1-2. O kikanenu kya Jihova mudivulu dya Izaya 65:16, 17 kitukwatekesa kyebhi kukolokota sé kubhwila?

O KYONGE kyadikota kya muvu wa 2017, kyexile ni dyambu: “Kana Kubhwila!” O Milongi ya kyônge kiki, yatulondekesa kyebhi ki tutena kukolokota mu ibhidi itudibhana nayu kumwenyu. Kwabhiti kyá mivu iwana tunde kyabhiti o kyônge kiki, maji etu bhabha, twamukolokota hanji mu izuwa yiyi yasukidilaku.

² Mu ithangana yiyi, maka ebhi uwadibhana nawu kya? O kwila wafundu ndandu mba dikamba dya kazola? O kwila wamudibhana ni uhaxi wabhonzo? O kwila wamudibhana ni ibhidi ya kukuka? O kwila wamutala hadi mukonda dya mavuwa, usweya mba izukutisu? Wamutala hadi mukonda dya COVID-19 mba kima kyengi kya difu kiki? Twamukinga ni hanji yoso o kizuwa kyandabhwa o maka oso yá utwamudibhana nawu. Twandakwajimba, kandakalaku dingi!—Tanga Izaya 65:16, 17.

3. Ihi itwatokala kubhanga kindala ni mukonda dyahi?

³ O mwenyu kumundu yú, wabhonzo kyavulu. Kupholo dyakwenda, o ibhidi yandaya ni kudibandekesa dingi. (Mat. 24:21) Kyenyikiphe, twabhingi kusuluka ni kukolokota. Mukonda dyahi? Mukonda Jezú wambe: “Mu kolokota kwenu, mwene mu mwandu mwena o myenyu yenu.” (Luka 21:19) Twandakala dingi ni nguzu yakukolokota, se tuxinganeka kyebhi akwetu kyamukolokota we mu ibhidi yadifu ni ibhidi itwamudibhana nayu.

4. Mukonda dyahi tutena kuzwela kwila, Jihova mwene o phangu yabetakota ya kukolokota?

⁴ Nanyi o phangu yabetakota ya kukolokota? Jihova Nzambi. O kwila tudiwana ni kitambwijilu kiki? O kitambwijilu kiki kitena kukubhangesa kudiwana ande dya kuxinganeka mu maka yá. Dyabhu mwene wamukwendesa o mundu yú. Kiki kyene mutubhekela maka avulu. Jihova wala ni kutena kwakuzubha o hadi yoso yiyi mu kithangana ni mbandu. Maji mwene wamukingila o kizuwa kyasolo kuhádya phala kubhanga kiki. (Loma 9:22)  Mukithangana kiki kyamukingila, Jihova wamukolokota jinga kate kibhixila o kizuwa kyasolo. Twandadilongaku divwa dya ima yasolo Jihova phala kukolokota.

5. Kyebhi kyamateka kusebhulula o dijina dya Nzambi? Kyebhi eye ki udivwa mu maka yá?

⁵ Jihova wene mukolokota sumbala abhekela lusebhu ku dijina dyê. Jihova wazolo o dijina dyê, wamesena kwila, athu adixila. (Iza. 42:8) Maji mu 6.000 amivu ndenge, o dijina dyê dyazele, enemudisebhulula. (Jisá. 74:10, 18, 23) O lusebhu lulu lwamateka mu njaludi ya Edene, kyoso Dyabhu (dilombolola “Mukwa kutatela”) watatela kwila Nzambi wamusweka kima kyambote kyabhindamene Adá ni Eva, phala kusanguluka. (Dim. 3:1-5) Tunde o kithangana kyenyokyo, Jihova ene mumutatela o makutu a kwila, wamufidisa o athu kutambula kima kyabhindamena kyavulu. Jezú watandaganyele mukonda o dijina dya Tat’ê exile mudisebhulula, kexile mudixila. Kiki kyene kyamubhangesa kulonga o maxibulu mê kusamba: “Tata yetu wene mu dyulu, dijina dyé a dixile.”—Mat. 6:9.

