O Palayizu Yazukama!
Nzambi wabhange o ixi phala o athu ambote atene kutundamu kate kuhádya ni hádya. (Jisálamu 37:29) Mwene watula o dikaza dya dyanga Adá ni Eva, mu njaludim ya Edene, ya fwamene kyavulu, yu wabhana kwa ene ni kutwana twâ, o kikalakalu kya kudima o ixi ni ku ilanga.—Dimatekenu 1:28; 2:15.
O mundu yú kiwale Palayizu kala kyamesenene Nzambi. Maji Nzambi ka jimbi o ima yamesenene kubhanga kudimatekenu. Kyebhi Nzambi kyanda kitula dingi o ixi palayízu? Kala kyalondekesa o milongi yatundumu, Nzambi kandabwika o ixi, kana. Muveji dya kiki, mwene wandakwehela o athu afiyele kutungamu. Kyoso Nzambi kyandakumbidila o ikananenu yê, o ima mu ixi yandakala kyebhi?
Kwandakala ngó unguvulu umoxi wandatumina o ixi yoso
Kwakambe ngó, kyoso o Utuminu wa Nzambi wala kudyulu, kiwandakwendesa o ima mu ixi, o athu andakala dingi ni kusanguluka, andadibhana kyambote, andabhanga ikalakalu yambote yanda ku asangukukisa. Nzambi wasolo Jezú Kidistu phala kutumina o ixi. Lelu, jinguvulu javulu kijene musota kubhanga o mbote yamesena o athu. Maji Jezú wadifu kyengi, mukonda mu ithangana yoso, wandabhanga o mbote ku athu. Mwene wandatumina ni henda, wandabhanga mbote, wandaloloka, wandakala Sobha ibatula o maka ni kuyuka.—Izaya 11:4.
Kikwanda kala kudiwanuna bhukaxi ka athu mu ngongo
O athu andatunga ku mundu wobhe, kandadiwanuna dingi, mukuxinganeka kwila, eme ixi yami yiyi, eme mwiji wami yú, mba ijila yami yiyi. Athu oso andakala ngó ni muxima umoxi. (Dijingunwinu 7:9, 10) Athu oso andatunga mu ixi andazola Nzambi, andadizola mudyâ, andakalakala kumoxi ni kutululuka phala kukumbidila o vondadi ya Nzambi, mukulanga o ixi mwatungu.—Jisálamu 115:16.
Kuma Kwandakala Kyambote
Kyoso o Utuminu wa Nzambi kiwandamateka kwendesa o ima mu ngongo, Nzambi wandalangidila kyambote o ima, o kuma kikwanda tema kyavulu, kikwanda talala we kyavulu. (Jisálamu 24:1, 2) Kyoso Jezú kyexile mu ixi, mwene walondekesa bhofele o kutena kwamubhele Nzambi, kyoso mwene kyatululukisa o kitembwe kyadikota, sé kubhanga nguzu. (Máluku 4:39, 41) Mu Utuminu wa Kidistu, séku dingi muthu wandakala ni wôma wamavuwa. Kyoso o Utuminu wa Nzambi kiwandakwendesa o ima mu ixi, twandatunga ni kutululuka ni yama, kikwandakala dingi muthu uzanga o ixi.—Hozeya 2:18.
Sawidi yambote ni kudya kwavulu
Athu oso andakala ni sawidi yambote. Séku dingi muthu wandakata, wandakuka mba kufwa. (Izaya 35:5, 6) O athu andatunga mu ixi yafwama, yazele kala kyexile o dikaza dya dyanga mu njaludim ya Edene. Kala mu njaludim ya Edene, ku mundu wobhe, o ixi yandabhana kudya kwavulu, athu oso mu ixi andakala ni kudya kwasoko. (Dimatekenu 2:9) Kala o mundu wa Nzambi m’ukulu akwa Izalayele, mu Palayizu athu oso ‘anda kúdya jinga, anga ekuta.’—Ijila 26:4, 5.
