1. Ihi imona o athu kyoso kyaya mu yônge yetu muveji yadyanga? (Tala we ofoto.)

 XINGANEKA dikaza ayi mu kyônge, mu kididi kya ubhezelu kya Jimbangi ja Jihova mu veji yâ yadyanga. Ene adiwana kyavulu mukumona o ukexilu wambote wa atambulula mu kilunga ni henda idilondekesa o jiphange mudyá. Mu kuvutuka ku bhata, o muhatu watangela mwadiwê: O Jimbangi ja Jihova ka difu ni athu amukwa ungadilungu nawu kya, ngawabhela kyavulu kukala kumoxi ni ene.

2. Mukonda dyahi amoxi mudyetu eha kusidivila Jihova?

² O henda idilondekesa o mundu wa Jihova, mu kidi, yakatunda mwene. Maji, kidi kwila o Jimbangi ja Jihova akwa ituxi we. (1 Nz. 1:8) Kyoso ki tuya ni kwijiya dingi o jiphange jetu mukilunga, twanda kwijiya we dingi o itondalu yâ. (Lom. 3:23) Kima kya kuluwala kumona kwila, amoxi mudyetu eha kusidivila Jihova mukonda dya itondalu ya akwá.

3. Kyebhi kyejitena kutungula o akayedi a Jezú? (Nzwá 13:34, 35)

³ Tala dingi o velusu ya milongi yiyi. (Tanga Nzwá 13:34, 35.) Kyebhi o athu kyatena kutungula se ananyi o Jikidistá ja kidi? Bhukaxi ka henda, k’o kuyuka, kana. Tala kwila Jezú ka zwela: ‘Kyenyiki, Enu mwanda kwijiya kwila mu maxibulu mami.’ Muveji dya kiki mwene wambe: “Kyenyiki, o athu oso anda mijiya kwila mu maxibulu mami.” Ni izwelu yiyi, Jezú walondekesa kwila o maxibulu mê ki ene ngó ejitena  kumona kwila, mu kilunga mwala henda ya kidi, maji we ni athu akamukwa ejitena kumona o kidi kiki.

4. Amoxi nange abhanga ibhwidisu yebhi yalungu ni Jikidistá ja kidi?

⁴ O yó ki Jimbangi ja Jihova, nange ebhwidisa: Mu ukexilu webhi o henda ilondekesa kwila o muthu kidistá ya kidi? Kyebhi Jezú kyalondekesa o henda ku maxibulu mê? Ni kyebhi kitutena kukayela o phangu ya Jezú mu izuwa yetu? Né mwene etu, tu Jimbangi ja Jihova kyá, twatokala kuxinganeka mu ibhwidisu yiyi. Se tubhanga kiki, ki kyanda tubhonza kyavulu kulondekesa o henda yetu ku akwetu, bengebenge kyoso ki tudibhana ni itondalu yâ.—Efe. 5:2.

5. Ihi ilombolola o izwelu itusanga mu divulu dya Nzwá 15:12, 13?

⁵ Jezú wambe kwila o akayedi’ê eji dizola mu ukexilu wakatunda. (Tanga Nzwá 15:12, 13.) Tala o kitumu kyabhana mwene: “Dizolyenu mudyenu, kala ki ngamizolo eme.” Kiki kilombolola ihi? Jezú wajimbulula kuma, o maxibulu mê atokalele kuzola dingi akwá ene ndenge, ni kwila atokalele kukala polondo phala kufwila bhu kididi kya akwá, se kyeji bhinga. b

6. Kyebhi o Bibidya ilondekesa kwila o henda yala ni valolo kyadikota?

⁶ O Bibidya ilondekesa kwila o henda yala ni valolo yadikota. Phala athu avulu o jivelusu ja Bibidya ja wabhela dingi jyenyiji: “Nzambi henda.” (1 Nz. 4:8) “Zola mukwenu kala ki wadizolo eye mwene.” (Mat. 22:39) “O henda isweka nzungule dya ituxi.” (1 Ph. 4:8) “O henda ki yanda bhwa.” (1 Ko. 13:8) O jivelusu jiji ni ja mukwa, jitukwatekesa kumona kwila twatokala kulondekesa o idifwa yiyi.

