1. Kitendelesu kyahi kyabhana poxolo Phetele ku Jikidistá jadyanga, ni mukonda dyahi kyedile kala kyejitena kuki kumbidila?

KIKALE se twala ni kidyelelu kya kuya kudyulu mba kya kukala mwene mu ngongo mumu, etwenyoso tutena kukatula mbote mu kitendelesu kyabhana poxolo Phetele ku Jikidistá mu hama ya dyanga. Phetele wasoneka: “Kumaphe o Nzambi wa m’ixana wa zela, enu wenu ki kale mu zela mu wendelu wenu woso. Mukonda kyene kya soneka mu Mikanda Ikôla, wixi: Ki kale mu zela, kuma Eme nga zela.” (1 Phe. 1:15, 16) O izwelu yiyi itulonga kuma, tutena kukayela o phangu ya Jihova, Yó wabetakota mukuzela. Kuma twa akwa ituxi, kila kala kitutena kuzela. Poxolo Phetele watondala we muveji javulu, né kiki, o phangu yê ilondekesa kwila, etu ‘tutena kuzela.’

2. Ibhwidisu yebhi itwandadilonga mu milongi yiyi?

² Mu milongi yiyi, twandadilonga o ibhwidisu: O kuzela ihi? Ihi ilonga o Bibidya yalungu ni kuzela kwa Jihova? Kyebhi kitutena kuzela mu wendelu wetu woso? Ni kyebhi o kuzela kwalungu ni ukamba wetu ni Jihova?

3. Ixinganeku yebhi yala nayu athu avulu yalungu ni kuzela ni kwebhi kukutena kusanga o milongi yakidi yalungu ni kuzela?

³ Athu avulu axinganeka kwila, o muthu wazele mba ukôla, yó wakambe o kusanguluka, wate izwate ya jingeleja, kolela mba katonoka ni akwâ. Maji kiki kikyene kikala o muthu wazele. O Bibidya ijimbulula kwila, Jihova wazela ‘Nzambi ya sanguluka.’ (1 Tim. 1:11) Oso amubheza a exana athu “azediwa.” (Jisá. 144:15) Jezú kaxikina o ukexilu wa athu exile muta izwatu yaditungula phala kulondekesa o kuyuka kwâ bhupholo dya athu. (Mat. 6:1; Mál. 12:38) O Jikidistá jakidi ejiya kyambote se ihi ilombolola o kuzela kwa kidi mukonda kyene kyamba o Bibidya yalungu ni Jihova. Etu twejiya kuma Nzambi watuzolo, ni kwila mwene nuka wejitubhinga kubhanga kima kitutena kukibhanga. Kyenyiki, kyoso Jihova kyatutangela kwila: “ki  kale mu zela,” etu kitwala ni phata ya kwila etu tutena kukibhanga. Mukidi, ande dya kulondekesa o wendelu wetu wazele, twatokala, kyadyanga, kutendela se o kuzela kulombolola ihi.

4. O izwelu “ukôla” ni “kuzela” ilombolola ihi?

⁴ O kuzela ihi? Mu Bibidya o izwelu “ukôla” ni “kuzela” ilombolola o kukala ni wendelu wambote kumwenyu, kuzela munzumbi ni kudikexidila. O izwelu yiyi itena kulombolola we kuditula bhumbandu phala kusidivila ngó Nzambi. Mu izwelu yengi, twandakala tu athu azele se tukala ni wendelu wambote kumwenyu wetu, tubheza Jihova m’ukexilu watokala, anga tukala ni ukamba wambote ni mwene. O kuxinganeka kwila tutena kukala ni ukamba ni Nzambi wazela, kitubhangesa kudiwana, kotelele kyoso kituxinganeka ilonga o Bibidya yalungu ni kuzela kwa Jihova.

