1. Kidyelelu kyahi kyatubhana Jihova?

 JIHOVA watubhana kidyelelu kyadikota kya kukala ni mwenyu. Amoxi amukingila kukala ni mwenyu wakalelaku ku dyulu, andakituka athu mu nzumbi, kandafwa dingi. (1 Ko. 15:50, 53) Maji o mundu wavulu wamukingila kukala ni mwenyu wakalelaku mu ixi, andakala ni sawidi yayuka ni kusanguluka kwoso. (Dij. 21:3, 4) Kikale se twamukingila kukala ni mwenyu ku dyulu mba mu ixi, o kidyelelu kyetu kyala ni valolo yavulu phala etu.

2. O kidyelelu kilombolola ihi?

² Mu Bibidya o kizwelu “kidyelelu,” kitena kulombolola “kukinga kwila hádya kwandabhita ima yambote.” Tutena kudyelela kwila yoso itwamukingila, ku hádya yandabhita mwene ni kidi kyoso mukonda Jihova mwéne wakitange. (Lom. 15:13) Twejiya yoso yatukanena mwene, twejiya we kwila Jihova ukumbidila yoso itanga mwene. (Dya. 23:19) Twejiya ni kidi kyoso kwila Jihova wala ni vondadi yu wala we ni kutena kwakubhanga yoso yatange mwene kwila wanda ibhanga. Mu kiki, o kidyelelu kyetu kokwila nzoji itwamulota mba jivondadi jetu jitwamesena kwila jidikumbidila, kana. O kidyelelu kyetu kyalungu ni ima itwejiya kwila ya kidi mwene.

3. Ihi itwandadilonga mu mbandu yiyi? (Jisálamu 27:14)

³ O Tat’etu ya dyulu watuzolo kyavulu, mwene wamesena kwila tumudyelela. (Tanga Jisálamu 27:14.) Se tukala ni kidyelelu kyakolo kwa Jihova, twandatena kukolokota né mwene kyoso kitubhita mu ibhidi mba mu ima yabhonzo. Twandamona kyebhi o kidyelelu kyetu kitulanga. Maji kyadyanga twandamona hanji kyebhi o kidyelelu kyetu kyadifwangana ni kifikidilu kya naviyu ni kapasete. Twandamona we kyebhi kitutena kukolesa o kidyelelu kyetu.

4. Mu ukexilu webhi o kidyelelu kyadifwangana ni kifikidilu kya naviyu? (Jihebelewu 6:19)

⁴ Poxolo Phawulu wasonekena akwa Jihebelewu, mwene wasokelesa o kidyelelu kyetu ni kifikidilu kikwatesa o naviyu. (Tanga Jihebelewu 6:19.) Mwene wakexile mukwenda lwavulu ni jinaviyu, mukonda dya kiki Phawulu wejidile kwila o ifikidilu yexile mukwatesa o jinaviyu phala kajikungulule kwalo kitembu kya nguzu. Sayi kizuwa, mwene wakexile mu naviyu, kweza kitembu kyanguzu. Bhenyobho mwene wamono yó akexile mukwendesa o naviyu, akexile mutakula o ifikidilu ya naviyu mu menya phala o naviyu ki idibete bhu matadi. (Ika. 27:29, 39-41) Kala o kifikidilu, o kidyelelu kyetu kitukwatekesa kuzukama kwa Jihova, phala kitubobe mu nzumbi né mwene se twamubhita mu ibhidi yedi kala kitembu kyanguzu. O kidyelelu kyetu ki tutululukisa kyoso kitwamudibhana ni maka. Tutululuka mukonda twadyelela kwila hádya o ima yandawabha. Lembalala kwila Jezú watudimuna mu kwila andatuzukutisa. (Nzw. 15:20) Mu kyenyiki, o kuxinganeka mu mabesá utwandatambula ku hádya, kwatubhangesa kukolokota kusidivila Jihova.

