1. Mukonda dyahi Jezú wasokeka o akayedyê ni jimbudi?

JEZÚ wasokesa o maxibulu mê, kala o jimbudi kijidibhana kyambote ni mubhidi wâ. (Nzwá 10:14) Kiki kyatokala mwene. O jimbudi jejiya o kafunga kâ, jivwa o dizwi dyê. Sayi diyala wakimono ni mesu mê, wambe: “Sayi athu mukibuka kyetu, amesenene kuxabula jifoto kujimbudi. Kyenyiki, ajixana, maji jene kijizukama, mukonda kijejidile o mazwi metu. Maji kyabhixila o kamunzangala, wexile o mubhidi, wajixana, jene jamukayela ni lusolo.”

2-3. (a) Kyebhi o akayedi a Jezú kyalondekesa kwila, evwa o dizwi dyê? (b) Ihi itwandadilonga mu milongi yiyi ni ya kayela?

² O ima yazwela o diyala didi, itulembalesa yazwela Jezú, yalungu ni jimbudi jê, kifwa, o maxibulu mê. Mwene wambe: “Jene jívwa o dízwi dyami.” (Nzwá 10:16) Maji Jezú wale kudyulu. Kyebhi kitutena kwivwa o dizwi dyê? Tulondekesa kuma twamukwivwa Jezú, kyoso kitukumbidila o milongi yê ku mwenyu wetu.—Mat. 7:24, 25.

³ Mu milongi yiyi ni mu milongi yakayela, twandamona ima yatulongo Jezú. Kala kitwandamona, Jezú watulongo kwila, sayi ima kitutokala ku ibhanga, o yamukwa twatokala ku ibhanga. Kya dyanga, twandamona ima iyadi yatufidisa kwala o kafunga ketu kambote.

4. Kala kilondekesa Matesu 6:25, ihi itena kutubhekela “hele”?

⁴ Tanga Matesu 6:25. Jezú watendelesa o maxibulu mê kanenu “kuvula hele” mukonda dya ibhindamu muxitu. Twejiya kuma, o itendelesu ya Jezú, itendelesu ya unjimu, twa tokala ku ikayela jinga ithangana yoso. Twamesena ku ikumbidila,  maji sayi ithangana kibhonza ku ikumbidila. Mukonda dyahi?

5. Mukonda dyahi sayi athu athandanganya mukonda dya ibhindamu muxitu?

 ⁵ Sayi athu atena kutandanganya mukonda dya ibhindamu yâ muxitu, kala o kudya, izwatu ni inzo yakukala. Kiki kitena kubhita mukonda atungu mu ixi mwavulu o wadyama. Kya abhonza kukala ni kitadi kyasoko phala kudikila o ibhindamu yamiji yâ. Mba o muthu wene mudikila o mwiji ufwa, kyenyiki ka kala ni kitadi kyasoko. Mukonda dya uhaxi wa COVID-19, o matenda axala sé kitadi, kiki kyabhangesa athu avulu kwa akatula kusalu. (Ndo. 9:11) Se wamudibhana ni ibhidi yiyi, kyebhi ki utena kukayela o kitendelesu kya Jezú, kya kukamba kukala ni hele?

6. Jimbulula yabhiti ni poxolo Phetele.

⁶ Sayi kizuwa, poxolo Phetele ni maxibulu amukwa, exile mu ulungu mu musanza wa Ngalileya, ku kwamoneka kitembu kyanguzu, ene amono Jezú wexile mukwendela kuthandu amenya. Phetele anga wamba: “Ngana, ki ki kala eye-mwène, ngi tume ngi ku sange koko, ku thandu’a menya.” Jezú wamwixana wixi: “Izá!” Phetele anga utunda mu ulungu, “ukala mu kwenda ku thandu’a menya, wala kuya kwa Jezú.” Mukusuluka tala yabhiti. “Maji kya mono o kitembu kya nguzuphe, wôma wa mu kwata. O ki andeka kubôba, udikola wixi: Ngana ngi kudile!” Jezú wasununa o lukwaku, yu wamubhulula. Kima kyambote kulembalala kwila, mukithangana kyalungu o mesu kwa Jezú, Phetele watena kwendela kuthandu amenya. Maji kyatale o kitembu kyanguzu, wôma wamukwata, wexile we ni phata. Kyenyiki, wamateka kuboba.—Mat. 14:24-31.

