1-2. Ihi ya tokala kubhanga o muthu ande dya ku mubatizala?

 MU MIVU itanu ya bhiti, kazunda kamoxi ka athu ndenge, a abatizala kala Jimbangi ja Jihova. Avulu mudya, a alongele o kidi “tundé mu undenge” kala kya bhitile ni dixibulu Timote mu hama ya dyanga. (2 Ti. 3:​14, 15) Amukwa a dilongo yalungu ni Jihova kyoso kya kulu kyá. Ithangana kudima sayi muhatu wa dilongo o Bibidya ni Jimbangi ja Jihova a mu batizala mu kitala kya 97 a mivu!

² Se eye wa mudilonga o Bibidya mba a mu kusasa ku jitata Jimbangi ja Jihova, o kwila wa mu xinganeka yalungu ni kudibatizala? Se kyene, wa suwu mbambe yambote! Maji, ande dya kudibatizala eye wa bhingi kubhakula o mwenyu we kwa Jihova. O milongi yiyi yanda jimbulula se ihi ilombolola o kubhakula o mwenyu we kwa Jihova. Yene we yanda kukwatekesa kumona se mukonda dyahi kiwabhingi kukala ni woma wa kudibhakula ni kudibatizala kyoso ki ukala polondo.

O KUDIBHAKULA IHI?

3. Bhana phangu ya athu a atumbula mu Bibidya a bhakwile o myenyu yâ kwa Jihova.

³ Mu Bibidya, o muthu wa dibhakwile kwa Jihova, kilombolola kwila a musolele phala kubhanga kima kya katunda. O akwa Izalayele exile kifuxi kya dibhakwile kwa Jihova. Maji amoxi ku kifuxi kya Izalayele a dibhakwile mu ukexilu wa katunda. Mu kifika, ku kitundu kyexile muzwata Alá ku mutwe kwexile “kijimbwete kikôla kya kudibhakula”—kifwa lamina ya ulu yexile mubhenya ya tele ku pholo ya kitundu. O lamina yiyi ya  ulu yexile mulondekesa kwila mwene a mu solele phala kusidivila Jihova mu ukexilu wa katunda—kifwa kukala mukunji wa dikota wa Izalayele. (Iji. 8:9) O Jinazilé a dibhakwile we kwa Jihova mu ukexilu wa katunda. O kizwelu Nazilé kya tundu ku kizwelu nazir, mu dimi dya Hebalayiku. Kyene kilombolola a mu “Tula ku Mbandu” mba “Wa Dibhakula.” Mu Kitumu kya Mozé mwexile ijila ya tokalele ngo ku Jinazilé.—Dya. 6:​2-8.

4. (a) Ima yahi ibetakota ku mwenyu we kyoso ki udibhakula kwa Jihova? (b) Ihi ilombolola kudituna mudyê? (Tala we ofoto.)

⁴ Kyoso ki udibhakula kwa Jihova, eye usola kukituka dixibulu dya Jezú Kidistu ni kubhangesa kwila o vondadi ya Nzambi ikale o kima kya betakota ku mwenyu we. O ku dibhakula kuku kwa lungu ni ihi? Jezú wambe: “Se muthu wamesena ku ngi kayela, aditune mwene mudyê.” (Mat. 16:24) O izwelu mu Ngeleku yolungulule “aditune mwene mudyê” itena we kulombolola “kudituna kwambata o mwenyu kala kyamesena o muthu.” Kyoso ki udibhakula kwa Jihova, watokala kudituna kima kyoso-kyoso ki muluwalesa. (2 Ko. 5:​14, 15) Kiki kya lungu ni kudituna “o ibhangelu ya xitu,” kala o undumbu. (Nga. 5:​19-21; 1 Ko. 6:18) O kwila o kubelesela o itumu kwanda bhonzesa o mwenyu we? Kana. Kiki kikyanda bhita se uzola Jihova, ni kuxikina kwila, o itumu ibhana mwene phala o mbote ye. (Jisá. 119:97; Iza. 48:​17, 18) Mu kujimbulula o maka ya, sayi phange amwixana Nicholas wambe: “Eye utena kumona o itumu ya Jihova kala kaleya ka kufidisa kubhanga o ima iwamesena, mba-phe utena ku imona kala kifikidilu ki kulanga ku hoji wandala ku kudya.”

5. (a) Kyebhi ki utena kudibhakula kwa Jihova? (b) O kwila o kudibhakula ni batizu kwa difu? (Tala we ofoto.)

