1-2. (a) Mukonda dyahi poxolo Phawulu wambe kwila o kidifwa ‘kya betakota’ o henda? (b) Ibhwidisu yebhi itwanda tambwijila?

 KYOSO poxolo Phawulu kyexile muzwela yalungu ni kixikanu, kidyelelu, ni henda, mwene wasuku mu kuzwela kwila, mu idifwa yoso yiyi ‘o kya betakota o henda.’ (1 Ko. 13:13) Mukonda dyahi Phawulu wazwela kiki? Ku hadya ki twandabhinga dingi kukala ni kixikanu ku ikanenu ya Nzambi yalungu ni mundu wa ubhe, mukonda o ima yiyi itwene mu kingila yanda dikumbidila kya. Maji mu ithangana yoso twandabhinga kukala ni henda kwa Jihova ni ku athu. Mu kidi, o henda yetu kwa Jihova ni ku akwetu yanda suluka ni kudibandekesa kate ku hadya ni hadya.

² Kuma twanda bhindamena jinga kukala ni henda, mu kiki phe twanda tambwijila ibhwidisu itatu. Kyadyanga, mukonda dyahi twatokala kudizola mudyetu? Kyakayadi, kyebhi kitutena kudilondekesa henda mudyetu? Kyakatatu, kyebhi kitutena kusuluka mu kukala ni henda yakolo mudyetu?

3. Ihi itubhangesa kudizola mudyetu?

³ Mukonda dyahi kima kyambote kudizola mudyetu? O henda ku jiphange jetu, yene ilondekesa kwila tu Jikidistá já kidi. Jezú wambela o jipoxolo je, wixi: “Athu oso anda mijiya kwila mu maxibulu mami, se mudizola mudyenu.” (Nzw. 13:35) Ku mbandu yamukwa, o kudilondekesa henda mudyetu kutukwatekesa kukala ni muxima umoxi. Poxolo Phawulu wambe kwila o henda yene “o dijikita dibhangesa o athu kukala bhwamoxi.”  (Kol. 3:14) Maji, kwala dingi kima kyamukwa kilondekesa se mukonda dyahi twatokala kudizola mudyetu. Poxolo Nzwá wasonekena o jiphange, wixi: “Woso wazolo Nzambi watokala we uzola phang’yê.” (1 Nz. 4:21) Kyoso kitudilondekesa o henda mudyetu, tulondekesa kwila twazolo Nzambi.

4-5. Ta kifika kilondekesa kyebhi o henda yetu kwa Nzambi yalungu ni henda itulondekesa ku jiphange jetu.

⁴ Mu ukexilu webhi o henda yetu kwa Nzambi yalungu ni henda itulondekesa ku jiphange jetu? Mu kifika, xinganeka kyebhi o phumbulu yetu yalungu mba ikalakala ni idyandu yamukwa ya mukutu wetu. Kyoso o dotolo kya kwata ku lukwaku lwetu anga ubweta ku mixibha phala kumona se yene yamukalakala kyambote mba kana, mu ukexilu yu mwene utena we kwijiya kyebhi kyala o sawidi ya phumbulu yetu. Ihi itutena kudilonga ni kifika kiki?

⁵ Kyoso o dotolo kyakwata ku lukwaku lwetu mwene utena kwijiya kyebhi kyala o phumbulu yetu. Kyene we kimoxi, etu tutena kwijiya se o henda yetu kwa Nzambi yakolo mwene, mu kutonginina se o henda ku akwetu yakolo we. Se tumona kwila m’ukulu twexile mulondekesa henda yavulu ku jiphange jetu, maji kindala kana dingi, kiki kitena kulombolola kwila o henda yetu kwa Nzambi yamuzoza we. Maji se ithangana yoso twamulondekesa henda ku jiphange jetu, kiki kilombolola kwila o henda yetu kwa Nzambi yakolo.

6. Mukonda dyahi twatokala kuthandanganya se tumona kwila o henda yetu ku jiphange yamuzoza? (1 Nzwá 4:​7-9, 11)

⁶ Se tumona kwila o henda yetu ku jiphange yamuzoza, twatokala kuthandanganya. Mukonda dyahi? Mukonda kiki kitena kulombolola kwila o ukamba wetu ni Jihova wala mu kilwezu. Poxolo Nzwá wajimbulula kyambote o maka enya, kyoso kyatulembalesa: “Woso kazolo phang’yê wene mu mumona, katena kuzola Nzambi kene mu mumona.” (1 Nz. 4:20) Kiki kitulonga ihi? Kitulonga kwila, Jihova wandasanguluka ngo n’etu se “tudizola mudyetu.”—Tanga 1 Nzwá 4:​7-9, 11.