7. Ihi itudilonga kuphangu ya Phetele?

 ⁷ Tutena kukatula mbote ku ima yabhiti ni poxolo Phetele. Kyoso Phetele kyatundu mu ulungu yu wamateka kwendela mu menya a kalunga, mwene kaxinganekene kwila, o kitembu kya nguzu kyeji muthandanganyesa ni kumubhangesa kuboba. Mwene wamesenene kusuluka ni kwendela kuthandu amenya, kate kyejibhixila kwa Mesene yê. Maji muveji dya kulunga o mesu kwa Jezú, mwene wôma wamukwata mukonda dya kutala o kitembu kyanguzu. Lelu, etu twabhingi kixikanu phala kukolokota mu ibhidi, kala Phetele kyabhingile kixikanu phala kwendela kuthandu amenya. Se tukamba kulunga o mesu kwa Jihova ni ku ikanenu yê, o kixikanu kyetu kyandazoza, twandamateka we kuboba munzumbi. Kyenyiki, né mwene se tudibhana ni maka avulu, twabhingi kusuluka ni kulunga o mesu metu kwa Jihova, ni mukutena kwê kwa kutukwatekesa. Kyebhi kitutena kubhanga kiki?

8. Ihi yandakutukwatekesa phala kituthandanganye kyavulu mukonda dya ibhindamu yetu muxitu?

⁸ Muveji dya kutandanganya kyavulu mukonda dya ibhidi yetu, twabhingi kudyelela kwa Jihova. Lembalala kwila, Tata yetu ya henda, Jihova, wakanena kudikila o ibhindamu yetu muxitu, se tuta o vondadi yê kupholo. (Mat. 6:32, 33) Mwene ukumbidila yoso yakanena. (Mate. 8:4, 15, 16; Jisá. 37:25) Jihova wene mulanga o jinjila ni itulu. Kyenyiki, kitwabhingi kutandanganya ni ima itwanda dya mba kuzwata! (Mat. 6:26-30; Fil. 4:6, 7) O henda ibhangesa o tata muxitu kudikila o ibhindamu ya mwiji wê. Kyene we kimoxi, o henda ibhangesa Jihova, Tata yetu ya dyulu, kudikila o ibhindamu ya mundu wê. Kyene mwene! Tutena kudyelela ni kidi kyoso kwila, Jihova wandasuluka ni kutulanga.

9. Ihi itutena kudilonga ni ima yabhiti ni dikaza mu kilunga?

⁹ Tala kifika, kilondekesa kyebhi Jihova kyadikila o ibhindamu yetu muxitu. Sayi dikaza, ala musidivisu yathembu yoso, endesa o dikalu dyâ dya kuka kyá, a ile mutakana jiphange mu kididi mulengela o athu, phala kwa ambata mukyônge. O munumi wajimbulula: “Kyabhu o kyônge, twexana o jiphange ja ahatu phala kuya kubhata mudya kama. Maji mukusuluka twatonginina kwila, kitwexile ni kudya phala kwa abhana.” Ihi yeji bhanga? Phange wasuluka, “Kyoso kitwabhixila kubhata, twasange jisaku jiyadi jezala ni kudya bhu mwelu yetu. Kitwejidile se nanyi wajitulabhu. Jihova wadikila o ibhindamu yetu.” Mukubhita kithangana, o dikalu dyawu dya zanganya. Ene adibhindamene phala o kikalakalu kya kuboka. Maji kexile ni kitadi phala kudiyudika. Kyoso kya dyambata mu kididi kya kuyudika phala kumona se kwejibhinga kikuxi phala kudiyudika, sayi diyala dya mwibhwidisa: “Dikalu didi dya nanyi?” O phange wamutambwijila kwila, dikalu dyê. Kwabhingile kudiyudika. O diyala dyatambwijila: “Sékwe maka. Muhatwami, wamesena dikalu dya difu kiki, dya kolo yiyi. Ngamesena kudisumba. Dyate kikuxi?” Phangi’etu wasumbisa o dikalu kudiyala dyodyo, o kitadi kyatambula kyasokele phala kusumba dikalu dyengi. Mukusukako, phange wambe: “kudisukilu dya kizuwa kyokyo, twasangulukile kyavulu. Twejidile kwila, kiki kikyabhitile mu kingoho. Jihova mwene watukwatekesa.”

