1. Kala kilondekesa odivulu dya Matesu 28:18-20, kitumu kyebhi kyatubhana Jezú?

KYOSO Jezú kyamufukununa mwene watukulukila omaxibulu mê exile kumoxi mu Ngalileya. Mwene wexile ni njimbu yakatunda phala kwatudila. Njimbu yebhi yexile nayu? Onjimbu yiyi tuisanga mudivulu dya Matesu 28:18-20.—Tanga.

2. Ibhwidisu yebhi itwandadilonga?

² Okitumu kyabhana Jezú kyakubhanga maxibulu kyalungu we ni jiselevende joso ja Nzambi lelu. Kyenyiki, twandadilonga ibhwidisu itatu yalungu ni kikalakalu kyatubhana Jezú. Kyadiyanga, katuku okikalakalu kya kulonga omaxibulu a ubhe kwaluka mba kubelesela oitumu ya Nzambi, ihi dingi itwabhingi kubhanga? Kayadi, kyebhi oaboki oso mukilunga kyatena kukwatekesa omaxibulu a Bibidya kukula mu nzumbi? Katatu, kyebhi kitutena kukwatesa ojiphange eha okuboka phala avutuke dingi kubhanga okikalakalu kiki?

3. Mukulonga omaxibulu Jezú watutendelesa kubhanga ihi?

³ Okitendelesu kya Jezú kyabhebhuluka. Etu twatokala kulonga oathu oima yatumu mwene. Maji, kitutokala kujimba okima kyabetakota. Jezú kambe kwila: ‘Mwalonga oima yoso ingamitumu eme.’ Muveji dyakiki, mwene wambe: Mwalonga “kwaluka mba kubelesela oima yoso ingamitumu eme”. Phala kubelesela oitendelesu ya Jezú, etu twabhingi kulonga odixibulu dyetu ihi yatokala kubhanga ni kwila etu we twabhingi kumulondekesa kyebhi kyatena kubhanga kiki. (Ika. 8:31) Mukonga dyahi twatokala kubhanga kiki?

4. Ihi ilombolola kubelesela okitumu? Bhana kifika.

 ⁴ Kyebhi kitutena kulonga muthu ‘kubelesela’ oitumu ya Jezú? Phala kulondekesa kyebhi kitutena kulonga muthu kwaluka mba kubelesela oima yatumu Kidistu, tala okifika. Kyebhi omulongexi waxikola wakwendesa omakalu kyakwatekesa oadilongi kubelesela oitumu yalungu ni kwendesa omakalu? Kyadyanga omulongexi watokala kulonga kwa adilongi oitumu yatokala kubelesela phala kwenda mu ikoka. Mukikiphe, phala kulonga oadilongi kyebhi kyatokala kubelesela oitumu, mwene watokala kubhanga dingi kima kyamukwa. Mwene watokala kubokona mudikalu phala kumona kyebhi oadilongi kyamukwendesa odikalu ni kwalondekesa kyebhi ene kyatena kukumbidila oima yadilongo muxikola. Ihi itutena kudilonga mukifika kiki?

5. (a) Kalakilondkesa odivulu Nzwá 14:15 ni 1 Nzwá 2:3, twabhingi kulonga omaxibulu metu kubhanga ihi? (b) Bhana kifika, kilondekesa kyebhi kitutena kukwatekesa omaxibulu metu kukumbidila omilongi ya Bibidya?