5. Kyebhi o kidyelelu kyabhana nguzu kwa Jezú mu kwijiya kwila wejifwa?

⁵ Tala kyebhi o kidyelelu kyakwatekesa Jezú kukala jinga fiyele né mwene ni kwijiya kwila andamutalesa hadi yavulu ni kumujibha. Mu kizuwa kya Pendekoxi ya muvu wa 33 K.K. poxolo Phetele watumbula o izwelu itusanga mu divulu dya Jisálamu, o izwelu yiyi ijimbulula o kutululuka kwakexile naku Jezú: “Nganda kala jinga ni kidyelelu, mukonda kiwanda ngixisa Mw’alunga, kiwanda kwehela kwila o muthu wa kukala fiyele ubola. . . . Wanda ngizalesa ni kusanguluka kwadikota bhu pholo yé.” (Ika. 2:25-28; Jisá. 16:8-11) Sumbala Jezú wejidile kwila wejifwa, mwene wadyelele kwila Nzambi wejimufukununa. Wadyelele kwila wejikala ni kusanguluka kwadikota mukukala dingi ni Tat’ê ku dyulu.—Jih. 12:2, 3.

6. Ihi yazwela phangyetu yalungu ni kidyelelu?

⁶ O kidyelelu kyetu kyene mukwatekesa jiphange jetu javulu kukolokota. Ivwa o musoso wa phangyetu ya fiyele amwixana Leonard Chinn, mwene watungile mu ixi ya Inglaterra. Mu kithangana kya Ita ya Kayadi yabhiti mu Ngongo Yoso, amute mu kaleya mukonda waditunine kuya ku usoladi. Mwene wexile mu kaleya ubheka wê, wabhitimu mbeji jiyadi. Kyamukatulamu, amujijidika kubhanga kikalakalu kyabhonzo. Mwene wasoneka kiki: “O yangibhiti ku mwenyu, yangikwatekesa kumona kwila twabhindamena kyavulu o kidyelelu phala tutene kukolokota. Twala ni phangu ya Jezú, ya jipoxolo ni ya jipolofeta. Twala we ni ikanenu itusanga mu Bibidya. Yoso yiyi itubhana kidyelelu kyadikota phala o hádya, itukwatekesa we kukolokota.” O kidyelelu kyexile kala kifikidilu phala phangyetu manu Leonardu, kitena we kukala kifikidilu phala etu.

7. Kyebhi o ibhidi ikolesa o kidyelelu kyetu? (Loma 5:3-5; Tiyaku 1:12)

⁷ Kyoso kitubhita mu ibhidi anga tumona o kikwatekesu kya Jihova, tudivwa kwila mwene watuxikina. Kikiphe kikolesa dingi o kidyelelu kyetu. (Tanga Loma 5:3-5; Tiyaku 1:12.) Mu kiki tukala dingi ni kidyelelu kya dikota, o kitwakexile nakyu kyoso ki twevu o njimbu yambote mu veji yadyanga ndenge. Satanaji wamesena kwila o ibhidi yetu ituzozesa, maji ni kikwatekesu kya Jihova twandatena kutolola kibhidi kyosokyoso.

8. Mukonda dyahi o kidyelelu akisokesa ni kapasete? (1 Tesalonika 5:8)

⁸ O Bibidya isokesa we o kidyelelu kyetu ni kapasete. (Tanga 1 Tesalonika 5:8.) O disoladi  uzwata kapasete phala kulanga o mutwe wê ku mifula ya jinguma. Mu ita yetu ni Satanaji, twabhingi we kulanga o kilunji kyetu. Mwene wala ni ima yavulu phala kututendala ni kubolesa o ixinganeku yetu. Kala o kapasete kalanga o mutwe wa disoladi, o kidyelelu kyetu kilanga o ixinganeku yetu phala tutene kusuluka mu ufiyele wetu kwa Jihova.

9. Ihi ibhita ni athu se akamba kukala ni kidyelelu?

⁹ O kidyelelu kya kukala ni mwenyu wakalelaku, kyandatukwatekesa kwenda ni unjimu, kyandatukwatekesa we kusola kyambote o ima. Maji se kidyelelu kyetu kizoza, anga twehela kwila o ixinganeku ya xitu ikala mu kilunji kyetu, twandajimba o kidyelelu kyetu kyakukala ni mwenyu wakalelaku. Tala yabhiti ni Jikidistá amoxi atungile mu ukulu mu mbanza ya Kolindu. Ene kakexile dingi ni kixikanu mu kikanenu kya Nzambi kyalungu ni difukunukinu. (1 Ko. 15:12) Phawulu wasoneka kwila yó kakexile ni kixikanu ku difukunukinu akexile mubhanga ngó o jivondadi jâ. (1 Ko. 15:32) Lelu mundu wavulu akambe kukala ni kidyelelu ku ikanenu ya Nzambi abhanga yoso yatena o kubhanga, phala kusanguluka kindala. Maji etu kitwadifwangana ni ene, twadyelela ku yoso yatukanena Nzambi ku hádya. O kidyelelu kikala kala kapasete, kilanga o ixinganeku yetu. Kitulanga we phala kituxinganeke ngó mudyetu, mukonda o kudixinganeka ngo etu mudyetu kuzanga o ukamba wetu ni Jihova.—1 Ko. 15:33, 34.

