MBANDU YAKUDILONGA 34
MWIMBU 107 Nzambi, o Phangu ya Henda
Kyebhi o Tufunga Kyalondekesa Kwila Azolo o Muthu Wate Kituxi?
“Nzambi mu henda yê wa mu kukwatekesa phala udyele.” —LOM. 2:4.
ITWANDADILONGA
Kyebhi o tufunga kya kwatekesa muthu mu kilunga wate kituxi kyadikota?
1. Ihi itena kubhanga yo ate kituxi kya dikota?
MU MILONGI ya tundumu twamono kyebhi Phawulu kyabatula o maka alungu ni muthu watele kituxi kya dikota. O muthu watele kituxi kadyela o kituxi kye, mu kiki amukatwile mu kilunga. Kala kilondekesa o velesu ya milongi yiyi sayi athu atele kituxi kyadikota atena kwa akwatekesa. Ene atena kudyela o ituxi yâ. (Lom. 2:4) Kyebhi o tufunga kyatena kwa akwatekesa kudyela o ituxi?
2-3. Ihi itwatokala o kubhanga se phange wate kituxi kyadikota ni mukonda dyahi?
2 Ande dya kukwatekesa, o tufunga atokala kwijiya yoso yalungu ni kituxi kya te o muthu. Kyenyiki, se tumona kwila muthu mu kilunga wate kituxi kyadikota kyeji mubhangesa kumukatula mu kilunga, ihi itwatokala o kubhanga? Etu twatokala kuswinisa o muthu phala kuzwela ni tufunga phala na mu kwatekese.—Iza. 1:18; Ika. 20:28; 1 Ph. 5:2.
3 lhi itwatokala kubhanga se o muthu udituna kuzwela ni tufunga? Etu mwene twandaya ku tufunga phala kwijiya se o muthu watambula kya o kikwatekesu. Kyoso ki tubhanga kiki twamulondekesa henda kwa phangyetu mukonda twejiya kwila o tufunga anda mukwatekesa. Se o muthu usuluka mu kubhanga ima yayibhila Jihova, mwene wanda zanga o ukamba wê ni Jihova. Mwene we wanda xidisa o kilunga kya Jihova. Mu kiki ne mwene se kutubhonza kubhanga kiki twanda zwela ni tufunga mukonda dya henda yetu kwa Jihova ni kwa phange wate kituxi.—Jisá. 27:14.
KYEBHI O TUFUNGA KYA TENA KUKWATEKESA YO ATE KITUXI KYA DIKOTA?
4. Mukonda dyahi o tufunga adyongeka ni muthu wate kituxi?
4 Kyoso o muthu uta kituxi kya dikota, o kibuka kya tufunga asola tufunga tutatu phala kubatula o maka ni muthu wate o kituxi. a O mayala enya atokala kukala athu alenduka. Kyoso o tufunga kyaya ni kukwatekesa o muthu na dyele o kituxi kye, ene ejiya kwila katokala kumujijidika phala kulungulula o ukexilu wê. (Mate. 30:19) O tufunga ejiya kwila ki athu oso ate kituxi anda xikina o kikwatekesu kyâ, kala kyabhiti ni sobha Davidi. (2 Sam. 12:13) Sayi ya kene muxikina o itendelesu ya Jihova. (Dim. 4:6-8) O tufunga adyongeka phala kukwatekesa o muthu wate kituxi, kudyela. O tufunga atokala kulembalala ihi kyoso kya dyongeka ni muthu wate kituxi?
5. Itendelesu yebhi atokala kukala nayu o tufunga kyoso kya dyongeka ni muthu wate kituxi? (2 Timote 2:24-26) (Tala we ofoto.)
5 O tufunga amona kwila o muthu wate kituxi, wala ni valolo, mwene mbudi yajimbidila. (Luk. 15:4, 6) Kyenyiki kyoso o tufunga kyadyongeka ni mwene, ene kamutalatala. O tufunga katokala kubanza kwila ene ngó atokala kubhanga ibhwidisu phala kufundisa o muthu. Mu veji dya kiki ene anda londekesa o idifwa yala mu divulu dya 2 Timote 2:24-26. (Tanga.) O tufunga atokala kuzwela ni kulenduka ni kutululuka kwoso, mukonda ene amesena kukwatekesa o muthu wate kituxi kulungulula o kibanzelu kyê.