⁵ Kyoso kitulonga o Bibidya kwakwetu, etu twalonga ihi yamesena Nzambi kokwetu. Maji etu kitwatokala kulonga ngo, twabhingi kubhanga dingi kima kyamukwa. Twabhingi kulonga omaxibulu a Babidya kukumbidila oima yadilongo kumwenyu wâ mukizuwa ni kizuwa. (Tanga Nzwá 14:15; 1 Nzwá 2:3.) Mukifika, etu tutena kulondekesa ku maxibulu metu kyebhi ene kyatena kukumbidila omilongi yadyanga ya Bibidya, muxikola, musalu, mba ni mukithangana kyakutonoka. Tutena kwatangela yalungu ni ima yabhiti kumwenyu wetu, phala kuwalondekesa kyebhi okukumbidila oitendelesu ya Bibidya kutulanga kujindolo, ni kyebhi kyatukwatekesa kusola ima ni unjimu. Kyoso kitukala kumoxi ni maxibulu metu, twatokala kubhinga nzumbi ikôla ya Jihova bhukaxi kamusambu phala kwa endesa.—Nzwá 16:13.

6. Ihi dingi itwatokala kubhanga kyoso kitwamulonga akwetu kubelesela oitumu ya Jezú?

⁶ Ihi dingi itwatokala kubhanga mukulonga akwetu kubelesela oitumu ya Jezú? Twabhingi kukwatekesa omaxibulu metu a Bibidya phala nakale ni hanji yakuboka. Sayi maxibulu okixinganeku kyakuzwela ni akwa kusalu yalungu ni ima yamudilonga kitena kwabhekela hele. Mukiki, twabhingi kukala ni mwanyu kyoso kitwamukwatekesa omaxibulu metu kutendela okidi kya Bibidya, phala ene atena kukolesa okixikanu kyawu. Kyenyiki, kyoso okidi kyandakwatula kumuxima ene andakala ni hanji yakuboka. Ihi itwatokala kubhanga phala omaxibulu metu kukala ni hanji yakuboka onjimbu yambote kwakwa?

7. Kyebhi kitutena kukwatekesa odixibulu dyetu kukala ni vondadi yakulonga onjimbu yambote kwakwa?

⁷ Tutena kubhanga oibhwidisu kumaxibulu metu a Bibidya kala: “Kyebhi omwenyu we walunguluka mukonda dya kukumbidila oima iwadilongo mu Bibidya? Ihi iuxinganeka, okwila akwenu kabhingi kwivwa onjimbu yiyi? Ihi iwatokala kubhanga phala kwakwatekesa?” (Jisa. 3:27; Mat. 9:37, 38) Londekesa kudixibulu dye otumikanda twetu tubhanga mbandu ya Jifalamenda ja Kulonga, mwehele kusola otumikanda twaxinganeka kwila utena kuzwela ni jindandu jê, makamba mê ni jikoleka jasalu. * Mubhane otumikanda twoso twasolo mwene. Ni henda yoso mulondekese kyebhi mwene kyatena kubhana otumikanda kwakwa. Mukidi, kyoso omaxibulu metu kyandakala pholondo phala kwa batizala, etu twandamesena kukala kumbandu yâ phala kwaendesa.—Ndo. 4:9, 10; Luka 6:40.

8. Mukonda dyahi kima kyamboe omaxibulu metu kubhangekesa ohenda ya kwa nzambi ni kwakwa? (Tala okaxa “ Kyebhi Kitutena Kukwatekesa Omaxibulu Metu Kubandekesa Ohenda yâ Kwa Nzambi?”)

⁸ Lembalala kwila Jezú watutendelesa kulonga akwetu “kubelesela oima yoso” yatumu  mwene. Oitendelesu yiyi yalungu ni itumu iyadi yabetakota—kuzola Nzambi ni kuzola akwetuOitumu iyadi yiyi yalungu ni kikalakala kyakuboka ni kubhanga maxibulu. (Mat. 22:37-39) Oima iyadi yiyi yadifu kyebhi? Okima kyabetakota kitubhangesa kuboka, ohenda yetu kwa Nzambi ni ku athu. Twejiya kwila sayi maxibulu akala ni woma kyoso kyaxinganeka mukikalakalu kyakuboka. Maji tutena kudyelelesa omaxibulu metu kwila Jihova wandakwatekesa mukwabhana okutena kwakutolola owoma wakuzwela ni athu. (Jisá. 18:1-3; Jisa. 29:25) Ose mwene uzola Nzambi ni akwa wandatena kutolola owoma wa athu ni kutula onjimbu yambote iximbakatesa itusanga mu Maka a Nzambi. Okaxa yala mumilongi iyiyi phala kutukwatekesa kwijiya ihi itutena kubhanga phala kukwatekesa odixibulu dyetu, kukudisa ohenda yê kwa Nzambi. Mukusuluka ihi itena kubhanga okilunga phala kukwatekesa oaboki a ubhe kukula mu nzumbi ni kulondekesa ohenda yâ?