7. Mukonda dyahi Satanaji nuka wejitena kulonga o athu kukala ni muxima umoxi?

⁷ Athu avulu adibhwidisa: ‘Kyebhi kitutena  kwijiya se yebhi o ngeleja ya kidi? O jingeleja joso amba kwila amulonga o kidi, maji phe kala ngeleja ilonga ima ki idifu yalungu ni Nzambi.’ Satanaji wene mubhanga jingeleja javulu jamakutu, mukonda dya kiki, kyene mubhonzesa o athu kwijiya yebhi o ngeleja ya kidi. Maji Satanaji nuka wejitena kwongeka athu a jixi javulu, phala na kituke mwiji umoxi ngó wa athu adizolo mudyâ. Jihova ngó utena kubhanga kiki. Mu kidi, ki kibhonzo ku kitendela, mukonda o henda ya kidi, itunda kwa Jihova. Yó ngó ala ni nzumbi ikôla ya Jihova ni mabesá mê atena kukala ni henda ya kidi mudyâ. (1 Nz. 4:7) Kiki kyene kyabhangesa Jezú kuzwela kwila, o henda yene yeji londekesa se ananyi o akayedi’ê a kidi?

8-9. Kyebhi athu avulu kyadivwa kyoso kyamona o henda ya kidi yala nayu o Jimbangi ja Jihova?

⁸ Kala kyakanena Jezú, athu avulu lelu ene mutena kutungula se ananyi o jikidistá ja kidi bhukaxi ka henda yadilondekesa mudyâ. Mu kifika, sayi phange amwixana Ian, udilembalala o veji yê yadyanga kyayi mu kyônge kyadikota, kyene akibhangele bhu kididi bhwene mu jokala o malunda a fiti. Jimbeji kudima, Ian wendele kya mu kididi kiki mutala malunda a fiti. Mwene wambe: “O ukexilu wa athu mu kyônge kya dikota, ki wadifwile ni athu ungadilungile nawu mu jijoko. O Jimbangi ja Jihova akexile mu dixila, azwatele kyambote, o twana twâ exile mu belesela. O kyabeta dingi kota, ene akexile ni kutululuka kwa muxima, eme ngamesenene we o ukexilu yú. Kingalembalala diskulusu dimoxi, maji o ukexilu wambote wa Jimbangi ja Jihova, wangitula kumuxima.” c O yamono Ian mu kyônge kiki, o mbote ijila mu kudilondekesa o henda ya kidi mudyetu. Mukonda dya kuzolo o jiphange jetu, tu atalatala kyambote ni kuxila kwoso.

⁹ Sayi phange amwixana Nzwá, wadivwile we kala kyadivu Ian, kyoso kyayi mu kyônge mu kidi kya ubhezelu mu veji yadyanga. Mwene wambe: “Ngadiwanene kyavulu mukumona o kusanguluka . . . kwa athu oso mu kyônge, edile kala kene mulweza. O henda ya yakidi, yangixikinisa kwila, ngasange o jikidistá ja kidi.” d O misoso yiyi ni misoso yamukwá, ilondekesa kwila o mundu wa Jihova éne o Jikidistá ja kidi.

10. Mu ithangana yebhi mu tutena kulondekesa kwila twazolo o jiphange jetu? (Tala we onota.)

¹⁰ Kala kitwamono kudimatekenu dya milongi yiyi, athu oso mu kilunga akwa ituxi. Sayi ithangana o jiphange jetu anda bhanga mba anda zwela kima kitukwatesa njinda. e (Tiy. 3:2) Mu ithangana yiyi, tutena kulondekesa o henda yetu ku jiphange bhukaxi a izwelu ni ima itubhanga. Kima kimoxi kyanda tukwatekesa, o kudilonga o phangu ya Jezú.—Nzw. 13:15.

11. Ukexilu webhi walondekesa Tiyaku ni Nzwá? (Tala we ofoto.)

¹¹ Jezú kakexile mukingila kuma o maxibulu mê akala athu ayuka. Muveji dya kiki, mwene wakwatekesa kutolola o itondalu yâ, phala n’atene kusangulukisa Jihova. Sayi kizuwa, poxolo jiyadi, Tiyaku ni Nzwá atangela man’yâ phala nayi mubhinga kwa Jezú  n’a abhane ididi ya ungana ku Utuminu wa Nzambi. (Mat. 20:20, 21) Mu kubhanga kiki Tiyaku ni Nzwá alondekesa o ukexilu wa ukumbu, ni kwila amesenene kukala kota o akwá ndenge.—Jisa. 16:18.