6. Mukonda dyahi Jihova wabhana thembu yavulu phala kulondekesa kwila mwene ngó wala ni ujitu wakutumina o dyulu ni ixi?

⁶ Athu avulu kaxikina Nzambi kala nguvulu yâ. Jihova mwene wala ni ujitu woso wakutumina o dyulu ni ixi. O ukexilu we wakutumina, wene wabetakota. (Dij. 4:11) Maji Dyabhu wasoto kunganala jianju ni athu yu wa abhangesa kuxinganeka kwila, Nzambi kala ni ujitu yú. Kweji bhinga kithangana kyasoko phala kulondekesa ni kidi kyoso kwila, Jihova mwene ngó wala ni ujitu wakutumina, ni kwila, o ukexilu we wakutumina, wene wabetakota. Ni unjimu woso, Jihova wehela o athu kuditumina mudya muthembu yavulu, phala atene kumona kwila, ene katena kuditumina mudya anga aditunda kyambote, se kevu o Mubhangi wâ. (Jel. 10:23) Mukonda dya mwanyu wene mulondekesa, seku muthu weji kala ni phata ya kwila, Nzambi wala ni ujitu wakutumina kudyulu ni ixi. Oso andatena kutonginina kwila, o ukexilu wa Jihova wa kutumina, wene wabetakota ni kwila, o Utuminu wê wene ngó wandabheka o kutululuka ni kukondama mu ixi yoso.

7. Ananyi abhukumukina Jihova ni ihi yandabhita ni ene?

⁷ Sayi twana twê twamubhukumukina. Jihova wabhange o twana twê mu nzumbi, ni athu mu xitu mu ukexilu wa yuka, se kitondalu. Maji mukubhita kithangana, sayi anju amwixana Satanaji (dilombolola “Nguma”) wabhangesa o athu ayuka, Adá ni Eva, kubhukumukina Jihova. Sayi jianju jamukwa ni athu muxitu, adibundu we ni mwene mukubhukumuka kuku. (Juda 6) Mukubhita thembu, kate mwene athu atokalele ku kifuxi kya Izalayele, o mundu wasolele Nzambi, aditunu Jihova ya amateka kubheza jinzambi jamakutu. (Iza. 63:8, 10) Mu kulunga kwe, Jihova wadivu kwila, amubhana dikunda. Né kiki, Jihova wasuluka ni kukolokota. Wandasuluka ni kukolokota kate kyanda bhixila o kithangana kya kubwika oso amubhukumukina. Jihova ni yó akolokota mu ufiyele wa, andasanguluka mukonda dya kukolokota kwâ kumundu yú wayibha!

8-9. Jihova ene mumutatela ima yebhi ni ihi i utena kubhanga phala kumuzokela?

⁸ O makutu enemuta Dyabhu. Satanaji wambe o makutu a kwila, Jobe ni jiselevende joso ja Jihova, ene mubheza ngó Nzambi mukonda amukatulaku mbote. (Jobe 1:8-11; 2:3-5) Dyabhu wamutanga hanji o makutu yá kate mu izuwa yetu yiyi. (Dij. 12:10) Tutena kukwatekesa mukulondekesa kwila Satanaji mukwa makutu mukukolokota mu ibhidi ni ufiyele wetu kwa Jihova mukonda twamuzolo. Jihova wabesowala Jobe mukonda dya kukolokota kwê. Mwene wandatubesouwala we se tukolokota.—Tiya. 5:11.

 ⁹ Bhukaxi ka atwameni a jingeleja jamakutu, Satanaji wene mutatela o makutu a kwila, Jihova kindanda, mwéne ubhekela o hadi ku athu. Kyoso ki kufwa mona ndenge, sayi atwameni a jingeleja amba kwila, Nzambi mwene wambata o mona, mukonda wabhindamene dingi anju kudyulu. Ya makutu! Tuzwela kiki mukonda twejiya kwila, Jihova Tata ya henda. Kyoso kitudibhana ni uhaxi wabhonzo mba tufunda ndandu, etu kitutatela Nzambi, kana. Muveji dya kiki, tuxikina kwila, kuhádya, mwene wandazubha o mauhaxi, wandafukununa yó afu. Etu tutena kutangela athu oso atwivwa kwila, Jihova Nzambi ya henda. Kyenyiki, Jihova wandatena kutambwijila yó wene kumusebhulula.—Jisa. 27:11.

10. Ihi ijimbulula Jisálamu 22:23, 24 yalungu ni Jihova?

¹⁰ O hadi yenemutala o jiselevende jê jakazola. Jihova Nzambi, wivwa o ndolo yetu. Mwene uluwala kyavulu kyoso kyatumona kwila twamudila mukonda dya kutala hadi, kukata mba o kukamba o kuyuka kwetu. (Tanga Jisálamu 22:23, 24.) Jihova wivwa o ndolo yetu, wamesena ku izubha. Kyene mwene kyandabhanga kuhádya. (Sokesa ni Makatukilu 3:7, 8; Izaya 63:9.) Kwa kambe ngó, “Mwène u a kondona o masoxi moso ku mesu [metu]! Ki ku kala dingi kùfwa, nè ngó mukôndo, mba kudila, mba kukata.”—Dij. 21:4.