9. Mukifika dya dixibulu dikwendesa dikalu, m’ukexilu webhe odixibulu ditena kukatula mbote yadikota?

⁹ Xinganeka dingi lwamukwa mukifika ya adilongi amakalu. Kyebhi odixibulu kyatena kukatula mbote kyoso kyamukwendesa odikalu kumoxi ni mulongexi wê? Mukwivwa yamuzwela omulongexi ni kutala kyebhi akwa kyamukwendesa omakalu. Kumbandu yamukwa omulongexi utena kumulondekesa mwendexi wamukwa ubhana kithangana kwakwa phala kumubhita kupholo. Mba omulongexi utena kumulondekesa mwendexi wamukwa wambote usosolola omukengexi wadikalu dye phala akwa atena kumona okikoka nendesa kyambote, nange mwene utena kuswinisa odixibulu kubhanga kiki. Okifika kiki kitena kulonga disa dyakatunga ni kwila mwene utena kukumbidila, kyoso mwene kyamukwendesa.

10. Ihi yandakwatekesa odixibulu dya Bibidya kukula mu nzumbi?

¹⁰ Kyene kimoxi we, odixibulu dya Bibidya dimateka kusidivila Jihova, mwene kakatula ngo mbote ni mulongexi wê, maji ukatula we mbote mu phangu yakamukwa ya jiselevende ya Jihova. Mukikiphe, ihi ikwatekesa odixibulu dya Bibidya kukula mu nzumbi? Kuya mu Yônge yetu. Mukonda dyahi? Mukonda omilongi ya Bibidya yandatambula mu yônge yandabandekesa okwjiya kwâ, yandakolesa okixikanu kyâ, ni kwakwatekesa kubandekesa ohenda yâ kwa Nzambi. (Ika. 15:30-32) Muyônge omulongexi utena kwijidisa odixibulu dya Bibidya kujiphange jakamukwa jamudibhana ni ibhidi kala mwene. Odixibulu wandamona phangu jambote ya jiphange amulondekesa henda mukilunga. Tala okifika kyakayela.

11. Phangu jebhi jitena kumona odixibulu dya Bibidya mukilunga ni kyebhi jitena kumukwatekesa?

¹¹ Tala okifika kyakayela, dixibulu dya Bibidya dya muhatu wamusasa otwana ubheka, umona phange yamuhatu wamudibhana ni maka kala mwene. Odixibulu mukumona onguzu yamubhanga phange yetu phala kwambata otwana twe mu kyônge, kiki kitena kumutula mumuxima. Xinganeka dixibulu dyamubhanga nguzu phala kutolola okifwa kya kubwakula, mwene wijiya phange watolola oibhidi yamudibhanga nayu? Ophange mwenyu utangela kudixibulu kuma, ohenda yé kwa Nzambi yene yamubhangesa kukumbidila oitumu ya Nzambi. (2 Kol. 7:1; Fil. 4:13) Kyoso odixibulu kyazubha kwivwa omusoso wa muboki mwene uswina dingi, kyoso ophange kya mwambela, “Eye utena.” Xinganeka odixibulu dya Bibidya munzangala yamuhatu, umona phange yamuhatu munzangala wasanguluka mukukala Mbangi ya Jihova, ubhanga nguzu phala kukwatekesa akwa. Kyoso odixibulu dya Bibidya kyamona phange yetu wasanguluka mwene umesena kudilonga dingi phala kwijiya se mukonda dyahi phange wasangulula ithangana yoso.

