Ande dyakufwa kwê, mukonda dyahi Jezú watumbula o izwelu ya Davidi itusanga mu Jisálamu 22:1?

Ande dyakufwa, Jezú watumbula o izwelu itusanga mudivulu dya Matesu 27:46, yamba: “Nzambi yami, Nzambi yami, wa ng’ehelela-hi’á?” Kyoso Jezú kyatumbula o izwelu yiyi mwene wakumbidila ni izwelu ya Davidi itusanga mu Jisálamu 22:1. (Mál. 15:34) Okwila kima kyayibha kuxinganeka kwila Jezú watumbula o izwelu yoyo mukonda mwene waluwalele ni Jihova mba nange mwene kexile ni kixikanu mukithangana kyokyo? Jezú wejidile kyambote se mukonda mwene watokalele kufwa, mwene wexile polondo phala kufwa. (Mat. 16:21; 20:28) Mwene wejidile kwila mukithangana kyê kyakufwa, Jihova keji “mu bhaka kididi kya kondama.” (Jisa. 18:10; Job 1:10) Jihova wehelela Jezú, mukiki Jezú wejilondekesa o ufiyele we kabasa ondolo yejidivwa mukufwa.—Mál. 14:35, 36.

Kyenyikiphe, mukonda dyahi Jezú watumbula o izwelu ya Jisálamu? Sumbala kitwejiya yoso yabhangesa Jezú kutumbula o izwelu yiyi, maji twandamona ima nange yamubhangesa kutumbula o izwelu yiyi. *

Mukutumbula o izwelu yiyi okwila Jezú wexile mulondekesa kwila Jihova wejimwehela kudibhana ni ndolo yakufwa? Jezú wabhingile kufuta ovalolo yasata yakukula se okikwatekesu kya Jihova. Jezú wexile muthu muxitu, kyenyiki, wabhingile kufwa phala “a lole kalunga mu mulonga wa mundu woso.”—Jihe. 2:9.

Okwila Jezú mukutumbula o izwelu yiyi ya jisálamu, mwene wamesenene kwila o athu abanza  mukibatulu kyoso kya jisálamu? M’ukulu kyexile kifwa kya Jijude kubhaka mukilunji ojisálamu. Kyoso ene kyexile mukwivwa ovelusu imoxi ya sálamu, kiki kyejile mukwakwatekesa kulembalala o izwelu yoso yala musálamu yiyi. Se kiki kyene kyamesene Jezú, mwene wejikwatekesa akayedyê kulembalala ojipolofesiya jala musalamu yiyi yalungu ni kufwa kwê. (Jisá. 22:7, 8, 15, 16, 18, 24) Kumbandu yamukwa, ojivelusu jasukina jasalumu yiyi, jiximana Jihova, jitumbula Jihova kala Sobha ya ngongo yoso.—Jisá. 22:27-31.

Okwila mukutumbula o izwelu yiyi Jezú wexile mulondekesa kwila mwene kexile ni kikuma? Ande dyakufwa kwê, Jezú amwambata se kikuma, ya amutatela kwila waxongwena Nzambi. (Mat. 26:65, 66) M’usuku wenyo o inzo yadikota yakufundisa yadyongeka ni lusolo anga afunyu ndunge yakumukwata se kubelesela o itumu ya ixi. (Mat. 26:59; Mál. 14:56-59) Kyoso Jezú kyabhangele okibhwidisu, “Nzambi yami, Nzambi yami, wa ng’ehelela-hi’á?” mwene nange wexile mulondekesa kwila kabhangele kima kyayibha kyatokalele kumujibha m’ukexilu yú.

Jezú mukulembalesa o athu kwila kate mwene Davidi omusoneki wa sálamu yiyi amwehelele kutala hadi, okwila kiki kilombolola kuma Jihova kaxikinine dingi Davidi kala selevende yê? Okibhwidisu kiki kya Davidi kikilombolola kwila mwene kexile ni kixikanu kwa Nzambi. Kyoso mwene kyabhange okibhwidisu kiki, mwene wambe kwila Jihova weji mubhulula mwene ni mundu wê, ni kusuluka ni kumubesowala. (Jisá. 22:23, 24, 27) Kyene kimoxi kyabanzele Jezú “Mona Davidi,” ohadi yatale ki ilombolola kwila Jihova kaxikinine dingi Jezú.—Mat. 21:9.

Okwila Jezú mukujimbulula kyebhi kyexile mudivwa kilombolola kwila Jihova wamukatule okilangidilu kyê phala kubhana kithangana kyakulondekesa o ufiyele wê kwa mwene? Kikyexile ovondadi ya Jihova ya kwila o Mon’ê utala hadi anga ufwa. Kiki kyabhiti ngo mukonda dyakubhukumuka kwa Ada ni Eva. Jezú kabhangele kima kyayibha, maji wabhingile kutala hadi ni kufwa phala kutambwijila omaka avulumuna Satanaji ni kufuta o ima yatexikisa odiyala dyadyanga bhukaxi kasata yakukula. (Mál. 8:31; 1 Phe. 2:21-24) Kiki kyejibhita ngo se Jihova kalangidile Jezú mukithangana kyakufwa kwê.

Okwila Jezú wasoto kukwatekesa o akayedyê kwijia se mukonda dyahi Jihova wamwehela kufwa mu ukexilu yú? * Jezú wejidile kwila o ukexilu wakufwa kwê wejibhangesa athu avulu kudibhala. (1 Kol. 1:23) Se akayedyê alungile omuxima wâ mu ima yamubhangesa kufwa, ejitendelela se ihi ilombolola okukwa kwê. (Nga. 3:13, 14) Ene ejimumona kala Mubhuludi, kejimumona kala kifumbe, kana.

Kabasa kima kyabhangesa Jezú kutumbula o izwelu yiyi, maji mwene wejidile kwila o ima yexile mubhita kumwenyu wê yabhangele mbandu ya vondadi ya Jihova phala mwene. Kyoso Jezú kyatumbula osálamu yiyi, kikwalaleka kyavulu, mwene wambe: “Yoso yòtenese kyá!” (Nzwá 19:30; Luka 22:37) Kyene, Jihova wehela Jezú kutala hadi mukakithangana. Kiki kyakwatekesa Jezú kukumbidila yoso yamutumu kubhanga mungongo. Kiki kyabhangesa we Jezú kukumbidila o ima yoso yalungile ni mwene yosoneke “mu Kitumu kya Mozé, ni mu madivulu a Jipolofeta, ni mu Jisalamu.”—Luka 24:44.