⁵ Kyebhi ki utena kudibhakula kwa Jihova? Bhukaxi ka musambu, eye ukanena kwa Jihova kwila wanda musidivila ngo Mwene, ni  kwila wanda ta ku pholo o vondadi ya Jihova ku mwenyu we. Mu kidi, eye ukanena kwa Jihova kwila wanda suluka ni ku muzola “ni muxima wé woso, ni mwenyu wé woso, ni kilunji kyé kyoso ni nguzu yé yoso”. (Mál. 12:30) O kudibhakula kwe wa tokala ku kubhanga eye ngo ni Jihova. Ku mbandu yamukwa, o batizu a tokala ku ibhanga ku pholo dya athu phala kulondekesa kwila eye wa dibhakula kya kwa Jihova. O kudibhakula kwe kikutu kikola, watokala kubhanga yoso ni yoso phala ku kikumbidila, kiki kyene we kyamesena Jihova.—Ndo. 5:​4, 5.

MUKONDA DYAHI EYE WATOKALA KUDIBHAKULA KWA JIHOVA?

6. Ihi ibhangesa o muthu kudibhakula kwa Jihova?

⁶ O kima kya beta kota ki kubhangesa kudibhakula kwa Jihova, o henda ye kwa mwene. Maji o henda ye kwa Jihova ki ya lungu ngó ni kyoso ki udivwa ku muxima. Mu veji dya kiki, o henda ye kwa Jihova idibandekesa mukonda dya “kwijiya kwa kidi” kwa lungu ni Jihova ni ikanenu yê. (Kol. 1:9) O kudilonga o Bibidya kwa kukwatekesa kwijya kwila (1) Jihova muthu mwene wa kidi, (2) o Bibidya maka mê, (3) ni kwila Mwene ukumbidila o vondadi yê bhukaxi ka kilunga kyê.

7. Ihi itwatokala kubhanga ande dya kudibhakula kwa Nzambi?

⁷ Yo adibhakula kwa Jihova ejiya o milongi ya dyanga kifwa yoyo yabhebhuluka itusanga mu Mak’a Nzambi, ya a ikumbidila ku myenyu yâ. Ene abhanga yoso phala kutangela akwa o ima yamudilonga. (Mat. 28:​19, 20) O henda ya kwa Jihova idibandekesa ya amesena kusidivila ngo Jihova ni muxima wa woso. O kwila kyene we kiwamubhanga? Se uzola Jihova ni  muxima we woso, eye kiwanda dibhakula ni kudibatizala phala kusangulukisa ngo o mulongexi we wa Bibidya, o jitata je, mba mukonda o makamba me a mubhanga we kiki.

8. Kyebhi o kusakidila kukubhangesa kubhakula o mwenyu we kwa Jihova (Jisálamu. 116:​12-14)

⁸ Kyoso ki uxinganeka mu ima yoso yene mu kubhana Jihova, o muxima we wizala ni kisakidilu, mukonda dya kiki eye wanda mesena kubhakula o mwenyu we kwa Mwene. (Tanga Jisálamu 116:​12-14) O Bibidya ixana Jihova kala Mubhani wa “Maujitu moso mambote mayuka.” (Tiy. 1:17) Mu maujitu moso enya o wa beta kota o sata ya kukula ya Mone Jezú. Xinganeka ngo! O sata ya kukula ya jikula o njila phala utene kukala ni ukamba wambote ni Jihova. Mwene wa kubhana o kidyelelu kya kukala ni mwenyu wa kalelaku. (1 Nz. 4:​9, 10, 19) O kubhakula o mwenyu we kwa Jihova ukexilu wa beta kota wa kulondekesa o kisakidilu kye mu henda yadikota yalondekesa Jihova, ni mu mabesa moso amukwa ene mu kubhana mwene. (Mate. 16:17; 2 Ko. 5:15) O ukexilu yu wa kulondekesa kisakidilu a ujimbulula kyambote mu disá dya 46, pondo 4, mu divulu Sanguluka Katé Kuhádya ni Hádya!. Mu mbandu yiyi, mwala we vidyu ya ithangana itatu ni dyambu Ima Yebhi Itutena Kubhana Kwa Nzambi?

O KWILA EYE WALA POLONDO PHALA KUDIBHAKULA NI KUDIBATIZALA?