11. Kyebhi Jihova kya divwa yalungu ni jiselevende jê jafiyele jafu kyá?

¹¹ Kyoso ki kufwa kamba dyê dya kazola. Kyebhi kidivwa Jihova yalungu ni jiselevende jê ja fiyele jafu kyá? Mwene wamesena kyavulu kwamona dingi kumwenyu! (Jobe 14:15) O kwila utena kuxinganeka o ngunzu yakwatela Jihova kwa kamba dyê Mbalahamu? (Tiya. 2:23) Mba ya Mozé wexile muzwela ne “pholo ni pholo”? (Mak. 33:11) Mwene wamesena kyavulu kwivwa dingi o Jisálamu jexile mukwimba Davidi phala kumuximana! (Jisá. 104:33)  Sumbala o makamba mê oso ya afu, Jihova ka ajimbi. (Iza. 49:15) Mwene ulembalala yoso yalungu ni ene. O Bibidya yamba kuma, “ene oso mwene, ku mesu ma Nzambi, yá wâ ni mwenyu.” (Luka 20:38) Kuhádya, mwene wandakwafukununa n’atene kumusambela ni muxima woso, na xikina o ubhezelu wâ. Se wafundu ndandu mba kamba dya kazola, o ixinganeku yiyi itena kukukonda o malamba ni kukuximbakatesa.

12. Mu izuwa yiyi yayibha ihi dingi yene muluwalesa kyavulu Jihova?

¹² O itatesu ibhekela o athu ayibha kwa akwa. Kyoso Adá ni Eva kya bhukumuka mu njaludim ya Edene, Jihova wejidile kwila, o kuyibha kwejiya ni kudibandekesa kate kyeji bhixila o kithangana kya mwene kuyudika o ima yoso. Jihova wazembe o kuyibha, o kukamba kubatula o maka ni kuyuka ni usweya wene kumundu yú. Tunde ukulu, mwene wene mulanga yó akambe oso wa azokela, kala ana a itungu ni atudi. (Zak. 7:9, 10) Jihova uluwala kyavulu kyoso kyamona o jiselevende jê amwatatesa, ni ku a ata mu kaleya. Eye utena kuxikina ni kidi kyoso kwila, Jihova wazolo enwenwoso mwamukolokota jinga kumoxi ni mwene.

13. Kyebhi kyala o wendelu wa athu kumesu ma Jihova? Yalungu ni maka yá ihi yandabhanga Jihova?

¹³ O undumbu ni ufusa wene mudibandekesa bhukaxi ka athu. O athu a abhange phala kukayela o ukexilu wayuka wa Nzambi. Maji Satanaji wa wabhela kulungulula o ilunji ya athu, phala na kituke athu ayibha mba kubhanga ufusa. Mu izuwa ya Nowé, kyoso Nzambi kya ‘mono kuma o kubhuma ni kubhukumuka kwa muthu kwa di vwala mu ngongo . . . Jihova wadyela mu kubhanga o muthu mu ngongo, kya mu bhekela lamba ku muxima wê.’ (Dim. 6:5, 6, 11) O kwila kindala kiki o ima yawabha kya? Kana ngana. Dyabhu wasanguluka kyavulu mukonda mu izuwa yalelu, o athu ene mubhanga o maukexilu oso a undumbu ni ufusa bhukaxi ka diyala ni muhatu, mba muhatu ni muhatu, diyala ni diyala! (Efe. 4:18, 19) Satanaji usanguluka dingi kyavulu kyoso kyamona selevende ya Jihova kuta kituxi kyadikota. Kyoso kyandabhixila o kithangana kyê kyasolo, Jihova wandalondekesa kwila wazembe o maufusa ni maundumbu mukubwika oso aditunu kulungulula o ukexilu wâ wayibha.

14. Ihi yamubhanga o athu ku ixi ni ku yama?

¹⁴ O athu amuzanga o ixi yabhange Nzambi. Lelu o athu ‘ka muditumina ngó phala kudisengulula’, maji amuzanga we o ixi ni yama ya abhana Jihova phala ku ilanga. (Ndo. 8:9; Dim. 1:28) Sayi jingijiye amba kwila, mukonda dya ibhangelu ya athu, mazunda ni mazunda a yama yala mungongo lelu, yandajimuka mumivu kupholo. Né mwene se amba kwila yoso yale kyambote, etu twejiya kwila, amutanga makutu. Maji tusanguluka mu kwijiya kwila, Jihova wakanena “kubwikisa yó oso ene mubwikisa oxi!” Wanda kitula o ixi yoso palayizu.—Dij. 11:18; Iza. 35:1.