12. Mukonda dyahi tutena kuzwela kwila kala muthu mu kilunga utena kukwatekesa dixibulu dya Bibidya?

¹² Kyoso odixibulu dya Bibidya kyamona  ojiphangu jambote mukilunga, mwene udilonga se ihi ilomboloa kubelesela okitumu kya kuzola Nzambi ni akwa. (Nzwá 13:35; 1 Tim. 4:12) Kala kitwamono, odixibulu ditena kudilonga bhukaxi ka jiphangu jambote ja jiphange abhiti mu maka kala amudibhana nawu mwene. Odixibulu didi ditena kudilonga bhukaxi kajiphange jiji kwila mwene wabingi kulungulula ima kumwenyu we phala kukituka dixibulu dya Kidistu. (Mate. 30:11) Kala phange mukilunga utena kukwatekesa mu maukexilu avulu phala omaxibulu a Bibidya atena kukula mu nzumbi. (Mat. 5:16) Ihi iutena kubhanga phala kukwatekesa omaxibulu a Bibdya kwiza mu kyônge?

13-14. Kyebhi Jezú kyatalatala Ojipoxolo jê kyoso kyazozele?

¹³ Etu twamesena kukwatekesa ojiphnge jetu jeha okuboka phala navutuke dingi mukikalakalu kyatubhana kwa Kidistu kyakubhanga maxibulu. Oukexilu watalatala Jezú ojipoxolo je ulondekesa se ihi twatokala kubhanga lelu.

¹⁴ Jezú m’usuku we wasukina andi dyakufwa, ojipoxolo je “a mu xa, ene oso, a leng’â.” (Mál. 14:50; Nzwá 16:32) Ihi yabhange Jezú kyoso ojiphange jê jazozele? Kyoso kyamufukununa, Jezú wambi kwakayedi yê: “Ki mu kale ni wôma. Ndenu kà tangedyenu phange jami [Kwila angifukununa].” (Mat. 28:10a) Jezú kabhana dikunda kwa Jipoxolo jê. Sumbala amuxisa ya alengele, mwene wa exana “phange jami.” Kala Jihova, Jezú wexile mukwa henda mukwa kuloloka.—2 Jis. 13:23.

15. Yalungu ni yó eha okikalakalu kya kuboka kyebhi kitudivwa?

¹⁵ Kyene kimoxi we, etu twasuwu kyavulu yo eha okuboka ni kwila ene jiphange jetu twazolo! Tudilembalala hanji oikalakalu yabhange ojiphange jiji phala Jihova. Amoxi mudya akalakala se kubwila mu mivu yavulu. (Jihe. 6:10) Mukidi twala ni ngunzu yâ! (Luka 15:4-7) Mukukayela ophangu ya Jezú, kyebhi kitutena kulondekesa kwila twasuwu ojiphange jiji?

16. Kyebhi kitutena kulondekesa kwila twasuwu ojiphange eha okuboka?

¹⁶ Ni henda yoso umwixana phala okyônge. Oukexilu umoxi wa Jezú kuswinisa ojipoxolo jê jazozele, okwa exana phala okyônge. (Mat. 28:10b; 1 Kol. 15:6) Kyene kimoxi we lelu, tutena kuswinisa yo eha okuboka mu kwa exana phala kwiza mu kyônge, se ene kamutena kwiza. Lembalala kuma, nange kwandabhinga kwa exana veji javulu kate kyandaxikina. Jezú wansangulukile kyoso oakayedi yê axikinene okixanu kiki, ni etu tutena kudivwa okusangukuka kuku.—Sokesa ni Matesu 28:16 ni Luka 15:6.

