu milongi iii, ni ia-nda kaiela?

⁹ Tua-nda di longa o phangu ia kitatu kia athu a tokalele ku mundu ua Jihova, a a talatala ue kiaiibha. Mu milongi iii, tua-nda dilonga o phangu ia Zuze, o mululu ua Mbalahamu, ni ima ia mu bhangele o jiphange jê. Mu milongi ia-nda kaiela, tua-nda mona se ihi ia bhangele Jihova kua Sobha Akabe, ni izulukutu ia bhitile ni Phetele mu ixi ia Andiioka ia Sídia. Kioso ki tuia ni kudilonga ia lungu ni athu enhá, sota kumona kiebhi ki u tena kukolokota mu ufiiele ué kua Jihova, ni kulanga o ukamba ué ni muene, benge-benge se u mona kuila, a mu ku talatala kiaiibha ku akuenu.

10, 11. (a) Ibhidi iebhi ia di bhanene na-iu Zuze? (b) Ihi ia zuela Zuze ku xefe ia jikopelu?

¹⁰ Zuze uexile selevende ia fiiele ia Jihova. Muene a mu talatala kiaiibha ku athu a ixi iéngi. Maji muene ua divu dingi kiaiibha, mukonda dia ima ia mu bhangele o jiphange jê. Kioso kia kexile ni 17 dia mivu, o jiphange jê a mu sumbisa kala mubhika. Mu kusuluka, a mu ambata mu ixi ia Ijitu. (Dimatekenu 37:23-28; 42:21) Mu kubhita thembu, Zuze a mu tatele o makutu a kuila, ua mesenene kuzeka ni muhatu ua ngene. Mukonda dia kiki a mu te mu kaleia, sé ku mu bhana kithangana kia kujimbulula o ima ia bhiti. (Dimatekenu 39:17-20) Zuze ua bhiti mu jiphaxi javulu. O kithangana kia bhangele kala mubhika, ni mu kaleia kia tenesa 13 kia mivu. Ihi i tu tena ku dilonga mu  phangu ia Zuze, i tena ku tu kuatekesa, se a tu talatala kiaiibha ku jiphange jetu?

¹¹ Kioso Zuze kia kexile mu kaleia, o xefe ia ji kopelu ia sobha, a mu tele ue mu kaleia. Mu usuku, o xefe ia ji kopelu ua loto nzoji. Mu kiki, Jihova ua kuatekesa Zuze kujimbulula o nzoji ia lotele muene. Zuze ua zuela kuila, o kopelu ueji tunda mu kaleia ni kubhikila dingi Falaó. Mu kusuluka, Zuze ua soto ue ku mu tangela o maka akexile mu bhita nau. Tu tena kudilonga kiavulu, kana ngó mu ima ia zuela Zuze, maji katé muene mu ima ia kambele o kuzuela.​—Dimatekenu 40:5-13.

12, 13. (a) Ihi ia bhange Zuze phala kubatula o maka akexile mu bhita nau? (b) Ihi ia kambele kuzuela zuze kua kopelu?

¹² Tanga Dimatekenu 40:14, 15. Kala ki tua mono Zuze ua zuela kuila, a mu “nhana.” Kiki kilondekesa kuila, muene a mu talesa hadi sé kikuma. Zuze ua zuela ue kuila, a mu tatela. Mukonda dia kiki, muene ua bhingi kua kopelu phala kutangela o maka mê kua Falaó. Ihi ia mesenene muene? Muene uambe: “Phala a ngi katule m’onz’umu.”

¹³ O kuila Zuze ka bhange kima phala kubatula o maka akexile mu bhita nau? Muene ua bhange kima! Zuze uejiidile kuila,  akexile ku mu bhanga ima iaiibha. Mukonda dia kiki, ua jimbulula o maka mê kua kopelu, iú ua kexile ni kidielelu kia kuila, muene ueji ku mu kuatekesa. Maji o Mikanda Ikola, ki izuela kuila, Zuze ua tangela muthu uéngi, mba kua Falaó kuila, o jiphange jê ene a mu nhanene, ia a mu sumbisa. Mu kidi, kioso o jiphange jê ejile mu ixi ia Ijitu, ia a bhange dingi ukamba ni Zuze, Falaó ua a tambulula kiambote. Muene ua a bhingi phala kutunga kuenhoko, n’a katule mbote mu ima “ioso iauabha” iexile mu ixi ia Ijitu.​—Dimatekenu 45:16-20.

