XINGANEKA o ima ia bhiti. Kuexile kiá kaxi ka usuku. Akunji aiiadi, Phaulu ni Sila, akexile mu kaleia mu mbanza ia Filipe. O kaleia ka vundile kiavulu. Ene ka tenene kuenda, mukonda a a kutile o inama, exile ni jifidila javulu ku mukutu, mukonda dia kibetu. (Ikalakalu 16:​23, 24) Mu kizuua kieniókio mu kamene, kifuxi kia dikota kia kuata Phaulu ni Sila, a a koka katé ku kitanda. Ene a mateka ku a zukutisa, a tandujula o izuatu iâ, anga a a beta ni jixikote. (Ikalakalu 16:​16-22) A a zukutisa kiavulu, sumbala kexile ni kikuma! Phaulu uexile mukua Loma, mukonda dia kiki, a tokalele ku mu fundisa mu ukexilu ua tokala. *​​—⁠Tala ku luiji.

1, 2. Ihi ia bhiti ni Phaulu ni Sila mu mbanza ia Filipe? (Tala o foto ia dianga.)

² Kioso kiexile mu kaleia, nange Phaulu ua xinganeka mu ima ia bhitile mu kizuua kienhókio, ni ku athu akuâ Filipe. Ene kexile ni malombe a kubhezela Nzambi, kala o jimbanza ja mukuá, mua bhitile poxolo Phaulu.  Mukonda dia kiki, o Jijudé akexile mu bheza Nzambi, bhu kanga dia mbanza bhu mbandu a ngiji. (Ikalakalu 16:​13, 14) M’ukulu, phala o Jijudé kutunga dilombe mu mbanza iéngi, mua tokalele kukala dikuinhi dia Jijudé. O kuila mu mbanza ia Filipe, ki muexile dikuinhi dia Jijudé? Akuâ Filipe exile mu dizangeleka kiavulu, mukonda dia ku tokala ku ixi ia Loma. (Ikalakalu 16:21) Nange kiki, kiene kia a bhangesa kubanza kuila, Phaulu ni Sila kexile akuâ Loma, mukonda ene exile Jijudé. Etu ki tuejiia kiambote, se mukonda diahi akuâ Filipe a banzele kuila, Phaulu ni Sila kexile akuâ Loma, maji tuejiia ni kidi kioso kuila, a a tele mu kaleia sé kikuma.

3. Mukonda diahi nange Phaulu ua kexile ni phata, ia lungu ni kima kia mu bhekela ku Filipe? Né muene ni ibhidi iavulu, kiebhi kiexile mu divua Phaulu?

³ Nange Phaulu ua kexile mu banza, se mukonda diahi uaile mu mbanza ia Filipe. Sai kizuua Phaulu ua kexile kusámbua dia Kalunga ka Egeu, ku Ásia Menor. Maji o nzumbi ikola ia Nzambi ia mu kidikile kuboka-mu. Kiedile kala o nzumbi ikola ia kexile ku mu lundumuna phala kuia ku kididi kiéngi. (Ikalakalu 16:​6, 7) Maji kuebhi kua tokalele kuia Phaulu? Kioso kia kexile mu mbanza ia Tolouade, Phaulu uevu mu kisuma dízui dia mu tangela, dixi: “Zauka kunu ku Masedonha.” Jihova ua mu londekesa kiambote o vondadi iê! Phaulu uai ni lusolo luoso ku Masedonha. (Tanga Ikalakalu 16:​8-10.) Maji ihi ia bhiti dingi? Kioso kia bhixila mu mbanza ia Masedonha a mu takula mu kaleia! Mukonda diahi Jihova uehela Phaulu kubhita mu maka iá? Thembu kuxi ieji bhanga muene mu kaleia? Né muene se Phaulu uexile mu dibhuidisa kiki, tuejiia kuila, muene uexile ni kixikanu kia kolo, iú ua kolokota ni kisangusangu. Phaulu ni Sila, a mateka “kusamba ni kuimbila [kua] Nzambi.” (Ikalakalu 16:25) Mukonda dia kiki, o kutululuka kua Nzambi kua tululukisa o mixima iâ.