5. Ihi itutena kudilonga yalungu ni Jihova mukwivwa o izwelu ya jianju jafiyele?

⁵ Jihova ukôla, mwene wazele mu maukexilu moso. Twejiya o kidi kiki mukonda dya izwelu ya jiselafi. O jiselafi, kifwa, jianju jikalakala kumbandu ya kyandu kya Jihova. Ene ambe: “Ukôla, Ukôla, Jihova dya Ilômbo Yeta!” (Iza. 6:3) O jianju jiji jatena ngó kukala ni ukamba wambote ni Nzambi yâ, wazela, mukonda ene we azele. Kiki kyene kyabhangesa kwila, o ididi yatudila o jinjimbu kwala o jianju jiji, mu ixi, yakitukile ididi ikôla, yazele. Kiki kyene kyabhiti kyoso Mozé kyatale o kisasa kya kwata o tubhya maji kikyexile mujikata.—Mak. 3:2-5; Josu. 5:15.

6-7. (a) Kala kilondekesa Makatukilu 15:1, 11, kyebhi Mozé kya jimbulula kyambote o kuzela kwa Nzambi? (b) Ihi yexile mulembalesa akwa Izalayele kwila, Jihova Nzambi yazele? (Tala ofoto yakapa.)

⁶ Kyoso Mozé kya zawuka o Kalunga Kakusuka kumoxi ni Izalayele, mwene wajimbulula kyambote kwila, Jihova Nzambi yazele. (Tanga Makatukilu 15:1, 11.) O abhezi a jinzambi ja Ijitu kexile ni wendelu wambote, wazele. O akwa Kanana, kexile we ni wendelu wazele, exile mubheza we jinzambi jamakutu. O ubhezelu wawu walungile ni kubhana o twana twâ kala jisata, ni kubhanga uhabu. (Iji. 18:3, 4, 21-24; Mate. 18:9, 10) Maji Jihova kadifu ni jinzambi jojo jamakutu. Mwene nuka weji bhinga ku abhezyê, phala kubhanga kima kyayibha. Mwene wazele, watenena mu maukexilu moso. Phala kulembalesa o kuzela kwa Nzambi kwa akwa Izalayele, o mukunji wadikota wexile muta kitandu mwexile o isoneku: “Kuzela Kukôla Kwa Jihova.”—Mak. 28:36-38.

⁷ O izwelu yiyi yexile mulembalesa o athu oso akimona kuma, Jihova wazela. Maji o mukwa Izalayele, nange kejimona o izwelu se ukamba kudisanga pholo ni pholo ni mukunji wadikota. O kwila kwexile ndunge yengi phala kwijiya o njimbu yiyi yakatunda? Xé, kwexile mwene! Akwa Izalayele exile mu kwivwa o njimbu yiyi, kyoso kyakexile mutanga o Kitumu bhupholo dya mayala oso, ahatu oso ni twana twoso! (Mate. 31:9-12) Se wakexilebhu weji kwivwa o izwelu yiyi: “Eme ngi Jihova Nzambi, yenu; . . . mu di zelesa, mbata Eme nga zela.” “Ngi kexidilenu mu athu’ami azele, mukonda Eme, Ngi Jihova, nga zela.”—Iji. 11:44, 45; 20:7, 26.

8. Mukonda dyahi kyandatuwabhela kyavulu kudilonga o divulu dya Ijila 19:2 ni mukanda wa 1 Phetele 1:14-16?

⁸ Kindala tutale o izwelu yosoneke mu divulu dya Ijila 19:2, yexile mutanga bhupholo dya Izalayele yoso. Jihova watangela Mozé: “Ambela o kyonge kyoso kya anʹa Izalayele, watangela kiki: Kibhinga muzela, mukonda Eme, ngi Jihova Nzambi yenu, ngazela.” Phetele watumbula o izwelu yiyi nange kyoso  kya swinisa o Jikidistá phala ‘kuzela.’ (Tanga 1 Phetele 1:14-16.) Etu kitwamukayela dingi o Kijila kya Mozé. Né kiki, o yasoneka Phetele, ituxikinisa kwila, tutena kudilonga kima mu divulu dya Ijila 19:2, tutena kudilonga kuma, Jihova Nzambi yazele. Oso amubheza atokala kubhanga nguzu phala kuzela we. Twatokala mwene kubhanga kiki, kikale se kidyelelu kyetu kudyulu mba mu ixi.—1 Phe. 1:4; 2 Phe. 3:13.

