1. Jihova umona ihi kokwetu?

 JIHOVA umona yoso ibhita ni jiselevende jê. Mwene utumona kyoso kituluwala mba kyoso kitusanguluka. (Jisá. 37:18) Né mwene kyoso kitukala ni kikote kumuxima, mwene umona o nguzu itubhanga phala kumusidivila. Mwene usanguluka kyavulu kyoso ki tubhanga kiki! Ni kwila mwene wala ni hanji ya kutukwatekesa ni kutuswinisa.

2. Ihi ibhanga Jihova kwa yo ala ni kikote ku muxima, ni kyebhi kitutena kukatula mbote ku kikwatekesu kyê?

² O Jisálamu 147:3 yamba kwila mwene utumba o jifidila ja yo ala ni kikote ku muxima. Mu Sálamu yiyi, Jihova a mutumbula kala muthu ulangidila ni henda yoso o muthu wala ni uhaxi wa kikote. Maji ihi itwatokala o kubhanga phala Jihova kutulanga ni henda yoso? Xinganeka mu kifika kiki: O dotolo yambote utena kubhanga yoso ni yoso phala kukwatekesa o muthu wakate, maji phala kudisanza, o muthu wahaxila watokala kukayela o itendelesu yoso ya dotolo. Mu milongi yiyi twanda dilonga ima iyadi: Kyadyanga, ihi yamba Jihova ku athu ala ni kikote ku muxima? Kyakayadi, kyebhi kitutena kukayela o itendelesu yene mutubhana Jihova?

JIHOVA UTUDYELELESA KWILA TWALA NI VALOLO YAVULU

3. Mukonda dyahi sayi athu abanza kwila kala ni valolo?

³ Etu twatungu kumundu wakambe o henda. O athu kene mudilondekesa henda. Avulu ene mutalatala kyayibha o athu a amona kuma kala ni valolo. Phange Elena a wambe: “Ngakudila kumwiji kexile mu dilondekesa henda. Tat’etu wexile kindanda, wexile muzwela  kwila etu kitwexile ni valolo.” Kala phange Elena, eye we akuxokwenene kya, mba akuzukutisa, wamono kwila seku muthu wakuzolo. Se wadibhanene kya ni maka ya nange ubanza kwila seku muthu wakuzolo.

4. Kala kyamba o divulu dya Jisálamu 34:​18, Jihova ubhanga ihi kwa yo atoloka o mixima?

⁴ O Bibidya mu divulu dya Jisálamu 34:18 yamba: “Jihova wa zukama kwa yá a toloka mixima.” (Tanga.) O kwila eye wala ni kikote ku muxima? Se kyene, ejiyakyu kwila Jihova wamono ima yambote ku muxima wê, mukonda dya kiki wakusolo phala kumubheza. (Nzw. 6:44) Mukiki ne mwene se akwenu akutalatala kyayibha, ejiyakyu kwila Jihova wakuzolo kyavulu ni kwila wanda kukwatekesa jinga.

5. Kyebhi Jezú kyatalatala o athu exile mwaxokwena? Kiki kitulonga ihi yalungu ni Jihova?

⁵ Jezú wakayela kyambote o idifwa ya Tat’ê Jihova. (Nzw. 14:9) Phala kwijiya se Jihova watuzolo mba kana twabhingi kudilonga o phangu ya Jezú. Kyoso kyexile mu ixi mwene wakwatela henda ku athu exile mwaxongwena. (Mat. 9:​9-12) Sayi kizuwa, kwamoneka muhatu wexile ni uhaxi wabhonzo, wakwata mu izwatu ya Jezú. Mwene wabhangele kiki mukonda wejidile kwila ne mwene wakwatele ngo mu izwatu ya Jezú weji disanza. Jezú wamuximana mu ima yoso yabhange mwene. (Mál. 5:​25-34). Kyenyiki Jihova wejiya kwila eye wala ni kixikanu kwa mwene, mukonda dya kiki mwene wakuzolo kyavulu.

6. Ihi i utena o kubhanga se umona kwila kiwala ni valolo bhu pholo ya Jihova?

⁶ Ihi i utena o kubhanga se umona kwila kiwala ni valolo ku pholo ya Jihova? Tanga jivelusu ja Bibidya jilondekesa o valolo iwala nayu bhupholo ya Jihova, ni ku jixinganeka. b (Jisá. 94:19) Se eye ki wamutena kukumbidila o jimbambe jé, kana kuluwala mba kudisokesa ni akwenu, mukonda Jihova kene mubhanga kiki. Maji bhanga yoso i utena musidivisu ya Jihova, mukonda  Jihova katubhingi phala kubhanga ima kitutena kwibhanga. (Jisá. 103:​13, 14) Kana kuditatela mukonda dya ima yayibha ya kubhangele o athu, kala o kukubeta kyavulu, o kukuxokwena, mba kukuzangata. K’eye-ko wala ni kikuma, mukonda phala Jihova o mukwa kikuma yo wazangata kana o muthu amuzangata. (1 Ph. 3:12) Sayi phange ya muhatu amwixana mana Sandra, mu undenge we amuzangatele. Mwene wambe: “Ngejiya kwila Jihova wa ngizolo, mukonda dya kiki ngene musamba phala kungikwatekesa kulembalala kwila mwene wangizolo kyavulu.”