15-16. Ihi yatokala kutubhangesa kukolokota kala Jihova? Bhana phangu.

¹⁵ Xinganeka mumaka oso enemudibhana nawu Tata yetu ya dyulu, ni kukolokota kwoso, mu mazunda ni mazunda amivu. (Tala o kaxa “ Jihova Wasolo Kukolokota mu Ima Yiyi.”) Jihova wala ni kutena kwa kuzubha o kuyibha kwoso kumundu yú, kabasa kithangana, maji o mwanyu wê wene mutubhekela mbote yavulu. Xinganeka mukifika kiki: Dikaza a atangela kwolo o dotolo yâ kwila, o mona wala mumala, wala ni uhaxi. Wandatala hadi yavulu kumwenyu, ni kwila, wandafwa ni undenge. Maji o jitata jisanguluka kyavulu kyoso kyavwala o mona, sumbala ejiya kwila, kyandakwabhonza kyavulu kusasa o kana kaka. Mukonda dya henda ya kwatela o mona, ene anda kolokota kabasa o ibhidi imoneka, phala atene kusasa o mona.

 ¹⁶ Kyene we kimoxi. O twana twoso twa Adá ni Eva, a avwala kya ni kukamba o kuyuka. Ne kiki, Jihova wa azolo, wa alanga. (1 Nzwá 4:19) Jihova kasoko ni jitata mu kifika kiki, mukonda mwene wala ni kutena kwa kuzubha o hadi ya twana twê. Mwene wasolo kya o kithangana kyandazubha o hadi yoso yene mutala o athu. (Mat. 24:36) O henda yatukwatela Jihova, yatokala kutubhangesa kukolokota jinga kate kudisukilu.

17. Mukonda dyahi o izwelu mu Jihebelewu 12:2, 3 yalungu ni Jezú ituswinisa we kusuluka ni kukolokota?

¹⁷ Jihova watubhana phangu yayuka yalungu ni kukolokota. Jezú wakayela we kyambote o phangu ya kukolokota kwa Tat’ê. Kyoso kyexile mu ixi, Jezú wakolokota sumbala o athu amuzwela kyayibha, amukwatesa jisonyi ya amuphaphela kutaka. Mwene wabhange kiki phala kutubhulula. (Jihebelewu 12:2, 3.) Se phata, o phangu ya kukolokota kwa Jihova yabhana nguzu kwa Jezú phala kukolokota we. Yene itena we kutubhana nguzu phala ni tukolokote.

18. O mukanda wa 2 Phetele 3:9 utukwatekesa kyebhi kutendela ombote yabheka o mwanyu wa Jihova?

¹⁸ Tanga 2 Phetele 3:9. Jihova wejiya o kithangana kyatokala phala kuzubha o kuyibha kumundu yú. Mukonda dya mwanyu wê, athu atena kumwijiya, kindala kifuxi kya mazunda ni mazunda a athu amumubheza ni kumuximana. Enyoso ya asakidila kyavulu Jihova mukonda dya kukolokota kwê, mukubhana kithangana kyasoko phala kwa avwala na kale kumwenyu, kudilonga kumuzola ni kubhakula o myenyu yâ kwa mwene. Kyoso o mazunda athu yâ kyandakolokota kate kudisukilu, andalondekesa ni kidi kyoso kwila, Jihova wabhange kyambote mukusola kukolokota ni mwanyu!

19. Ihi itwatokala kusola kubhanga? Mbote yahi itwandatambula se tubhanga kiki?

¹⁹ Jihova watulongo kyebhi kitutena kukolokota ni kusanguluka. Ne mwene ni kuluwala ni hadi yoso yabheka Satanaji, Jihova wasuluka ni kukala ‘Nzambi ya sanguluka.’ (1 Tim. 1:11) Etu we tutena kusanguluka jinga kyoso kituya ni kukingila o kithangana kyoso Jihova kyandazelesa o dijina dyê, kyandafumanesa o ungana wê ni kuzubha o kuyibha ni maka oso utwamudibhana nawu kindala kiki. Kyenyikiphe, tubhangyenu yoso phala kukolokota ni kuswina, mu kwijiya kwila, o Tata yetu ya dyulu, wamukolokota we. Se kyene kitubhanga, o izwelu yiyi yandadikumbidila n’etu: “Wa zediwa o muthu u kolokota mu lamba, anga u kala fiyele. Kuma kya zubha ku mu lola mu malamba enyó, wa katambula kitundu kya mwenyu, kyatange Ngana kubhana oso a mu zola.”—Tiya. 1:12.