9. Mukonda dyahi o muthu katokala kudivwa kwila a mu mujijidika phala kudibhakula?

⁹ Eye nange wamudivwa kwila ki wala luwa polondo phala kudibhakula ni kudibatizala. Kiki nange kyamubhita mukonda wa bhingi hanji kulungulula ima ku mwenyu we phala kubelesela o itumu ya Jihova, mba-phe nange wa bhindamena hanji kithangana phala kukolesa o kixikanu kye. (Kol. 2:​6, 7) O maxibulu oso a Bibidya kene mu kula mu ukexilu umoxi. Ku mbandu yamukwa o minzangala yoso, ki yene mu kala polondo phala kudibatizala mu kitala kimoxi. Kyenyiki kana kusokesa o ukexilu we wa kukula mu nzumbi ni wa akwenu. Muveji dya kiki sota kudikwatenena mu ima i utena kubhanga.—Nga. 6:​4, 5.

10. Ihi i utena o kubhanga se umona kwila kiwala luwa polondo phala kudibhakula ni kudibatizala? (Tala we o kaxa “ Phala yo a mu a Sasa ku Jitata Jimbangi ja Jihova.”)

¹⁰ Ne mwene se udivwa kwila kiwala luwa polondo phala kudibhakula kwa Jihova suluka mu kusuwa o mbambe yenyiyi. Samba kwa Jihova phala kukwatekesa kulungulula kabhasa kima kya bhingi ku mwenyu we. (Fil. 2:13; 3:16) Eye utena kudyelela kwila mwene wanda kwivwa o musambu we ni ku kukwatekesa.—1 Nz. 5:14:14.

MUKONDA DYAHI AMOXI ENE MU KALA NI WOMA WA KUDIBHAKULA NI KUDIBATIZALA

11. Kyebhi Jihova kyanda kutukwatekesa kukolokota fiyele kwa mwene?

¹¹ Amoxi ala polondo phala kudibhakula ni kudibatizala, maji ne kiki akala hanji ni woma. Ene nange adibhwidisa, ‘Abha-phe se ku pholo dya kwenda ngi ta kituxi kya dikota anga a ngi ta mu kamukonde?’ Se kyene ki wa mu divwa, dyelela kwila Jihova wanda kubhana yoso i wa bhindamena ‘phala wende kala kya mesena mwene ni utene ku mu sangulukisa.’ (Kol. 1:10) Mwene we wanda kubhana nguzu phala kubhanga o ima yatokala. Jihova walondekesa kya kwila utena kubhanga kiki, mukonda wene mukwatekesa kya athu avulu kubhanga o ima yotokala. (1 Ko. 10:13) Mukonda dya kiki athu ofele ngo ene mu ata mu kamukonde mu kilunga. Jihova wene mu kwatekesa o mundu we, kukolokota fiyele kwa mwene.

12. Kyebhi ki tutena kulenga kuta ituxi yamakota?

¹² Kuma etwenyoso tu akwa ituxi, twene  mudibhana ni jitendasá ja kubhanga ima yayibha. (Tiy. 1:14) Maji, eye watokala kusola se ihi iwanda bhanga kyoso ki kumoneka tendasá. Mu kidi, mu ima yoso, eye usola kyebhi ki wanda kwenda ku mwenyu we. Sayi athu amba kwila, etu kitutena kulanga o jihanji jetu ni ibhangelu yetu. Maji ya makutu. Eye utena kudilonga kulanga o jihanji jé jayibha. Kyenyiki, ne mwene kyoso kya kutendala, eye utena kusola kudituna kubhanga o kima kyayibha. Sayi dingi ima i utena kubhanga phala kulenga kuta kituxi. Mu kifika, samba kwa Jihova izuwa yoso. Kala ni ukexilu wambote wa kudilonga o Mak’a Nzambi. Nde mu yônge. Zwela yalungu ni kixikanu kye ku akwenu. O kubhanga o ima yiyi ithangana yoso, kwanda kubhana o nguzu i wabhindamena phala kusuluka mu kukala fiyele kwa Jihova. Ku mbandu yamukwa, kana kudijimba kwila Jihova wanda kukwatekesa kuditunda kyambote.—Nga. 5:16.

13. Phangu yebhi yambote yatuxila Zuze?

¹³ Kikyanda kubhonza kukolokota fiyele kwa Jihova se udyanga kya kuxinganeka ihi iwanda bhanga se kumoneka tendasá. O Bibidya izwela yalungu ni athu avulu a bhangele kiki sumbala exile we akwa ituxi. Mu kifika, o muhatu wa Potifale watendala Zuze mu veji javulu phala kuzeka-ne. Maji Zuze wejidile kya ihi yeji bhanga. O Bibidya itutangela kwila “mwene wexile mudituna.” Mwene wazwela: “Eme-phe ngi tena kyebhi kubhanga kuyibha kwos’uku ni kuta kituxi kwa Nzambi?” (Dim. 39:​8-10) Tutena kumona kwila, Zuze wejidile kya kyebhi kyeji dibhana ni maka ande mwene dya muhatu wa Potifale kumutendala. Mukonda dya kiki, kikyamubhonzele kubhanga o kima kyatokala kyoso kyamutendala.