7. Kyebhi kitutena kukwatekesa akwetu bhukaxi ka ibhidi itwadibhana nayu ku mwenyu?

⁷ Jihova utena kukwatekesa o athu bhukaxi ké, mukiki mwene wakubhana o ujitu wakukalakala ni mwene musidivisu ya kuboka. (1 Ko. 3:9) O ibhidi iwadibhana nayu ku mwenyu itena kukukwatekesa kutendela o ibhidi ya mudibhana nayu o athu. Mu kiki eye utena kukwatekesa o athu amudibhana ni ibhidi. Mana Elena twamutumbula kudima, watambula kikwatekesu, mwene wene mukwatekesa we akwa. Mwene wambe kiki: “Ngexile mudivwa kala kingexile ni valolo, maji Jihova wangikwatekesa kumona kwila mwene ni akwetu angizolo kyavulu.” Kindala mana Elena muboki wa thembu yoso.

JIHOVA WAMESENA KWILA TUXIKINA O MULOLOKI WÊ

8. Ihi yambe Jihova mu divulu dya Izaya 1:18?

⁸ Sayi jiselevende ja Jihova aluwala kyavulu mukonda dya ituxi yatele mu ukulu ande dya kwabatizala mba kyoso kya abatizala. Maji kima kyambote kulembalala kwila Jihova watuzolo kyavulu, mukonda dya kiki wabhana Mon’ê Jezú, phala kutukula. Jihova wamesena kwila uxikina kuma o kukula, ujitu phala eye! Se tumubhinga kikwatekesu, c twejiya ni kidi kyoso kwila mwene wanda tukwatekesa. (Tanga Izaya 1:18.) Tusanguluka kyavulu mu kwijiya kwila Tat’etu Jihova kalembalala o ituxi itwatele mu ukulu, mwene udikwatenena jinga ku ima yambote itwene mubhanga.—Jisá. 103:​9, 12; Jih. 6:10.

9. Mukonda dyahi kima kyambote kuxinganeka ku ima i twamubhanga kindala ni ku ima yanda bhita ku hadya?

⁹ Se uluwala mukonda dya ima yayibha i wabhange mu ukulu, bhanga yoso i utena phala kuxinganeka ku ima yambote i wamubhanga kindala, ni ima i wanda bhanga ku hadya. Kiki kyene kyabhiti ni poxolo Phawulu. Ande dya kukala poxolo, mwene wazukutisile kyavulu o Jikidistá. Maji ku pholo dya kwenda, wadyela o kituxi kyê, mu kiki Jihova wamuloloka. Mwene we wadyelele kwila Jihova wamulolokele. (1 Ti. 1:​12-15) Mwene kasuluka mu kubanza ku ima yayibha yabhangele mu ukulu. Kyebhi kitwejiya o maka enyá? Twejiya mukonda mwene kexile we muxinganeka ku ima yaxisa kudima kyoso kyexile Falizewu. (Fil. 3:​4-8, 13-15) Mu veji dya kiki, poxolo Phawulu wasuluka mu kuboka ni nguzu ni kuxinganeka ku ima yeji bhanga ku hadya. Kala kyabhiti ni Phawulu, kitutena kulungulula o ima yabhiti. Maji bhukaxi ka ima i twamubhanga kindala, tutena kulondekesa kwa Jihova kwila twamuzolo, ni kukingila ni hanji yoso o ima yanda bhanga Jihova ku hadya.

10. Ihi i watokala o kubhanga se mukulu wabhangele kima kyayibha ku muthu?

¹⁰ Ihi i watokala o kubhanga se mu ukulu wabhangele kima kyayibha ku muthu? Bhinga muloloki ku muthu wamuluwalesa, mulondekese kwila wadyela ni muxima woso. (2 Ko. 7:11) Samba kwa Jihova phala kukwatekesa o muthu wamutala hadi mukonda dya ima yayibha iwamubhangele mu ukulu. Dyelela kwila Jihova wanda suluka mu ku kukwatekesa ni kukwatekesa o muthu wamubhangele kyayibha kukala ni kutululuka ni kukolokota mu kumusidivila.

