1. Kala kilondekesa o mukanda wa 1 Tesalonika 5:11, kikalakalu kyebhi kitwene mubhanga etu enyoso?

 O KWILA mu kilunga kyé mwatungu mba mwayudika Kididi Kya Ubhezelu? Se kiki kyabhitile, sé phata ulembalala o kyônge kyé kyadyanga kyabhitile mu kididi kiki kya ubhe. Eye wasakidila kyavulu Jihova. Nange eye kiwatenene kwimba o mwimbu wadyanga, mukonda dya kusanguluka ku wakexile naku, kwakubhangesa kudila. O Ididi yetu ya Ubhezelu, iximanesa Jihova. Etu tumubhana dingi kijingu kyoso kitudibhakula mu fisu yengi ya kutunga. O kikalakalu kiki kyabeta dingi kota, o kutunga Idididi ya Ubhezelu ndenge. O fisu yenyiyi yalungu ni kukolokotesa o athu adyongeka mu ididi yiyi. Kyoso poxolo Phawulu kyasoneka o izwelu itusanga mu mukanda wa 1 Tesalonika 5:11, o velusu mwatundu o dyambu dya milongi yiyi, mwene wexile muxinganeka mu kikalakalu kya kukolesa o athu.—Tanga.

2. Ihi itwandadilonga mu milongi yiyi?

² Poxolo Phawulu phangu yambote ya muthu wejidile kyambote kyebhi kyejitena kuswinisa o jiphange jê. Mwene wexile mudita mu ididi ya akwa ni mu kwivwa o ndolo yâ. Mu milongi yiyi twandadilonga kyebhi mwene kyakwatekesa o jiphange jê (1) kudibhana ni ibhidi, (2) kubhanga paze ni akwâ ni (3) kuswinisa o kixikanu kyâ kwa Jihova. Twandadilonga we kyebhi kitutena kukayela o phangu yê ni kuswinisa o jiphange jetu mu izuwa yiyi yasukidilaku.—1 Ko. 11:1.

3. Kyebhi poxolo Phawulu kyexile muta o salu yê mu kididi kyatokala?

³ Poxolo Phawulu wazolele kyavulu o jiphange jê. Mwene wadibhanene ni ibhidi, kenyiki wakexile mudita mu kididi kya akwâ ni kwivwa we o ndolo yâ kyoso kyexile mudibhana ni ibhidi. Sayi kithangana mwene kexile ni kitadi, wasoto kukalakala phala kudikila o ibhindamu yê ni ibhindamu ya akwâ. (Ika. 20:34) O salu yê yexile kutunga jibalaka. Kyoso kyabhixila ku Kolindo, wadyangele kukalakala kumoxi ni Akila ni Pidisila. Maji “mu jisábhalu joso” mwene wexile mu bokela o Jijudé ni Jingeleku, ni kulonga “mudilombe”. Mukubhita thembu kyoso Sila ni Timote kyabhixila, “Phawulu wa dibhakwile kyangó mu kulonga o mak’â Nzambi.” (Ika. 18:2-5) Phawulu nuka wajimbile o kima kyabetele dingi kota ku mwenyu wê, o kusidivila Jihova. Kuma Phawulu wabhana phangu yambote yalungu ni kukalakala ni nguzu yoso mu ukunji ni kulanga o ibhindamu yê, mwene wejitena kuswinisa o jiphange jê. Kuma Phawulu wabhana phangu yambote mu kukalakala ni nguzu yoso mu ukunji ni mu kulanga o ibhindamu ya jiphange jê, mwene wafwemene kuswinisa o jiphange jê. Mwene wa alembalesa phala kehele o ijijidiku ya mwenyu ni kibhindamu kya kudikila o mwiji, kwabhangesa kukamba kusuwa “o ima yabetakota”—o ima yoso yiyi yalungu ni ubhezelu wetu kwa Jihova.—Fil. 1:10.