12. O kwila Tiyaku ni Nzwá ene ngó alondekesa o ukexilu wayibha? Jimbulula.

¹² Tiyaku ni Nzwá, ki ene ngó alondekesa o ukexilu wayibha mu kithangana kyenyókyo. Tala ihi yabhange o jipoxolo ja mukwa: “Kyoso o dikwinyi dya maxibulu kyevu o maka yá, afutuluka ni jiphange jiyadi.” (Mat. 20:24) Katé tutena kuxinganeka o dikwinyi dya jipoxolo kuzoka ni Tiyaku ni Nzwá. Nange ene azwela kiki kwa Tiyaku ni Nzwá: ‘Mwafika kwila enu ananyi phala kubhinga ididi yabeta dingi kota ku Utuminu? Ki enu ngó mwa kalakala ni ufiyele woso ni Jezú. Etu we twa fwamena kutambula o ujitu yú!’ Kabasa kima kya xinganeka mba kya zwela, mukithangana kyenyókyo, o jipoxolo adijimbi o valolo ya kudilondekesa o henda ni kudibhanga mbote mudyá.

13. Kyebhi Jezú kyadibhana ni itondalu ya jipoxolo jê? (Matesu 20:25-28)

¹³ Kyebhi Jezú kyadibhe ni maka enyà? Mwene kafutuluka kana. Mwene kambe kwila weji sola jipoxolo jengi, athu ambote alenduka dingi, akwa henda. Muveji dya kiki, mwene wazwela nawu ni mwanyu woso, mukonda wejidile kwila o jipoxolo amesenene kubhanga o ima yambote. (Tanga Matesu  20:25-28.) O yiyi ki yexile o veji yadyanga mba yasukina ya jipoxolo kuzoka mu kusota kwijiya se nanyi wabetele dingi kota mudyá, maji né kiki mu ithangana yoso Jezú wa talatala ni henda.—Mál. 9:34; Luk. 22:24.

14. Webhi wekexile o ukexilu wa athu mu kididi mwakudila o jipoxolo ja Jezú?

¹⁴ Mu kudibhana ni maka enyà, sé phata Jezú waxinganeka yalungu ni kididi mwakudila o jipoxolo. (Nzw. 2:24, 25) O atwameni jingeleja mu kididi mwakudila o jipoxolo, exile mulonga kwila o muthu wala ni valolo yó ngó wala ni ungana bhwaxaxi ka akwá. (Matesu 23:6; Tala we ovidyo Primeiros assentos na sinagoga mu nota de estudo mu divulu dya Matesu 23:6, mu Bibidya ya phutu.) O atwameni a Jijudé exile we mudimona kwila, abeta kota o akwa ndenge. f (Luk. 18:9-12) Jezú wejidile kwila o ima yoso yiyi yejitena kufunyisa o ukexilu wa jipoxolo wakuditala, ni kutala akwá. (Jisa. 19:11) Jezú wejidile kwila o maxibulu ejitondala, yú walondekesa mwanyu, mwene wejidile we kwila o maxibulu mê exile ni mixima yambote. Kyenyiki wakatula kithangana phala kwalonga kukala athu alenduka, ni kudizola dingi mudyá muveji dya kusota kumona se nanyi wabeta dingi kota.