11. O phangu ya Jona itulonga ihi? (Tala we o foto yakapa.)

 ¹¹ O ima yayibha itwabhangele itena kutulonga madisá avulu. Xinganeka yabhitile ku mwenyu wa polofeta Jona. Sayi kizuwa Jihova wamutumine kuboka o maka mê mu mbanza ya Ninive. Mwene wayile mu kididi kyengi muveji dya kuya bhwamutumine Jihova. Jihova wamubazele. Jona wadilongo disá dya katunda mu kubhukumuka kwê. (Jona 1:​1-4, 15-17; 2:​7-10) Jihova wehela Jona kuya muboka mu mbanza ya Ninive, muveji yiyi Jona waxikina ni muxima woso. Nange mwene waluwalele mukonda dya kubhukumukina Jihova, maji mwene kehela o kuluwala kwê kumubhangesa kudituna kubhanga o kikalakalu kya Jihova.—Jona 3:​1-3.

JIHOVA UTUKONDA O MALAMBA METU BHUKAXI KA NZUMBI IKÔLA

12. Kyebhi kitutena kusanga o kutululuka kwa Jihova kyoso kitudibhana ni maka abhonzo? (Filipe 4:​6, 7)

¹² Jihova ukonda o malamba metu bhukaxi ka nzumbi yê ikola, kyoso kitubhita mu ithangana yabhonzo kala o kufunda muthu wa kazola. Tala yabhiti ni dikaza manu Nzwá ni mana Ndeza. Atukumuka ngó o mon’â wadiyala wa dijibha: “Etu twadibhanene kya ni ibhidi yavulu ku mwenyu wetu maji o kibhidi kiki kyene kyatubhonzele dingi o ibhidi yamukwa ndenge. Mu izuwa yavulu kitwatenene kuzeka, twexile musamba kyavulu kwa Jihova. Etu twamono o kikumbidilu kya izwelu ya divulu dya Filipe 4:​6, 7.’’ (Tanga.) Se wamudibhana ni ibhidi yamukubhekela ndolo kumuxima samba kwa Jihova, se umona kwila o ndolo yiyé hanji, suluka mukusamba kwa Jihova. (Jisá. 86:3; 88:1) Mubhinge o nzumbi yê ikola. Dyelela kwila mwene wanda tambwijila o misambu yê.—Luk. 11:​9-13.

13. Kyebhi o nzumbi ikola ya Jihova itena kutukwatekesa kusuluka mu ku musidivila? (Efezu 3:16)

¹³ Sayi bhabha tudivwa kwila kitwala ni nguzu phala kubhanga kima mukonda dya kibhidi ki twamudibhana nakyu. O kwila kyene we kiwamudivwa? Se kyene, samba kwa Jihova phala ku mubhinga o nzumbi yê ikola phala ku kukwatekesa kumusidivila ni muxima waso. (Tanga Efezu 3:16.) Tala ngó yabhiti ni phange ya muhatu amwixana mana Flora. Mwene ni mwadi wê exile musidivila kala akunji ya jixi jengi kyoso mwadi we kyate phanda ni muhatu wengi, mu kiki o ukaza wâ wabhu. Mwene wambe: “Ngaluwalele kyavulu mukonda dya kima kyayibha kyabhitile kingexile ni nguzu phala kubhanga kima. Ngasambe kwa Jihova mu kumubhinga o nzumbi yê ikola phala ngikolokote. Kudimatekenu ngafikile kwila kingejitena kudibhana ni kibhidi kiki, maji Jihova wangibhana o nguzu ingabhindamene phala kukolokota né mwene ni ibhidi ingexile mudibhana nayu.’’ Phange Flora wamono o kikwatekesu kya Jihova, mwene wadyelele kwila Jihova wanda suluka mu ku mukwatekesa. Mwene wambe dingi: “O izwelu itusanga mudivulu dya Jisálamu 119:32 ijimbulula kyambote kyebhi Jihova kya ngikwatekesa: ‘Wendelu wa itumu yé, ngi u kwata mwene ni lusolo, kyoso eye Ngana, ki u ngi kudisa o muxima moxi.’”

14. Ihi i twatokala o kubhanga phala kutambula dingi o nzumbi ikola?

¹⁴ Kyoso ki uzubha o kusamba mu kubhinga o nzumbi ikola ya Jihova ihi dingi i watokala o kubhanga? Bhanga yoso i wabhingi phala kutambula o nzumbi ikola. Mu kifika, kuya mu yonge, ni kuya musidivisu ya kuboka. Bandekesa o kwijiya kwê kwalungu ni Jihova mu kutanga o Bibidya izuwa yoso. (Fil. 4:​8, 9) Kyoso ki uya ni kutanga o Bibidya tala yebhi o ibhidi ya dibhananayu o muthu ku musoso yu ni kyebhi Jihova kyamukwatekesa kuswina. O phange Sandra twamutumbula kya kudima watale hadi ku mwenyu we mukonda dya ibhidi ya dibhana nayu kumwenyu. Mwene wambe: “O musoso wa Zuze wa ngiswinisa kyavulu. Mwene amutatela, amutalatala kyayibha maji kehela kwila o ibhidi yoso yiyi izozesa o ukamba we ni Jihova.”—Dim. 39:​21-23.