4. Kyebhi Phawulu ni Timote kyakwatekesa o jiphange jâ kudibhana ni izukutisu?

⁴ Kyoso kyabhange o kilunga mu mbanza ya Tesalonika, mu kubhita tu ithangana o Jikidistá ja ubhe, amateka kwazukutisa. O jinguma jiji, ni njinda yavulu asoto poxolo Phawulu ni Sila, maji ka asange. Kyenyiki o jinguma akoko “jiphange ja mukwá, katé ku atwameni a mbanza,” ya adikola exi: “O mayala yá, a mu bhukumukina o ijila ya Sézalu.” (Ika. 17:6, 7) Eye utena kuxinganeka o wôma wakexile nawu o Jikidistá jojo ja ubhe, kyoso kyamono kwila o mayala a mbanza amateka kwazukutisa? Ene ejitena kuzoza mu sidivisu yâ kwa Jihova, maji poxolo Phawulu kamesenene kwila kiki kibhita. Sumbala mwene ni Sila atokalele kuxisa o mbanza, maji abhange yoso phala o kilunga kya ubhe akilange kyambote. Poxolo Phawulu walembalesa o Jikidistá mu mbanza ya Tesalonika: “[Twa] mitumikisa Timote phangyetu . . . phala ku mikonda o malamba ni kukolokotesa o kixikanu kyenu, phala kana muthu ubhwila mukonda dya izukutisu yiyi.” (1 Te. 3:2, 3) Nange Timote wamono o kizukutisu mu veji yadyanga, kyoso kyexile hanji mu mbanza mwamuvwalele, ku Listra. Mwene wamono kyebhi poxolo Phawulu kya aswinisa kwenyoko. Mu kumona kyebhi Jihova kyakwatekesa o jiphange mu mbanza ya Listra, Timote wejitena kuxikinisa o jiphange ja ubhe kwila, o ima yoso yejiditunda we kyambote mu mbanza ya Tesalonika.—Ika. 14:8, 19-22; Jih. 12:2.

5. Kyebhi manu Bryant kyamukwatekesa ku kafunga?

⁵ Kyebhi dingi poxolo Phawulu kyaswinisa o jiphange jê? Kyoso kyakundu dingi o mbanza ya Listra, ya Ikônyu ni ya Andiyokiya, Phawulu ni Balanabé, “asolo we tufunga mu ilunga yoso.” (Ika. 14:21-23) Sé phata o tufunga toto akexile mukolokotesa o jiphange mu ilunga, kala kyene mubhanga o tufunga mu izuwa yetu. Tumone yazwela manu Bryant: “Kyoso kinga kexile ni 15 kya mivu tat’etu watuxisa, mam’etu amutele mu kamukonde. Ngaluwalele kyavulu ngexile mudivwa kuma angibwazeka.” Ihi yakwatekesa manu Bryant kukolokota mu ibhidi yiyi? Mwene wambe: “Sayi kafunga amwixina manu Thonyi wakexile muzwela n’eme mu izuwa ya yônge ni mu izuwa  yamukwá. Mwene wakexile mu ngitangela yalungu ni athu akexile mudibhana ni ibhidi, maji né kiki ene asangulukile. Mwene watange n’eme o divulu dya Jisálamu 27:10, yu wakexile jinga mungitangela yalungu ni sobha Hezekiya, wasidivila Jihova ni ufiyele woso sumbala tat’ê kexile phangu yambote.” Kyebhi manu Bryant kyadivu ni kikwatekesu kiki? Mwene wambe: “Ni kikwatekesu kya manu Thonyi, ngabokona mu sidivisu ya thembu yoso. O sidivisu yiyi yene mungisangulukisa kyavulu.” Tufunga, “talenu kyambote” yó abhindamena kwaswinisa kala kyabhiti ni manu Bryant.—Jisa. 12:25.

6. Kyebhi poxolo Phawulu kyaswinisa o jiphange jê bhukaxi ka misoso ya jiselevende jafiyele ja Jihova?

⁶ Poxolo Phawulu walembalesa o jiphange jê kwila, mu kutena kwa Jihova, “kifuxi kyadikota kya jimbangi” kyakolokotele mu ibhidi. (Jih. 12:1) Mwene wejidile kwila o misoso ya athu akolokotele mu ibhidi yavulu yejitena kuswinisa ni kukwatekesa o jiphange jê kusuluka mukuxinganeka “mu mbanza ya Nzambi” ya mwenyu. (Jih. 12:22) Kyene we kimoxi lelu. Kyoso kitutanga kyebhi Jihova kyakwatekesa Ngidiyone, Balake, Davidi, Samuwele, ni athu amukwá tuswina kyavulu. (Jih. 11:32-35) Kyene we kimoxi, kyoso kitutanga o misoso ya jiphange jetu lelu. Mu mbonge yetu twene mutambula mikanda yavulu ya jiphange, aswina kyoso kyatange o misoso ya Jimbangi ja Jihova jafiyele mu izuwa yetu.