10. Kyebhi o kidyelelu kyetu kitulanga phala kitukale ni ibanzelu yayibha yalungu n’etu?

¹⁰ O kidyelelu kyetu kitena we kutulanga phala kitukale ni ibanzelu ya kwila kitwandatena kubhanga ima yawabhela Jihova. Mu kifika, amoxi nange axinganeka kiki: ‘Kinganda kala ni mwenyu wakalelaku, akwetu ngó, eme kana. Eme ngi kiximbi. Nuka ngandatena kubhanga kala kyamesena Nzambi.’ Lembalala kwila o dikamba dya makutu dya Jobe, Ilifaji watange we kiki kwa Jobe. Ilifaji wambe kiki: “Muthu kima kyahi, phala a kale ni kuzela?” Mwene wazwela yalungu ni Nzambi: “Tala, Nzambi katé ni jisandu jê, ka jidyelela, né-mbe o dyulu, ku mesu mê ki dyala ni kuzela.” (Jobe 15:14, 15) Yá makutu! Lembalala kwila Satanaji mwéne wandala kwila tukala ni ibanzelu yiyi. Mwene wejiya kwila eye se ukala ni ixinganeku yiyi, bhofelebhofele kixikanu kyê kyandalela kala yangu. Muveji dya kiki kana kuxikina o makutu yá, dyelela ku ikanenu ya Jihova. Kana kukala ni phata kuma Jihova wandala kwila eye ukala ni mwenyu wakalelaku, mwene wandakukwatekesa kubhixila ku mbambe.—1 Ti. 2:3, 4.

11. Mukonda dyahi twatokala kukala ni mwanyu kyoso kituya ni kukingila yoso yatukanena Nzambi?

¹¹ Sayi bhabha kubhonza kukala ni kidyelelu kyakolo. Sayi ithangana tutena kubanza kwila Nzambi wamulaleka kyavulu phala kukumbidila o ikanenu yê. Maji Jihova, Nzambi yakalelaku, o ukexilu wê wakumona o kithangana kiwene umoxi ni ukexilu wetu. (2 Ph. 3:8, 9) Mwene wandakumbidila yoso yakanena, maji kandabhanga kiki mu kithangana kitwamesena etu. Ihiphe yandatukwatekesa kukala ni kidyelelu kya kolo, kyoso kituya ni kukingila Nzambi katé kyandakumbidila o ikanenu yê?—Tiy. 5:7, 8.

12. Kala kyatange Jihebelewu 11:1, 6, mukonda dyahi o kidyelelu akisokesa ni kixikanu?

¹² Twandakala ni kidyelelu kya kolo, se tuzukama jinga kwa Jihova, mukonda mwéne wandakumbidila yoso itwamukingila. Mu kidi, o Bibidya ilondekesa kwila phala kukala ni kidyelelu, twatokala kukala ni kixikanu kuma Jihova wakalelaku, mwene “mukwa kubesowala oso amusota ni kidi kyoso.” (Tanga Jihebelewu 11:1, 6.) Se mu kidi tuxikina kwila Jihova wene ku mwenyu, twandadyelela kwila mwene wandabhanga  yoso yakanena. Twandamona ihi itwatokala o kubhanga phala kukolesa o ukamba wetu ni Jihova phala tukale ni kidyelelu kya kolo.

13. Kyebhi kitutena kuzukama kwa Nzambi?

¹³ Samba kwa Jihova, tanga o Maka mê. Sumbala kitutena kumona Jihova ni mesu metu, tutena kuzukama kwa mwene. Tutena kuzwela ni mwene mu kaxi ka musambu, twadyelela kwila mwene wandatwivwa. (Jel. 29:11, 12) Tutena kwivwa Nzambi mukutanga o Maka mê ni kuxinganeka ku yoso itwamutanga. Kyoso kituya ni kutanga kwila mu ukulu Jihova walange yó exile jifiyele kwa mwene, o kidyelelu kyetu kyadibandekesa dingi. Yoso itusanga mu Maka ma Nzambi “a isoneka phala ku tulonga, phala bhukaxi ka kukolokota kwetu ni kiswinisu kya Mikanda Ikôla, tukale ni kidyelelu.”—Lom. 15:4.