⁴ O kuila sai kizuua, ua divuile kiá kala Phaulu? Nange eie ua sambele kiá kua Nzambi mu ku mu bhinga unjimu phala kubatula maka oso-oso, anga ua mono kuila, o nzumbi ikola ia Nzambi ia ku kuatekesa. Maji nange mu kubhita thembu eie ua dibhana ni ibhidi iavulu, mba nange kua bhingile kulungulula o ima ku muenhu ué. (Ndongixi 9:11) Kioso ki u banza mu ima ia bhiti, nange u dibhuidisa se mukonda diahi Jihova ua ku ehela kubhita mu ibhidi ienioio. Ihi ia-nda ku kuatekesa kusuluka mu ku dielela kua Jihova ni muxima uoso? Tu tena kusanga o kitambuijilu mu kudilonga o ima ia ka mukuá ia bhitile ni Phaulu ni Sila.

4, 5. (a) Mu ukexilu uebhi o muenhu uetu u tena ku difuangana ni ua Phaulu? (b) Kiebhi o muenhu ua Phaulu ua lunguluka ni lusolo?

⁵ Kioso Phaulu ni Sila kia kexile mu kuimba, kua bhiti izulukutu iavulu. Kia dianga, o kaleia ka tunguta, anga o mabhitu moso ma jikuka. Mu kusuluka, o akexile mu kaleia a jituka bhu jingoji, mba malubhambu. Mu kusuka-ku, Phaulu ua fidisa o disoladi dia kexile mu langa o kaleia ku di jibha. O disoladi ni muiji uê a xikina o Mak’â Nzambi, anga a a batizala.  Mu kamene, o ji kabhitangu ja masoladi a tumikisa maiala, phala kukatula Phaulu ni Sila mu kaleia ni ku a xinjikila n’a xise o mbanza. Kioso o masoladi kiévu kuila, Phaulu ni Sila exile akua Loma, a mono kuila, a luezele mu ku a ta mu kaleia, mukonda dia kiki, a a xinjikila n’a tunde ku mbanza. Maji ande dia ku xisa o mbanza, Phaulu ni Sila, ai mu lekela phange ia muhatu a mu xanene Lidia, a mu batizalele kindala. Ene a soto ue kusuinisa o jiphange akuâ Filipe. (Ikalakalu 16:​26-40) O ima ia lunguluka ni lusolo!

6. Ihi i tua-nda dilonga?

⁶ Ihi i tu tena kudilonga ni ima ia bhiti ni Phaulu? Kioso ki tu bhita ni izukutisu, ki tu bhingi kukala ni uôma, mukonda Jihova u tena kubatula o maka mu ukexilu ki tu u fikile. Tuejiia kuila, o maka enhá, a suinisa Phaulu, mukonda dia ima ia soneka mu mukanda ua tumikisa ku jiphange mu mbanza ia Filipe. Muene ua zuela ia lungu ni hele ni kutululuka kua Nzambi. Mu milongi íii, tua-nda dilonga o izuelu ia Phaulu mu divulu dia Filipe 4:​6, 7. (Tanga.) Mu kiki, tua-nda mona ue misoso ia mukuá i tu londekesa kiebhi Jihova kia bhange ima athu ka i fikile. Mu kusuka-ku, tua-nda mona kiebhi o kutululuka kua Nzambi ku tu kuatekesa kukolokota mu ibhidi, ni ku mu dielela.