10. Jisálamu 37:5 ituswinisa kyebhi phala kitukale ni hele mukonda dya ibhindamu yetu muxitu?

¹⁰ Kyoso kitwivwa o kafunga, anga tudilanga phala kitukale ni hele mukonda dya ibhindamu muxitu, tutena kudyelela kwila,  Jihova wandatubhana yoso itwabhindamena. (Tanga Jisálamu 37:5; 1 Phe. 5:7) Xinganeka mu ibhidi yotumbule  mukaxi 5. Kate mu kithangana kiki, Jihova nange wene mudikila o ibhindamu yetu bhukaxi ka mutwameni wamwiji mba phatala yetu. Se o mutwameni kamutena kudikila o mwiji mbaphe amukatula kusalu, tutena kudyelela kwila, Jihova wandatulanga mu maukexilu engi. Etu tutena kudyelela kwila wandatudikila. Kindala tudilonge ima yatufidisa kafunga ketu ku ibhanga.

11. Kala kilondekesa Matesu 7:1, 2, Jezú watufidisa kubhanga ihi ni mukonda dyahi kiki kitena kubhonza?

¹¹ Tanga Matesu 7:1, 2. Jezú wejidile kwila, o athu akwa ituxi, muveji javulu, ejitala dingi o itondalu ya akwâ. Tala yambe mwene: ‘Kanenu kufundisa.’ Tutena kubhanga nguzu phala kitufundise akwetu, maji, etwenyoso twa akwa ituxi. Se tumona kwila, sayi ithangana twene mufundisa akwetu, ihi itwatokala kubhanga? Twatokala kubelesela o izwelu ya Jezú, ni kubhanga yoso phala kitufundise akwetu.

12-13. Kuxinganeka kyebhi Jihova kyatale Sobha Davidi, kutukwatekesa kyebhi phala kitufundise akwetu?

¹² Tutena kukatula mbote mukuxinganeka mu phangu ya Jihova. Mwene usota kutala o ima yambote ku athu. Tumona o kidifwa kiki kya Nzambi, mu ukexilu wadibhana ni Sobha Davidi, watondalele muveji javulu. Mu kifika, Davidi watele phanda ni Bateseba, kate wajibha mwadi wê. (2 Sam. 11:2-4, 14, 15, 24) Mukonda dya ibhangelu yê, Davidi, o mwiji wê ni ahatwê amukwa, adibhana ni ibhidi yavulu. (2 Sam. 12:10, 11) Mukithangana kya mukwa, Davidi walondekesa kukamba kidyelelu kwa Jihova, mukukondala o masoladi a Izalayele. Jihova kamutuminine kubhanga kiki. Davidi nange wabhange kiki mukonda dya kudizangeleka, kuma o amasoladi mê avudile. Ihi yabhiti? 70.000 akwa Izalayele, afu mukibwika!—2 Sam. 24:1-4, 10-15.

¹³ Se wexile kumwenyu mu Izalayele yokulu, kyebhi kiwejitala Davidi? Weji mufundisa mukuxinganeka kwila, kafwama dingi kutambula o mololoki wa Jihova? Jihova kaxinganeka kiki. Mwene walungu o muxima mu ufiyele walondekesa Davidi tunde ukulu, ni mukudyela kwê. Kyenyiki, Jihova waloloka Davidi mu ituxi yatele. Jihova wejidile kuma, Davidi wamuzolele kyavulu. Wamesenene kubhanga o ima yatokala. Tusakidila kyavulu, mukonda Jihova utala o idifwa ni wendelu wetu wambote.—1 Jis. 9:4; 1 Mal. 29:10, 17.

14. Ihi ikwatekesa o Jikidistá phala kafundise akwâ?

¹⁴ Kuma Jihova kabhingi kuyuka kokwetu, etu we kitwatokala kungila kuyuka kwa akwetu. Maji twatokala kusota kumona o ima yambote. Muveji javulu, kikibhonzo kutala o itondalu ya akwetu ni kwa afundisa. O athu akayela o phangu ya Jihova, adibhana kyambote ni akwa, sumbala akwa ituxi. O ditadi dya dyamande mba kamanga, se kadizelesa luwa, o kuyuka ni valolo yê ki imoneka ku mesu amuthu wosowoso. Maji o muthu wejiya kyambote o valolo yé wandatonginina kwila, se adizelesa, dyandafwama kyavulu, dyandakala we ni valolo yavulu. Kala kibhanga Jihova ni Jezú, etu kitwatokala kutala ngó o athu kukanga. Maji twatokala kusota kumona o idifwa yâ yambote.