15. Ihi itutena kudilonga mu ima yabhiti ni Tiyaku ni Nzwá?

¹⁵ Tutena kudilonga ima yavulu mu yoso yabhiti ni Tiyaku ni Nzwá. O kubhinga kididi kya ungana ku Utuminu, kyexile kima kyayibha. Maji o jipoxolo ja mukwá alwezele we, mukonda ene ehela kwila o maka enyó a abhangesa kudiwanuna. Maji Jezú wadibhana ni 12 kya jipoxolo joso ni henda ni kilendu. Ihi itwadilongo mu phangu yiyi? Twadilongo kwila, o kyabeta kota, k’o itondalu ya kwetu ngó, maji we kyebhi kitwanda dibhana ni itondalu yiyi. Ihi itena kutukwatekesa? Kyoso kitufutuluka mukonda dya kima kyatubhange phang’yetu, tutena kudibhwidisa: ‘Mukonda dyahi o kima kya ngibhange mwene kyangibhekela njinda yavulu? O kwila kiki kilondekesa kwila ngabhingi kulungulula kima mu ukexilu wami? O kwila o phange yú wamudibhana ni ibhidi? Né mwene se ngamudivwa kwila ngalungwami mukukala ni njinda, o kwila ngitena kumulondekesa henda ni kumuloloka?’ Kyoso ki tutalatala akwetu ni henda, tulondekesa kwila twa akayedi a kidi a Jezú.

16. Ihi dingi itutena kudilonga mu phangu ya Jezú?

¹⁶ O phangu ya Jezú itulonga we o mbote ya kusota kutendela o jiphange jetu. (Jisa. 20:5) Kidi kwila Jezú wexile ni kutena kwakutanga o mixima ya athu. Etu kitwala ni kutena kuku. Maji né kiki tutena kulondekesa mwanyu mu kudibhana ni itondalu ya jiphange jetu. (Efe. 4:1, 2; 1 Ph. 3:8) Kima kimoxi kyanda tukwatekesa kubhanga kiki, o kwa ejiya kyambote. Tala phangu imoxi.

17. O kwijiya kyambote o phange, kyakwatekesa kyebhi o kafunga ka ilunga?

¹⁷ Sayi kafunga ka ilunga wamusidivila kumbandu yatundila kumbi, mu ixi ya África, udilembalala yalungu ni phange mu kilunga wedile kala wexile ni ukexilu wabhonzo phala kudibhanané. Ihi yabhange o kafunga ka ilunga? Mwene wambe: “Eme ngasoto kwijiya dingi o phange muveji dya kumulenga,  mukubhanga kiki o kafunga wamono kwila o phange amusase mu ukexilu wabhonzo kyavulu, kiki kyexile mu funyisa o ukexilu wa kudibhana we ni akwá.” O kafunga ka ilunga wasuluka mu zwela: “Kyoso kinga tendela o nguzu yexile mubhanga o phange phala kulungulula o ukexilu wê, n’atene kudibhana kyambote ni jiphange, ni yoso yabhangele kyá, ngamateka kumuxila dingi, twakituka makamba ambote”. Mukidi kyoso kitubhanga yoso itutena phala kutendela o jiphange jetu ki kitubhonzo kwa zola dingi.

18. Ibhwidisu yebhi itwatokala kudibhanga se phange mu kilunga utuluwalesa? (Jisabhu 26:20)

¹⁸ Sayi ithangana twandabhinga kuzwela ni phange watuluwalesa phala kubatula o maka. Maji kyadyanga, kima kyambote kudibhwidisa: ‘O kwila ngatendela mwene o ima yoso?’ (Jisa. 18:13) ‘O kwila mwene wakibhange mu lwelu?’ (Ndo. 7:20) ‘O kwila eme ngatele kyá kitondalu kala kiki?’ (Jisa. 26:20) ‘Se ngizwelané, o kwila o maka u ngamusota ku abatula andadibandekesa dingi?’ (Tanga Jisabhu 26:20.) Sé tukatula kithangana phala kuxinganeka mu ibhwidisu yiyi, nange twanda mona kwila o kima kyabeta kota o kulondekesa o henda ni kuxisa o maka kudima.

19. Ihi iwanda suluka mukubhanga?

¹⁹ O Jimbangi ja Jihova, alondekesa kwila maxibulu a kidi a Jezú mukonda dya henda yala nayu mudyâ. Kala muthu mudyetu ulondekesa kwila dixibulu dya kidi dya Jezú, kyoso kyalondekesa o henda ku jiphange sumbala ni itondalu yâ. Kyoso kitubhanga kiki, akwetu andatena kumona kwila etu tu abhezi a kidi, ene andamesena we kubheza o Nzambi yetu Jihova. Mu kiki twanda suluka mu kulondekesa o henda itutungula kala tu Jikidistá ja kidi.