7. Disá diebhi dia longo Phaulu kioso kia sonekena o jiphange mu mbanza ia Filipe? Ihi i tu tena kudilonga ku disá didi?

⁷ Ihi ia banze o jiphange mu mbanza ia Filipe, kioso kia tange o mukanda ua a sonekena poxolo Phaulu? Avulu mudiâ nange a banze mu ima ia bhitile na-iu Phaulu ni Sila, ni kiebhi Jihova kia a bhulula mu ukexilu ka u fikile. Disá diebhi dia mesenene ku a longa Phaulu? Dienhidi: ‘Kana kuthandanganha ni kima. Samba ni nguzu ioso, phala kutambula “o kutululuka kua Nzambi, kua somboka o kitongoluelu kioso kia muthu.” Ihi ilombolola o izuelu íii? Sai Jibibidia jamba: “O kutululuka kua Nzambi, ku somboka o jinzoji jetu joso,” mba “o ixinganeku ioso ia muthu.” Mu kiki, Phaulu ua mesenene ku a tangela kuila, “o kutululuka kua Nzambi” ku tu kuatekesa mu ukexilu ua katunda. Sumbala sai bhabha, ki tuejiia kiebhi ki tua-nda batula o maka, maji Jihova uejiia. Muene u tena ku u batula mu ukexilu ki tua u fikile.​—⁠Tanga 2 Phetele 2:⁠9.

8, 9. (a) Sumbala Phaulu ua bhiti mu izukutisu mu mbanza ia Filipe, maji kima kiahi kiambote kia bhiti? (b) Mukonda diahi o jiphange mu mbanza ia Filipe a dielele mu izuelu ia Phaulu?

⁸ O mukanda ua Phaulu ua suinisa o jiphange mu mbanza ia Filipe, kioso ene kiexile mu banza mu ima ia bhangele Jihova mu kuinhi dia mivu ia bhitile. Sumbala Jihova uehela Phaulu ni Sila kubhita mu izukutisu ienióio, íii ia kuatekesa “kuzokela o Njimbu Iambote.” (Filipe 1:⁠7) O atuameni a mbanza ia Filipe ka sulukile dingi mu kuzukutisa o Jikidistá mu kilunga. Nange mukonda dia Phaulu kutanga kuila,  uexile ­mukua Loma, kua bhangesa o dixibulu Luka kukala mu mbanza ia Filipe, kioso Phaulu ni Sila a tunda-mu. Mu kiki, Luka ua sulukile mu kuatekesa o jiphange mu mbanza ienióio.

⁹ Kioso o jiphange mu mbanza ia Filipe kia tange o mukanda ua Phaulu, ene ejidile kuila, o izuelu ia Phaulu ki i tundile mu ixinganeku iê-muene. Phaulu ua bhiti mu izukutisu ienióio. Kioso kia sonekene o jiphange akuá Filipe, a mu kuikile m’onzo iê. Maji muene ua kolokotele mu kulondekesa kuila, ua kexile ni “kutululuka kua Nzambi.”​​—⁠ Filipe 1:​12-14; 4:​7, 11, 22.

10, 11. Ihi i tu tena kubhanga kioso ki tu thandanganha ni kima? Ihi i tu tena kukingila?

¹⁰ Ihi i tena ku tu kuatekesa kukamba kukala “ni hele ia kima?” Ihi i tu kuatekesa kukala ni “kutululuka kua Nzambi?” O izuelu ia Phaulu ku akuâ Filipe, ilondekesa kuila, se tu thandanganha ni maka oso-oso, tua tokala kusamba. Mu kiki, kioso ki tu kala ni hele ia kima, tua tokala kujikula o muxima uetu kua Nzambi bhu kaxi ka musambu ni kueha o maka bhu maku mê. (Tanga 1 Phetele 5:​6, 7.) Mu kusamba kua Jihova, dielela ni muxima uoso kuila, muene ua-nda ku langa. Sakidila Nzambi mu mabesá oso u tambula. Lembalala kuila, Jihova u tena ‘kubhanga ioso i tu mu bhinga, ni ioso i tu tena o kubanza, n’a te-ku dingi kia tundu kiavulu.’​—⁠Efezo 3:⁠20.