9. Mbote yahi itwandakatula mukudilonga mu divulu dya Ijila kibatulu 19?

⁹ Kuma twamesena kusangulukisa o muxima wa Nzambi yetu, wazele, tubhanga yoso phala kwijiya kyebhi kitutena kukala tu athu azele. Jihova utukwatekesa kubhanga kiki. Tutena kusanga jindunge jambote mudivulu dya Ijila kibatulu 19. O mukwa kutokwesa Marcus Kalisch wasoneka: “Kiki nange kyene o kibatulu kyabeta dingi kota mu divulu dya Ijila, mba mu madivulu atanu adyanga, (kifwa, Dimatekenu ndu Matendelelu). Tutale jivelusu mu kibatulu kiki, mwala madisá alungu ni maka akizuwa ni kizuwa. Kyoso kituya ni kubhanga kiki, lembalala o izwelu itwamudilonga tunde kudimatekenu, “ki kale mu zela.”

10-11. O divulu dya Ijila 19:3, itutangela phala kubhanga ihi, ni mukonda dyahi kima kyambote kubelesela o kitendelesu kiki?

¹⁰ Kyazubha kuzwela o maka enya akwa Izalayele atokala kuzela, Jihova wabandekesaku dingi: “Muthu ni muthu axile manyi’â, axile phayi’yâ, . . . Eme-mwene Jihova Nzambi yenu nga ki ambe.”—Iji. 19:2, 3.

¹¹ Kima kyambote kubelesela o kitendelesu kya Nzambi, kya kuxila o jitata jetu. Sayi diyala webhwidisa kwa Jezú: “Eme ngi bhanga mbote yahi, phala ngi mone o mwenyu, ki wabhwa?” Mukumutambwijila, Jezú wambe kwila, o diyala dyodyo, dyatokalele kuxila tat’ê ni manyâ. (Mat. 19:16-19) Jezú wabazela o jifalizewu ni alongexi akitumu mukonda ene kexile muxila o jitata jâ. Mukonda dya kukamba kuxila o kitumu kiki, Jezú wa atangela: “O maka ma Nzambi mwa ma tumbulula mba mwa ditunu nawu.” (Mat. 15:3-6) “O maka ma Nzambi” alungu we ni kitumu kya katanu, Kudikwinyi dya Itumu, kala kitwatange mu divulu dya Ijila 19:3. (Mak. 20:12) Lwamukwa dingi, lembalala  kwila, o kitendelesu kitusanga mudivulu dya Ijila 19:3, kyalungu ni kuxila mama ni tata, kya kayela o kitumu kyamba: “Kibhinga muzela, mukonda Eme, ngi Jihova Nzambi yenu, ngazela.”

12. Kala kyalondekesa o kitendelesu mu divulu dya Ijila 19:3, kibhwidisu kyebhi kitwatokala kudibhanga etwene?

¹² Kyoso kituxinganeka mukitumu kya Jihova kya kuxila o jitata jetu, nange tutena kudibhwidisa: ‘Kyebhi ki ngamuditunda mu maka yá?’ Se utonginina kwila m’ukulu kiwexile mukwatekesa o jitata jê m’ukexilu watokala, utena kusola kubhanga dingi tunde lelu. Eye ki utena kulungulula o ima yabhiti kyá. Maji kindala utena kubhanga yoso i utena phala kubhita dingi kithangana ni jitata jê ni ku akwatekesa we dingi. Mba nange sayi ima yamukwa i utena kubhanga, kala: O kwa akwatekesa kusumba o ima yabhindamena, kuzukama dingi kwa Jihova ni kusuluka ni kumusidivila. Utena we ku aswinisa ni ku aximbakatesa. Se ubhanga kiki wamubelesela o kitendelesu kya Ijila 19:3.

13. (a) Kitendelesu kyebhi dingi kitusanga mu divulu dya Ijila 19:3? (b) Kyebhi kitutena kukayela o phangu ya Jezú kala kyosoneke mu divulu dya Luka 4:16-18?