14. Mukonda dyahi twatokala kuxinganeka ku yoso yabhange Jihova kwakwetu?

¹⁴ Xinganeka kyebhi Jihova kyakumbidila o ikanenu yê mu ukulu. Tala ihi yabhange Nzambi kwa Mbalahamu ni kwa Sala. Ene akukile kya, kejitena dingi kuvwala. Maji né kiki avwala mona kala kyatangele Nzambi. (Dim. 18:10) Kyebhi kyadivu Mbalahamu? O Bibidya yamba kiki: “Mbalahamu walondekesa kixikanu kwila weji kala tata ya ifuxi yavulu.” (Lom. 4:18) Sumbala Mbalahamu kejidile kyebhi Nzambi kyejikumbidila o kizwelu kyê, Mbalahamu wadyelele kwila Jihova wejikumbidila o kikanenu kyê. Mwene kadyele mukudyelela kwa Nzambi. (Lom. 4:19-21) O musoso yú utulonga kwila tutena kudyelela ni muxima woso kwila Jihova wandakumbidila o ikanenu yê né mwene se mukubanza kwetu, o kima kyatukanena Nzambi kikyandabhita.

15. Mukonda dyahi twatokala kuxinganeka ku ima yene mubhanga Nzambi kokwetu?

¹⁵ Xinganeka ku yoso yabhange Jihova kokwé. Xinganeka ku mbote iwakatula kya mukonda dya ikanenu yala mu Mak’â Nzambi yadikumbidila kyá. Mu kifika, Jezú wakanena  kwila Tat’ê wandakubhana yoso iwabhindamena phala kukala ku mwenyu. (Mat. 6:32, 33) Jezú watange we kwila se ubhinga o nzumbi ikola ya Jihova, mwene wandakubhana nayu. (Luk. 11:13) Jihova wene mukumbidila o ikanenu yiyi. Eye nange watena kuxinganeka ku ikanenu yengi ya Nzambi yene mudikumbidila kokwé. Mu kifika, mwene wakanena ku kuloloka o ituxi, wakanena kukonda o malamba mé ni ku kudikila mu nzumbi. (Mat. 6:14; 24:45; 2 Ko. 1:3) Kyoso ki uxinganeka ku yoso yabhange kyá Nzambi kokwé, wandakolesa o kidyelelu kyé ku yoso yandabhanga ku hádya phala eye.

16. Mukonda dyahi o kidyelelu ujitu wadikota?

¹⁶ O kidyelelu kyetu kyakukala ni mwenyu wakalelaku, ujitu wadikota watubhana Nzambi. Twadyelela ni kidi kyoso kwila hádya yoso yandawabha. O kidyelelu kyedi kala kifikidilu kyetu, kitubhangesa kukolokota sumbala ni ibhidi, kituswinisa kyoso kyamutuzukutisa mba kyoso kyamesena kutujibha. O kidyelelu kyetu kyedi kala kapasete, kalanga o ixinganeku yetu phala tutene kudituna o ima yayibha ni tutene kunaminina ku ima yawabha. O kidyelelu kya Bibidya, kitukwatekesa kwijiya kyambote Nzambi, kitulondekesa we kwila mwene watuzolo kyavulu. Tukatula mbote yavulu kyoso kitukolesa o kidyelelu kyetu.

17. Mukonda dyahi o kidyelelu kyetu kitusangulukisa?

¹⁷ Poxolo Phawulu waswinisa akwetu ku Loma. Mwene wa asonekena kiki: “Kidyelelu kyenu ki mi sangulukise.” (Lom. 12:12) Phawulu watenene kusanguluka mukonda wadyelele kwila se ukala fiyele, wejitambula o mwenyu wakalelaku ku dyulu. Etu we tutena kusanguluka mu kidyelelu kyetu mukonda twaxikina ni kidi kyoso kwila Jihova wandakumbidila o ikanenu yê. Mukwa jisálamu wasoneka kiki: “U zediwa o muthu yó . . . wa dyelela kwa Jihova mwene Nzambi yê, . . . Mukwa kukumbidila o kidi katé ku hádya ni hádya, sé kufula.”—Jisá. 146:5, 6.