1-2. (a) Kala kilondekesa o divulu dya Jisabhu 16:31, kyebhi kitwatokala kutala o adyakime afiyele akuka kyá? (b) Ibhwidisu yebhi yandatambwijila o milongi yiyi?

ATHU avulu aya mu parque, mu mbanza ya Arkansas, ku Estados Unidos, asanga madyamande bhoxi. Maji kuma ka azelesa luwa, ene abhita ngó, katonginina kwila amutala matadi ala ni valolo yavulu.

² Kyene kimoxi we, o adyakime etu akuka kyá adifu ni madyamande yá; ene ala ni valolo yavulu. O Mak’â Nzambi azwela kwila o njimvi jâ jasoko ni kitundu. (Tanga Jisabhu 16:31; 20:29) Maji se kitudilange kitwandabhana valolo ku jiphange jiji. O minzangala atonginina kwila o adyakime akuka kyá, ala ni valolo, atena kutambula kima kyala dingi ni valolo o kitadi ndenge. Mumilongi yiyi, twandatambwijila o ibhwidisu yiyi: Mukonda dyahi Jihova ubhana valolo kwa adyakime afiyele akuka kyá? Mukonda dyahi o jiphange akuka kyá ala ni valolo mukilunga kya Jihova? Mbote yahi itutena kukatula mu phangu yâ?

3. Kala kilondekesa Jisálamu 92:12-15, mukonda dyahi o jiphange jafiyele akuka kyá ala ni valolo kumesu a Jihova?

³ O jiphange jafiyele akuka kyá ala ni valolo yavulu kumesu a Jihova Nzambi. Mwene umona yala kumixima yâ, ni kwila mwene wa ejiya, ubhana valolo ku idifwa yâ yambote. Jihova usanguluka kyoso o adyakime kyalonga o ima yadilongo kumyenyu yâ yoso musidivisu yâ kwa mwene. (Jobe 12:12; Jisa. 1:1-4) Jihova ubhana we valolo mukukolokota  kwâ. (Mal. 3:16) Ene, enemudibhana ni maka avulu kumyenyu yâ maji ene musuluka ni kukolokota mu ufiyele wâ kwa Jihova. O kidyelelu kyá phala o hádya, kyakolo dingi o kyoso kya dilongo o kidi ndenge. Jihova wa azolo mukonda amusuluka mukuboka o dijina dyê “katé ni mu ukukilu.”—Tanga Jisálamu 92:12-15.

4. Ihi itena kuswinisa o jiphange jetu jakuka kyá?

⁴ Se umwadyakime wakuka kyá, ejiya kwila Jihova ubhana valolo mukikalakalu kyé kiwabhange mu ukulu. (Jihe. 6:10) Eye ni kuswina kwoso wene mukwatekesa o kikalakalu kya kuboka, kyene musangulukisa o Tata yetu ya dyulu. Eye wakolokota mu ibhidi katé mwene ni yóyo yakutolokesa o muxima, wabelesela, wazokela o itumu ya Bibidya, ni ufiyele woso wabhange kyambote o kikalakalu mukilunga kya Jihova ni kwila walongo we akwenu. Ni kutululuka kwoso wabhange yoso, phala kukayela o ima yavulu yalunguluka mukilunga kya Jihova. Eye wene muswinisa ni kukwatekesa yó ala musidivisu yakatunda. Jihova Nzambi wakuzolo kyavulu mukonda dya ufiyele wé. Mwene wakanena kwila o yó, “a di tuma-nê mba amukala fiyele, ka ehelela”! (Jisá. 37:28) Mwena wakukanena kwila: ‘Katé ni ku jimvi; . . . nganda ku kusasa.’ (Iza. 46:4) Kyenyikiphe, kana kuxinganeka kwila mukonda dya kuka eye kiwala dingi ni valolo mukilunga kya Jihova. Eye wala hanji ni valolo yavulu!