7. Ihi itudilonga mu kitendelesu kya Phawulu mu divulu dya Loma 14:19-21?

⁷ Etu tuswinisa o jiphange jetu kyoso kituzwela ni kubhanga ima ibheka paze mu kilunga. Né mwene se o ixinganeku yetu ki idifu, kitwehela kwila o ima yiyi itubhangesa kudiwanuna. Se kumoneka maka mwabhingi kwila phala kwabatula o athu kanda bhukumukina o itumu ya Bibidya, etu ki tudikwatenena mu ixinganeku yetu. Mu kifika, mukilunga kya Loma mwakexile Jikidistá Jijudé ni yó atundile mu jixi jengi. Kyoso o kijila kya Mozé kexile dingi kukikumbidila, o abhezi a Jihoha katokalele dingi kubelesela o ijila yalungu ni kukamba kudya o ima yofidise ku kijila. (Mál. 7:19) Tundé o kithangana kyenyokyo, sayi Jikidistá Jijudé amono kwila exile kya ni ufolo wa kudya o ima yoso. Majiphe o Jikidistá jamukwa Jijudé, akexile mu banza kwila katokalele hanji kudya o ima yenyoyo. Mukonda dya maka enyá, o athu mukilunga adiwane mu ibuka iyadi. Maji poxolo Phawulu walondekesa kwila ene ejidikwatenena ku ima yeji bheka paze mu kilunga, kyoso kyambe: “Kima kyambote kukamba kudya xitu mba kunwa vinyu, mba kubhanga kima kyoso-kyoso, kibhalesa phang’yé.” (Tanga Loma 14:19-21.) Kyenyiki poxolo Phawulu wakwatekesa o jiphange jê kumona kwila o kima kyokyo kyexile mubhekela maka mu kilunga kyoso. Mwene wexile we polondo phala kulungulula o ukexilu wê phala kabhangese akwâ kudibhala. (1 Ko. 9:19-22) Tutena we kuswinisa akwetu ni kubheka paze mu kilunga mukukamba kuzoka ni maka alungu ni ixinganeku ya muthu ni muthu.

8. Ihi yabhange poxolo Phawulu kyoso kyamoneka maka, ejikatula o paze mu kilunga?

⁸ Poxolo Phawulu wabhana phangu yambote ya kubhanga paze ni yó kaxikina o ima yala ni valolo yadikota. Mu kifika, sayi Jikidistá ku hama yadyanga akexile muzwela ni nguzu yoso kuma o athu kexile Jijudé akitukile Jikidistá, atokalele kwasaya. (Nga. 6:12) Poxolo Phawulu kaxikinine o kixinganeku kyâ. Mu veji dya kujijidika akwâ kubhanga o ima mu ukexilu wê, ni kulenduka kwoso wambata o maka ku jipoxolo ni tufunga ku Jeluzaleme. (Ika. 15:1, 2)  Mukonda dya kiki o ukexilu wa poxolo Phawulu wakwatekesa o Jikidistá kusanguluka ni kukala ni paze mu kilunga.—Ika. 15:30, 31.

9. Kyebhi kitutena kukayela o phangu ya poxolo Phawulu?

⁹ Se kumoneka maka onene, twatokala kubhanga paze mukusota yó a asolo kwala Jihova phala kulanga o kilunga. Mu ithangana yoso tusanga itendelesu ya Bibidya mu madivulu ene mutubhana o kilunga kya Jihova. Se tusota kukayela o itendelesu yiyi, mu veji dya kubhanga o ima yala mu ibanzelu yetu twandabheka paze mu kilunga.