7-8. Mu maukexilu ebhi ututena kudilondekesa henda mudyetu?

⁷ Mu veji javulu o Mak’a Nzambi azwela yalungu ni kitumu kya ‘kudizola mudyetu.’ (Nzw. 15:​12, 17; Lom. 13:8; 1 Te. 4:9; 1 Ph. 1:22; 1 Nz. 4:11) Maji o henda kidifwa kyala kumuxima wetu, ki kwala phe muthu utena kumona moxi dya muxima wetu. Kyenyiki kyebhi akwetu kyanda kwijiya kwila etu twazolo? Bhukaxi ka izwelu ni ibhangelu yetu.

⁸ Kwala maukexilu avulu ututena kulondekesa ku jiphange jetu kwila twa azolo. Maukexilu amoxi enya: “Mu kuzwela ditangedyenu o kidi muthu ni mukwâ.” (Zak. 8:16) “Sotenu kukala ni paze mudyenu.” (Mál. 9:50) “Dyangenu kuxila akwenu.” (Lom. 12:10) “Di tambululyenu mudyenu.” (Lom. 15:7) “Kolokotenu mu. . . kudiloloka mudyenu.” (Kol. 3:13) “Kolokotenu mu kwambata o imbamba yaneme ya akwenu.” (Nga. 6:2) ‘Sulukenu mu kudikonda o malamba mudyenu.’ (1 Te. 4:18) “Sulukenu. . . mu kudiswinisa mudyenu.” (1 Te. 5:11) “Disambelyenu mudyenu.”—Tiy. 5:16.

9. Mukonda dyahi o kukonda o malamba a akwetu ukexilu wambote wakulondekesa kwila twa azolo? (Tala we ofoto.)

⁹ Kindala tuzwele yalungu ni ukexilu umoxi wakulondekesa henda yetu ku jiphange. Phawulu wambe: ‘Sulukenu mu kudikonda o malamba mudyenu.’ Mukonda dyahi o kukonda o malamba a akwetu ukexilu wambote wakulondekesa kwila twa azolo? Sayi divulu  dyalungu ni kutokwesa o Bibidya dyamba kwila, o kizwelu kyatumbula Phawulu phala kujimbulula o “kukonda o malamba” kilombolola “kukala ku mbandu ya muthu wamutala hadi yavulu, phala kumuswinisa.” Kyenyiki, kyoso kitukonda o malamba a phange wamutala hadi, twa mu mukwatekesa kusuluka mu kusidivila Jihova ni ufiyele woso. Kabasa kithangana kitukwatekesa phang’yetu, tulondekesa kwila twamuzolo.—2 Ko. 7:​6, 7, 13.

10. Mu ukexilu webhi o kusuwa o ibhindamu ya akwetu mba kukwatela henda, kwalungu ni kukonda o malamba?

¹⁰ O kusuwa o ibhindamu ya akwetu mba ku akwatela henda, kwalungu ni kukonda o malamba. Mu ukexilu webhi? Kyoso muthu kya kwatela henda ku muthu wamutala hadi, mwene umesena kumukonda o malamba ni kubhanga kima phala kumukwatekesa. Kyenyiki kyoso kitukwatela henda ya muthu, kiki kitukwatekesa kumukonda o malamba. Phawulu wajimbulula kwila o henda ya Jihova ku athu, imubhangesa kwakonda o malamba. Phawulu watumbula Jihova kala “Tata ya jihenda. O Nzambi mukwa kukonda o malamba a athu.” (2 Ko. 1:3) Bhabha Phawulu watumbula o kizwelu “jihenda” phala kujimbulula o henda itukwatela ku akwetu. Mu kyenyiki, Nzambi amwixana Tata, mba Fixi ya jihenda, mukonda dya henda yadikota yala nayu ku athu. O henda yiyi imuswinisa kutukonda o malamba “mu jiphaxi jetu joso.” (2 Ko. 1:4) Kala o menya azele, a talala atunda bhu fixi, akwatekesa yo ala ni dinyota kudivwa kyambote, Jihova we ubhana nguzu kwa yo atoloka o mixima. Kyebhi kitutena kukayela o phangu ya Jihova ya kukwatela henda ni kukonda o malamba a akwetu? Ukexilu umoxi wakubhanga kiki, o kukala ni idifwa yanda tukwatekesa kusuwa o ibhindamu ya akwetu ni kwakonda o malamba. Yebhi o idifwa yeniyi?

