“Enu wenu langidilenu-phe, kuma kizuwa ki mua k’ijiya, kithangana ki mwa k’ijiya.”—MATESU 25:13.

“Alukenu-phe, mu langidile, mu sambe; kuma o thembu ki mwa ijiya.”—MÁLUKU 13:33.

Séku muthu mu ngongo wejiya ni kidi kyoso, o kithangana kyandakwiza o dizubhilu dya mundu yú. Maji Nzambi waxindi kyá “o thembu”—kifwa o “kizuwa”, mba o “kithangana” —kyandakwiza o dizubhilu dya mundu. (Matesu 24:36) O kwila kiki kilombolola kuma séku ukexilu wa kwijiya se o dizubhilu dyazukama? Sayi. Jezú wambela kumaxibulu mê, izulukutu yeji londekesa kwila o dizubhilu dya mundu yú dyazukamba.

Tala o ima yeji londekesa kwila o “dizubhilu dya zukama.” Jezú wambe: “Akwa’xi imoxi a kà di kwata ni akwa’xi yamukwá; kilômbo kya kà balukila kilômbo kyamukwá; kwa kà kala nzala, ni oxi kutunguta mu ididi yavulu.” (Matesu 24:3, 7) Mwene wambe we kwila kweji kala “mabhebhu”—kifwa mauhaxi. (Luka 21:11) O kwila eye wene mumona o ima yiyi yambe Jezú?

Lelu ku mundu woso o athu atala hadi mukonda dya ita, nzala, itungutu ya ixi, ni mauhaxi. Mukifika, kumuvu wa 2004 o kitungutu kya ixi, ku Oceano Índico, kyabheka kithembu akixana tsunami, kyajibha 225.000 a athu. Mumuvu umoxi ngenge, o dibhebhu dya COVID-19, dya jibha 2.6 ya jimidi a athu ku mundu woso. Jezú wambe kwila, o izulukutu kala yiyi yeji londekesa kwila o dizubhilu dya mundu dya zukama.

Mu Bibidya o kithangana ande dya dizubhilu akixana “izuwa isukidilaku.” (2 Phetele 3:3, 4) O mukanda wakayadi kwa Timote 3:1-5, wamba kwila, mu izuwa isukidilaku o athu ejidituna kubhanga o ima yambote. (Tala o kaxa “ Ande Dya Dizubhilu Dya Mundu Yú.”) O kwila wene mumona o athu lelu adibanza ngó mudya, akwa lwimbi, ijibhanganga, akambe o henda? O ukexilu yú ulondekesa we kwila etu twala mu izuwa yasukidila ya mundu yú.

Thembu kuxi yandalaleka o izuwa isukidilaku? Kala kilondekesa o Bibidya, o “thembu ya . . . butu.” Mukusuluka, Nzambi wandabwika “yó oso ene mu bwikisa oxi!”—Dijingunwinu 11:15-18; 12:12.

Nzambi waxindi kyá o kizuwa, o ola yandabheka o disukilu dya ima yoso yayibha ya mundu yú. (Matesu 24:36) Maji sayi ko njimbu yambote—Nzambi “ka mesena kwila kukala muthu u texika.” (2 Phetele 3:9) Kyenyiki Mwene wamubhana o kithangana ku athu phala kudilonga o itumu yê. Mukonda dyahi? Mukonda mwene wamesena kwila etu tubhuluka kudizubhilu dya mundu yú ni kutunga ku mundu wobhe kyoso o ixi kiyandakituka palayizu.

Nzambi wamubhanga yoso phala kukwatekesa o athu kwijiya kyebhi kyatena kubhanga mbandu ku mundu wa ubhe. Jezú wambe kwila o njimbu yambote ya Utuminu wa Nzambi ejiku iboka “ku akwa jixi joso.” (Matesu 24:14) Kumuvu wa 2019 o Jimbangi ja Jihova ku mundu woso, abhange tuzunda tuyadi twa ji ola mukuboka ni kulonga o athu o njimbu ya Bibidya ibhana o kidyelelu. Jezú wambe kwila o kikalakalu kyakuboka eji kukibhanga mujixi joso ande dya kwiza o dizubhilu dya mundu yú.

Kwakambe ngó, o athu kandaditumina dingi. Maji o njimbu yambote ya kwila, eye utena kubhuluka kudizubhilu dya mundu yú ni kubhanga mbandu mu Palayizu mu ixi yakanena Nzambi. O milongi yakayela yandazwela kyebhi ki utena kutunga ku mundu wobhe.