¹³ O divulu dya Ijila 19:3 ditulonga dingi kima kyengi kyalungu ni kuzela. O velusu izwela yalungu ni kubhaka jinga o kizuwa kya Sabhalu. O Jikidistá kamukayela o Kijila kya Mozé, kabhingi kubhaka o Sabhalu ya kizuwa kimoxi. Né kiki tutena kudilonga kima, mukumona kyebhi akwa Izalayele kyexile mubhaka o kizuwa kya Sabhalu ni mbote yakatula mu kubhanga kyenyiki. O kizuwa kya Sabhalu kyexile kithangana kya kunyoha ku ikalakalu yawu, phala kubheza Nzambi. * Kiki kyene kyabhangesa Jezú kuya mu malombe mu mbanza yê, mu jisabhalu, phala kutanga o Mak’â Nzambi. (Mak. 31:12-15; tanga Luka 4:16-18.) O kitendelesu kya Nzambi kyosoneke mu Ijila 19:3 kyamba: ‘aluka o izuwa [yê] ya jisabhalu,’ kyatokala kutubhangesa kubhaka ithangana, izuwa ku mwenyu wetu phala kubheza Jihova Nzambi. Yalungu ni maka yá, o kwila wabhingi kulungulula kima? Se wenda ni kuxisa kithangana phala kulunga o muxima mu ima yanzumbi, wanda kala ni ukamba wambote ni Jihova. O kiki, kyanda kukwatekesa kukala umuthu wazele.

14. Milongi yebhi yojimbulule kyavulu mu divulu dya Ijila kibatulu 19?

¹⁴ Mu divulu dya Ijila kibatulu 19 abhitululamu milongi itukwatekesa kukala jinga tu athu azele. O velusu 4 isuka ni izwelu: “Eme-mwene ngi Jihova, Nzambi yenu.” O izwelu yiyi ni izwelu yamukwa yadifu, yamoneka 16 ajiveji mu kibatululu kiki. Kiki kitulembalesa o kitumu kya dyanga: “Eme Jihova, Nzambi yé . . .Kana kukala ni nzambi jengi bhu pholo yami.” (Mak. 20:2, 3) O Jikidistá joso jamesena kuzela, atokala kubhanga yoso phala kikukale kima mba muthu, ubetakota, o ukamba we ni Jihova ukala ndenge. Kuma tu Jimbangi ja Jihova tulenga yoso itena kubhekela lusebhu kudijina dyê, dikôla, dyazele.—Iji. 19:12; Iza. 57:15.

15. O jivelusu jitanga o ijila yalungu ni kubhana jisata mu divulu dya Ijila kibatulu 19 jatokala kutuswinisa kubhanga ihi?

¹⁵ Akwa Izalayele alondekesa kwila axikina Jihova kala Nzambi yâ, mukubelesela o ijila yê. Ijila 18:4 yamba: “Enu mwenda ni kubhanga yoso yala mu mabatwilu mami, o jingonge jami jene jimulunda ku mixima yenu, muye jinge; ni kwendela mu jingonge jami; mbata  eme ngi Jihova Nzambi yenu.” Mu kibatulu 19 mwala we “jingonge,” phala akwa Izalayele. Mukifika, o jivelusu 5-8, 21, 22 jijimbulula maka alungu ni kubhakula ibhaku kala jisata. O jisata jiji atokalalele kujibhana mu ukexilu ulondekesa kuxila o ima ‘yozelese kwala Jihova.’ Kutanga o jivelusu jiji kwatokala kutubhangesa kumesena kusangulukisa o muxima wa Jihova, ni kumubhana jisata jatokala, phala kumuximana, kala kitutendelesa Jihebelewu 13:15.

16. Ihi itulembalesa kwila, o jiselevende ja Jihova kadifu ni yó ka mumusidivila?

¹⁶ Phala kuzela, twatokala kubhanga nguzu phala kitudifwe ni yó kamubheza Jihova. Kubhanga kiki, kitena kubhonza. Sayi ithangana jikoleka kuxikola, akwa kubhanga wenji, jindandu kamusidivila Jihova, ni athu amukwa, asota kutufunyisa kudibhakula mu ikalakalu itena kuthanganyesa o ubhezelu wetu kwa Jihova. Se ene akibhanga, etu twala ni kikalakalu kyadikota kya kusola kima. Ihi itena kutukwatekesa kusola o kima kyatokala? Tala o kitendelesu kitusanga mu divulu dya Ijila 19:19, mumbandu yamba: “Kana we kuzwata izwatu ya thanga ya kuvudisa idifwa.” O kijila kiki, kyabhangesa akwa Izalayele kuditungula, phala kadifwe ni akwa jixi jengi, a akondolokele. Lelu, etu tutena kuta izwatu, né mwene a ibhange ni milele yavulu ki idifu. Maji kituxikina kukayela o phangu ya athu, abhanga o ima yofidise mu Bibidya, né mwene akwa kutokwesa, akwa wenji mba jindandu jetu mwene. Mukidi, etu twazolo o jindandu jetu, tulondekesa we henda kujivizinyu jetu. Maji, o ima itusola kumwenyu, ilondekesa kuma, tubelesela Jihova, né se kubhinga kubhanga kima kitubhangesa kudifwa kyengi mba kuditungula bhukaxi ka athu atukondoloka. Kima kyambote kubhanga kiki, mukonda phala kuzela, Nzambi watokala kututula bhu mbandu phala kumusidivila.—2 Kol. 6:14-16; 1 Phe. 4:3, 4.