 JIHOVA UTUKONDA O MALAMBA BHUKAXI KA JIPHANGE JETU

15. Kala kilondekesa Kolose 4:​11, kyebhi Jihova kyatukonda o malamba bhukaxi ka jiphange jetu? (Tala we ofoto.)

¹⁵ Jihova ulondekesa we kwila watuzolo bhukaxi ka jiphange jetu. Kyoso kitwamutala hadi, ene ‘ene mu tukonda o malamba.’ (Kol. 4:11) Ene abhanga kiki mu kutwivwa ni mu kusota kutendela kyebhi kitwamudivwa. Sayi bhabha o jiphange jetu atukwatekesa mu kukala ku mbandu yetu, né mwene sé kuzwela kima. Mu ithangana ya mukwa, atanga velusu ya Bibidya mba asamba kumoxi n’etu. d (Lom. 15:4) Sayi bhabha o jiphange jetu atukwatekesa kumona kyebhi Jihova kyadivwa yalungu ni maka utwamudibhana nawu. Nange kwiza phange utubhekela kadikoka. Yoso yiyi ibhanga o jiphange itukwatekesa kukolokota, ni kudivwa kyambote.

16. Ihi i tutena kubhanga phala o jiphange jetu atukwatekese?

¹⁶ O jiphange jetu atuzolo kyavulu ni kwila amesena kutukwatekesa. (Jisa. 17:17) Maji phala kutukwatekesa, ene atokala kwijiya o ibhidi i twamudibhana nayu. Nange o jiphange jetu kejiya o ibhidi i twamudibhana nayu mba kejiya o ima i twabhindamena. (Jisa. 14:10) Se wala ni kikote ku muxima, tangela kyebhi ki wamudivwa kwa kamba dyé wakulu mu nzumbi. Watokala kumutangela se ihi itena kubhanga mwene, phala ku kukwatekesa. Mba utena kuzwela ni kafunga kamoxi mba tufunga tuyadi. O jiphange ja  ahatu nange adivwa kyambote kuzwela o maka mâ kwa phange ya muhatu kamba dyâ, wakulu mu nzumbi.

17. Ihi itena kutufidisa kutambula o kikwatekesu kya jiphange, ni ihi itwatokala kubhanga?

¹⁷ Mukonda dya kikote ku muxima, sayi ithangana, kitumesena kukala ni akwetu. Maji kana kukala ubheka wé mu ithangana yavulu. Kidi kwila, sayi bhabha o jiphange jetu anda zwela ima yanda tuluwalesa dingi. (Tiy. 3:2) Maji kana kwehela o maka yá ku kufidisa kukala ni jiphange. Jihova utena ku kutululukisa bhukaxi ka ene. Sayi kafunga amwixana Thonyi, wala ni uhaxi wa kikote ku muxima, wambe kiki: “Mu ithangana yavulu, kingimesena kukala ni jiphange.” Né kiki, manu Thonyi wene mubhanga nguzu phala kukala ni jiphange. Kyoso kyabhanga kiki, mwene udivwa kyambote. Sayi phange ya muhatu amwixana Ana wambe: “Mukonda dya ima yabhiti ku mwenyu wami, kungibhonza kudyelela ku athu. Maji ngamubhanga yoso ni yoso phala kuzola o jiphange ni kwadyelela kala kyabhanga Jihova. Ngejiya kwila kiki kisangulukisa Jihova, kyene ki ngisangulukisa we.”

O KIKANENU KYA PALAYIZU KITUSWINISA

18. Ihi yanda bhita ku hadya, ni ihi i twatokala kubhanga kindala?

¹⁸ Tutena kudyelela kwila o ima ku hadya yanda wabha, mukonda twejiya kwila, kwakambe ngo bhofele Jihova wanda saka o mauhaxi oso utwala nawu, katé mwene o kikote ku muxima. (Dij. 21:​3, 4) Ku hadya mu palayizu, o ima yatubhekela o kikote ku muxima kitwanda ibanza dingi, “né ngó kwiza mu kilunji, lémbwa.” (Iza. 65:17) Kala kitwadilongo mu milongi yiyi Jihova ‘usaka oso ala ni kikote ku muxima.’ Katula mbote ku kikwatekesu kyoso kya kubhana Jihova. Kana kukala ni phata kwila Jihova ‘ukulanga.’—1 Ph. 5:7.