10. Ihi dingi yabhange poxolo Phawulu mu kusota o paze mu kilunga?

¹⁰ Poxolo Phawulu wasoto kubhanga paze mu kilunga mu kuzwela yalungu ni idifwa yambote ya jiphange jê, mu veji dya kuzwela idifwa yâ yayibha. Mu kifika, ku disukilu dya mukanda wê ku akwa Loma, mwene watumbula o majina a jiphange javulu, mu ithangana yamukwa watumbula ukexilu wambote mba idifwa yâ. Tutena kukayela o phangu ya poxolo Phawulu mu kutumbula o idifwa yambote ya jiphange jetu. Mu kubhanga kiki tukolesa dingi o ukamba wetu ni henda ku jiphange mu kilunga.

11. Kyebhi kitutena kubheka paze mu kilunga kyoso kikumoneka maka onene?

¹¹ Sayi ithangana, katé mwene ni Jikidistá jakulu mu nzumbi kakala ni ixinganeku imoxi mba azoka mwene. Kiki kyabhitile ni poxolo Phawulu ni kamba dyê dya kazola, amwixana Balanabé. Kiyadi kyâ kexile ni kibanzelu kimoxi kyalungu ni kwenda ni Máluku mu kikalakalu kyâ, kya kukunda o jixi. “Ene azoko, ya a diwanuna.” (Ika. 15:37-39) Maji Phawulu ni Balanabé ni Máluku abhange o paze. Mukubhanga kiki ene alondekesa kwila o paze mu kilunga yexile ni valolo yavulu phala ene. Mubhita thembu poxolo Phawulu wazwela kyambote yalungu ni Balanabé ni Máluku. (1 Ko. 9:6; Kol. 4:10) Etu we twatokala kubatula o maka oso oso utuwala nawu mu kilunga ni jiphange jetu, ni kusuluka kudikwatenena mu idifwa yâ yambote. Mu kubhanga kiki, twandadibunda kumoxi ni kukala ku paze ni akwetu mu kilunga.—Efe. 4:3.

12. Ibhidi yebhi yene mudibhana nayu o jiphange jetu?

¹² Etu tuswinisa o jiphange jetu kyoso kitukolesa o kixikanu kya kwa Jihova. Amoxi mudyetu a axongwena ku jindandu jâ ki Jimbangi ja Jihova mba kujikoleka jâ ja salu mba ja xikola. Amukwa adibhana ni mauhaxi abhonzo mba ala ni kikote ku muxima. Amukwa hanji abatizala kyá mu mivu yavulu, amukingila o dizubhilu dya mundu yú mu mivu yavulu. O ima yiyi itena kulola o kixikanu kyetu, o jiphange ku hama yadyanga adibhanene we ibhidi yadifu kiki. Ihi yabhange poxolo Phawulu phala kukolesa o kixikanu kya jiphange jê?

13. Kyebhi poxolo Phawulu kyakwatekesa o jiphange exile mwalokalala mukonda dya kixikanu kyâ?

¹³ Poxolo Phawulu watumbula misoso ya Mikanda Ikôla phala kuswinisa o jiphange jê. Mu kifika, o Jikidistá Jijudé nange kejidile ihi yejizwela kyoso o jindandu jâ exile mwalokalala mu kwamba kuma o ilongesu ya Jijudé yabetele dingi kota o ya Kidistu ndenge. Sé phata o mukanda wa poxolo Phawulu ku akwa Jihebelewu waswinisa kyavulu o Jikidistá. (Jih. 1:5, 6; 2:2, 3; 9:24, 25) O ixinganeku ya poxolo Phawulu yeji kwa kwakwatekesa kwijiya yejizwela ni jindandu jâ. Etu tutena we kukwatekesa o jiphange jetu ene mwalokalala, kujimbulula o kixikanu kyâ bhukaxi ka madivulu metu. Se o jiphange jetu ja minzangala a alokalala mukonda dya kuxikina kuma o ima a ibhange, tutena kwakwatesa kusanga milongi yambote mu tumadivulu A Vida—Teve um Criador? ni  A Origem da Vida—Cinco Perguntas Que Merecem Resposta phala kwalondekesa se mukonda dyahi o ima a ibhange.