17-18. Madisá ebhi akatunda ututena kudilonga mu divulu dya Ijila 19:23-25?

¹⁷ O izwelu “Eme-mwene Jihova Nzambi yenu” yakwatekesa akwa Izalayele kuta kupholo o ubhezelu ni ukamba wâ ni Jihova. Kyebhi? Ijila 19:23-25 itukwatekesa kutendela ukexilu umoxi wakubhanga kiki. (Tanga.) Xinganeka ngó kyebhi akwa izalayele kyexile mutala o izwelu yiyi kyoso kya bokona mu Ixi ya Akanene. Se diyala wakunine muxi, watokalele kukingila mivu itanu phala kudya o ibundu yé. Mu muvu wa kawana, watokalele kubhana o ibundu yiyi mu balaka ya Nzambi. Mwene watokalele kudya ngó o ibundu mu muvu wakatanu. O kijila kiki, kyexile mukwatekesa  akwa Izalayele kutendela kwila, o ima yamesenene kiyatokalele kukala kupholo. Jihova wamesenene kwila, ene adyelela Mukilangidilu kyeji kwa abhana, ni kuta kupholo o ubhezelu, ku mwenyu wâ. Mwene wejikwabhana o kudya kwasoko phala kudidikila. Nzambi wa aswinisa kubhana ni henda, ima phala o Balaka yê, o kididi mwexile kumubheza.

¹⁸ O kijila kyosoneke mu divulu dya Ijila 19:23-25 kitulembalesa o izwelu ya Jezú, mu Diskulusu dya bhangele Kumulundu. Mwene wambe: “Kana kuvula hele . . . [se] mu dya-hi, mba mu nwa-hi.” Jezú wasuluka: “Tata yenu ya dyulu wa kijiyé kuma im’iyi mwa ibhindamena.” Nzambi wandatudikila kala kyabhanga ni jinjila. (Mat. 6:25, 26, 32) Etu twadyelela kwila, Jihova Wandatulangidila. Tusota we ‘kubhanga o mbote’ phala kukwatekesa abhindama. Tusangela we kitadi mukilunga kyetu ni kusanguluka kwoso. Jihova utala o mbote itubhanga, mwene wandafuta yoso itubhanga. (Mat. 6:2-4) O kubhana ni muxima woso kwandalondekesa kwila, twatendela mwene o madisá utwadilongo mu divulu dya Ijila 19:23-25.

19. Mbote yahi iwakatula mukudilonga o jivelusu mu kibatulu 19 dya divulu dya Ijila?

¹⁹ Twadilongo bhofele o kibatulu 19 dya divulu dya Ijila. Dyatukwatekesa kumona kyebhi kitutena kukayela o phangu ya Nzambi yetu, wazela. Mu kukayela o phangu ya Jihova, twene mubhanga yoso phala ‘kuzela mu wendelu wetu woso.’ (1 Phe. 1:15) Avulu kamusidivila Jihova, ene mumona ni mesu mâ o wendelu wetu wambote. Mukidi, kiki kya abhangesa kuximana Jihova. (1 Phe. 2:12) Maji tutena kudilonga dingi ima yengi mu divulu dya Ijila kibatulu 19. O milongi yakayela, yandajimbulula jivelusu jamukwa mu kibatululu kiki, yandatukwatekesa kumona kyebhi ‘ki tutena kuzela’ mu maukexilu engi, mukizuwa ni kizuwa, kala kyatendelesa Phetele.