¹¹ Kála Phaulu ni Sila, nange tua-nda diuana mu kumona o kima kia-nda bhanga Jihova phala ku tu kuatekesa. Sai bhabha, ki kima kia-nda tu diuanesa, maji ua-nda bhana o ditundilu di tua bhindamena. (1 Kolindo 10:13) Maji ki kilombolola kuila, tua tokala kuxikama ngó, ni kukinga Jihova kubatula o mak’etu, kana. Tua tokala kubhanga o ima i tua bhingi mu musambu. (Loma 12:11) O ibhangelu ietu ilondekesa kuila, tua bhindamena muene o ima i tua bhingi, i bhangesa ue Jihova ku tu besoala. Ki tu tokala kujimba kuila, Jihova u tena kubhanga ioso i tu tena o kubhinga, mba ioso i tu banza. Sai bhabha, muene u tu bhangesa kudiuana, mu kubhanga o ima mu ukexilu ki tu u fikile. Mu kiki, tua-nda dilonga phangu ia-nda suinisa o kidielelu kietu, ku uhete ua Jihova, ua kubhanga o ima mu ukexilu ki tu u fika.

12. (a) Ihi ia bhange Sobha Ezekiia kioso Senakedibe kiexile mu mu kuatesa uôma? (b) Ihi i tu dilonga mu ukexilu ua Jihova kubhulula o mundu uê?

¹² Mu Bibidia tu sanga-mu phangu i tu londekesa kuila, Jihova ua bhange ima ka i fikile ku athu. Mu kifika, kioso Ezekiia kiexile sobha ia Judá, Senakedibe, sobha ia Asídia, ua bokona mu ixi ia Judá, mu kiki ua tolola mbanza javulu, ia subhukile ngó o mbanza ia Jeluzaleme. (2 Jisobha 18:​1-3, 13) Mu kubhita kithangana, ua mesenene kubuikisa ue o mbanza ia Jeluzaleme. Ihi ia bhange o Sobha Ezekiia? Kia dianga, muene ua sambe kua Jihova, mu ku mu bhinga kikuatekesu, anga ua bhingi o itendelesu ia Jihova bhu kaxi ka polofeta Izaia. (2 Jisobha 19:​5, 15-20) Mu kusuluka, muene ua londekesa unjimu mu kufuta o lubhaku lua bhingi Senakedibe. (2 Jisobha 18:​14, 15) Mu kusuka-ku, Ezekiia ua sokejeka o mbanza, mukonda eji i kondoloka. (2 Malunda 32:​2-4) Ihi ia bhiti? Jihova ua tumikisa anju ia jibha 185.000 a masoladi a Senakedibe, m’usuku umoxi ngó. Ezekiia ka banzele kuila, Jihova ueji ku a bhulula mu ukexilu iú!​—⁠2 Jisobha 19:⁠35.

13. (a) Ihi i tu tena kudilonga ni ima ia bhiti ku muenhu ua Zuze? (b) Kima kiebhi Sala ka i fikile?

 ¹³ Tala ihi ia bhiti ni munzangala a mu ixana Zuze. Kioso kiexile mu kaleia mu ixi ia Ijitu, Zuze ka fikile kuila, muene ueji kala o muthu ua kaiadi mu ixi ienióio. Muene ka fikile ue kuila, Jihova ueji mu bhana o kutena kua kubhulula o akua Izalaiele ku nzala ieji bhita. (Dimatekenu 40:15; 41:​39-43; 50:20) Sé phata, o ima ia bhange Jihova, Zuze kexile mu i fika! Xinganeka ue, o kukululu ua Zuze a mu ixanene Sala. O kuila mu kitala kiê, Sala ua fikile kuila, Jihova ueji ku mu bhana mona mu lembe diê muene? Sala ka fikile kuila, ueji vuala Izake mu kitala kieniókio.​—⁠Dimatekenu 21:​1-3, 6, 7.