5. Mukonda dyahi kima dyambote kulembalala jinga o adyakime akuka kyá?

⁵ O adyakime akuka kyá atena kukwatekesa o kilunga kya Jihova mu maukexilu avulu. Sumbala ene kala dingi ni nguzu yakexile nayu mu uzangala, maji ene ala ni uhete wavulu mu ima yadilongo mumivu yoso yiyi. Jihova utena kusuluka kwa abhana ikalakalu mu maukexilu avulu, kala kyandalondekesa o phangu ya abhezi a Nzambi mu ukulu ni mu izuwa yalelu.

6-7. Bhana phangu ya adyakime akuka kyá a atumbula mu Bibidya, atambula mabesá mukonda dya kikalakalu kyâ kya fiyele.

⁶ Tutena kusanga jiphangu jambote ja athu afiyele a atumbula mu Bibidya asidivila Jihova katé mu ukukilu wâ. Mukifika, Mozé wexile ni 80 amivu kyoso kyamateka kusidivila  kala polofeta ya Jihova ni kukala kupholo dya kifuxi kya Izalayele. Kyoso Daniyele kyakexile ni 90 amivu ndenge, wakexile kala polofeta Ya Jihova. O poxolo Nzwá, nange wakexile we ni 90 amivu ndenge, kyoso kyamubhusu phala kusoneka o divulu dya Dijingunwinu.

⁷ Jiphange javulu jafiyele akuka kyá ka ejiya kyavulu, kikibhonzo o athu kukamba kwa asuwa. Maji Jihova wasuwa, wandakwabhana futu mukonda dya ufiyele wâ. Mukifika, Ximinyá wexile ‘muthu wa mbote, wazolele Nzambi’ mwene kamutumbula lwavulu mu Bibidya, maji Jihova wamwijidile kyambote, wamubhana o ujitu wakutala Jezú kyoso kyakexile kabwetele ni kukanena o ima yejibhita kuhádya kumona ni kwa manya. (Luka 2:22, 25-35) Xinganeka we o mutudi wamuhatu amwixanene Hana. Mwene wexile ni 84 amivu, maji “mu tembulu [kexile] ku tunda-mu dingi.” Jihova wamubesowala mukonda dya kukala izuwa yoso mutembulu, yu wamubhana o ujitu wakutala Jezú kyoso kyexile kabwetele. Kikale Ximinyá, kikale Hana, ene exile ni valolo bhupholo ya Jihova.—Luka 2:36-38.

8-9. Ihi yabhange o phange yamuhatu mukilunga kya Jihova kyoso mwene kyakituka mutudi?

⁸ Mu izuwa yalelu, phange javulu akuka kyá amubhana phangu yambote ku minzangala. Tala o phangu ya Phange yamuhatu amwixana Lois Didur mwene wexile ngó ni 21 amivu kyoso kyamateka o sidivisu yamuboki wakatunda mu ixi ya Canada. Mukubhita kithangana mwene ni munumyê, phange Nzwá, abhange mivu yavulu mukikalakalu kyakukunda o ilunga. Mukusuluka asidivila mu Betele ya Canada 20 amivu ndenge. Kyoso Lois kyakexile ni 58, mwene ni phange Nzwá, a atumikisa phala kusidivila ku ixi ya Ucrânia. Ihi yeji bhanga ene? O kwila ene axinganeka kuma twadyakime kyá kitutena dingi kuya kusidivila mu ixi yengi? Ene axikina kwa atumikisa, kwenyoko, o phange Nzwá amusolo phala kubhanga mbandu mu Kibuka kya Filiyale. Mukubhita sambwadi dyamivu o phange Nzwá wafu; o phange Lois wasolo kunangenena mukikalakalu kyê. O phange Lois lelu, wala ni 81 amivu, wamusidivila hanji ni ufiyele woso musidivisu ya Jihova, kumwiji wa Betele ku ixi ya Ucrânia, o jiphange joso amuzolo kyavulu.

⁹ Kala o mutudi Lois, atudi avulu kene mwasuwa dingi kala kyexile mwasuwa kyoso o anumyâ kyakexile hanji kumwenyu. Maji o kukala atudi kikisosolola o valolo yâ. Jihova ubhana valolo yavulu ku jiphange jiji ja ahatu akwatekesa o anumyâ mumivu yavulu, lelu amusuluka ni kulondekesa o ufiyele wâ kwa mwene. (1 Tim. 5:3) Ene, ene we muswinisa o minzangala.