17. Kyebhi kitwatokala kutambulula yo weha kuboka kyoso kiza mukyônge?

¹⁷ Tambululawu ni henda yoso. Jezú mwene wasangesa omaxibulu mê kyoso kyadisange nawu; mwene watwama mukuzwela nawu. (Mat. 28:18) Kyebhi kitwandatalatala yo weha kuboka kyoso kiza mu kyônge? Twabhingi kumusangesa ni muxima woso. Etu nange tuthandanganya, mukonda kitwejiya itwandazwela. Phala kitumubhangese kudivwa kyayibha, tutena ngo kuzwela kuma twasanguluka mukukumona.

18. Kyebhi kitutena kuswinisa omuboki weha okuboka?

¹⁸ Swinisawu ni muxima woso. Omaxibulu a Jezú nange adivu kuma kejitena kutula onjimbu mu ngongo yoso. Jezú waswinisa oakayedi yê mukwatangela: “Eme mwene ngakakala ni enu izuwa yoso.” (Mat. 28:20) Okwila oizwelu yiyi yaswinisa omaxibulu mê? Xe, ya swinisa. Kyoso kyazubha kwivwa onjimbu yiyi, ene “ka fulu dingi okulonga ni kutanga o Njimbu Yambot’iyi.” (Ika. 5:42) Ojiphange eha okuboka abhingi we kwa swinisa. Ene nange ala ni woma wakuvutuka dingi kuboka. Etu tutena kwadyelelesa kwila ene kandaboka ubheka. Kyoso ene kyandakala polondo tutena kuya nawu kumoxi kuboka. She phata ene andasakidila kyavulu mukonda dya kikwatekesu kyetu, kyoso kyandamateka okuboka  dingi onjimbu yambote. Kyoso kitulongedeksa kwa yo eha okuboka kwila, phala etu mwene phange yetu, ene nange andavutuka dingi kubhanga okikalakalu kyakuboka. Okiki, kibhangesa okilunga kyoso kusanguluka.

19. Ihi itwamesena kubhanga ni mukonda dyahi?

¹⁹ Katé kithangana kyebhi kitwandasuluka ni kubhanga maxibulu? Katé kudisukilu dya mundu. (Mat. 28:20; tala mu nwt o Glossário, “Final do sistema de coisas.”) Okwila twandatena kuboka ni kubhanga maxibulu katé okithangana kiki? Xe, twandatena! Etu twala polondo phala kubhana okithangana kyetu, nguzu yetu ni kitadi kyetu, phala kusanga yo “a fwamena omwenyu ki wabhwa.” (Ika. 13:48) Kyoso kitubhanga kiki, twamukayela ophangu ya Jezú. Mwene wambe: “Kúdya kwami, okubhanga vondadi ya yó wangi tumu, ni kuzubha okikalakalu kyê kyangibhana okubhanga.” (Nzwá 4:34; 17:4) Etu we kyene kitwamesena kubhanga ni muxima woso. Etu twamesena kuzubha okikalakalu kyatubhana phala kubhanga. (Nzwá 20:21) Etu twamesena kwila akwetu ni yo eha okuboka akolokote mukubhanga okikalakalu kiki kumoxi n’etu.—Mat. 24:13.

20. Kala kilondekesa Filipe 4:13, mukonda dyahi tutena kuxikina kwila twandazubha okikalakalu kyatubhana Jezú?

²⁰ Okubhanga okima kyatumu Jezú, kikima kyofele. Maji kitwamubhanga okikalakalu kiki ubheka. Jezú watukanena kwila wejikala netu. Kyoso kitukumbidila okikalakalu kyetu kyakubhanga maxibulu “tu kalakala kumoxi phala Nzambi” ni kwila “tu akalakadi a Kidistu.” (1 Kol. 3:9; 2 Kol. 2:17) Kiki kitubhangesa kuxikina kuma tutena kuzubha okikalakalu kiki. Se phata okikalakalu kya kubhanga maxibulu ni kukwatekesa akwetu kubhanga okikalakalu kiki, ujitu wadikota!—Tanga Filipe 4:13.