11. Kala kilondekesa o divulu dya Kolose 3:12 ni 1 Phetele 3:​8, idifwa yebhi yamukwa yandatukwatekesa kuzola akwetu ni kwa akonda o malamba?

¹¹ Ihi yanda tukwatekesa kusuluka mu kudizola ni ‘kukolokota mu kudikonda o malamba mudyetu’ izuwa yoso? Twabhingi kukala ni idifwa yalungu ni kusuwa akwetu, kudizola kala tu jiphange, ni kubhanga o mbote. (Tanga Kolose 3:12; 1 Phetele 3:8.) O idifwa yiyi yandatukwatekesa kyebhi? Kyoso kitukala ni henda ya jiphange jetu anga twa asuwa ni muxima woso, twandakala ni hanji yavulu ya kwa akonda o malamba kyoso kyatala hadi. Kala kyambe Jezú, “o dikanu dizwela o ima yala ku muxima. O muthu wambote, ku dilundilu dyê dyambote, ubheka-ku ima yambote.” (Mat. 12:​34, 35) O kukonda o malamba a jiphange jetu jabhindama, ukexilu wakatunda wa kulondekesa o henda yetu kwa ene.

12. (a) Mukonda dyahi twatokala kusuluka mu kudilanga? (b) Kibhwidisu kyebhi kitwanda tambwijila?

¹² Etwenyoso twamesena ‘kukolokota mu kudizola.’ (1 Nz. 4:7) Maji phe, kima kyambote kulembalala o kidimwinu kya Jezú, kyoso kyambe kwila “avulu o henda yâ [yeji] zoza.” (Mat. 24:12) Jezú bhabha kexile muzwela kwila avulu ku maxibulu me, eji kweha kudilondekesa henda. Maji twatokala kudilanga phala o ukexilu wa kukamba o henda wa athu ku mundu, ki uzange o ukexilu wetu wa kudibhana ni jiphange jetu. Mu kuxinganeka mu maka enya, twanda tambwijila o kibhwidisu kiki: Ihi yandatukwatekesa kwijiya se o henda yetu ku jiphange yakolo mwene mba kana?

13. Ihi yandatukwatekesa kwijiya se o henda ku jiphange jetu yakolo mba kana?

¹³ Ukexilu umoxi wa kutonginina o henda yetu, o kwijiya ihi itwene mubhanga kyoso kikumoneka  maka. (2 Ko. 8:8) Poxolo Phetele wazwela yalungu ni maka enya kyoso kyambe: “Mu ima yoso o henda yenu mudyenu ivule, mukonda o henda isweka nzungule dya ituxi.” (1 Ph. 4:8) Kyenyiki o ima itubhanga kyoso o jiphange jetu kyatondala mba abhanga ima ituluwalesa, kyanda tukwatekesa kwijiya se o henda yetu kwa ene yakolo mwene mba kana.

14. Kala kilondekesa o divulu dya 1 Phetele 4:​8, henda yakidifwa kyahi itwabhingi kukala nayu? Ta kifika.

¹⁴ Tutonginine dingi kyambote o izwelu ya Phetele. O mbandu yadyanga ya velusu 8 ijimbulula se henda yebhi itwabhingi kukala nayu—‘o henda ivula.’ O kizwelu kyatumbula Phetele phala kujimbulula “kuvula,” kilombolola “kusununa.” O mbandu yakayadi ya velusu ilondekesa ihi itwandabhanga se o henda yetu ku jiphange ivula. O henda yiyi isweka o ituxi ya jiphange jetu. Tutena kujimbulula o maka enya mu ukexilu yu: Xinganeka kwila wala ni meza ala ni jimbandu javulu jaxidi, ki jamuzela dingi. Se ukwata mulele, u uzala ku meza, anga u usununa mwene kyambote, wandatena kuxita mba kusweka kana ngo kididi kimoxi mba iyadi yaxidi, maji ididi yavulu. Kyene kimoxi we, se o henda ku jiphange jetu ivula, tutena kuxita mba kuloloka  kana ngo kituxi kimoxi mba iyadi, maji, “nzungule dya ituxi.”