14. Ihi i tu tena kudielela?

¹⁴ Ki tu kingila kuila, Jihova u batula o maka oso u tua mu bhita na-u mu madiuanu. Ki tu kingila ue kuila, Jihova u bhanga ima ia madiuanu ku muenhu uetu.  Maji tuejiia ni kidi kioso kuila, Jihova ua kuatekesa o jiselevende jê m’ukulu mu ukexilu ka u fikile. Muene ka lunguluka. (Tanga Izaia 43:​10-13.) O kutanga o misoso íii i tu bhangesa kudielela kua Jihova. Tu tena kuijiia kuila, muene ua-nda tu bhana o kutena ku tua bhindamena phala kubhanga o vondadi iê. (2 Kolindo 4:​7-9) Ihi i tu tena kudilonga ku phangu ia Ezekiia, Zuze, ni Sala? Se tu kolokota mu ufiiele uetu kua Jihova, muene ua-nda tu kuatekesa katé muene mu ibhidi ia makota.

¹⁵Kiebhi ki tu tena kukala ni “kutululuka kua Nzambi,” katé muene kioso ki tu bhita ni maka? Tua tokala kukolokota kusuinisa o ukamba uetu ni Jihova. Tu tena kukala ni ukamba iú, mukonda dia sata ia kukula ia Jezú Kristu. O sata ia kukula, ujitu ua dikota ua tu bhana Jihova. Mukonda dia ujitu iú, muene u tena ku tu loloka o ituxi ietu, tu tena kukala ni kitongoluelu kia zele, ni ku mu zukama dingi.​—⁠Nzuá 14:6; Tiiaku 4:8; 1 Phetele 3:⁠21.

16. Ihi ia-nda bhita n’etu se tu tambula o “kutululuka kua Nzambi?” Jimbulula.

¹⁶ Ihi ia-nda bhita n’etu se tu tambula o “kutululuka kua Nzambi kua somboka o kitongoluelu kioso?” O Bibidia izuela kuila, kua-nda ku tu “bateka” mixima ietu ni ilunji. (Filipe 4:⁠7) O kizuelu ku “bateka,” kia tokalele dingi ku masoladi. Kia lungile ni kibuka kia masoladi kia kexile ni kikalakalu kia kulanga o mbanza. O athu a tungile mu mbanza ia Filipe akexile mu a langa ku kibuka kieniókio kia masoladi. Ene akexile mu zeka ni kutululuka, mukonda ejidile kuila, kuexile athu akexile mu langa kiambote o mbanza. Kiene kimoxi ue, kioso ki tu kala ni “kutululuka kua Nzambi” ki tu thandanganha ni kima. Tu kala ni kutululuka kua muxima. Tuejiia kuila, Jihova u tu langa mukonda ua mesena kuila tu sanguluka ku muenhu. (1 Phetele 5:10) Kuijiia o maka enhá, ku tu kuatekesa kukamba kuluuala, mukonda dia kuvula o hele.

17. Ihi ia-nda tu kuatekesa kudielela kua Jihova mu kithangana kia hadi ia dikota?

¹⁷ Kua kambe ngó bhofele, o hadi ia dikota ia-nda mateka. (Matesu 24:​21, 22) Ki tuejiia kiambote ihi ia-nda bhita n’etu mu kithangana kieniókio. Maji ki tu bhingi kuthandanganha kiavulu ni hadi ia dikota. Sumbala ki tuejiia o ima ioso ia-nda bhanga Jihova, maji tuejiia o Nzambi ietu. Tuejiia o ima bhangele m’ukulu phala kukuatekesa o jiselevende jê. Tua mono kuma, sé-ku kima ki tena kufidisa Jihova ku kumbidila o ikanenu iê. Nange muene u bhanga kiki, mu ukexilu ki tu u fikile! Mu kiki, kioso Jihova kia tu bhangela kima, tu mona ukexilu uéngi ua “kutululuka kua Nzambi kua somboka o kitongoluelu kioso.”