Kala mu ukulu o tufunga ene mubhanga nguzu phala kukwatekesa yo adyela o ituxi yâ kuvutuka mu kilunga (Tala okaxi 5)
6. Kyebhi o tufunga kya disokejeka kyambote ande dya kudyongeka ni muthu wate kituxi? (Loma 2:4)
6 O tufunga akatula kithangana phala kudisokejeka kyambote. Ene akayela o phangu ya Jihova mu kudibhana ni muthu wate kituxi, ene alembalala we o izwelu ya Phawulu: “Nzambi mu henda yê wa mu kukwatekesa phala udyele.” (Tanga Loma 2:4.) O tufunga ala we jimbudi, ene atokala kukayela o itendelesu ya Jezú mu kubhana phangu mu ukexilu u wa mulanga o kilunga. (Iza. 11:3, 4; Mat. 18:18-20) Ande dya tufunga kudyongeka ni muthu wate kituxi ene asamba phala Jihova kwa kwatekesa kubhangesa o muthu kudyela. Ene atokwesa o Bibidya ni madivulu metu ni kusamba phala kukala ni unjimu. Ene abhanga yoso phala kwijiya dingi ihi yabhangesa o muthu kuta kituxi.—Jisa. 20:5.
7-8. Kyebhi o tufunga kyatena kukayela o phangu ya Jihova kyoso kyadyongeka ni muthui wate kituuxi kya dikota?
7 O tufunga akayela o phangu ya Jihova. Ene alembalala kyebhi Jihova kya kwatekesa o muthu ande dya kuta kituxi. Mu kifika Jihova walondekesa mwanyu kwa Kayini. Mwene wamutangela ihi yeji bhita se mwene kamubelesela ni ihi yeji bhita se wamubelesela. (Dim. 4:6, 7) Jihova watumikisa polofeta Natane phala kudimuna Davidi. Natane wate kifika phala kukwatekesa Davidi kudyela o ituxi yê. (2 Sam. 12:1-7) Jihova ‘wasuluka mu kutumikisa o jipolofeta jê’ phala kudimuna o akwa Izalayele kyoso kyatele ituxi. (Jel. 7:24, 25) Jihova kakingila o mundu wâ kudyela o ituxi phala kwakwatekesa. Jihova mwene wadyangela kwabhangesa kudyela o ituxi yâ.
8 O tufunga akayela o phangu ya Jihova kyoso kya kwatekesa muthu wate kituxi kya dikota. Kala kilondekesa 2 Timote 4:2 ene azwela “ni mwanyu woso” ni muthu wate kituxi. O kafunga watokala kulondekesa kulenduka ni mwanyu ku muthu wate kituxi phala kakibhange dingi. Se o kafunga ulondekesa njinda o muthu wate kituxi nange kanda bhana matwi, mba kanda xikina kudyela o kituxi.
9-10. Kyebhi o tufunga kyatena kukwatekesa o muthu wate kituxi kubanza mu kituxi kyate?
9 O tufunga asota kutendela ihi yabhangesa o muthu kuta kituxi. Mu kifika, o kwila o kidista kexike dingi kudilonga ubheka mba kexile dingi muboka? O kwila mwene kexile musamba jinga kwa Jihova? Mwene wehela o jihanji jayibha ku mwendesa? O kwila wasolo kyayibha o makamba mê mba o itonokenu yê? O kwila mwene utendela kyebhi kidivwa Tat’ê Jihova yalungu ni ima yabhange?
10 O tufunga abhanga ibhwidisu yambote ikwatekesa o muthu wate o kituxi kufisala o kituxi kyate. (Jisa. 20:5) Mu kusuluka o tufunga atena kubhana ifika ikwatekesa o muthu wate o kituxi, kudyela, kala kyabhange Natane kwa Davidi. Mwene utena kudyela o kituxi kyê mu kidi.