10. Phangu yebhi yambote yabhana phange Tonyi?

¹⁰ Jiphange javulu atungu mu jinzo mwene mulanga yó akuka kyá ala we ni valolo yavulu. Mukifika, o phange amwixina Tonyi kindala watungu mu inzo mwalanga o athu akuka. Mwene amubatizala ku Pensilvânia, ku  Estados Unidos da América, mumbeji ya Kakwinyi 1942 mukitala kya 20 amivu. Kikulaleka amujijidika kuya mu usoladi, mukonda dya kiki, wabhiti mivu iyadi ni kaxaxi mukaleya. Mwene ni muhathu wê, Hilda, asase twana tuyadi mu kidi. Mumivu yavulu, Tonyi wasidivila kala Mwendexi wa tufunga mu ilunga itatu kala kyexile mwa exana m’ukulu (kindala ene mwa exana kafunga wala kupholo dya kibuka kya tufunga) yu wasidivila we kala mwendexi wa kyônge kya ilunga. Mwene wexile mukwendesa o yônge ni kulonga o Bibidya mu kaleya. Phange Tonyi wala kyá 98 amivu, wamusuluka hanji ni kubhanga o ikalakalu ya Jihova. Mwene wamusuluka ni kubhanga o sidivisu ya Jihova, kumoxi ni jiphange mukilunga kyatokala!

11. Kyebhi kitutena kulondekesa kwila tubhana valolo kujiphange ala mu jinzo mwene mulanga o adyakime akuka kyá?

¹¹ Kyebhi kitutena kubhana kinjingu ku jiphange akuka kyá ala mu jinzo mwene mulanga o adyakime akuka kyá? Se kibhana o tufunga atena ku akwatekesa kutala mba kwivwa o yônge, ni ku akwatekesa kuboka. Etu tutena kulondekesa o henda yetu mukwakunda mba kuzwela nawu bhukaxi ka vidyuconferesya. Etu twamesena kusuwa dingi bengebenge o jiphange ala mu jinzo mwalanga yó akuka kyá ala o dikanga dya kilunga kyâ. Se kitudilange tutena kujimba o jiphange jiji. O jiphange akuka kyá, sayi ya kyabhonza kututangela yalungu ni ene, axinganeka kwila katokala kututangela o misoso yâ. Maji kyandatuswinisa kyoso kitukatula kithangana phala ku abhanga ibhwidisu ni kwa evwa kyoso kyatutangela o kisangusangu kya misoso kyamono musidivisu ya Jihova.

12. Ihi itutena kusanga mu ilunga itwatokala?

¹² Tutena kudiwana mukusanga phangu jambote ja jiphange jafiyele akuka kyá mu ilunga itwatokala. Phange yamuhatu amwixana Harriette wasidivila Jihova ni ufiyele woso mumivu yavulu mukilunga kyatokalele ku Nova Jersey EUA, mukusuluka mwene wayi mutunga dikanga ni mon’ê wamuhatu. O jiphange mukilunga kyê kya ubhe akatula kithangana phala kumwijiya kyambote, ene atonginina kwila mwene wexile ni valolo yavulu. Mwene wa aswinisa mukwatangela o musoso wê musidivisu ya Jihova kyoso kyamateka o kudilonga o kidi mumuvu wa 1925. Muthembu yóyo kyoso mwene kyakexile muya muboka, wexile mukwambata o mwindu wê mukonda kejidile se kithangana kyebhi kyandamuta mukaleya. Mu kidi muveji jiyadi jakutu phange Harriette mu 1933 mwene wabhange semana mukaleya. Mu ithangana yiyi mwadiwê ki Mbangi ya Jihova wexile kumukwatekesa walange o twana twâ tutatu. Sé phata o jiphange jafiyele akuka kyá, kala phange Harriette ala ni valolo yavulu!