15. Se o henda ku jiphange jetu ikola mwene, ihi itwandatena kubhanga? (Kolose 3:13)

¹⁵ O henda yetu ku akwetu yatokala ikola kyavulu phala itene kutukwatekesa kuloloka o ituxi ya jiphange jetu—ne mwene se kyabhonzo kyavulu. (Tanga Kolose 3:13.) Kyoso kituloloka akwetu, tulondekesa kwila o henda yetu yakolo, tusangulukisa we Jihova. Ihi dingi itena kutukwatekesa kuloloka o itondalu ya akwetu, ni kukamba kufutuluka ni lusolo ni ima ya bhanga?

16-17. Ihi dingi yandatukwatekesa kujimba o itondalu ya akwetu? Ta kifika. (Tala we ofoto.)

¹⁶ Dikwatenene mu ima yambote ibhanga o jiphange je, kana mu ima yayibha. Banza mu kifika kiki. Xinganeka kwila mwadyongeka mu kibuka kya jiphange ja mala ni ja ahatu. Enu mwasanguluka kyavulu mu kubhita kithangana kumoxi anga ku disukilu dya kyonge, muxabula foto ya kibuka kyoso. Mu kidi, eye uxabula dingi foto jiyadi, mu kuxinganeka kwila nange o foto yadyanga ki yandatunda kyambote. Mu kyenyiki, eye wala ni foto jitatu. Maji mu kujitonginina, umona kwila mu foto imoxi sayi phange yadiyala ka mukwolela. Ihi iwanda bhanga ni foto yoyo? Eye wanda ijima mukonda wala hanji ni jifoto jiyadi mwala o jiphange joso amukwolela, kate mwene ni phange yadiyala kexile mukwolela mu foto yadyanga.

 ¹⁷ O jifoto ji twasolo o kubhaka, tutena kujisokesa ni ima yambote yalungu ni akwetu itwabhake ku mixima yetu. Etu twene mulembalala ni kisangusangu kyoso o ithangana yambote itwabhiti ni jiphange jetu. Maji xinganeka kwila mu ithangana yeniyi sayi phange uzwela mba ubhanga kima kituluwalesa. Ihi itwejibhanga ni izwelu mba ima yabhange o phange yiyi? Tweji sota kujimba mba kujima o ima yiyi, kala kitubhanga ni foto yakambe kutunda kyambote? (Jisa. 19:11; Efe. 4:32) Tutena kujimba o itondalu ya jiphange jetu mukonda tulembalala o ithangana yambote itwabhiti kumoxi ni ene. Yiyi yene o ima itwamesena kubhaka ni kubhana valolo.

18. Ima yebhi yabetakota yalungu ni henda itwadilongo mu milongi yiyi?

¹⁸ Mukonda dyahi twamesena kukolesa o henda itwala nayu mudyetu? Kala kitwamono, kyoso kitulondekesa o henda yetu ku jiphange, tulondekesa we kwila twazolo Jihova. Kyebhi kitulondekesa o henda yetu ku jiphange jetu? Ukexilu umoxi wakubhanga kiki, o kwa akonda o malamba. Se tuzola akwetu, twandatena ‘kudikonda o malamba mudyetu.’ Kyebhi kitutena kukolesa jinga o henda yetu mudyetu? Mu kuloloka o itondalu ya jiphange jetu ne mwene se kyabhonzo kubhanga kiki.

19. Mukonda dyahi twabhindamena kudilondekesa henda mudyetu bengebenge lelu?

¹⁹ Mukonda dyahi twabhindamena kudilondekesa henda mudyetu bengebenge lelu? Phetele watambwijila se mukonda dyahi, mwene wambe: “O dizubhilu dya ima yoso dya zukama. Kyenyiki-phe, . . . o henda yenu mudyenu ivule.” (1 Ph. 4:​7, 8) Kyoso o dizubhilu dya mundu yu wayibha ki diya ni kuzukama dingi, ihi itutena kukingila? Mu kuzwela yalungu ni akayedi’e Jezú wambe: “Anda mi zemba kwala akwa jixi joso, mukonda dya dijina dyami.” (Mat. 24:9) Phala kukala fiyele kwa Jihova sumbala ni kutuzemba, twatokala kukala ni muxima umoxi. Se tuzola o jiphange jetu, Satanaji nuka wandatena kutuwanuna mukonda o henda yene o “dijikita dibhangesa o athu kukala bhwamoxi.”—Kol. 3:14; Fil. 2:​1, 2.