11. Kyebhi Jezú kyazwela ni athu atele ituxi?
11 O tufunga abhanga nguzu phala kukayela o phangu ya Jezú. Mu kudibhana ni Phawulu, Jezú wamubhange kibhwidisu ni unjimu Mwene wamwibhula: “Sawúlu, Sawúlu, mukonda dyahi wa mu ngizukutisa?” Ni kibhwidisu kiki Jezú wamukwatekesa kumona kwila o ima yexile mubhanga ima yayibha. (Ika. 9:3-6) Kala kyabhiti “ni muhatu yó Jezabele,” Jezú wambe: “Nga mubhana kithangana phala kudyela.”—Dij. 2:20, 21.
12-13. Kyebhi o tufunga kyabhana kithangana phala o muthu wate kituxi, kudyela? (Tala we ofoto.)
12 Mu kukayela o phangu ya Jezú, o tufunga kabanze kwila o muthu wate o kituxi kanda dyela o kituxi kye. Sayi ya adyela o kituxi kyate kyoso kya dyongeka ni tufunga mu veji yadyanga. Maji akamukwa kubhinga kithangana phala kudyela. Kyenyiki o tufunga atena kudyongeka ni mwene mu veji javulu. Kyoso kyadyongeka mu veji yadyanga, o muthu wate o kituxi utena kubanza mu ima yazwela o tufunga. Ni kulenduka, mwene utena kubhinga phala Jihova kuloloka o kituxi kye. (Jisá. 32:5; 38:18) Kyenyiki mu kudyongeka mu ithangana yavulu ni muthu wate kituxi, mwene utena kulondekesa idifwa yambote kalondekesa mu veji yadyanga, kyoso kyadyongeka ni mwene.
13 Mu kukwatekesa o muthu wate kituxi, kudyela, o tufunga alondekesa henda. O tufunga asamba kwa Jihova phala kubesowala o nguzu yene mubhanga phala kukwatekesa o muthu wate kituxi, kudyela o kituxi kyê.—2 Ti. 2:25, 26.
O tufunga atena kudyongeka mu veji javulu ni yo wate kituxi phala kumubhana kithangana kya kudyela (Tala okaxi 12)
14. Kyoso o muthu wate kituxi kyadyela, nanyi twatokala kumubhana o kijingu ni mukonda dyahi?
14 Se o muthu wate kituxi, udyela, tusanguluka kyavulu! (Luk. 15:7, 10) Ananyi atokala kubhanga o kijingu? O kwila o tufunga? Lembalala yazwela Phawulu yalungu ni muthu wate kituxi: “Nange Nzambi wanda kwabhana kithangana kya kudyela.” (2 Ti. 2:25) Kyenyiki Jihova, mwéne ubhangesa o muthu wate kituxi kulungulula o ukexilu wê, kana o athu. Phawulu wambe kwila kweji bhita ima yambote kyoso o muthu wate o kituxi kyadyela. O muthu yu utena kubandekesa dingi o kwijiya kwê ni kwila utena kulenga ku mibhetu ya satanaji.—2 Ti. 2:26.
15. Kyebhi o tufunga kyatena kusuluka mukukwatekesa o muthu wadyela o kituxi?
15 Kyoso o muthu wate o kituxi kyadyela, o tufunga asuluka mu kumukunda phala kumuswinisa ni kumukolokotesa mukudibhana ni izukutisu ya Dyabhu ni kubhanga o ima yambote. (Jih. 12:12, 13) Kidi kwila, o tufunga kanda tangela o kituxi kyate mwene, ku athu engi. Ihi yatokala kwijiya o kilunga?
“O YÓ ATE ITUXI, U ABAZELA BHUPHOLO YA ATHU OSO”
16. Yalungu ni divulu dya 1 Timote 5:20, ihi ya mesenene kuzwela Phawulu kyoso kyambe “bhupholo ya athu oso”?
16 Tanga 1 Timote 5:20. Phawulu wasonekena o izwelu yiyi kwa Timote phala kudimuna “yó ate ituxi.” O kwila Phawulu wamesenene kuzwela kwila ene atokala kwabazela bhupholo ya jiphange joso? Kana. Maji wexile yalungu ni yo ejidile we o maka. Nange amono o muthu kyoso kyate o kituxi mba mwene mwéne wa atangela yoso yabhiti. O tufunga anda zwela ngo kwa yo ejiya o maka kuma, a abatula kya ni kwila o muthu wate o kituxi amukwatekesa kyá.