14. Ihi ia-nda tu kuatekesa kukamba kulongolola o jiphange?

¹⁴ Se tu mona kuila, sai phange mu kilunga ua tu bhange kima kiaiibha, tua tokala ku di langa phala ki tu longolole o muthu. Mu kidi, tua tokala kubhinga o kikuatekesu kia tufunga. Se tuejiia kuila, sai phange ua te kituxi kia dikota, tua tokala ue kutangela o tufunga. (Ijila 5:1) Maji mu ima ia mukuá, tu tena kusota kubatula o maka ni phang’ietu, sé kuzuela ni muthu, né muene o tufunga. (Tanga Matesu 5:23, 24; 18:15.) Tua tokala kulondekesa o ufiiele uetu ni kukaiela o ijila ia Bibidia, mu ithangana íii. Sai ithangana, tu mona kuila, ki tu tendela kiambote o maka. Nange tu mona ue kuila, akuetu ka tu bhange kima kiaiibha. Mu kiki, tua-nda sanguluka kiavulu mu kuijiia kuila, mukonda dia kukamba kulongolola phange’ietu, o maka o batule kiambote! Lembalala kuila, né muene se tua lungu mba kana, o kulongolola akuetu, ki kua-nda kuatekesa kubatula o maka mu ukexilu uambote. O kulondekesa o ufiiele kua Jihova ni ku jiphange jetu, kua-nda tu kuatekesa ku di langa mu iluezu íii. O mukuá Jisálamu ua zuela kuila, sai “muthu ua tenena mu kuenda kuê.” O muthu uala ni ukexilu iú “ka xingi ndaka ni dimi diê, ka xikina kubhanga phulu kua mukuá, kende ni kabódio mu sanzala.”—Jisálamu 15:2, 3; Tiiaku 3:5.

15. Mu ukexilu uebhi o ukamba ua Zuze ni Jihova uexile dibesá?

¹⁵ O phangu ia Zuze i tu longa ue kima kia mukuá. Mu 13 kia mivu, kia mu talesa o hadi sé kikuma, Zuze ua londekesa kuila, ua kexile mu mona o ima kála ki mona Jihova. (Dimatekenu 45:5-8) Mu kubhita mu ibhidi, muene ka tatela Jihova. Sumbala Zuze ka jimbe o ibhidi ioso ia bhitile, maji muene ka suluka kukala ni njinda. Muene kehela o ituxi ia akuâ, ni ibhangelu iâ iaiibha, ku mu sondolokesa kua Jihova. Mukonda dia ufiiele uê, Zuze ua mono Jihova kubatula o maka, ni ku mu besoala muene, ni muiji uê uoso.

16. Kioso ki tu dibhana ni maka mu kilunga, mukonda diahi tua tokala kuzukama kua Jihova?

¹⁶ Kiene ue kimoxi n’etu, tua tokala ue kulanga, ni kubhana valolo ku ukamba uetu ni  Jihova. Ki tu tokala kuehela kuila, o ima i bhanga o jiphange jetu, i tu sondolole kua Nzambi ietu ia kazola. (Loma 8:38, 39) Mu veji dia kiki, se phange mu kilunga u tu bhanga kima ki tu ibhila, tua tokala kukaiela o phangu ia Zuze ni kuzukama dingi kua Jihova. Sota kumona o ima kala ki mona Jihova. Se tua bhange kiá ioso phala kubatula o maka, bhu kaxi ka milongi ia Bibidia, tua tokala kuehela o maka bhu maku a Jihova. Tu tena kudielela kuila, muene ua-nda batula o maka mu kithangana kia tokala, ni mu ukexilu ua tokala.

17. Kiebhi ki tu tena kulondekesa kuila tu dielela ku ‘Mufúndixi ua Ngongo ioso?’

¹⁷ Kuma tuala hanji ku mundu iú uaiibha, tuejiia kuila, o athu a tena ku tu talesa hadi sé kikuma. Sai ithangana nange eie mba muthu ua mu ijiia, u mona kuila, a mu bhange kima kiaiibha ku phange mu kilunga. Kana kubhuila. (Jisálamu 119:165) Mu veji dia kiki, kolokota mu ufiiele ué kua Nzambi, bhinga o kikuatekesu kiê mu musambu, sota ku mu dielela. Lembalala kuila, mukonda dia ituxi ietu, nange eie ku tendela kiambote, mba nange eie ku ijiia o ima ioso ia bhiti. Sota kukaiela o phangu ia Zuze, kana kulongolola mukuenu, mukonda kubhanga kiki, kutena kuvudisa o maka. Mu ku suka-ku, mu veji dia ku dielela mu ibanzelu iê, ia kubatula o maka, kinga ni muanhu, katé Jihova kia-nda ku a batula. Mu kubhanga kiki, Jihova ua-nda ku besoala kála kia bhangele ni Zuze. Ejiia ni kidi kioso kuila, Jihova o ‘Mufúndixi ua Ngongo Ioso,’ ithangana ioso ua-nda bhanga o kima kia tokala, mukonda “o uendelu uê uoso uatetuluka.”​—Dimatekenu 18:25; Matendelelu 32:4.

18. Ihi i tua-nda dilonga mu milongi ia-nda kaiela?

¹⁸ Mu milongi ia-nda kaiela, tua-nda dilonga dingi phangu ia athu aiadi a tokalele ku mundu ua Jihova m’ukulu, a a talesa hadi sé kikuma. O phangu ia athu enhá, ia-nda tu kuatekesa kumona kiebhi o kulenduka ni kuloloka, kua-nda tu kuatekesa kumona o ima kala ki mona Jihova.