14. Kyebhi kitutena kulenga o jitendasa?

¹⁴ Kyebhi ki utena kukayela o phangu ya Zuze ni kulenga o jitendasa? Eye utena kuxinganeka kya kindala ihi iwanda bhanga se kumoneka tendasa. Dilonge kudituna ni lusolo lwoso o ima ya zembe Jihova kate mwene mu ixinganeku. (Jisá. 97:10; 119:165) Mu kubhanga kiki eye kwanda ta kituxi kyoso kya ku tendala. Eye wanda kwijiya kya ihi iwatokala o kubhanga, mukonda wa dyanga kya kudisokejeka.

15. Kyebhi o muthu kya tena kulondekesa kwila wa musota Jihova “ni kidi kyoso”? (Jihebelewu 11:6)

¹⁵ Nange eye udivwa kwila wa sange o kidi, ni kwila wa mesena kusidivila Jihova ni muxima we woso, maji wa mu divwa hanji kwila kiwala polondo phala kudibhakula ni kudibatizala.  Eye utena kukayela o phangu ya Sobha Davidi. Utena kudyonda kwa Jihova: “Nzambi ngi solokote, u ng’ijiye muxima moxi; ngi lole; u ngi tongolole o ilunji yoso; Ngi tangele, se wa ngi mono ngala kuila mwengi; u ngi kutukise mu kikoka ki nangenena.” (Jisá. 139:​23, 24) Jihova ubesowala yo “amusota ni kidi kyoso.” O nguzu iwamubhanga phala kudibhakula ni kudibatizala ilondekesa kwa mwene kwila eye wa mumusota ni kidi kyoso.—Tanga Jihebelewu 11:6.

KOLOKOTA MU KUZUKAMA KWA JIHOVA

16-17. Kyebhi Jihova kyabheka mu kilunga kate mwene ni yo a mu a sasa kya ku jitata Jimbangi ja Jihova? (Nzwá 6:44)

¹⁶ Jezú wambe kwila, o maxibulu me, ene mu a bheka mu kilunga kwa Jihova. (Tanga Nzwá 6:44.) Xinganeka ngo mu izwelu yiyi ya katunda ni dilombolwelu dye phala eye. Jihova umona kima kyambote ku muthu ni muthu anga umubheka kokwê. Jihova ubhana valolo ku muthu anga umumona kala wamutokala ngo Mwene. (Mate. 7:6) Jihova ukumona we mu ukexilu yu.

¹⁷ Eye nange u munzangala a mu kusasa ku jitata Jimbangi ja Jihova. Kyenyiki, nange udivwa kwila Jihova ki mwene wakubheka mu kilunga, maji wa mumusidivila ngo mukonda kyene kyamubhanga o jitata je. Maji phe, o Bibidya yamba: “Zukamenu kwa Nzambi, mwene wanda mi zukama we.” (Tiy. 4:8; 1 Mal. 28:9) Kyoso ki ubhanga o mbandu yé mu kuzukama kwa Jihova, mwene ukuzukama we. Mwene ka kumono kala u muthu ngo watokala mu kibuka kya athu avulu a mu musidivila. Mu kidi, Jihova ubheka muthu ni muthu ku mbandu yê—kate mwene ni yo a mu a sasa ku jitata Jimbangi ja Jihova. Kyoso o muthu kyabhanga o mbandu yé mu kumuzukama, Jihova ubhanga kala kizwela o divulu dya Tiyaku 4:8.—Sokesa ni 2 Tesalonika 2:13.

18. Ihi itwanda mona mu milongi ya kayela? (Jisálamu 40:8)

¹⁸ Kyoso ki udibhakula kwa Jihova ni ku kubatizala, eye ulondekesa o ukexilu wa Jezú. Mwene wadibhakula mu vondadi ye kwa Tat’e phala kubhanga kabasa kima kya mubhingile. (Tanga Jisálamu 40:8; Jih. 10:7) Mu milongi ya kayela, twanda mona ihi yanda kukwatekesa kusuluka kusidivila Jihova ni ufiyele woso, kyoso kyanda ku kubatizala.