15. Kwijiya o ibhidi yene mudibhana nayu o athu, kutukwatekesa kyebhi phala kitwa afundise?

¹⁵ Katuku o kutala o idifwa yambote ya akwetu, ihi dingi itena kutukwatekesa phala kitwa afundise? Sota kuxinganeka kyebhi kyala o myenyu yâ. Tala ngó o phangu  yiyi. Sayi kizuwa mutembulu, Jezú wamono mutudi, ngadyama, watele tumilambongo tuyadi mu ngonga yatembulu. Mwene kadibhwidisa: “Mukonda dyahi o muhatu wate o kakitadi kaka mu ngonga?” Muveji dya kiki, Jezú waxinganeka mu kima kyabhangesa o muhatu kubhana o kitadi kyokyo, sumbala wexile mudibhana ni ibhidi, wamuximana mukonda dya kubhana yoso yatenene.—Luka 21:1-4.

16. Ihi itutena kudilonga mu phangu ya phange Veronica?

¹⁶ O yabhiti ni phange Veronica ilondekesa kuma, kima kyambote kuxinganeka mu ibhidi yene mudibhana nayu akwetu. Mukilunga kyê, mwexile phange yamuhatu wexile musasa mona wadiyala, ubheka. Veronica wambe: “Mukixinganeku kyami, ene kexile mudibhakula ni muxima woso mu ikalakalu ya kilunga. Mukonda dya kiki, kwangibhangesa kwa atala mu ukexilu wayibha. Maji sayi kizuwa, ngaboko kumoxi ni phange yiyi yamuhatu. Mwene wajimbulula kwila, mon’ê kilunji kikyexile kyambote, wexile mudibhana ni ibhidi mukumulanga. Mwene wexile mubhanga yoso yatenene phala kudikila o ibhindamu ya mon’ê, ni kukolesa o ukamba wâ ni Jihova. Sayi ithangana, mukonda dya uhaxi wamona, kwexile mubhinga kuya muyônge mu kilunga kyengi.” Kudisukilu phange Veronica wambe: “Kingejidile o ibhidi yexile mudibhana nayu kumwenyu. Kindala ngibhana valolo, ngixila  kyavulu phange yamuhatu yú, mu yoso yene mubhanga phala kusuluka ni kusidivila Jihova.”

17. Tiyaku 2:8 ituswinisa kubhanga ihi ni kyebhi kitutena kubhanga kiki?

¹⁷ Ihi itwatokala kubhanga, se tutonginina kwila, twafundisa phange? Lembalala kuma, twatokala kuzola o jiphange jetu. (Tanga Tiyaku 2:8.) Twatokala we kusamba kwa Jihova, mukumubhinga kikwatekesu phala kitufundise jinga akwetu. Tukumbidila o ima itwabhingi mumisambu, mukusota kubhita dingi kithangana ni phange twamuxinganeka kyayibha. Kubhanga kiki kyandatukwatekesa kwa ejiya dingi kyambote. Tutena kuboka nawu mba kwa exana phala kudya kama kubhata dyetu. O kwijiya kyambote o jiphange, kwandatukwatekesa kukayela o phangu ya Jihova ni Jezú, twandamona ngo o idifwa yambote ya jiphange jetu. Se tubhanga kiki, twandalondekesa kwila, twamubelesela o kitumu kya kafunga ketu kambote, kyoso kyambe: kanenu kufundisa.

18. Kyebhi kitulondekesa kwila, twamubelesela o kitumu kya Jezú?

¹⁸ Kala kibhita ni jimbudi, o akayedi a Jezú, evwa we o dizwi dyê. Se tubhanga yoso itutena phala kitukale ni hele mukonda dya ibhindamu muxitu, phala we kitufundise akwetu, Jihova ni Jezú andabesowala o nguzu itubhanga. Kikale se twatokala ku “kakilunga kófele” mba ku “jimbudi jamukwá,” twatokala kusuluka ni kwivwa ni kubelesela o dizwi dya kafunga ketu kambote. (Luka 12:32; Nzwá 10:11, 14, 16) Mu milongi yakayela, twandamona ima iyadi yatumina Jezú kumaxibulu mê, phala ku ibhanga.