17. Se o kilunga kyoso kiza mukwijiya kwila sayi phange wate kituxi kya dikota, ngolokela yebhi yatokala ku ibhana mu kilunga, ni mukonda dyahi?
17 Sayi athu mukilunga anda kwijiya kwila sayi phange wate kituxi kyadikota. Mu maka enya, “bhupholo ya athu oso” kulombolola o kilunga kyoso. Kafunga kamoxi wanda bhana ngolokela ya kwila o manu nganji mba mana nganji amubazela. Mukonda dyahi? Phawulu wa tambwijila: “Phala kudimuna akwâ” phala kadibhale.
18. Kyebhi o tufunga kyabatula o maka alungu ni munzangala katenesa luwa 18 dya mivu? (Tala we ofoto.)
18 Ihi yatokala o kubhanga o tufunga se o munzangala katenesa luwa 18 dya mivu, amubatizala kya uta kituxi kya dikota? O kibuka kya tufunga anda sola tufunga tuyadi phala kudyongeka ni mwene ni jitata je. b O tufunga anda kwibhwidisa o jitata se ihi yabhange kya phala kumukwatekesa kulungulula o ukexilu wê ni kudyela o ituxi yê. Se mwene wene mubelesela o jitata yu wamubhanga nguzu phala kulungulula o ukexilu wê, o tufunga atena kweha o jitata kusuluka mu kumukwatekesa. Jihova wabhana o ujitu yu ku jitata wa kulonga o twana twâ. (Mate. 6:6, 7; Jisa. 6:20; 22:6; Efe. 6:2-4) Kithangana ni kithangana o tufunga andaya jinga mukunda o jitata phala kwijiya se ene amubhana o kikwatekesu kyabhindamena. Mukiki, ihi yatokala o kubhanga o tufunga se o munzangala yu usuluka mu kubhanga o ima yayibha mba udituna kulungulula o ukexilu wê? Mu maka enya o kibuka kya tufunga anda dyongeka-ne kumoxi ni jitata je.
Se o munzangala katenesa luwa 18 dya mivu, amubatizala kya, uta kituxi kya dikota, tufunga tuyadi anda dyongeka ni mwene ni jitata jê mba ni muthu wamumusasa (Tala okaxi 18)
“JIHOVA O HENDA YÊ YADIKOTA NI KWILA, MUKWA KULENDUKA”
19. Kyebhi o tufunga kyakayela o phangu ya Jihova mukudibhana ni muthu wate kituxi kya dikota?
19 Jihova ukingila kwila o kibuka kya tufunga alangidila o kilunga ku yo abhukumukina o itumu yê. (1 Ko. 5:7) Maji ene abhanga yoso yatena phala kumukwatekesa o kudyela. Kyoso kyaya ni kukwatekesa o muthu, ene akingila kwila mwene ulungulula o ukexilu we. Mukonda dyahi? Mukonda ene amesena kukayela o phangu ya Jihova “mukwa kulenduka.” (Tiy. 5:11) Poxolo Nzwá walondekesa henda ku jiphange jê. Mwene wasoneka: “Twana twami, nga mu mi sonekena o ima yiyi phala kimute kituxi. Maji se muta kituxi, twala ni mukwatekexi wayuka bhu mbandu ya Tata, mwéne Jezú Kidistu.”—1 Nz. 2:1.
20. Ihi itwanda dilonga mumilongi ya kayela?
20 Sayi bhabha o kidista udituna kudyela o kituxi kye. Se kiki kibhita mwene anda mukatula mu kilunga. Kyebhi o tufunga kyabatula o maka yá adikota? Twanda tambwijila o kibhwidisu kiki mu milongi ya kayela.
MWIMBU 103 O tufunga—Maujitu a Jihova