13. Ihi itudilonga muvalolo yalanayu o jiphange akuka kyá mukilunga kya Jihova?

¹³ O jiphange jetu akuka kyá ala ni valolo yavulu mukilunga kya Jihova. Ene, enemumona kyebhi Jihova kyene mubesowala ene ni kilunga kyê mu maukexilu avulu. Ene adilongo madisá akatunda mu itondalu yâ. Twa amona kala “fixi ya unjimu,” ni kukatula mbote mumisoso yâ. (Jisa. 18:4) Se ukatula kithangana phala kwa ejiya kyambote, o kixikanu kyé kitena kukola ni kwila wandadilonga ima yavulu!

14. O divulu dya Matendelelu 32:7 diswinisa o minzangala kubhanga ihi?

¹⁴ Sota kudizwelesa ni adyakime. (Tanga Matendelelu 32:7.) Mukidi, ene kamutala dingi kyambote, kamutena dingi kwenda ni  nguzu yoso, kamutena we kuzwela dingi kyambote, maji kumuxima, ene minzangala hanji, ene abhange ‘dijina dyambote’ bhu pholo ya Jihova. (Ndo. 7:1) Kana kujimba kwila Jihova wabhana valolo. Suluka ni ku abhana kijingu. Kayela o phangu ya Elizewu. Mwene wadikwatenena kwa Elija mu izuwa yasukina ya mwenyu wê. Muveji jitatu Elija wambe: “Eme ki ngi tena ku ku xa.”—2 Jis. 2:2, 4, 6.

15. Ibhwidisu yebhi itutena kubhanga ku adyakime akuka kyá?

¹⁵ Londekesa kwila eye uswa o adyakime mukwa abhanga ibhwidisu. (Jisa. 1:5; 20:5; 1 Tim. 5:1, 2) Bhanga ibhwidisu kala yiyi: “Kyoso ki wexile munzangala, ihi yakuxikinisa kwila wasange o kidi?” “Yebhi o ima yabhiti kumwenyu wé yakubhangesa kuzukama dingi kwa Jihova?” “Ihi yene mukukwatekesa kusanguluka musidivisu ya Jihova?” (1 Tim. 6:6-8) Mukusuluka ivwa kyambote o itambwijilu yê.

16. Kyebhi o kudizwelesa mudya kutena kubhekela mbote kikale kwa adyakime kikale ku minzangala?

¹⁶ Kyoso o adyakime ni minzangala kyadizwelesa, ene oso akatula mbote. (Loma 1:12) Enu minzangala mwandabandekesa o kisakidilu kyenu mu ukexilu wa Jihova wakulanga o jeselevende jê jafiyele, ni kwila o adyakime akuka kyá andamona kwila enu mwa azolo. Ene andakutangela ni kusanguluka kwoso, kyebhi Jihova kyene mu abesowala.

17. Mukonda dyahi tutena kuzwela kwila o jiphange akuka kyá afwama dingi kyoso o mivu ki iya ni kubhita?

¹⁷ Mukidi, o pholo yâ ki ifwama dingi kala kyakexile mu unzangala wâ maji o yó akolokota mu ufiyele wâ kwa Jihova, afwama dingi kyoso o mivu ki iya ni kubhita. (1 Tes. 1:2, 3) O kwila kiki kidi mwene? Kidi mwene; mukonda kyoso o mivu ki iya ni kubhita, ene ehela kwila o nzumbi ya Nzambi ya umba ni ku akwatekesa kukala ni idifwa yambote. Kyoso kitwejiya kyambote o jiphange jetu jakuka kyá, ni ku abhana dingi kijingu, ni kudilonga ni ene, twandamona kwila ene ala ni valolo yavulu!

18. Mumilongi yakayela ihi itwandadilonga?

¹⁸ O kilunga kikikolo ngó kyoso o minzangala kyabhana valolo ku adyakime maji we ni kyoso o adyakime kyabhana valolo ku minzangala. Mumilongi yakayela twandazwela kyebhi o dyakime kyatena kulondekesa kwila ene abhana valolo ku minzangala mukilunga.