Kutululuka kwakidi ni kukondama
Kyoso o Utuminu wa Nzambi kiwandakwendesa o ima mu ngongo, athu oso andakala ni kutululuka, andaditalatala kyambote ni kuyuka. Kikwandakala dingi ita, kikwandakala kala dingi athu atumina akwâ ni undanda, athu oso andakala ni yoso yabhindamena. O Bibidya ikanena: “A k’èla kyá, muthu uxikama bhoxi dya muvide wê, muthu uxikama bhoxi dya mufiku wê, o u a kwatesa wôma ka moneka.”—Mikeya 4:3, 4.
Athu oso andakala ni jinzo jafwama ni ikalakalu ya asangulukisa
Miji yoso yandakala ni dibhata dyâ, sé kukala ni wôma wa kwila, anda kwa atambuladyu. Enyoso andakala we ni kikalakalu phala kudikila o ibhindamu yâ yoso. Kala kyambe o Bibidya, athu oso andatunga ku mundu wobhe wa Nzambi “ene we ka kà kalakala mu kingoho.”—Izaya 65:21-23.
O ulongelu wabetakota
O Bibidya ikanena: “Mukonda oxi yoso ya kèzala ni kwijiya Nzambi.” (Izaya 11:9) O athu ku mundu wobhe, andadilonga yalungu ni kwijiya kwazongo kwa Mubhangi wâ, Jihova; anda dilonga we o ibhangelu yê yafwama. O kwijiya kuku, kikwandakala phala kubhanga mawuta mba ima yayibha kwa akwâ. (Izaya 2:4) Muveji dya kiki, ene andasota kutunga ni kutululuka mudyâ, andasota we kulanga kyambote o ixi.—Jisálamu 37:11.
Mwenyu wakalelaku
Nzambi wasokejeka kyambote o ixi, phala tutene kukala ni mwenyu ni kusanguluka kwavulu izuwa yoso. Mwene wamesenene kwila, o athu atunga mu ixi katé kuhádya ni hádya. (Jisálamu 37:29; Izaya 45:18) Phala kukumbidila yamesene tunde kudimatekenu, Nzambi o “kalunga wa ka kà bhwisaku.” (Izaya 25:8) O Bibidya ikanena: “Ki ku kala dingi kùfwa, nè ngó mukôndo, mba kudila, mba kukata.” (Dijingunwinu 21:4) Nzambi wandabhana ku athu oso o ujitu wakukala ni mwenyu wakalelaku, kikale yó andabhuluka kudizubhilu dya mundu yú, kikale yó anda ku afukununa kumundu wobhe.—Nzwá 5:28, 29; Ikalakalu 24:15.
Né mwene kindala kiki, mazunda ni mazunda a athu ku mundu woso, amudisokejeka kyá phala kutunga ku mundu wobhe, wazukama. Sumbala akwa ituxi, ene amusota kukala kyá ni ukexilu wawabhela Nzambi, phala atene kukala ku mundu wobhe. Kyebhi kyamubhanga kiki? Mukudilonga yalungu ni Jihova Nzambi ni yó amutumikisa kwala mwene mu ixi, Jezú Kidistu.—Nzwá 17:3.
Sota kwijiya dingi iwatokala kubhanga phala kubhuluka kudizubhilu dya mundu yú ni utene kutunga mu palayízu yazukama kyá. Xikina kudilonga o Bibidya ni Jimbangi ja Jihova sé kufuta kitadi mbaphe udilonga mu sayte jw.org, mu mbandu Curso da Bíblia On-line.
Eye Nange Wandawabhela we o Maka Yá
O MULANGIDI
O Utuminu wa Nzambi Wa-nda Bhanga Ihi?
Jesú wejidile kwila, o Utuminu wa Nzambi wene ngó u tena kuzubha o maka oso mu ixi. Ihi ya bhange kya o Utuminu phala kukolesa o kidyelelu kyetu?
O MULANGIDI
O Utuminu ua Nzambi—Unguvulu ua Iuka
Samanu dia ima ilondekesa kuila, mu Utuminu ua Nzambi ki mua-nda kala kuiibha