14. Né mwene poxolo Phawulu wexile muboka ni nguzu yavulu, ihi dingi yakexile mubhanga?

¹⁴ Poxolo Phawulu wakwatekesa o jiphange jê kulondekesa henda bhukaxi ka ibhangelu ya “ima yambote.” (Jih. 10:24) Mwene kakwatekesa ngó o jiphange jê bhukaxi ka izwelu yê, maji we ni bhukaxi ka ibhangelu yê. Mu kifika, kyoso o jiphange ku Judeya kyabhitile ni nzala, Phawulu wa ambatele o ima yabhindamene. (Ika. 11:27-30) Mu kidi sumbala Phawulu wexile muboka ni kulonga ni nguzu yoso, mwene wexile musota maukexilu akukwatesa yó exile ni ibhindamu muxitu. (Nga. 2:10) Mu kubhanga kiki mwene wa kolesa o kidyelelu kya jiphange jê kya kwila Jihova wejikwalanga. Lelu’idi, kyoso ki tubhakula o kithangana kyetu, o nguzu yetu, ni mawuhete metu, phala kukwatekesa mu ibuka yakukwatekesa o jiphange abhiti mu mavuwa, tukolesa we o kixikanu kya jiphange jetu. Tutena we kubhanga kiki mu kusangela kitadi phala kukwatekesa o kikalakalu kyetu ku mundu woso. Mu ukexilu yú ni mu maukexilu amukwá, tukwatekesa o jiphange jetu kudyelela kwila Jihova kanda kwabwazeka.

15-16. Kyebhi kitutena kutalatala o jiphange azoza mu nzumbi?

¹⁵ Poxolo Phawulu wasuluka mu swinisa yo azozele mu kixikanu. Mwene wakwatela henda wazwela nawu mu ukexilu wambote ni kilendu kyoso. (Jih. 6:9; 10:39) Mu kifika mu mukanda wasoneka ku akwa Jihebelewu, mwene watumbula o izwelu “etu” ni “phala etu” mu kulondekesa kwila mwene we watokalele kukumbidila o itendelesu yexile mubhana. (Jih. 2:1, 3) Kala Phawulu, etu kituxisa azoza mu kuxikana, mu veji dya kiki etu twaswinisa mukwalondekesa o henda ya kidi. Mu kubhanga  kiki tu axikinisa kwila twa azolo. O ukexilu wetu wahenda, wa kuzwela utena we kuswinisa akwetu kala o izwelu yetu.

¹⁶ Phawulu waxikinisa o jiphange jê kwila Jihova wejidile o ima yoso yambote yakexile mubhanga. (Jih. 10:32-34) Tutena kubhanga kima kala kiki kyoso kitukwatekesa phangyetu wazoza mu kixikanu. Tutena kumubhinga phala kututangela kyebhi kyadilongo o kidi, ni kyebhi kyamono o kikwatekesu kya Jihova ku mwenyu wê. Tutena we kumutangela kwila o henda yalondekesa kwa Jihova m’ukulu, Jihova ka ijimbi, ni kwila kuhádya Jihova kandamubwazeka. (Jih. 6:10; 13:5, 6) O izwelu yiyi yandaswinisa o jiphange jetu jakazola kukolokota mu sidivisu yâ kwa Jihova.

17. Mauhete ebhi ututena kubandekesa?

¹⁷ Kala o mutungi uya ni kubandekesa o uhete wê, etu we twatokala kubandekesa o uhete wetu wa kuswinisa o jiphange jetu. Tutena we kukwatekesa akwetu amudibhana ni ibhidi, mu kwatangela misoso ya athu adibhanene we ni ibhidi kala ene. Tusota o paze kyoso kitutumbula o ima yambote itumona ku akwetu, kyoso ki kumoneka maka mu kilunga, ni mu kubhanga yoso phala kubheka o paze. Etu tusuluka mu kuswinisa o kixikanu kya jiphange jetu kyoso ki tu atangela maka alungu ni Bibidya, mu kwakwatekesa mu ukexilu watokala ni mu kuswinisa yó azoza mu nzumbi.

18. Etu enyoso twamesena kubhanga ihi?

¹⁸ O athu akalakala mu ibuka yakutunga asanguluka kyavulu. Kyoso kitukolesa o kixikanu kya jiphange jetu, etu we tusanguluka kyavulu. O ididi ya ubhezelu kupholo dya kwenda itena kubwa, maji o kikalakalu kyetu kya kuswinisa akwetu kitena kunangenena katé kuhádya ni hádya! Kyenyiki, ‘tusulukyenu mu ku dikolokotesa ni kudiswinisa mudyetu.’—1 Te. 5:11.