Sayi ya, mukutanga o musoso yú ni lusolo lwoso, adibhanga o kibhwidisu kiki. Maji mu jivelusu jiji atumbulamu mayala ayadi a exanene Mefibozete. Tutena kudilonga kima mukutonginina o ima yabhiti.

O Sobha ya Izalayele, Sawúlu, wexile ni sambwadi dya ana amala ni ana ayadi a ahatu. O mona wa dyanga wa Sawúlu wexile Jonata. Kupholo o sobha wexile we ni mona wamuluku o dijina dya Mefibozete, wamuvwalele ni muhatu amwixanene Dizipa. Majiphe, Jonata wexile we ni mona amwixanene Mefibozete. Kyenyiki, Sobha Sawúlu wexile ni mona amwixanene Mefibozete ni mulawula wexile we ni dijina didi.

Sayi kithangana, Sobha Sawúlu wamateka kuzemba akwa Ngibiyone hé usota kwa ajibha enyoso. Avulu nange a ajibha mwene. Kiki kyexile kima kyayibha. Mukonda dyahi? Mukonda mivu kudima, mu izuwa ya Josuwé, o adyakime a Izalayele atele kikutu kya paze ni akwa Ngibiyone.—Josu. 9:3-27.

O kikutu kiki, atokalele hanji kukikumbidila mu izuwa ya Sobha Sawúlu. Mukubhukumukina o kikutu kiki, o sobha wasoto kubwika akwa Ngibiyone. O kusota kujibha akwa Ngibiyone kwabhangesa ‘Sawúlu ni dibhata dyê, kukala ni kikuma kya manyinga.’ (2 Sam. 21:1) Mukusukaku, Davidi wakituka sobha. O akwa Ngibiyone asubhukileku amutangela yoso yabhitile. Davidi wa ebhwidisa se kyebhi kyejifuta o kituxi kyonene kya Sawúlu ni kubhangesa Jihova kubesowala o ixi. Muveji dya kubhinga kitadi, akwa Ngibiyone abhingi kwila o sambwadi dya ana adiyala ‘dyakanene kwa ajima o mbutu’ atokalele kwa abhakula phala kwa ajibha. (Dya. 35:30, 31) Davidi waxikina o kima kyabhingi ene.—2 Sam. 21:2-6.

Maji Sawúlu ni Jonata afwile mu ita, Mefibozete mon’a Jonata wexile hanji kumwenyu. Mwene wexile kinema mukonda dya kilwezu kyabhiti mu undenge wê, mukiki mwene kakwatekesa kuku’ê mukujibha akwa Ngibiyone. Davidi watele kikutu kya ukamba ni Jonata, kyene kyejibhekela mbote ni ku mbutu yê, kala Mefibozete, mon’a Jonata. (1 Sam. 18:1; 20:42) O musoso wamba: ‘Mwenexi [Davidi] anga ulondekesa henda kwa Mefibozete mon’a Jonata, mon’a Sawúlu, mukonda dya mulôko wa Jihova wabhiti bhukaxi ka Davidi ni Jonata, mon’a Sawúlu.’—2 Sam. 21:7.

Né kiki, Davidi waxila o kima kyabhingi akwa Ngibiyone. Mwene wabhakula o twana tuyadi twa Sawúlu, umoxi dijina dyê Mefibozete, ni kitanu kya alawula a Sawúlu. (2 Sam. 21:8, 9) O kima kyabhange Davidi kyazubha o kikuma kya manyinga mu ixi.

O kima kiki kyabhiti mwene, ki musoso, ngó, kana. O kitumu kya Nzambi ki kyaxisa phata, kana. Kyene kyambele: “Kana kujibha . . . ana mukonda dya mulônga wa jitata.” (Mate. 24:16) Jihova kejixikina kwila o twana tuyadi twa Sawúlu ni kitanu kya alawula a ajibha se ene kexile ni kikuma. O kitumu kyasuluka mukwamba kwila: “Kala muthu ufwa mu kikuma kyê.” Mukiki, o sambwadi dya athu ku mbutu ya Sawúlu a ajibhile, nange abhangele mbandu mu ndunge ya Sawúlu yakujibha akwa Ngibiyone. Mukonda dyakiki, o sambwadi dya athu yá afutu o kikuma kyâ.

O musoso yú ulondekesa kwila o muthu katena kulenga o kikuma kyé mukuxinganeka ni kuzwela kwila wexile ngó mukayela itendelesu. Sayi sabhu ya unjimu yamba: “Hoka i ubhita, dyanga ku ixinganeka kyambote; o jinjila jé joso jikukale ja uhete!”—Jisa. 4:24-27; Efe. 5:15.