O ATHU

Ihi yamba o Bibidya: Nzambi ‘o ixi ka ixi kiphulungunzu kya hatu, kana; wa ibhanga phala athu kutungamu.’—IZAYA 45:18.

O IXI

Ihi yamba o Bibidya: “Ku tunda mwiji, kwiza mwiji; maji o ixi ya kalé, kyene ki yene kyene.”—NDONGIXI 1:4.

KIKI KILOMBOLOLA IHI: Kala kilondekesa o Bibidya o ixi nuka anda ibwika ni kwila mwandakala jinga athu phala kutungamu kate kuhádya ni hádya. Kyenyikiphe, o dizubhilu dya mundu dilombolola ihi?

XINGANEKA NGÓ: O Bibidya isokesa o dizubhilu dya mundu ni ima yabhiti mu izuwa ya Nowé. Muthembu yóyo o ixi ‘yezalele ni uswéya.’ (Dimatekenu 6:13) Maji Nowé wexile muthu wayuka. Kyenyiki Nzambi wabhulula Nowé ni mwiji wê, maji Mwene wabwika o athu ayibha bhukaxi kadiluvyu dya menya. Yalungu ni ima yabhiti mu izuwa yóyo o Bibidya yamba: “Oxi yoyo ya kexileku, ya bobele mu Diluvyu dya menya anga i jima.” (2 Phetele 3:6) Didi dyene dyexile o dizubhilu dya mundu muthembu yóyo. Maji ihi yabwikisa? Kabwika o ixi, maji abwika o athu ayibha exile mu ixi. Kyenyiki kyoso o Bibidya ki izwela dizubhilu dya mundu, ki ilombolola kubwika o ixi. Maji kiki kilombolola o dizubhilu dya athu ayibha ala mu ixi ni ima yoso yayibha yalamu.

O MAKA NI KUYIBHA

Ihi yamba o Bibidya: “Bhu bhita ngó kathangana, mukwa phulu-ó ubhwa athu ku mesu; u tala kyambote, bhu kididi kyê kala-bhu dingi. Oso-phe a lenduka, ene a lundula o ixi; A kala ku ngalasa ni kutululuka kwavulu.”—JISÁLAMU 37:10, 11.

KIKI KILOMBOLOLA IHI: O Diluvyu dya izuwa ya Nowé kidyazubha o kuyibha kwoso. Kyoso kyabhiti o Diluvyu o athu ayibha abhekela dingi ibhidi yavulu ku mwenyu wa athu. Kwakambe ngó bhofele Nzambi wandabwika o kuyibha kwoso. Kala kyambe o mukwa Jisálamu: “Mukwa phulu-ó ubhwa athu ku mesu.” Nzambi wandazubha o kuyibha kwoso bhukaxi ka Utuminu wê, o Unguvulu wandatumina o ixi yoso tunde kudyulu o athu abelesela Nzambi.

XINGANEKA NGÓ: O kwila o jinguluvulu ja mundu jandasanguluka mukubelesela o Utuminu wa Nzambi? O Bibidya ilondekesa kwila, kana. Mu wowa wâ andasota kubhânga ni Utuminu wa Nzambi. (Jisálamu 2:2) Ihi yandabhita? O Utuminu wa Nzambi wandabhingana o jinguvulu joso ja mundu, “wene wa kà xalela ni kutumina mu thembu joso katé ku hádya ni hádya.” (Daniyele 2:44) Maji mukonda dyahi o unguvulu wa athu wabhingi kubwa?

Ihi yamba o Bibidya: “Muthu kyenda, [ki] mwene u tongesa o makanda mê-mwène.”—JELEMIYA 10:23.

KIKI KILOMBOLOLA IHI: O athu ka abhange phala kuditumina mudyâ. Ene kala ni uhete wakutumina kyambote akwa ni kubatula kyambote o maka.

XINGANEKA NGÓ: Sayi divulu dyambe kwila, o jinguvulu kala ni kutena kwa kubatula o maka alungu ni “nzala, wadyama, uhaxi, mavuwa, ita mba ujibhanganga.” Dyene dyambe dingi: “Sayi . . . athu axinganeka kwila kwabhingi unguvulu umoxi utumina o ngongo yoso phala kuzubha o kuyibha kwoso.” Maji né mwene se o jinguvulu joso ja ngongo adibhunda, ene akwa ituxi, kandatena kuzubha o kuyibha kwoso kutwatumbula kudima. O Utuminu wa Nzambi wene ngó wala ni kutena phala kubatula o maka oso mu ngongo kate kuhádya ni hádya.

Kala kilondekesa o Bibidya athu ambote katokala kukala ni woma mukwijiya kwila o dizubhilu dya mundu, kifwa o disukilu dya ima yoso yayibha, dyazukama. Muveji dya kiki amukingila ni hanji yoso o dizubhilu, mukonda o mundu yú wayibha wandabhwa, anda ubhinganesa ni mundu wa ubhe wafwama wa Nzambi!

Kiki kyandabhita thembu kuxi? O milongi yakayela yandajimbulula o kitambwijilu kya Bibidya.